Ita Ne Thup göi 21 Semitrepa
Nyima 16 me 93 Qene Drehu
Akötresieti La Atre Acian!
“Tha nyipi kö la ate tran, kete tha nyipi kö la ate fi, ngo loi pe Akötesie ate acian.”—1 KOR. 3:7.
1. Nemene la aliene la hna qaja ka hape, ame së, tre, itretre “ce huliwa tro kö me Akötesie”?
“CE huliwa me Akötesie.” Drei la aqane qeje pengöne hnei Paulo la hnëqa hne së asë hna kapa madrin. (E jë la 1 Korinito 3:5-9.) Ame la hnëqa cili hnei Paulo hna qaja, tre, ene la huliwa ne troa inine la itre atr. Hnei nyidrëti hna aceitunëne lai memine la kola traane me fie la ketre itine feja. Maine easa ajane troa kepe thangane ka loi qa ngöne la huliwa ne iamele celë, haawe, nyipi ewekë tro sa thele ixatua qaathei Iehova. Paulo a amekunë së laka, “Akötesie [la] ate acian.”
2. Pine nemene matre kola xatua së troa tuluthe la aqane goeëne së la huliwa ne cainöj, hnene laka ‘Akötresie la Atre acian’?
2 Kola xatua së hnene la ewekë celë troa tuluthe la aqane goeëne së la huliwa ne cainöj. Maine jë ka maca së troa cainöj me inine la itre atr, ngo ame hë la kola bapataiso la ketre atr, tre, Iehova la nyine troa atrun, ke, Nyidrëti la ka acian. Nge pine nemene matre easa atrunyi Iehova? Pine laka kuca ju hë së la hnei së hna atreine, ngo pëkö ala caasi e easë ka ijij troa akökötrene la aqane imelekeu ne la ketre atr me Iehova, nge thaa ijiji së kö troa thupëne matre troa catre catr la aqane imelekeu cili. Hnei Solomona Joxu hna qeje pengöne hnyawa la ewekë cili; öni angeic e cinyihan, ka hape: “Tha’te kö eö la ite huliwa i Akötesie ate kuca asë.”—Ate cai. 11:5.
3. Nemene la eceitunene la troa tra itine feja memine la troa inine la itre atr?
3 Hapeu, tro jë kö a gufa la huliwa së hnene laka, thatreine kö së troa trotrohnine la aqane tro la ketre atr elany a xötrethenge Iesu? Ohea. Ngo kolo pe lai a amamane la elolon memine la enyipiewekëne la troa kuca la huliwa cili. Kola qaja hnei Solomona Joxu, ka hape: “E hmakanyi traneju la ite feja i ’ö, nge e heji the shawa kö la iwanakoime i ’ö, ke tha’ te kö eö la ka troa cia, maine celë maine cili, nge maine troa ce loi lu’ ej.” (Ate cai. 11:6) Nyipici, ame ngöne la easa jume la ketre itine feja, tre, thatre kö së la hnë tro ej a trootro ngön, maine pena tro jë kö eje a cia. Nyimutre la itre ewekë ka ajolë së. Ceitune hi lai memine la huliwa ne troa inine la itre atr. Hnei Iesu hna wanga atrune la götrane cili ngöne la lue ceitun hna qeje pengöne koi së ngöne la mekene 4 ne la Evangelia i Mareko. Loi e tro sa pane ce wange la itre ini hne së hna kapa qa ngöne lai lue ceitune cili.
Eisapengönen La Itre Dro
4, 5. Qaja jë la itre mekune ka tru ne la ceitune i Iesu göne la atre eënyi ka kukuiëne la itine feja.
4 Tune la hna qaja ngöne Mareko 4:1-9, Iesu a qeje pengöne la ketre atre eënyi kola troa jumejume maine kukuiëne pena la itre itine feja ngöne la itre dro ka isapengön, öni nyidrëti ka hape: “Dengeju, hana wang, kola tro pi la ate eënyi a troa tran; nge angeic’ a kukuiën, ame hna malapi ite xan’ e kuhu pala gojeny, ame hna traqapi la ite öni ka sheshë a xen’ it’ ej. Nge hna mala ite xane hune la ga tëtë, tha hmeköni kö la dro, ame hna canga ciajë, ke tha hmeköni kö la dro; nge ho hë la jö, ame hna fitepi, mate meciju, ke pëkö iwan. Nge hna malapi ite xane nyipine la ite sinöe ka ithiny, ame hna ciajë la ite sinöe ka ithinyi a thahe it’ ej, mate pëju wen. Nge hna malapi ite xane hune la hnadro ka loi, ame hna kekë, me cia, me wa; ame hna hete wene isa caate nge luepi, me köniate, me ca haded.”
