Meken 26

Kola Bëeke Hmaca a Tro Kaperenauma

HLEMU hë Iesu enehila ngöne la nöj, nge ala nyimu catre la itre atr ka tro kowe la itre götrane gaa nanyi hnei nyidrëti hna pane cile troa mano. Nge, thupene la itre xaa hnepe drai, nyidrëti a tro Kaperenauma hna jëne la ngönegejë ne Galilaia. Canga atre hi la itre atrene la lapa laka, bëeke hmaca ha nyidrë, celë hi matre angatre a hilili kowe la hnalapa hnei nyidrëti hna tro kow. Kola traqa fe qaa gaa nanyi la itre Faresaio me itre ka inine la Trenge Wathebo.

Thatreine kö troa lö e hnine la uma, pine laka kola ipepetrenyi la atr ngöne la qëhnelö. E cili la kola troa kuca la ketre ewekë ka ketre pengöne kö. Ewekë ka sisitria catr, pine laka, kola xatua së troa trotrohnine laka, atreine hi Iesu troa apaatrene la qaane la itre akötre ne la atr, me troa aloine asë la nöjei ka wezipo hnei nyidrëti hna iëne troa amelen.

Ame ngöne la Iesu a inine la nöjei atr ka traqa, kola xututhe koi nyidrë hune la göhnë la ketre atr ka geny, hnene la foa lao trahmany. Angatre a hane ajane tro Iesu a aloine la meci ne la enehmu i angatr, ngo thatreine kö angatre troa lö hnine la uma, pine laka, pë hë caa göhnë. Drei la ketre hace ka tru! Angatre a thele jëne troa traqa kowe la mekune i angatr. Angatre a elë jë hune la uma, me fe qene ej, me nuenue koi Iesu la atr ka genyi memine la göhnë i angeic.

Hapeu, wesitre kö Iesu pine la hna thupa la nyidrëti a ini? Ohe! Nyidrëti pe a haine la ejuine la lapaune ne la itre atr cili. Öni nyidrë kowe la atr ka genyi ka hape: “Ase hë nue tije la ite ngazo i’ ö.” Ngo, hapeu ijiji Iesu kö troa senge la itre ngazo? Xele kö la itretre cinyihan, me itre Faresaio ma kapa la mekune cili. Öni angatre a emane ekuhu itre hni angatre ka hape: “Dei la ka pi tru koi Akötesie? Drei la ka atreine troa nue tije la nöjei ngazo, nga Akötresieti hi?”

Atre hë Iesu la itre mekune i angatr, matre öni nyidrëti koi angatre ka hape: “Hna uë nyipunie laka mekune la ngazo e kuhu ite hni nyipunie? Ke nemene la ka hmaloi? Troa qaja ase hë nue tije la nöje i ngazo i’ ö? Nge troa hape, Cile jë me tro?”

Jëne la ewekë hnei nyidrëti hna troa kuca, Iesu a aijijëne me amamane kowe la itre atr memine fe la itre ka xöjetriji nyidrë, laka, ijiji nyidrë troa nue la itre ngazo ne la itre atr e celë fen, nge nyidrëti hi la atr ka tru hune la nöjei atr e celë fen. Nyidrëti a ujë jë kowe la atr ka genyi me hape: “Cilejë, xomejë fe la göhne i’ ö, nge tro jë kowe la uma i’ ö.” Ame hnene la atr hna cil, me lö fë pi la göhnë i angeic, nge kola igoenyi asë la nöjei atr! Angatre a hai, me atrunyi Akötresie, kola hape: “Öhne hë shë ngöne la drai celë la ite ewekë ka kete pengöne kö!”

Maine epuni a öhn, Iesu a amamane hnyawa laka, ame la kola wezipo la atr, ke, pine laka, ka ngazo angeic; nge ijije hi troa egöcatre me wië la mel, e hna senge trije la itre ngazo i angeic? Kola qaja hnei Tusi Hmitrötre ka hape, hna kuca la ngazo hnei Adamu keme së, nge easë asë a xeni pune la ngazo i angeic, ene laka, easë a wezipo me mec. Ngo fene la musi ne la Baselaia i Akötresie, tro Iesu a senge trije la itre ngazo ne la nöjei atr asë ka hnimi Akötresie me nyihlue i Nyidrë, nge e cili tro ha paatre palua la itre meci asë. Drei kö elanyi la ketre manathithi hna troa kapa! Mareko 2:1-12; Luka 5:17-26; Mataio 9:1-8; Roma 5:12, 17-19.

▪ Qeje pengöne jë la aqane traqa ne la ketre ewekë ka ketre pengöne kö?

▪ Tune kaa la aqane traqa la atr ka genyi koi Iesu?

▪ Nemene la kepine matre, itre atr ka ngazo asë hi së, ngo nemene la aqane aijijë së hnei Iesu troa mejiune laka, troa senge trije elanyi la itre ngazo së, nge tro fe së a egöcatre me wië la mele së?