Meken 36

Lapaune Ka Tru Ne La Ketre Tane Isi

IESU a traqa ngöne la nyipine la huliwa i nyidrë, nge nyidrëti a hamëne la Cainöje i nyidrë hune Wetr. Matre kösë lo caa macatre nge naene pe hi lao treu, matre umuthe pi hë la huliwa i nyidrë e celë fen.

Iesu a traqa kowe la traone e Kaperenauma, traone hnei nyidrëti hna hnëkë troa cainöje ngön. Haawe, kola traqa pi koi nyidrë la itre qatre ne Iudra troa sipo nyidrëti la ketre ewekë. Hna upi angatre hnene la ketre tane isi, ketre atre etheni, a thaa atre Iudra kö.

Hetrenyi la ketre hlue hnei angeice hna hnim, a kolo ha troa paatre la hna mano, pine laka, hna tithe hnene la ketre meci ka tru; nge nyidrëti a ajane tro Iesu a aloine la meci ne la hlue i angeic. Itretre Iudra a sipone iele Iesu troa kapa la sipo ne la tane isi? Öni angatre ka hape: “Ijiji angeice la hnei cilieti hna troa kuca la ewekë kow; ke angeic’ a hnime la nöje shë, nge ase hë angeic’ acile la sunago hun.”

Iesu a xötrethenge angatre ju. Nge easenyi hë nyidrëti kowe la uma, ame hnei keneturio hna upe koi nyidrë la itre sinee i angeic, troa qaja la maca celë hna hape: “Joxu fe hmenengëtiju, ke tha ijiji ni kö jötëti enëtilai a thithati kowe la enengö. Celati nöngöti hna mekuatine tha ijiji ni kö jötëtia ithuëti kowati cilie.”

Kola mama la ipië ne la keneturio, angeice lo ka majemine upe la itre xaa atr! Ngo eje hi laka, angeice fe a meku Iesu, pine laka, atrepengöne hi angeice la qene nöje ka wathebone la angetre Iudra troa ce tro memine la angetre etheni. Hna qaja fe hnei Peteru ka hape: “Ate hë nyipunie laka, hmitöte kowe la ate Iuda troa icasikeu me iashenyi memine la ate ne la kete nöj.”

Maine jë kola neëne hnene la keneturio, wanga triane pi Iesu la hna amekötine hnene la qene nöje i nyidrë, nge traqa pi la pune ka ngazo; qa ngöne lai, angeice a upe la itre sinee i angeice troa qaja ka hape: “Jiniati ithuëti enëtilai a könietine hi, nge jötëtia shewengönieti la zinemunangö. Ke inieti fene la mus, nge olongangöti koi kete, ‘Trojë,’ nge nyën’ a tro; nge kowati la kete, ‘Trohemi,’ nge nyën’ a tro koi ni; nge kowe la hlueng, ‘Kucajë lai,’ nge nyën’ a kuca.”

Haawe, ame la Iesu a drenge lai, nyidrëti a hai. Öni nyidrëti ka hape: “Ini a qaja koi nyipunie, tha öhne kö ni e Isaraela la lapaune atraqate ka tune lai.” Thupene la hna aloine la meci ne la hlue ne la keneturio, Iesu a amamane ju e cili laka, tro ha hamëne koi angetre etheni, angetre lapaune la itre manathithi hna thipe trije hnene la angetre Iudra ka thaa lapaune kö.

Iesu a qaja ka hape: “Ala nyimu troa tropi qa kohië me kuë, troa ce lapa me Aberahama, me Isaka, me Iakobo, ngöne la baselaia e hnengödrai. Ngo tro ha kuën’ e kuhu ga jidi la ite nekö ne la baselaia; tro ha teije me kiki la inyö e cili.”

“Ame la ite nekö ne la baselaia . . . hna kuën’ e kuhu ga jid,” angatre hi lo itre sipu angetre Iudra ka thaa kapa kö la hnëqa hna pane hamë angatr, ene la troa ce musi me Keriso. Aberahama, me Isaka, me Iakobo, angatre a nyi hatrene la hna amekötine hnei Akötresie, ene la Baselaia i Nyidrë. Iesu a thingehnaeane laka, tro ha kapa la itre etheni ngöne la treipel e hnengödrai, ‘ngöne la baselaia ne hnengödrai.’ Luka 7:1-10; Mataio 8:5-13; Ite Huliwa 10:28.

▪ Pine nemene matre kola xëwe fë la ketre keneturio hnene la angetre Iudra, ngo thaa atre Iudra pe?

▪ Nemene la kepine matre thaa könë Iesu kö hnene la keneturio troa lö kowe la uma i nyidrë?

▪ Nemene la aliene la trenge ewekë i Iesu, ngöne la itre hnei nyidrëti hna qaja tixenuë?