Pane Iamamanyikeu i Nyidrë

Hnaakönine drai hë thupene lo kola ase hë Nathaniela troa ketre atre drei Iesu. Matre Iesu me itre xa atre dreng a tro kowe la götrane kolopi, angatr a Galilaia thenge, lo zi i angatr, me tro e Kana, zi i Nathaniela. Ame la traone cili, ej e kolopi ngöne la itre wetr e Nazareta, lo traone i Iesu. Hna könë angatr troa xeni nyikein e Kana.

Hna hane fe traqa hnei thine i Iesu kowe la faipoipo. Nge pine laka, Maria la ketre sinee ne la lue ka faipoipo, kösë hna upi eahlo troa kuca hnyawa la itre hna könën. Canga mama ju hi koi eahlo ka hape, kola ha pë la ketre ewekë, matre öni eahlo jë hi koi Iesu: “Pë hë waina i angatr.”—Ioane 2:3.

Maria hi lai a uku Iesu troa kuca la ketre ewekë. Iesu a qaja jë la ketre trengewekë ngöne la qene zi angatr göi troa amamane ka hape, xele kö nyidrë, öni nyidrë: “Föe, tha jole i nyiso kö lai.” (Ioane 2:4) Pine laka, Iesu hi la hnei Akötresie hna acile troa Joxu, haawe, Akötresie hmekuje hi la ka ijije troa ameköti huliwa i Iesu, ngo tha fami kö maine sinee. Matre hnei Maria pë hë hna nue la jole cili kowe la nekö i eahlo, me hape kowe la itre ka huliwa: “Kuca asë jë la hnei angeice hna troa qaja.”—Ioane 2:5.

Hetrenyi la sikisi lao trengene tim hna kuca hnei etë, ngöne la ca trengen, ijije troa nyialiene la 40 lao litë tim. Öni Iesu jë hi kowe la itre ka huliwa: “Nyialiene pi la itre trengen hnei tim.” Thupene lai öni nyidrë: “Haawe, jöe jë, nge hamëne pi kowe la tane huliwa.”—Ioane 2:7, 8.

Ame hnene la tane huliwa hna haine la elolone la waina, ngo thatre pe angeic ka hape, ketre iamamanyikeu lai. Angeic a hëne jë la trahmanyi ka faipoipo me hape: “Hnene la nöjei atr hna majemine pane atë la nyipi waina, ngo e hmo hë la atr, angatr pena ha atë la ketre waina menu. Ngo ame eö, hnei eö pe hna amë acone la nyipi waina koi enehila.”—Ioane 2:10.

Pane iamamanyikeu i Iesu hi lai. Nge celë hi ka acatrene la lapaune ne la itretre drei nyidrë. Thupene lai, hnei Iesu me thine i nyidrë, me ha jini nyidrë hna tro Kaperenauma, e kolopi ne la Hnagejë Ne Galilaia.