Meken 43
Iesu a Ini Jëne La Itre Ceitun
KOLA mekune laka, ma Iesu e Kaperenauma ngöne lo ijine nyidrëti a pane shewe itre faresaio. Ngöne la drai cili, nyidrëti a tro pi kowe la hnagejë e Galilaia, nöje ka easenyi qaa cili hnei nyidrëti hna lapa ngön, nge kola traqa itronyi la itre atr koi nyidrë. Iesu a elë jë hune la ketre bootr, me nango ananyine la zanehngala me nyiqaane inine la itre atr ka ilapanyi pe ezine la hnagejë; nyidrëti a qeje pengöne koi angatre la Baselaia ne hnengödrai jëne la itre tulu me itre ceitune hna xome qa ngöne la aqane mele ngöne la nöjei drai.
Iesu a pane qaja jë la ketre atr ka eëny, angeice a tro troa traa feja. Nyimutre la itre itine feja ka mala e kuhu pala gojeny, ame hna traqa pi la itre waco me xeni itre ej. Itre xane a mala hune la gaa tëtë. Nge pine laka, thaa hmeköni kö la dro me catrecatre la itre iwane ne la itre feja ka xötrei fetra, haawe, canga dreuthe ju hi itre eje hnei jö, ame hna fitre ju itre ej. Ame pena itre xan, itre eje a mala e nyipine la itre hnitre ka ithiny, ame hna cia jë la itre hnitre ka ithinyi a thahe itre ej. Ame itre xaa itine feja, itre eje a mala hune la hnadro ka loi, ame hna wa pi, itre xane a isa caa hadredr, nge itre xane isa sikisitre, nge itre xane isa thötre qa ngöne la caas.
Ngöne la hnaaluene ceitun, Iesu a aceitunëne la Baselaia i Akötresie memine la ketre atr ka jumi itine feja. Kola tro la itre drai, kola meköle la atr me hlë e hmakanyi a öhne la feja a cia. Thatre pengöne kö la atr celë la aqane ciane la feja. Kola cia xane la feja me hamë wen. Ame la kola macaje la wene ne lai sinöe, haawe, kola menuëne hnene lai atr.
Iesu a qaja ju la hnaakönine ceitun, ene la ketre atre traane la itre itine feja ka loi. Ngo ame la kola “meköle la nöjei ate,” kola tro pi la ithupëjia me traane trane la qite hnei zizania. Kola hnyingë nyidrëti jë hnene la itre hlue i nyidrë, maine ijije troa feje la feja ka ngazo. Ngo öni nyidrëti ka hape: ‘Ohea, the feje kö la zizania, wanga fejejë fe la qitr. Loi kö tro lu’ ej’ a ce cia utihë la troa menue; Nge ngöne la ijine menue, tro ni a qaja koi angete menue, ka hape, Pane ce wange jë la zizania, me ukëne me otheju nyine deuthe tij; ngo umënejë la qite hnine la uma qazing.’
Iesu a sisedrëne trongëne la cainöje i nyidrë, me hamëne hmaca la lue xaa ceitune kowe la itre atr ka icilenyi ngöne la zanehngala. Nyidrëti a qeje pengöne koi angatre ka hape, ame la “baselaia ne hnengödai” ke, ceitune eje memine la wene sinapi hna traane hnene la ketre atr. Ngacama celë pe hi wene ka co ne la nöjei itine feja, ngo ame pe la kola cia, eje la ka tru ne la nöjei sinöe ka wagapa. Eje a cia me nyi isinöe hna troa nyi hnë zae ne la itre waco.
Itre xaa atr a jele thoi Iesu me qaja ka hape, hetrenyi kö enehila la itre itine feja ka co catre pala kö hune la wene sinapi. Ngo thaa Iesu kö la a hamë ini göi troa inine troa traa feja. Caasi hi la itine feja ka co pe hune la nöjei itine hna atre hnene la itretre Galilaia ngöne la hneijine i angatr, ene la wene sinapi. Qa ngöne lai, angatre a trotrohnine laka, Iesu a qaja la ceitune cili matre, troa amamane la mana me hatr.
Ame hë ngöne la pun, Iesu a aceitunëne la “baselaia ne hnengödrai” memine la levene hna xome hnene la ketre föe me ilonekeune memine la farine ka köni tulu. Kola tro la itre drai, nge kola lapane la farine hnene la levene.