5 Ame ngöne la hneijine ekö, ame la aqane troa tra feja, tre, ene la troa kukuiëne la itre itine feja. Kola xome hnyawa la itre itine feja hnene la atre eënyi ngöne la imano i angeice maine ngöne la ketre ge, nge thupene lai angeic a jume catrëne itre ej. Celë hi matre ame ngöne la ceitune celë, tre, thatre kö angeice la pengöne la itre dro hna trotro ngön hnene la itre itine feja. Loi pe, kola mala la itre itine feja hna jum, ngöne la itre götrane ka isapengön.
6. Tune kaa la aqane qeje pengöne Iesu la ceitune ne la atre eëny?
6 Thaa nyipi kö koi së troa thele troa trotrohnine la aliene la ceitune celë. Hnei Iesu kö hna qeje pengöne lai, ngöne Mareko 4:14-20, kola hape: “Ame la ate eënyi, te, kola trane la wesi ula. Ame la ite he pala gojeny, lo hna trane la wesi ula ngön, te, dengë hë angat, ame hna canga xulupi Satana a xomejë la wesi ula hna trane thei angat. Ame fe la ite hna trane ngöne la ga tëtë, te, angate hi a denge la wesi ula, me canga kapa madin’ ej; ngo pëkö wan’ e kuhu ite hni angat, celë hi mate tha cile huti kö e traqa ha la hleuhleu me iaxösisi pine la wesi ula, ame hnei angate hna canga jingenekë. Ame la ite hna trane nyipine la ite sinöe ka ithiny, te, angate hi a denge la wesi ula, ame hna löjë la ite mekumekune la ite ewekë ne fen, memine la iaö ne la tenga mo, me meciune göi ite xa ewekë, a cia trane la wesi ula, ame hna tha wapi angat. Ame la ite hna trane hune la hnadro ka hape loi, te, angate hi la angete denge la wesi ula, me kapa hnyawa, me hete wen, isa caate nge luepi, me köniate, me ca haded.”
7. Nemene la hna nyihatrene hnene la itine feja, memine la itre pengöne dro?
7 Kola mama laka, thaa Iesu kö a qaja ka hape, hna jume la nöjei pengöne itine feja. Ngo nyidrëti pe a qaja la caa pengöne itine feja ka mala ngöne la itre dro ka isapengön, nge ketre isapengöne mina fe la aqane cia itre ej. Ame la pane pengöne dro, tre, ka catr; ame la hnaaluen, ka tëtë; ame la hnaakönin, hna thahe hnei sinöe ka ithiny; nge ame la hnaafoan, tre, ka loi, ke, ej’ a wa. (Luka 8:8) Nemene la itine feja? Kolo hi lo maca ne la Baselaia ka eje e hnine la Wesi Ula i Akötresie. (Mat. 13:19) Nemene la hna nyihatrene hnene la itre dro ka isapengön? Kola nyihatrene hnene itre ej la eisapengönene la itre aliene hni ne la itre atr.—E jë la Luka 8:12, 15.
8. (a) Drei la hna nyihatrene hnene la atre eëny? (b) Pine nemene matre isapengöne kö la aqane ujë ne la itre atr kowe la huliwa ne cainöj ne la Baselaia?
8 Drei la hna nyihatrene hnene la atre eëny? Angeic a nyihatrene la itre hlue ka ce huliwa me Akötresie, ene lo itre ka cainöjëne la maca ka loi ne la Baselaia. Angatr a traane me fie tui Paulo me Apolose. Ngo ngacama hnei nyidroti asë hi hna isa catre huliwa, ngo isapengöne kö la itre thangane hnei nyidroti hna kapa. Pine nemen? Pine laka, isapengöne kö la itre aliene hni ne la itre atr ka drenge la maca. Ame ngöne lo ceitun, tre, thatre kö la atre eënyi la itre thangane elanyi la hnei angeice hna traa feja. Drei la kola akeukawane la itre hni së, memine fe la itre trejine me easë ka mele nyipici, me ka catre huliwa qaane hë ekö, ngo co hi la thangane hna kapa!a Pine nemene matre kola akeukawane la itre hni së hnene la götrane celë?
