Iesu a Iëne La Ala Truelof

Traqa koi ca macatre nge sin ne qaja Ioane Bapataiso ka hape, Iesu la Neköi Mamoe i Akötresie. Ame la Iesu a nyiqaane la huliwa ne cainöje i nyidrë, hetre itre atr ka xötrethenge nyidrë, tui Anederea, me Simona Peteru, me Ioane, nge ma Iakobo fe (trejin me Ioane), me Filipo, me Batolomaio (hna hëne fe Nathaniela). Nge e thupen, ala nyimu catre hmaca kö la itre ka xötrethenge nyidrë.—Ioane 1:45-47.

Enehila, ijine hë koi Iesu troa iëne la itre aposetolo i nyidrë. Tro hë angatr a itre nyipi sinee nyidrë, me kapa la ini ka ketrepengön. Ngo qëmekene troa ië angatr, Iesu a pane elë jë kowe la ketre wetr, ma ezine la Hnagejë Ne Galilaia me Kaperenauma. Hnei nyidrëti hna thithi jidri ka pexej, troa sipo inamacan me manathithi qaathei Akötresie. Matre ame hë la drai thupen, hnei nyidrëti hna hëne la itretre nyidrë, me iën la ala 12 troa itre aposetolo i nyidrë.

Iesu a iëne jë lo ala sikis hna qaja e caha, me Mataio, lo hna hën qa ngöne la uma ne hle mani. Nge ame la itre xan, tre Iudra (lo hna hëne ka hape, Thadaio maine “nekö i Iakobo”), me Simona atre Kanana, me Toma, me Iakobo neköi Alefaio, me Iudra Isakariota.—Mataio 10:2-4; Luka 6:16.

Qaane enehila, tro la ala 12 a sine la itre tronge i Iesu, nge atrepengöi angatre hnyawa hi hnei nyidrë. Ame la itre xan, tre itre sine la madra i nyidrë, tui Iakobo me Ioane lue trejin me Iesu. Nge maine nyipici la hna mekun hnei itre xan ka hape, Alefaio la trejin me Iosefa keme i Iesu, haawe, ame la nekö i Alefaio, ene Iakobo aposetolo, tre trejine hi me Iesu.

Pëkö ejolene koi Iesu troa atre la ëjene la itre aposetolo i nyidrë. Ngo tune kaa fe eö? Ame la ketre aqane troa kuca, tre ene la troa mekune ka hape, lue Simona, nge lue Ioane, nge lue Iudra. Hetre trejin i Simona (Peteru) ene, Anederea, nge hetre trejine i Iakobo (lo nekö i Zebedaio) ene, Ioane. Celë hi aqane troa mekune la ëjene la eitre lao aposetolo. Ame la itre xan tre, ene lo atre hle mani (Mataio), memine lo atre luelu (Toma), memine lo hna hën fene lo isinöe (Nathaniela), memine lo sinee i Nathaniela (Filipo).

Ala 11 thei angatr ka traqa qa Galilaia, zi i Iesu. Nge atre Kanana Nathaniela, nge ame Filipo, Peteru, me Anederea, itre atre Bethesaida angatr. Nge e thupen, hnei Peteru me Anederea hna fek a tro Kaperenauma, zi i Mataio. Nge ame fe Iakobo me Ioane, kola mekune ka hape, nyidro a mel e Kaperenauma maine ezin, nge tha nanyi kö qa lai la huliwa i nyidro troa nyi ie. Nge ame pë hë Iudra Isakariota, lo atre salemë Iesu, tre ma angeice casi hi la atre Iudra.