Itre Jeune Fe—Nemene La Hnei Epuni Hna Troa Iën?

1. Nemene la ewekë ka traqa koi Ioasa, Uzia me Iosea?

PANE mekune jë laka, kola acili eö troa musinëne la nöje i Akötresie, nge nekönatre palakö eö! Tro eö a huliwane tune kaa la musi eö? Ame ngöne la Tusi Hmitrötr, alanyimu la itre joxu ne Iudra hna acil, nge nekönatr petre kö. Tui Ioasa, hna acili angeic troa joxu lo kola 7 lao macatre, ame pena Uzia hna acili angeic lo kola 16 lao macatre, nge Iosea lo kola 8 lao macatre. Tha huliwa ka co kö lai koi angatr! Eloine pe, hetre ixatua hnei angatr hna kapa matre elëhune la itre jol me kuca la itre ewekë ka mingöming koi Iehova.

2. Hnauëne la tro sa ce ithanatane la hna melëne hnei Ioasa, Uzia me Iosea?

² Ngacama tha itre joxu kö së, ngo hetre ini nyine tro sa xome qa ngöne la tulu i angatr. Hnei angatr hna xome la itre mekun ka loi me itre mekune ka ngazo. Tro sa ce ithanatane la itre hnei angatr hna melën me wange la enyipiewekëne troa iëne hnyawane la itre sinee, me ipië me catre easenyi Iehova.

IËNE HNYAWA JU LA ITRE SINEE I EÖ

3. Nemene la ka amamane laka, hna hetru Ioasa hnyawa hnei Iehoiada?

³ Hnei Ioasa hna axecië mekune ka loi, nyitipu angeice jë. Ame lo angeic a jeune, hnei Ioasa joxu hna xomi mekune ka loi. Pine laka meci hë la kem i angeic, hnei angeic hna drengethenge Iehoiada Atre Huuj Ka Sisitria, ka mele nyipici koi Akötresie. Hnei Iehoiada hna hetru angeic kösë sipu nekö i nyidrë. Jëne la tulu ka loi hna amamane hnei Iehoiada, hnei Ioasa hna iëne troa nyihlue i Iehova me isigöline la nyipi hmi. Goi nyihnyawane fe angeic la uma ne hmi.—2 A. l. ite jo. 24:​1, 2, 4, 13, 14.

4. Nemene la itre thangane koi eö, e tro eö a nyipiewekëne la itre trepene meköti Iehova? (Ite Edomë 2:​1, 10-12)

⁴ Maine kola xatua eö troa hnimi Iehova hnene la kem me thine i eö maine ketre trejine pena, ke angatre hi lai a hamë eö la ketre ahnahna ka tru. (E jë la Ite Edomë 2:​1, 10-12.) Nyimu aqane hamë ini koi eö hnene la kem me thine i eö. Tro sa ce wange la hna kuca hnene la keme i Katya ketre trejine föe, matre xatua angeic troa axecië mekune ka loi. E nöjei drai, nyidrëti a porotrikëne me angeic la topik ne la drai ngöne la gojeny ne tro troa ini. Öni angeic, “Celë hi ka xatua ni troa elëhune la itre jol ka traqa ngöne la drai.” Ngo tune kaa, e ame koi eö kola hnöthe la mele i eö hnene la itre ini qa hnine la Tusi Hmitrötr? Nemene la ka troa xatua eö troa metrötrën itre ej? Mekune palahi Anastasia la aqane kuca la kem me thine i angeic. Hnei nyidroti palahi hna qaja koi angeic la kepin, matre nyidroti a acile la itre wathebo. Öni angeic, “Celë hi ka xatua ni troa trotrohnine laka, tha nyidroti kö a thele troa hnöthe la meleng, ngo tru la ihnimi nyidroti koi ni, nge aja i nyidroti troa thupë ni.”