9. Nemene la nyipici ka keukawa hna qaja atrune hnei Paulo aposetolo me Iesu?
9 Thaa hnene kö laka ka catre huliwa hnyawa pala hi la atre tra feja, tre, tro ha mama lai ngöne la itre thangane la huliwa i angeic. Hnei Paulo hna wanga atrune la mekune cili, ngöne lo angeic a qaja, ka hape: “Tro ha isa hete thupene ka ijije la huliwa.” (1 Kor. 3:8) Kola nyithupene la atr thenge la huliwa, ngo thaa ngöne kö la itre thangane la huliwa hna kuca. Ketre, hnei Iesu mina fe hna wanga atrune la mekune celë ngöne lo kola bëeke hmaca hnene la itretre dreng qaa hna cainöj. Kola elitrauj la madrine i angatr, hnene laka kola drei angatr hnene la itre dremoni, ke, hnei angatre hna huliwan la atresiwa i Iesu. Ngacama ketre ijine madrin, ngo öni Iesu koi angatr ka hape: “Ngo the madine kö qa ngöne la hna dei nyipunie hnene la ite u [“ua”MN]; loi pe madine jë qa ngöne la hna cinyihane la ite ëje i nyipunie e hnengödrai.” (Luka 10:17-20) Ngacama pëkö thangane la huliwa ne la atre eënyi ngöne la troa inine la itre atr troa drei Iesu, ngo thaa kolo kö lai a hape, ka catre nge ka mele nyipici kö la itre xane hui angeic. Kola mama hnyawa laka, ame göi thangane la huliwa, tre, qanyine kö la aliene hni ne la atr ka drei së. Ngo ame hë ngöne la pun, tre, Akötresieti la ka acian!
Hnëqa Ne La Itre Ka Drenge La Wesi Ula
10. Nemene la ka aijijëne troa qaja ka hape, ame la ketre atr ka drenge la Wesi Ula, tre, ka ceitu maine thaa ka ceitune pena memine la dro ka loi?
10 Tune kaa fe kowe la itre ka drenge la Wesi Ula? Hapeu, hna ahnithe amë hë la aqane tro angatr a sa? Ohea. Angatre kö a troa isa iën, maine dro ka loi maine dro ka ngazo angatr. Nyipici, ka saze la hni ne la atr, maine troa ujë kowe la loi maine kowe la ngazo pena. (Rom. 6:17) Ame ngöne la ceitune i nyidrë, hnei Iesu hna qaja, ka hape “dengë hë [itre xan]” la Wesi Ula, ame hna traqa pi hnei Satana me xome trije ej. Ngo loi e thaa tro kö a traqa kowe lai. Ame ngöne Iakobo 4:7, tre, hna ithuecatre kowe la itre Keresiano troa “thipe tiji Diabolo,” nge tro hë angeic a nue angatr. Iesu fe a qaja la itre xan, laka, hnei angatre hna kapa madrin la Wesi Ula, ngo hna kei e thupen, ke, “pëkö wan’ e kuhu ite hni angat.” Ngo ame la itre hlue i Akötresie, tre, hna eamo angatr troa “hete iwane [ . . . ] me tepen” matre atreine angatre troa ce atre hnyawa “la pengöne la eishaishan, me ehoean, me edraiën, me ejuin; me troa ate la ihnimi Keriso la ka sisitia hune la inamacan.”—Efe. 3:17-19; Kol. 2:6, 7.
11. Tune kaa la aqane tro la ketre atr a neëne la itre ewekë hna hnehengazon memine la itre mo, ka troa cia trane la Wesi Ula?
11 Ame la itre xaa ka drenge la Wesi Ula, tre, hnei angatre hna nue “la ite mekumekune la ite ewekë ne fen, memine la iaö ne la tenga mo” troa cia trane la Wesi Ula. (1 Tim. 6:9, 10) Tune kaa la aqane tro sa neëne lai? Kola sa hnei Paulo aposetolo, ka hape: “The aja mani kö nyipunie; meji hnine ju nyipunie la ite ewekë hna heteny, ke ase hë nyidëti ulatin: ‘Tha trojë kö a nue eö, nge tha trojë kö ni a tiji ’ö.’ ”—Heb. 13:5.
12. Pine nemene matre ame la itre atr hna nyihatrene hnene la dro ka loi, tre, isapengön kö la etrune la itre wen hnei angatr hna hetreny?
12 Thupene lai, Iesu a qaja, ka hape, ame la itre hna traane hune la dro ka loi, tre, itre eje a “hete wen, isa caate nge luepi, me köniate, me ca haded.” Ngacama ame la itre xaa ka kapa la Wesi Ula, tre, ka loi la aliene hni angatr me ka wa wen, ngo isapengöne catre la hnei angatre hna atrein ngöne la troa cainöjëne la maca ka loi, hnene laka, isapengöi angatre kö. Drei la ketre ceitun, ame kowe la ketre trejine ka qatre hë maine ketre ka trene sine meci pena, tre, maine jë jole koi nyidrë troa cainöj. (Aceitunëne jë me Mareko 12:43, 44.) Ketre, ngacama co hi la thangane la hna huliwa, maine thatreine pena kö la atre eëny troa musinën la feja, ngo ame pe, tre, angeic a madrine laka Iehova la ka aciane ej.—E jë la Salamo 126:5, 6.
Atre Eënyi Ka Meköl
13, 14. (a) Qaja jë la itre mekune ka tru ne la ceitune i Iesu göne la atre ëenyi ka kukuiëne la itine feja. (b) Drei la hna nyihatrene hnene la atre eëny, nge nemene la itine feja?
