Trongene Cainöj e Galilaia

Ase petre hi Iesu huliwa drai ka pexej memine la foa lao atre dreng e Kaperenauma. Nge e hej, itre atr a traqa fë la itre wezipo i angatr. Matre , tha tru kö hnei traeme i Iesu troa pane lapa cas.

Nge e hmahmakany, lo mitimiti pala kö, hnei nyidrëti hna mejë, me pane tro cas e kuhu qëhnelö. Öhne ju hi nyidrë la ketre götrane gaa mi, hnë ne tro nyidrëti a thithi cas koi Keme i nyidrë. Ngazo pe, tha lapa aqeanyi ju kö nyidrë, ke ame ju hi la angatr a öhne laka, patre hë nyidrë, hnei “Simona me itre xan” hna nyiqaane thele nyidrë. Nge ma Peteru la ka wejemekene la tronge i angatr, ke Iesu a lapa thei angeic.—Mareko 1:36; Luka 4:38.

Ame hë la Peteru a öhnyi Iesu, öni angeic: “Kola thele nyipë hnene la itre atr.” (Mareko 1:37) Eje hi, itre atre Kaperenauma a thele troa alapa Iesu. Madrine catre angatr koi Iesu, nge angatr a isin matre “tha tro kö nyidrëti a tro ananyi angatr.” (Luka 4:42) Ngo hapeu, tro hi Iesu a aloinyi mec? Nge e Kaperenauma hmekuje hi? Nemene la aqane sa i nyidrë?

Öni Iesu kowe la itretre drei nyidrë ka hape: “Tro sa tro kowe la itre traon ezin matre tro fe ni a hane cainöje e cili, ke kepine hi lo lai matre upi ni jë.” Nge goi qaja fe Iesu kowe la itre ka thele troa alapa nyidrë ka hape: “Tro fe ni a cainöjëne la itre maca ka lolo ne la Baselaia i Akötresie kowe la itre xa traon, ke celë hi kepin matre upi ni jë.”—Mareko 1:38; Luka 4:43.

Eje hi, ame la pane kepin matre traqa pi Iesu e celë fen, tre troa cainöjëne la Baselaia i Akötresie. Tro la Baselaia cili a ahmitrötrëne la ëje ne la Keme i nyidrë, me apatrene paluan la nöjei mec. Hnei Iesu hna kuca la itre iamamanyikeu nyine anyipicine ka hape, Akötresie la ka upi nyidrë. Nge hnei Mose fe ekö hna hane kuca tun.—Esodo 4:1-9, 30, 31.

Iesu a tro ju memine la foa lao atre dreng troa cainöj ngöne la itre xa traon. Ce nyidrë me Peteru, me Anederea trejine me Peteru, me Ioane, me Iakobo trejine me Ioane, ke ame lo wiike hnapan, hnei Iesu hna hë angatr troa itre sine huliwa i nyidrë.

Tha fene loi kö la trongene cainöj i angatr e Galilaia! Eje hi, hlemu catre hë Iesu, ke “kola qeje nyidrë ngöne la Suria asë,” me ngöne la treene lao traon hna hëne ka hape, Dekapoli, nge uti fe hë kowe la ketre götrane lo Hneopegejë Ioridrano. (Mataio 4:24, 25) Ame hnene la ka ala nyimu qa ngöne la itre götrane cili, me qa Iudra, hna nyiqaane xötrethenge Iesu me itretre drei nyidrë. Ala nyimu fe la itre ka traqa fë wezipo koi nyidrë. Nge eje hi, tha luzi kö la tronge i angatr koi Iesu—ke hnei nyidrëti hna aloine la nöjei ka trene mec, me helëne la itre dremoni ka löthe la itre atr.