5. Tune kaa Iehova memine la kem me thine i eö, la eö a trongëne la itre eamo? (Ite Edomë 22:6; 23:​15, 24, 25)

⁵ Tro la kem me thine i eö a madrin, e tro eö a trongëne la itre eamo hna nyitrepene hnei Tusi Hmitrötr. Ame la ka nyipiewekë catr, ke tro eö lai a amadrinë Iehova me nyisinee i Nyidrë. (E jë la Ite Edomë 22:6; 23:​15, 24, 25.) Celë hi matre loi e tro sa nyitipu Ioasa la easa jeune.

6. Thupene la kola meci hnei Iehoiada, drei la hnei Ioasa hna nyisineen? Nge nemene la pun koi angeic? (2 Aqane Lapa ite Joxu 24:​17, 18)

⁶ Ka ngazo la aqane axecië mekune hnei Ioasa, xomi ini jë. Thupene la kola mec hnei Iehoiada, hnei Ioasa hna nyisineene la itre atr ka uku angeic troa kuca la ngazo. (E jë la 2 Aqane Lapa ite Joxu 24:​17, 18.) Hnei angeic hna drengethenge la itre he ne nöj, itre ka tha hnimi Iehova kö. Maine ju, tro hi angeic a kötrene la itre atr cili ka kuca la ngazo. (Ite edomë 1:10) Ngo, hnei angeic hna drei angatr. Nge ame la Zakaria nekö i Iehoiada a thel troa xatua Ioasa, hnei angeic hna iup troa humuthi Zakaria. (2 A. l. ite jo. 24:​20, 21; Mat. 23:35) Ka hmo la aqane axecië mekune i angeic! Ka loi hi la mele i Ioasa lo xötrei, ngo e thupen hnei angeic hna nuetriji Iehova me ihumuth. Ame ju pë hë la pun, hna humuthi angeic hnene la itre hlue i angeic. (2 A. l. ite jo. 24:​22-25) Maine drei Iehova ju me itre ka hnimi Nyidrë, tha tro kö angeic a traqa kowe lai! Nemene la ini koi së?

7. Drei la hnei eö hna troa nyisineen? (Wange ju fe la iatr.)

⁷ Ame la ketre ini hne së hna xome qaathei Ioasa, ke nyipiewekë tro sa nyisineene la itre atr ka uku së troa kuca la loi, ka hnimi Iehova, nge ka amadrinë Nyidrë. Tha nyipiewekë kö tro la itre hne së hna nyisineen a ce xötr me easë. Ngacama tru catre kö Iehoiada hui Ioasa, ngo lue treme sineene nyidro. Haawe, isa hnyinge jë ka hape: ‘Itre sineenge kö a uku ni troa acatrene la lapauneng koi Iehova? Angatre kö a ithuecatre koi ni troa trongëne la itre trepene meköti Nyidrë? Aja i angatre kö troa qeje Nyidrë me ithanatane la itre ini qa hnine la Tusi Hmitrötr? Angatre kö a metrötrëne la itre wathebo i Nyidrë? Angatre kö a cile troa haji ni, maine angatr pena a ameköti ni la eni a tria?’ (Ite edomë 27:​5, 6, 17) Maine tha hnimi Iehova kö hnene la itre sinee i eö, ke nuetriji angatre pi! Ngo, e ka hnimi Iehova angatr, ce tro jë me angatr, ke itre nyipi sinee hi lai!—Ite edomë 13:20.

8. Maine epuni a huliwane la itre réseaux sociaux, nemene la itre hnying ka troa xatua epun?

⁸ Ka nyipiewekë la itre réseaux sociaux, matre troa porotrik memine la itre fami me sinee së ka lapa gaa nany. Ngo alanyimu la itre ka amë la itre foto me itre video, matre wesiwesi fë la itre hnei angatre hna itöne maine kuca. Maine eö fe a huliwane la itre réseaux sociaux, hnyinge jë ka hape: ‘Eni kö a thel troa pi mama? Eni kö a thel troa ithuecatre koi angatr, maine tro angatr a goeë ni? Eni kö a nyitipune la aqane mekun, me aqane ithanata, me aqane ujë ne la itre ka huliwane la itre réseaux sociaux?’ Öni Nathan Knorr, ketre ka nyiatrene la Lapa Ne Xomi Meköti ekö ka hape: “The nyi dröne kö, ke pëkö atr lai ka troa hnimi epun. Ngo, e tro epuni a thel troa amadrinë Iehova, ke troa hnimi epun hnene la itre ka hnimi Nyidrë.”