Thupene la hnei Iesu hna hamëne lai faifi lao ceitun, nyidrëti a upe ju la itre atr troa isa bëeke koi hnalapan, nge nyidrëti pë hë a tro kowe la uma hnei nyidrëti hna lapa ngön. Nge kola canga tro koi nyidrë hnene lo ala 12 lao aposetolo i nyidrë me itre xaa atr ju kö.
Kola Kepe Thangane La Itre Ceitune i Iesu
Kola thele troa atre hnene la itretre drei Iesu la aqane ini nyidrë ka hnyipixe, thupene lo cainöje i nyidrë kowe la itre atr ngöne la zanehngala. Nyipici, ase hë angatre e cili lo drei nyidrë lo kola hamëne la itre ceitun, ngo thaa hna tune kö la. Matre angatre a hnyingë nyidrëti ju ka hape: “Hna axajanëti kati enëtilai laka ulatine koi angate la ite ceitun?”
Nyine tro lai a eatrëne la itre trenge ewekëne la ketre perofeta, hna hape: “Tro ni a fe pi la ukeineqenge ngöne la nöjei cei tun; tro ni a qaja la nöjei ewekë ka sihngödi qane la hna ami tepene la fene hnengödrai.” Ngo thaa celë hmekuje kö la sipu kepine lai. Iesu a hamëne la itre ceitun, pine laka, nyidrëti a ajane troa mama la thiina ka eje e kuhu hni ne la itre atr.
Eje hi laka, ala nyimu la ka thele Iesu, pine laka, ka atreine nyidrë troa ithahnata, me kuca la itre iamamanyikeu, ngo thaa kolo kö la troa hane nyihlue i nyidrë pine laka ketre joxu, me hujëne la mele matre troa xötrethenge nyidrë. Thaa ajane kö la itre atr cili tro la maca ne baselaia, a ketr la itre hni angatre matre hane jë fe saze la aqane tro angatre a waiewekë, maine itre hna majemine pena.
Celë hi matre, öni Iesu ka hape: “Qa ngöne lai, ini a qaja koi angatre la nöjei cei tun; ke angat’ a goe ngo tha goeëne pe, me denge ngo tha denge pe; nge tha trotrohnine kö; Nge eate hë koi angate la hna perofetane hnei Isaia, ka hape, . . . Ke pipixenyë hë la hni ne la nöje celë.”
Öni nyidrëti fe ka hape: “Ngo manathithi la ite lue meke i nyipunie, ke kola goeën, me ite hnangenyë i nyipunie, ke kola deng. Ke nyipici ini a qaja koi nyipunie, ala nyimu la nöjei perofeta me angete thina ka meköti hna ajane troa öhne la hnei nyipunieti hna goeën, ngo tha öhne pe; me troa denge la hnei nyipunieti hna deng, ngo tha denge pe.”
Eje hi laka, hetre hni ne ajane thene la ala 12 lao aposetolo, me itretre xötrethenge nyidrë. Celë hi matre Iesu a qaja ka hape: “Hna hamë nyipunie troa wangate hmekune la nöjei ewekë ka sihngödi ne la baselaia ne hnengödrai, ngo tha hna hamë angate fe kö.” Pine laka, hetre ajane la itretre drei Iesu troa trotrohnine la itre ceitun, haawe, nyidrëti a hamëne pi la itre mekune nyine troa qeje pengöne la aliene la ceitune ka qaja la atre eëny.
Iesu a qaja ka hape: “Dei lola cei tune, ka hape, wesi ula i Akötesie la ite feja,” nge ame la hnadro ke, hni ne la atr. Öni nyidrëti fe e qaja la feja ka mala hune la dro ka catr, ezine la gojeny, ka hape: “Ame hna tro pi la diabolo, me xomepi la wesi ula qa kuhu ite hni angat, wanga lapaune angat, ame hna mele pi.”
Ketre, ame la hnadro gaa tru etë, hna kei hun hnene la itine feja, te, celë hi hatrene la aliene hni ne la itre atr ka kapa la Wesi Ula cememine la madrin, ngo hnene laka, thaa cia loi kö la itre iwane ne ej, haawe, canga kei hi angatre qëmekene la itre itupathi me itre icilekeu.
Iesu a qaja fe ka hape, ame la itine feja ka mala e nyipine la itre hnitre ka ithiny, ke, celë hi pengöne lo itre atr ka drenge la Wesi Ula ngo hna huli angatre hnene la itre ejolene la mel, me itre mo, me itre nyine madrin, matre ase hnyawa ha he la lapaune i angatr, nge thatreine hë troa kuca hnyawa la loi.
