Meken 12

Bapataiso i Iesu

SIKISI hë lao treu ne cainöje Ioane. Nge ame Iesu, kola traqa kowe la 30 lao macatre i nyidrë, hanawang, nyidrë a tro koi Ioane ngöne la hneopegejë e Ioridrano. Nemene kepine lai? Maine jë kola troa iwai? Maine jë Iesu a troa hnyingë pengöne la huliwa i Ioane? Ohe, Iesu a traqa troa sipo Ioane troa bapataiso nyidrë.

Ngo Ioane a sewe nyidrë me hape: “Loi e tro cilieti a bapataiso ni, ngo cilieti a jötëti koi ni?” Atre hi Ioane laka, hupuna i Akötresieti Iesu, lo trejine me angeic. Ketre, angeice hi lo ka sesë hnei madrine e kuhu hni Elisabeth, thine i angeic, ngöne lo kola traqa hnei Maria koi angatr, a kolo petre kö a lapa sai Iesu! Maine jë thaa hna juetrëne kö la ewekë cili hnei Elisabethe koi angeic. Ma hnei nyidroti jë fe hna hane qaja lo ithuemacanyi hna hamëne hnene la angela, ngöne la hnaho i Iesu, memine lo itretre tro fë maca qaa hnengödrai a mama kowe la itretre thupë mamoe ngöne lo jidri ne mala i Iesu.

Haawe, thaa trehnyiwa kö Iesu koi Ioane. Nge atre hi Ioane laka, thaa thatraqai Iesu fe kö la bapataiso i angeic. Thatraqane hmekuje hi lo itre ka ietra pine la itre ngazo i angatr, ngo ame Iesu, pë fe kö ngazo i nyidrë. Ngacama xele kö Ioane, ngo kola una iele angeice hnei nyidrë me qaja ka hape: “Pane xome ju enehila; ke cei tune koi shë troa xöte thenge la thina ka meköti asëjëihë.”

Pine nemene matre meköti fe koi Iesu troa hane xome la bapataiso? Pine laka, ka hetre aliene la bapataiso i nyidrë, laka, thaa nyidrëti kö a hane ietra pi ngazo, ngo nyidrëti a amamane laka, nyidrë a troa kuca la aja i Akötresie, Tretretro i nyidrë. Ka tratrau sinöe Iesu lo, ngo enehila, traqa ha la ijine tro nyidrë a nyiqaane lo huliwa ne cainöje hnei Iehova Akötresieti hna upi nyidrë troa kuca e celë fen. Hapeu, atre kö Ioane la ewekë ka ketre pengöne kö ka troa traqa, ngöne la angeice a troa bapataiso Iesu?

Kola qaja hnei Ioane thupen, ka hape: “Ame la ate upi ni troa bapataiso hnei tim, hnei nyidëti hna ulatine koi ni, ka hape, Ame la hnei ’ö hna goeëne la Ua kola sheshë kow, me të hun, celë hi ate bapataiso hnei Uati Hmitöt.” Haawe, atre hi Ioane laka, troa traqa hune la ketre atr hnei angeice hna troa bapataison, lo uati hmitrötre i Akötresie. Celë hi matre, thaa sesëkötre kö angeice la Iesu a fetra qa hnine la tim, nge kola öhne la ‘Uati Akötesie kola sheshë pi kösë ngönetrei ne piny, me traqa hui anganyidë.’

Ngo hetre ewekë kö ka traqa ngöne la kola bapataiso Iesu. ‘Hna thawa la hnengödrai’ koi nyidrë. Nemene la aliene la ewekë celë? Kolo lai a hape, ame ngöne la nyidrë a bapataiso, ke, kolo hmaca ha mekune hnei nyidrë lo mele i nyidrë ekö e koho hnengödrai. Qa ngöne lai, Iesu hmaca ha mekune hnyawa lo mele i nyidrë, Hupuna i Iehova Akötresie, ketre tune mina fe la nöjei ewekë asë hnei Akötresieti hna qaja koi nyidrëti ekö e hnengödrai.

Ketre, ngöne la ijine bapataiso, kola traqa la aqane ula qaa hnengödrai me hape: “Nyipëti la Nekönge hniminang; ini a madi nyipë.” Aqane ula i drei la? Iesu? Ohe! Aqane ula i Akötresie. Kola mama hnyawa e celë laka, ame Iesu ke hupuna i Akötresie, ngo thaa Akötresieti kö nyidrë tune lo aqane trotrohnine la itre xaa atr.

Ngo ceitui Iesu hi me Adamu laka, lue atr asë hi nyidro, lue xupuana i Akötresie. Thupene la hna qeje pengöne la bapataiso i Iesu, kola cinyihane ju hnei Luka ka hape: “Nge hnei Iesu hna weje ine huliwa, nge kösë caate nge luepi lao macatre i nyidë; (nge hna mekun) nyidëti la nekö i Iosefa, matra i Heli, . . . matra i Davita, . . . matra i Aberahama, . . . matra i Noa, . . . matra i Adamu, nekö i Akötesie.”

Nekö i atr Adamu nge “nekö i Akötesieti” fe nyidrë, ketre tui Iesu fe. Maine tro së a goeëne la mele i Iesu, easë a öhne hnyawa laka, nyipici, nyidrëti hmekuje hi la atr ka sisitria ngöne la fen. Ngo ngöne hë lo ijine xome nyidrë la bapataiso, kola hnyipixe e cili la aqane imelekeu i Iesu me Akötresie, laka, ketre ua i Akötresieti fe hë nyidrë, ngacama ngönetrei ne atr petre kö. Enehila, Akötresieti a hë nyidrëti hmaca hnengödraieë, nge kösë lo kolo ha troa hnëkë troa nue pe lo mele i nyidrë e celë fen, nyine huje thatraqane lo nöjei atr asë ka hnëjin. Mataio 3:13-17; Luka 3:21-38; 1:34-36, 44; 2:10-14; Ioane 1:32-34; Heberu 10:5-9.

▪ Pine nemene matre thaa trehnyiwa kö Iesu koi Ioane?

▪ Pine laka thaa atr ka ngazo kö Iesu, hnauëne kö la kola bapataiso nyidrë?

▪ Qa ngöne la itre ewekë hna atre hnei Ioane göi Iesu, pine nemene matre, thaa sesëkötre kö angeice ngöne la kola traqa la uati hmitrötre i Akötresie hui Iesu?