LOI E TROA IPIË

9. Nemene la itre huliwa hnei Iehova hna aijijë Uzia troa kuca? (2 Aqane Lapa ite Joxu 26:​1-5)

⁹ Hnei Uzia hna axecië mekune ka loi, nyitipu angeice jë. Ketre joxu ka ipië Uzia lo angeic a jeune. Hnei angeic hna inine “troa xouene la nyipi Akötresie.” Hnei angeic hna mec lo kola 68 lao macatre, nge tru catre la hnei Iehova hna amanathithi angeic. (E jë la 2 Aqane Lapa ite Joxu 26:​1-5.) Tru catr la itre ithupëjia hnei Uzia hna lep, nge hnei angeic hna xup acatrene la itre qanahage ne Ierusalema. (2 A. l. ite jo. 26:​6-15) Tru catre la madrine i angeic, ke hnei Iehova hna aijijë angeic troa eatrëne la itre huliwa cili.—Ate cai. 3:​12, 13.

10. Nemene la ka traqa koi Uzia?

¹⁰ Ka ngazo la aqane axecië mekune hnei Uzia, xomi ini jë. Ka majemine Uzia joxu qaja koi itre xan la nyine tro angatr a kuca, nge angatr a drengethenge angeic. Celë hi matre, ame koi angeic, pëkö ka hane qeje angeic. Ame lo ketre ijin, hnei angeic hna lö hnine la uma ne hmi Iehova, me dreu ka pui loi. Ngo, tha ijije kö tro la itre joxu a kuca la huliwa cili. (2 A. l. ite jo. 26:​16-18) Hnei Azaria lo Atre Huuj Ka Sisitria, hna thele troa sewe Uzia, ngo elëhni jë hi angeic. Ngacama itre macatre ne mele nyipici angeic koi Iehova, ngo pine angeic pi tru, hnei Iehova hna lepi angeic hnei lepera. (2 A. l. ite jo. 26:​19-21) Maine ipië ju angeic tune lo xötrei, ke tha tro kö a traqa koi angeic la itre ewekë cili!

11. Nemene la ka troa xatua së troa ipië? (Wange ju fe la iatr.)

¹¹ Ame hë la kola catr hnei Uzia joxu, thëthëhmine hë angeic laka, qaathei Iehova lo trengecatr me itre lolo hnei angeic hna kapa. Nemene la ini koi së? The thëthëhmine kö së laka, qaathei Iehova la itre manathith me itre hnëqa hne së hna kapa ngöne la organizasio. Ame la easa eatrëne hnyawan la ketre huliwa, tha tro pi kö sa sipu selë së, ngo loi e tro pe sa atrunyi Iehova.b (1 Kor. 4:7) Nyipiewekë tro sa atrehmekune laka, itre atr ka tha pexeje kö së, matre loi e troa haji së e itre xaa ijin. Önine la ketre trejine trahmany ka sasaith la 60 lao macatre ka hape: “Tha eni kö a drenge akötrëne la itre xan a qaja la itre triang. Ame la kola haji ni, eni a kapa me isine troa saze. Nge eni a catre nyihlue i Iehova.” Haawe, e tro sa catre xou Iehova me ipië, ke tro ha lolo la mele së.—Ite edomë 22:4.