Iesu a nyipune me hape, ame la itine feja tixenuë ke, celë hi hna jume hune la hnadro ka loi, ene lo itre atr, ka drenge la Wesi Ula cememine la hni ka lolo, me ka menyik, nge angatre a lapa xome ej, me wawen hna xomihni ahoeany.
Drei la manathithi kowe la itretre drenge ka tro koi Iesu troa thele la aliene la itre ini hnei nyidrëti hna hamën! Ame la aja i Iesu, ke, ene la troa trotrohnine hnyawa hnene la itre atr la itre ceitune hnei nyidrëti hna hamën, matre troa hane qaja fe la nyipici kowe la itre xan. Nyidrëti a hnyinge me hape: “Hapeu hna xome la lamepa troa amë fene la kumete ma göhnë pena?” Ohe, “troa atë hune la tan.” Haawe, nyidrëti a ithuecatre ju me hape: “Wange kö la hnei nyipunie hna deng.”
Manathithi Hë Qa Ngöne Laka Ketre Ini Ka Tru
Thupene la hnei Iesu hna qeje pengöne la ceitune ne la atre eëny, kola ajane catrëne hnene la itretre drei nyidrë troa kapa pala hi la itre ini qaathei nyidrë. Angatre a hnyinge ka hape: “Amamai pengöwatine jë koi huni la cei tune memine la zizania ne la hlapa.”
Isa pengöne catre la aqane ujë ne la itretre drenge memine la iatre ka cacaxenyi ngöne la hnangöni! Pëkö caa aja ne la itre atr cili troa atre la aliene la itre ceitun; angatre hi a pi drenge la itre mekune ka tru, nge hna hmaca hi e cili. Iesu a amamane ju la eisapengönene la itre ka drenyidrë ngöne la hnangöni memine la itretre drei i nyidrë ka pi thele ewekë ka traqa koi nyidrë kowe la hnalapa; öni nyidrë:
“Ke ame la tulu hnei nyipunie hna tuluth, te, tro pena a tuluthe koi nyipunie, nge troa nyixane koi nyipunie.” Lolo la aqane tuluthi Iesu hnene la itretre drei nyidrë, ngöne laka, hetre hni ne ajane thei angatr, nge angatre a drei nyidrëti hnyawa; qa ngöne lai, manathithi angatr, pine laka, pexeje la ini hnei angatre hna kapa. Iesu a sa la hnyinge ne la itretre drei nyidrë, me qeje pengöne ka hape:
“Ame la ate trane la wene ka loi, te, nekö i ate; nge ame la hlapa te, fene hnengödrai; nge ame la wene ka loi, angate la ite nekö ne la baselaia; nge ame la zizania te, angate la ite nekö ne la ate ka ngazo; nge ame la ithupëjia ate tran, te, nyëne la diabolo. nge ame la menuëne, te pune la fen; nge ame angete menue, te, ite angela.”
Thupene la hnei Iesu hna qeje pengöne la itre wapicine ne la ceitune hnei nyidrëti hna hamën, nyidrëti a nyipune ju la hna ithahnata. Öni nyidrëti ka hape, ngöne la pune la fene hnengödrai, tro la itre ka menuëne la hlapa, ene lo itre angela, a thawaluëne la itre keresiano thoi hna aceitunëne memine la zizania, memine la itre nyipi hlue i Akötresie, ene lo itre “nekö ne la baselaia.” Haawe, tro ha nyihatrene la “ite nekö ne la ate ka ngazo,” matre troa apaatrenyi angatr, nge ame koi itre neköne la Baselaia, ene lo “angete thina ka meköt,” tro hë angatre a hlemu loi ngöne la baselaia ne la Tretretro.
Hetre thangane la pi atre ne la itretre dreng, pine laka, Iesu a hamëne hmaca koi angatre la köni xaa ceitun. Hanawange la hnapan, öni nyidrë: “Ame la baselaia ne hnengödrai, te, tune la tenga mo hna juetëne ngöne la hlapa; hna öhne pena hnei kete at, ame hna juetëne pi hnei angeic; ame hnei angeice hna tro ju me itöne la nöjei ewekë asë i angeice ke madinë hë, me itöne la hlapa cili.”
