Lapaune Ka Tru Ne La Tane Isi

Thupene la Iesu a ase cainöj hune la wetr, nyidrëti a tro ju e Kaperenauma. E cili, hna traqa koi Iesu la itre xa qatre i angetre Iudra. Hna upi angatr hnene la ketre atr—ketre tane isi i angetre Roma, atre mus kowe la ca hadredre lao sooc.

Wezipo hnyawa ha la hlue hnimina ne la tane isi, nge nyëne hë a troa mec. Ngacama atre ne fen lai tane isi, ngo hnei angeic hna sipo ixatua koi Iesu. Matre hnene la angetre Iudra hna qaja koi Iesu ka hape, nyën a ‘meköl e koilo hnalapa, ke thatreine hnyawa ha enij,’ ma tru catre la akötre i nyën. (Mataio 8:6) Nge angatr a iele fë jë lai tane isi, me hape: “Ke, ka tru la nöje së koi angeic, nge goi xupe fe angeic la sunago së.”—Luka 7:4, 5.

Thupene lai, Iesu a canga tro ju me itre qatr kowe la hnalapa ne lai tane isi. Ngo ame ju hi la angatr a easeny kowe la hnalapa, hnene la tane isi hna upe la itre sinee i angeic troa qaja koi Iesu ka hape: “Joxu, the ajolë nyipëti kö, ke nemene ni matre troa kepe nyipë ngöne la hnalapang. Celë hi matre tha tro kö ni koi nyipë ke tha ijijinge kö.” (Luka 7:6, 7) Drei la aqane ipië ne la trene mus! Nge kolo fe a mama la eisapengöi angeice me angetre Roma ka majemine qanangazon la itre hlu.—Mataio 8:9.

Atre hi la tane isi ka hape, tha angetre Iudra kö a nyi sineene la itre xa nöj. (Itre Huliwa 10:28) Ma celë hi ka uku angeic troa upe koi Iesu la itre sinee i angeic, matre troa qaja ka hape: “Qaja ju hi la ketre ewekë, nge tro la hlueng a egöcatre.”—Luka 7:7.

Iesu a sesëkötre la nyidrëti a drenge lai, matre öni nyidrë: “Eni a qaja hnyawa koi nyipunie, tha hane kö ni öhne la ketre atr ka lapaune tun e Isaraela.” (Luka 7:9) Matre itre sinee ne la tane isi a bëeke ju kowe la hnalapa, nge traqa ju hi angatr a öhne lo ka wezipo a egöcatre hmaca ha.

Matre Iesu a amexeje jë laka, tro fe a hane amanathithine la itre atre ne fen ka lapaun. Öni nyidrë: “Tro ha traqa la ka ala nyimu qa koië me kuë, itre ka troa ce elë troa xen me Aberahama, me Isaaka, me Iakobo ngöne la Baselaia ne hnengödrai.” Nge tune kaa koi angetre Iudra ka tha lapaun? Öni Iesu, “tro ha helëne kowe la jidr e kuhu trön. . . . Nge e cili, tro angatr a treije me latresi.”—Mataio 8:11, 12.

Haawe, tro ha thipetrije la angetre Iudra ka xele ma kapa lo pane ihë göi troa ce lö me Keriso kowe la Baselaia. Ngo tro pe la itre atre ne fen a ce elë troa xen, “ngöne la Baselaia ne hnengödrai.”