Meken 29

Itre Huliwa Ka Lolo Hna Kuca Hnei Iesu Ngöne La Sabath

EASË ngöne la ijine eleng, macatre 31 M.K. Nyimutre hë la itre treu ka paatre hë, thupene lo ijine Iesu a porotrike memine la föe ne Samaria, hnei nyidrëti hna öhne lo nyidrë a tro qaa Iudra a tro Galilaia.

Thupene la hnei Iesu hna cainöje ngöne la nöje Galilaia asë, nyidrëti a tro pi a tro Iudra, nge e cili, nyidrëti a cainöje hnine la itre sunago. Mana nge sisitria catre kö la itre huliwa i Iesu e Galilaia hune e Iudra; co hi la hna qaja hnei Tusi Hmitrötr ngöne la huliwa i nyidrë e Iudra, tune mina fe lo itre treu ne cainöje nyidrë e cili, thupene lo paseka. Kola amamane laka, thaa hna kepe nyidrëti hnyawa kö e Iudra, thaa hna tune kö e Galilaia.

Easenyi hë matre xome jë Iesu la gojenyi ne tro Ierusalema, lo traone ka tru ne Iudra, e cili kola troa atrune la Paseka ne 31 M.K. Eje e Ierusalema ngöne la Qanahage ne Mamoe la an, Betheseda la ëjen, hna traqa itronyi la itre ka wezipo, itre ti mek, me itre peje ca. Angatre a lapaune laka, ijije hi troa loi la itre trene mec, e hna sesë hnine la an ngöne la kola emuemu la tim.

Ngöne la drai sabath, Iesu a öhne ezine la an, la ketre atr ka wezipo, 38 hë lao macatre. Atre hë Iesu laka, ekö hë akötre fë hnene la atr la meci angeic, haawe, öni nyidrëti e hnyingë angeice ka hape: “Aja i’ ö troa mel?”

Angeice a sa koi Iesu ka hape: “Joxu, pëkö ate kepe ni kowe la ani e kola emuemune la tim; ke ini pete hi a uti ene pe saqepi la kete.”

Iesu a qaja koi angeice ka hape: “Cilejë xomejë fe la göhne i’ ö nge trojë.” Ame hna canga mele la atr, nge angeice a xome jë la göhne i angeice me tro!

Ngo ame la kola öhnyi angeice hnene la itretre Iudra, angatre a qaja ka hape: “Sabathi lola; thaa ijiji’ ö kö troa ajöne la göhnë.”

Kola sa koi angatre hnene la atr ka hape: “Hnene la ate hna amele ni hna hape koi ni, Xomejë la göhne i’ ö, nge trojë.”

Öni angatre e hnyinge ka hape: “Dei la ate qaja koi’ ö ka hape, ‘Xomejë la göhne i’ ö nge trojë’?” Ame Iesu ke, hnei nyidrëti hna ananyine lai, pine la ka ala nyim, nge thatre kö la atr hna aloine mecine la ëje i nyidrë. Thupene lai, nyidroti a iöhnyi hnine la ēnē, nge kola atre e cili hnene la atr laka Iesu la atre aloine la meci angeic.

Haawe, angeice a tro pi troa thuemacane la itretre Iudra laka, Iesu la atre aloine la meci angeic. Ame la kola atre lai hnene la itretre Iudra, angatre a tro troa wai Iesu. Pine nemen? Hapeu, angatre kö a ajane troa atre la qaane la mene ka eje thei nyidrë, ene la troa kuca la itre iamamanyikeu cili? Ohe. Kolo pe a troa jele ngazo nyidrë, pine kuca la itre huliwa ka lolo cili ngöne la drai sabath. Nge angatre fe a thele iwesitrë me nyidrë! Luka 4:44; Ioane 5:1-16.

▪ Ije treu hë thupene la iwai hnapine i Iesu e Iudra?

▪ Pine nemene matre tru catre hnei atr ngöne la ani e Betheseda?

▪ Nemene la iamamanyikeu hnei Iesu hna kuca ngöne la ani cili, nge nemene la mekune ne la itretre Iudra?