Öni nyidrëti fe ka hape: “Dei hmaca la, ame la baselaia ne hnengödrai, te, tune la ate itö, kola thele la ite penina ka lolo. Nge öhnë hë angeice la kete penina ka tru alameken, ame hnei angeice hna tro me [“salemëne,” MN ] la ite ewekë i angeice asë nyine thupen’ ej.”
Ceitui Iesu memine lo atr ka öhne la trenga mo hna juetrën; maine ketre atre itö, a kola öhne la ketre penina ka tru alameken. Hnei nyidrëti hna salemëne asë, ene laka, hnei nyidrëti hna nue la ketre göhnë ka draië e hnengödrai matre troa ketre atr ka hni ka ipië. Nge ngöne la ijine mele i nyidrëti e celë fen, hna qaja angazonyi nyidrë me akötrë nyidrëti menu; nyidrëti hi lai a amamane laka, ijiji nyidrë troa tane la Baselaia i Akötresie.
Ketre itupathi ka tru fe kowe la itretre dreng, ene la troa salemëne asë la itre ewekë i angatr, matre troa hetrenyi la ahnahna ka sisitria; maine troa ce joxu me Iesu, maine troa itre atrene pena la Baselaia e celë fen. Hapeu, easë kö a goeëne la hnëqa së kowe la baselaia, kösë ewekë ka sisitria kö hune la nöjei ewekë asë, maine ketre trenga mo hna thatreine qeje thupen, maine ketre penina ka tru alameken?
Iesu a nyipune la cainöje i nyidrë me aceitunëne la “baselaia ne hnengödrai” memine la ieötr hna hule trongën, a kola hleme asë la nöjei pengöne ie. Ame la kola ase iëne la itre ie ke, kola trije ju la itre ka ngazo, nge hna xome pë hë la itre ka lolo. Qa ngöne lai, öni Iesu ka hape, celë hi ewekë lai ka troa traqa ngöne la pune la fene hnengödrai; tro la itre angela a thawa luëne la itre atr, itre ka ngazo me itre ka meköt; nge tro ha apaatrene la itre atr ka ngazo.
Iesu a ketre nyiqaane jë la aqane nyi ie cili, me hëne la itretre drenge ka pane drei nyidrë troa itre ka “axena at.” Kola elemekene hnene la itre angela, la huliwa ne nyi ie ngöne la nöjei hneijin. Ame hë ngöne la pun, ijine troa ea la “eöt,” ene lo itre organizasio asë ne la ihnadro ka hane siejëne menu ka hape itre keresiano fe angatr, memine fe la ekalesia ne la itre Keresiano hna iën.
Ngacama troa trije me apaatrene la itre ie ka ngazo, madrine pe së laka, hna hane e së fe ngöne lo itre ‘ie ka loi’ hna xome pe. Maine tro së a xome la tulu hna amë pe hnene la itretre drei Iesu, ene la troa hetrenyi la ajane troa inine me trotrohnine hnyawa la itre hna qaja, haawe, tro hë së a manathith, a thaa hnene hmekuje kö la troa kapa la ketre ini ka pexej, ngo ene pe lo ahnahna qaathei Akötresie, ene la mele ka thaa ase palua kö. Mataio 13:1-52; Mareko 4:1-34; Luka 8:4-18; Salamo 78:2; Isaia 6:9, 10.
▪ Eu nge ekaa la götrane lo hnei Iesu hna hamëne la itre ceitune kowe la itre atr?
▪ Nemene lo faifi lao ceitune hnei Iesu hna hamëne kowe la itre atr?
▪ Pine nemene matre Iesu a qaja ka hape, ame la sinapi, ke celë hi itine ka co pe hune la nöjei itine asë?
▪ Pine nemene matre Iesu a hamëne la itre ini jëne la itre ceitun?
▪ Nemene la aqane ujë ka isa pengöne hna öhne thene la itretre drei Iesu, memine la itre atr?
▪ Nemene la aqane qeje pengöne Iesu la ceitune ne la atre eëny?
▪ Nemene la ka aisapengönëne la itretre drenge memine la itre atr ka ilapanyi ngöne la hnangöni?
▪ Drei maine nemene la hna nyihatrene hnene la atre eëny, me hlapa, me itine ka lolo, me ithupëjia, me meledrai, me angetre troa menue?
▪ Nemene lo köni xaa ceitune hna hamëne hnei Iesu, nge nemene la ini hne së hna xome qa ngöne itre ej?