Meken 16

Hetre Aja Atraqatr Kowe La Hmi i Iehova

HETRENYI la itre trejine me Iesu, ene lo itre xaa nekö i Maria, Iakobo, me Iosefa, me Simona la itre ëje i angatr. Qëmekene tro angatre a ce tro me Iesu me itretre drei nyidrë Kaperenauma eë, lo traone ezine la hnagejë ne Galilaia, ma angatre a pane jea kowe la hnalapa i angatr e Nazareta, matre troa xome la itre xaa hnepe ewekë thatraqai angatr.

Ngo pine nemene matre, Iesu a tro Kaperenauma, ngo thaa cainöje pe e Kana, me Nazareta, maine ngöne la itre götrane gaa hutrutrupe ne Galilaia? Ame la ewekë hnapan, ke, hnene laka, Kaperenauma la ketre traone ka tru, nge thaa ka sihngödre kö eje koi nöjei atr. Ketre, ka tru asë hi la itre ka xötrei ce tro me Iesu e Kaperenauma, maine ezine pena la traone cili. Haawe, thaa nyipi ewekë kö koi angatre troa tro trije la traone hnei angatre hna mele ngön, matre troa kapa la ini hna troa hamëne koi angatre hnei Iesu.

Ngöne la nyidrëti e Kaperenauma, nyimutre la itre iamamanyikeu ka lolo hnei nyidrëti hna kuca, nge celë hi hnei nyidrëti hna cainöjëne ngöne la itre treu thupen. Ngo, easenyi hë matre, öhnyi nyidrëti hmaca jë së ngöne la itre gojeny, cememine lo itre sinetrongei nyidrë. Ijine cia koko hë, angatre hë a xome la gojenyi ne tro Ierusalema troa sine la paseka ne macatre 30 M.K. E cili, tro la itretre drei Iesu a öhne la ketre götrane la thiina i nyidrë, hna thatre pengöne hnyawa petre kö hnei angatr.

Thenge la Trenge Wathebo i Akötresie, tro la itre nekö i Isaraela a hujëne la itre öni. Celë hi matre, nyimutre la itre ka salem, angatre a tro Ierusalema troa salemëne la itre öni me itre waco thatraqane lai. Ngo angatre a saleme e hnine la ēnē, nge angatre a atrekënöne la itre atr me aelëne menune pala ha la thupene la itre öni hna salemën.

Atraqatre la elëhni Iesu, matre nyidrëti a elewanaeamone jë la itre eno nyine wameuc, me helëne asë la itre ka saleme qa hnine la ēnē. Nyidrëti a nenge trije ju fe la itre mani ne la itre ka itö mani, me qene ipiëne la nöjei laulau i angatr. Nyidrë a sue me qaja kowe la nöjei ka itö piny, ka hape: “Xome jë la nöjei ewekë celë qa la! the celohmëne kö la uma i kaka nyine uma ne itö!”

Ame la kola öhne lai hnene la itretre drei Iesu, angatre a mekune hmaca lo ewekë hna perofetane göne la hupuna i Akötresie, hna hape: “Ase hë ulumi ni hnene la aja ataqate kowe la ēnē i cilie.” Ngo kola hnyingëne hnei angete Iudra ka hape: “Nemene la hatene hnei nyipëti hna troa amamane koi huni, laka, hnei nyipëti hna kuca la nöjei ewekë cili?” Iesu a sa ka hape: “Kenithe pi la uma celë, nge tro ni a acile hmaca ngöne la köni drai.”

Kola mekune hnene la itretre Iudra ka hape, Iesu a qaja la ēnē hna xupe hnei etë, matre angatre a hnyingë nyidrë ka hape: “Luate nge cangemene la o macate ne acile la uma celë, nge tro eö a acile hmaca ngöne la köni drai?” Ngo ame la ēnē hnei nyidrëti hna qaja ke, ene la ngönalë i nyidrë. Köni macatre thupene la hna amele Iesu hmaca qa hna mec, tro hë la itretre drei nyidrë a mekune hmaca me trotrohnine la trenge ewekë celë. Ioane 2:12-22; Mataio 13:55; Luka 4:23.

▪ Thupene la faipoipo e Kana, Iesu a tro pi ië?

▪ Pine nemene matre Iesu a elëhni? Nge nemene la hnei nyidrëti hna kuca?

▪ Nemene la ewekë hna mekune hmaca hnene la itretre drei Iesu, ngöne la angatre a öhne la thiina i nyidrë?

▪ Nemene la hnei Iesu hna qaja göne la “ēnē celė”? Nge nemene la aliene la trenge ewekë i nyidrë?