Meken 32

Nemene La Ka Ijije Troa Kuca Ngöne La Drai Sabath?

AME ngöne la ketre drai sabath, Iesu a lö hnine la ketre sunago, ezine la hnagejë ne Galilaia. Hanawang, eje e cili la atre fitre im. Kola elemekë Iesu hnene la itretre cinyany, me itre Faresaio, me wange maine tro jë Iesu a aloine la atr. Haawe, angatre a hnyingë nyidrë ka hape: “Hmitöte troa iamele ngöne la sabath?”

Kola mekune hnene la itre hene hmi ne Iudra ka hape, meköti e troa aloine la ka wezipo ngöne la sabath, e maine ka tro hë a mec. Ketre, angatre a inine fe la itre atr laka, ngöne la sabath, hna wathebone troa aloine la atr hna ela wanakoimene maine wacan, maine troa atuthe la eatrene la ketre atr. Haawe, kolo hi a hnyinge koi Iesu hnene la itretre cinyany, me itre Faresaio, matre troa thele kepine troa upe zö nyidrë.

Ngo atre hnyawa hi Iesu la itre mekune i angatr. Ketre, nyidrëti fe a öhne laka, ase hë angatre sasaithi tulu, nge isazikeu catre memine la hna amekötine hnei Akötresie, ene laka thaa tro kö a huliwa e sabath. Qa ngöne lai, Iesu a hnëkë troa ithahnata me angatr, ngöne la kola qaja kowe la atr ka fitre ime ka hape: “Mejë jë, cile jë ngöne la nyipin.”

Iesu a ujë jë kowe la itretre cinyanyi me itre Faresaio, me qaja ka hape: “Dei e nyipunie tene mamoe e kei la kete kowe kuhu hnaope ngöne la sabath, te, tha tro kö angeic’ a xölehuj, me ea hmaca ej?” Pine laka, ka tru alamekene catre la thupene la mamoe, thaa tro jë kö angatre a nue eje ngöne la hnaop, uti hë e hmakany wanga wezipo pi, nge luzi pi la mamoe. Haawe, Itre Hna Cinyihane a qaja ka hape: “Ame la ate ka meköti kola hnime la si angeic.”

Iesu a qaja ju la pengöne la lue ceitune cili, öni nyidrë: “Nge hape u, tha sisitia la ate hune la mamoe! Celë hi mate loi troa kuca la loi ngöne la sabath.” Thatreine kö la itre hene hmi troa qeje ketre ithahnata hune la mekune cili, matre angatre a lapa thaup, pine laka, pëkö trenga thoi ngöne la hna qaja, nge trenge ithahnata ka hetre hni ne ihnimi ngön.

Iesu a goeë angatr, ngo wesitre me hace thei nyidrë pine la aqane pi hune i angatr. Öni nyidrë kowe la atr ka hape: “Shathepi la ime i ’ö.” Kola drenge thenge hnene la atr, nge loi pi hi la ime i angeic.

Thaa madrine pi kö itre Faresaio, ngo angatre pe a lö pi me ce ithahnatane memine la itre atre i Heroda, troa humuthi Iesu. Ame la itre atre i Heroda, ke, kolo hi lo angetre kuci politik, a hna lö hnine fe hnene la itre saducea. Eje hi laka, ka imethinë catre la itre atre i Herodra me itre Faresaio, ngo angatre hë a caas, ke kola troa icilekeu me Iesu. Mataio 12:9-14; Mareko 3:1-6; Luka 6:6-11; Ite Edomë 12:10; Esodo 20:8-10.

▪ Nemene la aqane kuca i Iesu matre troa cile kowe la itre hene hmi ne Iudra?

▪ Nemene la mekune ka eje thei angetre Iudra göi troa amelene la itre atr ngöne la sabath?

▪ Nemene la ceitune hnei Iesu hna hamën, nyine troa lepe trije la aqane mekune i angatre ka ngazo?