Meken 18

Co Pë Hë Ioane, Kökötre Kö Iesu

THUPENE la pui ne paseka ne 30 M.K., hna majemine atrune ngöne la ijine kola cia koko, kola tro qaa Ierusalema hnei Iesu me itretre drei nyidrë. Ngo thaa bëeke hmaca ju kö angatre a tro Galilaia ngöne la itre hnalapa i angatr, ngo angatre a tro ju kowe la hnepadro e Iudra, nge e cili, angatre a troa bapataisone la itre atr. Caa macatre ne hane fe hë Ioane bapataiso kuca la huliwa cili, nge hetrenyi pala kö la itretre drei nyidrë a kola xötrethenge nyidrë.

Eje hi laka, thaa Iesu kö la ka bapataisone la itre atr, ngo huliwa pe lai hna kuca hnene la itretre drei nyidrë, nyidrëti pe a tane la huliwa. Caasi hi la aliene la bapataiso i angatre me Ioane. Ame koi angetre Iudra ka xome la bapataiso cili, ke, celë hi hatrene la ietra i angatre qa ngöne la itre ngazo i angatre pine la hna triane la isisinyikeu ne la Trenge Wathebo i Akötresie. Ngo ame hë la thupene la melehmaca i Iesu, nyidrëti a inine la itretre drei nyidrë ka hape ketre pengöne pena hë la aliene la bapataiso hna troa kuca. Ame la bapataiso enehila, ke, nyine nyi hatrene la ajane la atr troa nyihlue i Iehova Akötresie.

Kola xejë la huliwa hnei Iesu. Ngacama kola isa huliwa hnei Ioane me Iesu, ngo nyidroti asë hi a inine me bapataisone la itre atr ka ietrane la itre ngazo i angatr. Ngo kola zalu hnene la itretre drei Ioane, nge angatre a qaja angazo Iesu koi nyidrë ka hape: “Rabi, . . . hana wang, nyidëti a bapataiso, nge kola tropi la nöjei ate asëjëihë koi nyidë.”

Ngo thaa zalu fe kö Ioane, nyidrëti pe a madrine la elolone la huliwa i Iesu, nge kola ajane fe tro la itretre drei nyidrë a hane madrin. Nyidrë a amekunë angatre ka hape: “Nyipunieti a nyi nyipici ni laka, hnenge hna qaja, ka hape, Tha Keriso kö ni, ngo hna upi ni pe ngöne la xajawa i nyidë.” Thupene lai, nyidrëti a hamëne la ketre ceitune ka lolo, hna hape: “Ame ate hmalan, angeice la ate xötei faipoipo; ngo ame la sine ne la ate xötei faipoipo, te kola cile dei angeice me madine ataqate qa ngöne la aqane ewekë ne la ate xötei faipoipo; tune la madinenge a eatë hë.”

Hna madrine hnei Ioane, enehmu ne la ka xötrei faipoipo, ngöne lo nyidrë a fetra fë la itretre drei nyidrë koi Iesu, sikisi hë lao treu enehila. Ala nyimu thei angatre la itre ka troa föi Keriso e hnengödrai, ene lo itre keresiano hna iëne hnei uati hmitrötr. Ame la aja i Ioane enehila, ke, tro la itretre drei nyidrë a hane xötrethenge Iesu, ngöne laka, ame lo hnëqa i nyidrë ke, ene la troa hnëkëne la huliwa i Iesu ka sisitria catre kö. Öni Ioane bapataiso ka hape: “Tro pala kö nyidëti a kököt, ngo tro kö ni a co.”

Ioane la ketre atre drei Ioane bapataiso ekö, enehila angeice hë a hane xötrethenge Iesu; tro pë hë angeice a qaja thupen, lo qaane i Iesu me hnëqa i nyidrë ka sisitria ngöne la aqane troa amelene la itre atr; öni nyidrëti ka hape: “Ame la ate qa koho, te, nyidëti hi e hune la nöjei ewekë asë. . . . Tetetroti a hnime la hupuna me nunuëtine la nöjei ewekë asë kowe la ime i nyidë. Hetenyi hë la mele ka tha ase palua kö hnene la ate lapaune kowe la Hupuna; ngo tha tro kö a öhne la mele hnene la ate tha lapaune kö kowe la Hupuna; ngo tro pala kö a të hui angeice la elëhni Akötesie.”

Itre hnepe drai thupene lo kola ithahnatane hnei Ioane bapataiso, la aqane co trootro la huliwa i angeic, kola xöleuthi nyidrëti ju hnei Herodra joxu. Hnei Herodra hna xomi Herodia, ifëneköne la trejine me angeic, ene Filipo. Nge pine laka, Ioane bapataiso a qaja amamane la itre aqane ujë cili, Herodra a akalabusi angeice ju. Ame la kola atre la ewekë cili hnei Iesu, nyidrëti a nue pe e Iudra memine la itretre drei nyidrë me tro Galilaia eë. Ioane 3:22–4:3; Ite Huliwa 19:4; Mataio 28:19; 2 Korinito 11:2; Mareko 1:14; 6:17-20.

▪ Nemene la aliene la bapataiso hna cilëmekene hnei Iesu qëmekene tro nyidrëti a mele hmaca? Nge thupene lo nyidrëti a mele qa hna mec, nemene pena ha la aliene la bapataiso?

▪ Nemene la aqane amamane i Ioane laka, ka ewekë menu la itretre drei nyidrë?

▪ Pine nemene la kola akalabusi Ioane?