CATRE JË EASENYI KOI IEHOVA

12. Nemene la aqane thele Iehova hnei Iosea, lo angeic a nekötrahmany? (2 Aqane Lapa ite Joxu 34:​1-3)

¹² Hnei Iosea hna axecië mekune ka loi, nyitipu angeice jë. Hnei Iosea hna nyiqane thele Iehova lo angeic a nekötrahmany. Aja i angeic troa atre Iehova hnyawa me kuca la aja i Nyidrë. Ngo, tha ka hmaloi kö koi angeic, ke alanyimu la angetre Isaraela ka thil kowe la itre haze. Matre tha huliwa ka co kö la troa isigöline la nyipi hmi. Trahmanyi ka catre Iosea, ke tha 20 palakö lao macatre i angeic, nge ase hë angeic apatrene la hmi ka thoi ngöne la nöj.—E jë la 2 Aqane Lapa ite Joxu 34:​1-3.

13. Nemene la thangan, e tro eö a nue mele koi Iehova?

¹³ Ngacama jeune palakö eö, ijiji eö hi troa nyitipu Iosea, ene la troa easenyi Iehova me inine la itre thiina i Nyidrë. Celë hi ka troa uku eö troa nue mele koi Nyidrë. Nemene la thangane lai? Öni Luke, hna bapataisone lo angeic a 14 lao macatre ka hape, “Qane enehila, huliwa i Iehova la ka tro pa ngöne la meleng, nge tro ni a isine troa amadrinë Nyidrë.” (Mar. 12:30) Maine celë fe hi aja i eö, ke tro hë eö lai a mele madrin!

14. Nemene la aqane nyitipu Iosea joxu hnei Johan me Rachel?

¹⁴ Nemene la itre jol hna cile kow hnene la itre jeune ka nyihlue i Iehova enehila? Hna bapataiso Johan lo angeic a 12 lao macatre. Öni angeic ka hape, hnene la itre sine ini angeic hna uku angeic troa hane uf lo cigarettes électronique. Nemene la ka xatua angeic troa cile catr qëmekene la itupath? Mekune jë hi angeic laka, ketre hna majemine lai ka troa adrone la ngönetrei angeic me thë la imelekeu i angeic me Iehova. Ame pena Rachel, hna bapataiso angeic lo angeic a 14 lao macatre. Angeic a qaja la ka xatua angeic troa cile kowe la itre jol ngöne la hna ini. Öni angeic: “Eni a thele la aqane ce tro la hnenge hna öhn me inin, memine la hna qaja hnei Tusi Hmitrötr. Ame la itre xaa hnenge hna inin, ke kola amekunë ni la ketre hna melëne e hnine la Tusi Hmitrötr maine ketre hna perofetan. Ame pena la eni a porotrik me ketre, eni a thel la ketre xötr ka ihmeku memine la porotrike i nyio, nge nyine tro ni a qaja koi angeic.” Ngacama tha ka ceitu kö la itre jole ka traqa koi eö me Iosea joxu, ngo ijiji eö hi troa mele nyipici koi Iehova me inamacan, tui angeic. Ame la itre jol hnei eö hna cile kow enehila, ke kolo hi lai a hnëkë eö kowe la itre xaa jol elany.

15. Nemene la ka uku Iosea troa trongëne la wathebo? (2 Aqane Lapa ite Joxu 34:​14, 18-21)

¹⁵ Ame lo kola 26 lao macatre i Iosea joxu, hnei angeic hna nyiqane nyihnyawane la uma ne hmi. Ame ngöne la ijine cili, hna öhne la “Tusi Wathebo i Iehova, lo hna hamën jëne Mose.” Ame la joxu a dreng la kola e la tusi cili, ke hnei angeic hna canga trongëne la hna qaja hnene la wathebo. (E jë la 2 Aqane Lapa ite Joxu 34:​14, 18-21.) Ajane kö eö troa e lapane la Tusi Hmitrötr? Maine celë hi hnei eö hna kuca, ka madrine kö eö? Nemene la aqane tro eö a canga xolouth la itre xötr ka troa xatua eö? Ame Luke, lo hna qaja ha, ke angeic a sija ngöne la ketre carnet la itre mekun ka lolo hnei angeic hna öhne la angeic a e Tusi Hmitrötr. Hapeu, ijiji eö kö troa tui Luke, matre tha tro kö eö a canga thëthëhmin la itre xötr me itre ini ka ketri eö? Maine tro eö a wangatrun me catre inine la Tusi Hmitrötr, ke tro lai a thue aja koi eö troa nyihlue i Iehova. Tro la Tusi Hmitrötr a uku eö troa catre huliwa i Iehova, tui Iosea joxu.

