Meken 14

Itre Atr Ka Pane Xötrethenge Iesu

THUPENE la 40 lao drai Iesu ngöne la hnapapa, nyidrë a bëeke hmaca ju koi Ioane, lo atre bapataiso nyidrë. Ame la kola öhnyi nyidrëti hnei Ioane, angeice a amamai nyidrëti kowe la itre sinetrongei angeic, me qaja ka hape: “Hanawange la Arenio i Akötesie, la ate geigeietine la ngazo ne la fene hnengödrai. Dei la anganyidëti hnenge hna qaja, ka hape, Kola tro pi hutrönge la ate ka sisitia hung, ke hna pa i nyidëti nge pinge pe.” Ngacama ka tru kö Ioane hune la trejine me angeic, ene Iesu, ngo ame pe, atre hi Ioane laka, traqa pai Iesu kö ekö, pane ua hna xupe e hnengödrai.

Ngo ame petre kö lo itre hnepe wiike ka ase hë, lo Iesu a traqa troa bapataiso, thatre hnyawa pala kö Ioane laka, Iesu hi la Mesia. Kola atrehmekune hnei Ioane me qaja ka hape: “Nge tha hnenge hna wangate hmekunyi nyidë; loi pe troa amamai nyidëti koi angete isaraela, qa ngöne lai traqa ha ni troa bapataiso hnei tim.”

Ioane a qeje pengöne kowe la itre atr ka drei angeic, la ewekë ka traqa ngöne la angeice a bapataiso Iesu, öni angeice ka hape: “Hnenge hna goeëne la ua kola sheshëpi qa hnengödrai kösë piny, me traqa hui anganyidë. Nge tha hnenge hna wangate hmekunyi nyidë; ngo ame la ate upi ni troa bapataiso hnei tim, hnei nyidëti hna ulatine koi ni ka hape, Ame la hnei ’ö hna goeëne la Ua kola sheshë kow, me të hun, celë hi ate bapataiso hnei Uati Hmitöt. Hnenge hna goeëne me anyipicin, laka, celë hi Hupuna i Akötesie.”

Elanyi hmaca Ioane a ce cile memine la lue xaa atre drei angeic. Angeice a öhnyi Iesu hmaca e alemi trootro, öni angeice jë hi ka hape: “Hana wange la Arenio i Akötesie!” Nge drenge hë hnei luetre drenge la hnei Ioane hna qaja, ame hnei nyidroti hna xötrethenge Iesu. Anederea trejine me Simona Peteru la ketre, ene la luetre drei Ioane, nge ame la ketre, ke angeice hi la ka ithuemacanyine la itre ewekë celë; Ioane fe la ëje i angeic. Hetrenyi la itre ithuemacanyi ka amamane laka, ame la Ioane celë, ke, angeice hi lo nekö i Salome trejine me Maria.

Ame hnei Iesu hna xei, me xajawa nyidro a ixötrethenge, nge nyidrëti a hnyingë nyidroti ka hape: “Nyipo a thele nemen?”

Öni nyidroti ka hape: “Rabi, e ka laka cilieti a munëti ngön?”

Öni Iesu koi nyidroti ka hape: “Trojë fe ma troa wang.”

Hnaipajö heji hë, nge kola ce munëti pe me Iesu hnei Ioane me Anederea. Thupene lai, hnene laka, tru catre pala ha la madrine i Anederea, matre angeice a nyenyape ju troa hëne la trejine me angeic, ene Peteru. Öni angeice ka hape: “Öhnë hë huni la Mesia.” Ame hnei angeice hna tro xomi Peteru koi Iesu. Nge ma ame fe la ijine cili, kola tro hnei Ioane troa wange la trejine me angeic, ene Iakobo, me xomi angeice koi Iesu; Ngo tune lo hnei angeice hna majemin, thaa hnei Ioane kö hna hane qaja la ewekë celë nyine selë angeic, e hnine la evangelia hnei angeice hna cinyihan.

Ame pena ha la ketre drai, Iesu a öhnyi Filipo lo atre Bethesaidra, nöje hna mele ngön ekö hnei Anederea me Peteru. Nyidrëti a hë angeice ju me hape: “Xöte thenge ni jë.”

Haawe, öhnyi Nathaniela ju pena lo hna hëne ka hape Batolomaio, öni Filipo jë hi: “Öhnë hë huni la hnei Mose hna cinyihane ngöne la wathebo, me hnei nöjei perofeta, Iesu ate Nazareta nekö i Iosefa.” Kola luelue hnei Nathaniela. Angeice a hnyinge ka hape: “Hete ewekë ka loi a xulu e Nazareta?”

Canga öni Filipo ju hi, “Trojë fe ma troa wang.” Ame hë la nyidroti a easenyi Iesu, öni Iesu koi Nathaniela ka hape: “Hana wange la nyipi ate ne isaraela, pëkö hnepe thoi thei angeic.”

Öni Nathaniela ka hape: “Hna wangate hmekunyi ni hnei cilieti e ka?”

Iesu a sa koi angeice ka hape: “Öhnyi eö hë ni fene la hmejieng, nge tha hna hë eö pete kö hnei Filipo.”

Kola hai hnei Nathaniela. Öni angeice ka hape: “Rabi, cilieti la hupuna i Akötesie, cilieti la Joxu ne Isaraela.”

Öni Iesu koi angeice ka hape: “Lapaune hë eö, qa ngöne la hnenge hna qaja koi ’ö, ka hape, öhnyi eö hë ni fene la hmejieng? Tro ha eö a öhne la nöjei ewekë ka tru hune lai.” Nyidëti a ulatine koi angeice ka hape: “Nyipici, nyipici, ini a qaja koi nyipunie, tro nyipunie a öhne la hnengödrai hna thawa, nge nöjei angela i Akötesie a elëjë me utipi hune la Nekö i at.”

Ame hë la itre drai thupen, Iesu a ce trotrije e Ioridrano, ce memine la itretre drei nyidrë ka hnyipixe, me tro Galilaiaeë. Ioane 1:29-51.

▪ Drei la itretre pane drei Iesu?

▪ Tune kaa la aqane tro sai Peteru me Iakobo koi Iesu?

▪ Tune kaa matre xecie jë e kuhu hni Nathaniela, ka hape, Iesu hi la Hupuna i Akötresie?