Meken 15

Pane Iamamanyikeu i Iesu

KOLO petre hi a caasi maine lue drai ne xötrethenge Iesu, hnei Anederea, me Peteru, me Ioane, me Filipo, me Nathaniela, nge ma me Iakobo fe. Angatre hi lai a xome la gojenyi ne tro Galilaia, götrane hna hnaho angatre asë ngön. Ame la nöje hnei angatre hna tro kow, ke, Kana, ene lo zi Nathaniela; eje ngöne la itre sasala ne Nazareta, lo traone hna hetru Iesu ngön. Ene pe könë angatre jë kowe la ketre faipoipo e Kana.

Hna hane hëne fe la thine i Iesu kowe lai hna faipoipo. Ma hnene laka, Maria la ketre enehmu ne la fami ne la ka troa faipoipo, ame la jole i nyidro, ke, ene la troa tro fë ane la itre atr ka ala nyimu hna könën. Celë hi matre, canga öhne hi Maria laka, kolo ha troa pë waina, nyidroti a qaja ju koi Iesu ka hape: “Pëhë waina i angat.”

Eje hi laka, kola mama jëne la trenge ewekë i Maria laka, nyidroti a ajane tro Iesu a nyi nyine la jole ka traqa. Ame ngöne la xötrei, nango cile hnö Iesu. Öni nyidrë koi nyidroti ka hape: “Nenë, nemene eapo koi ni?” Eje hi laka, nyidrëti hi la joxu hna iëne hnei Akötresie; qa ngöne lai, thaa qanyine kö la hnepe lapa i nyidrë memine la itre enehmu i nyidrë troa amekötine la huliwa nyine tro nyidrëti a kuca. Celë hi matre, Maria a inamacane me nue la jole ngöne la ihnatrapaime ne la nekö i nyidro, me qaja kowe la itre hlue ka hape: “Ame la ewekë hnei nyidëti hna troa qaja koi nyipunie, kuca jë.”

Hetrenyi e cili la sikisi lao ge etë, isa lue me köni bathe la tulun, footre lao lit. Öni Iesu kowe la itre hlue ka hape: “Atiqane jë la nöjei ge hnei tim.” Ame hnei angatre hna atiqane uti hë la ulan. Thupene lai, Iesu a qaja ka hape: “Jöe jë enehila, nge xome jë kowe la tane la pui ne xen.”

Kola haine hnene la tane la pui ne xeni la esisitriane la waina, nge thatre pi kö nyidrëti laka, thangane la ketre iamamanyikeu lai. Nyidrëti a hëne jë la atre xötrei faipoipo, me qaja ka hape: “Thina ne la nöjei ate troa thawa panëne la waina ka loi, nge ase hë iji atrune, waina ka ngazo pena. Ngo hnei nyipëti hna amë la waina ka loi uti hë enehila.”

Celë hi pane iamamanyikeu i Iesu la, ka acatrene la lapaune ne la itre ka pane xötrethenge nyidrë. Thupene lai, kola tro pi hnei Iesu me itretre drei nyidrë, nge kola hane ce tro fe me nyidrë hnene la thine i nyidrë me itre trejine me nyidrë a tro kowe la traone e Kaperenauma, ezine la hnagejë ne Galilaia. Ioane 2:1-12.

▪ Nemene ijine ngöne la huliwa i Iesu, lo kola pui ne xeni ne faipoipo e Kana?

▪ Pine nemene matre Iesu a lepe trije la mekunene la thine i nyidrë?

▪ Nemene la iamamanyikeu hna kuca hnei Iesu? Nge nemene la thangane eje kowe la itre xaa atr?