16. Pine nemen matre hnei Iosea hna kuca la ketre ewekë ka ngazo? Nge nemene la ini koi së?

¹⁶ Ka ngazo la aqane axecië mekune hnei Iosea, xomi ini jë. Ame lo Iosea a 39 lao macatre, hnei angeic hna kuca la ketre ewekë ka ngazo matre meci pi hi angeic. Tha hnei angeic kö hna pane thel troa atre la mekuna i Iehova, ngo hnei angeice pe hna ketre kuci mekun. (2 A. l. ite jo. 35:​20-25) Nemene la ini koi së? Jeune ju hë së maine qatr, ka xötrei ini Tus Hmitrötr maine ka hekö hë, ngo loi e tro palahi sa thel la mekuna i Iehova. Haawe, loi e tro sa sipo Iehova troa eatrongë së, me inine la Tusi Hmitrötr me thele ixatua thene la itre trejin ka macaj. Ame hë e cili, tro sa atreine neëne la itre ewekë ka ngazo me mele madrin.—Iako. 1:25.

IJIJI EPUNI HI ITRE JEUNE TROA MELE MADRIN

17. Nemene la ini hne së hna xome qa ngöne la tulu i Ioasa, Uzia, me Iosea?

¹⁷ Ame la easa jeune, tru catre hnei ewekë nyine tro sa kuca. Kola mama jëne la tulu i Ioasa, Uzia, me Iosea laka, ijije hi tro la itre jeune a axecië mekune ka loi me amadrinë Iehova. Ngo tune la hne së hna ce wang, tha ka hmaloi kö kowe la itre jeunes. Ngo ijije hi tro sa nyitipune la itre huliwa ka loi hna kuca hnene la itre joxu cili, me xomi ini qa ngöne la itre tria i angatr. Ame e cili, tro hë së lai a mele madrin.

18. Drei la itre tulu e hnine la Tusi Hmitrötr ka amaman ka hape, ijiji eö hi troa mele madrin? (Wange ju fe la iatr.)

¹⁸ Tusi Hmitrötre fe a qaja la itre xaa jeune ka lapa qale koi Iehova, ka amadrinë Nyidrë, nge ka mele madrin. Dravita la ketre. Hnei angeic hna iëne troa nyihlue i Iehova lo co petre kö angeic, nge utihë la kola acili joxu angeic, hnei angeic hna mele nyipici koi Nyidrë. Eje hi laka, hnei Dravita fe hna hane tria, ngo ame koi Iehova, ketre atr ka mele nyipici. (1 Ite jo. 3:6; 9:​4, 5; 14:8) Tro la hna melëne hnei Dravita a ithuecatr koi eö me xatua eö troa catre nyihlue i Iehova. Ijije fe tro eö a xomi ijine troa inin la hna melëne hnei Mareko maine Timoteo. Hnei nyidroti hna nyihlue i Iehova qane lo nyidroti a co, nge tru la itre manathith hnei nyidro hna kapa ngöne la mele i nyidro. Ketre, madrine catre nyidro ngöne la huliwa i Iehova.

19. Nemene mel hnei eö hna troa iën?

¹⁹ Ame la aqane axecië mekune i eö enehila, ke ka hetre thangane kowe la mele i eö elany. Maine tro eö a mejiun koi Iehova hune la sipu inamacan i eö, ke tro kö Nyidrëti a xatua eö troa xomi mekune ka loi. (Ite edomë 20:24) Ijiji eö hi troa mele ka loi me madrin. The thëthëhmine kö laka, Iehova a wangatrun la itre hnei eö hna kuca koi Nyidrë. Pëkö ketre madrin ka tru hune la troa nyihlue i Iehova, Akötresie ka tru ihnimin!