13 Ame ngöne Mareko 4:26-29, hetrenyi la ketre ceitun ka qaja la ketre atre eëny: “Cei tune la baselaia i Akötesie memine la ate kukuiëne la ite wene kowe la hnadro, me meköle e jidi me hlë e lai, ame hna ciajë la zine me hoeajë, ngo tha’ te kö angeice la pengön. Nge hnadro a aciane la xeni hnei nyëne kö, pai zin, mate engepi, ame hna pexejejë la wen, nge macajë hë la wen, ame hna canga iupijë troa huj, ijine menuë hë.”
14 Drei la atre eënyi celë? Kola mekune hnene la itre xaa atr ka uune fë laka, itre Keresiano angatr, ka hape, Iesu hi la atre cili. Ngo hapeu, ijije kö troa qaja, ka hape, Iesu a meköl nge thatre kö nyidrëti la aqane troa cia la itine feja? Ka xecie hnyawa e kuhu hni së laka, atre hi Iesu la aqane troa cia la itre itine feja! Ngo ame la atre eënyi celë, tre, tune lo hne së hna ce wange hë, kola nyihatrene la itretre cainöjëne la Baselaia, angatre isa ala caas; ene lo itre ka catre kukuiëne la itre itine feja ne la Baselaia ngöne la huliwa ne cainöj. Ame la itine feja hna kukuiëne hune la hnadro, tre, celë hi lo Wesi Ula hnei angatre hna cainöjën.b
15, 16. Ame ngöne la ceitune i Iesu göne la atre eëny, nemene la nyipici hnei nyidrëti hna hamëne göne lo lai lue pengöne aqane troa cia la itine feja?
15 Iesu a qaja fe, ka hape, ame la atre eëny, tre, angeic a “meköle e jidi me hlë e lai.” Thaa kolo kö lai a wanga acone la huliwa ne la atre eëny. Ngo kolo pe a qeje pengöne la hna majemine kuca hnene la itre xaa atr. Kola amamane hnene la hnëewekë celë la aqane trongene la mel laka, kola huliwa e lai nge kola meköle e jidr. Iesu a qaja atrune la ewekë ka traqa ngöne la ijine cili. Öni nyidrëti, ka hape: “Ame hna ciajë la zine me hoeajë.” Thupene lai, nyidrëti a sisedrën, me hape: “Ngo tha’ te kö angeice la pengön.” Ame la mekune ka sisitria e celë, tre, ene laka kolo kö a cia “hnei nyëne kö.”c
16 Nemene la mekune hnei Iesu hna troa amaman e celë? Hanawang, nyidrëti a qaja atrune la aqane troa kökötre la itine feja memine la aqane tro eje a wawen. Öni nyidrëti, ka hape: “Nge hnadro a aciane la xeni hnei nyëne kö, pai zin, mate engenepi, ame hna pexejejë la wen.” (Mar. 4:28) Kola cia trootro la itine feja celë nge nyimu pengöne aqane tro ej a cia. Thaa ijiji së kö troa asaqene catrëne la aqane cian’ ej. Ceitune hi lai memine la kola kökötre la nyipici ngöne la götrane la ua. Nyimutre fe la itre pengöne aqane tro eje a kökötr, ke, Iehova la ka aijijëne la nyipici troa kökötre e kuhu hni ne la ketre atr ka hetre hni ne ajan.—Ite hu. 13:48; Heb. 6:1.
17. Drei la itre ka madrine ngöne la kola wawen la itine ne la nyipici?
17 Ame ngöne la götrane la ua, tune kaa la aqane tro la atre eënyi a menuën, e “macajë hë la wen”? Ame ngöne la Iehova a akökötrene la nyipici ne la Baselaia e kuhu hni ne la itre ka xötrei xötrethenge Iesu, tre, hnei angatre hna canga kökötr uti hë la kola uku angatre hnene la ihnimi angatr koi Akötresie troa nue la mele i angatre koi Nyidrë. Hnei angatre hna xome la bapataiso matre nyine nyihatrene la aqane sa xepu i angatr. Ame la itre trejine trahmanyi ka kökötre pala hi uti hë la troa macaj, tre, ijiji angatre fe hë troa hane cilëne la itre hnëqa e hnine la ekalesia. Thaa kolo kö a menuëne caasine la atr ka traan la wene ne la Baselaia, ngo itre xaa ka cainöje mina fe a hane menu, ngacama thaa hnei angatre kö hna hane traan la itine feja ka hamëne pë hë e thupen la ketre hlue i Keriso. (E jë la Ioane 4:36-38.) Ngo eje hi laka kola “ce madine la ate trane memine la ate sin [la menu].”
Itre Ini Koi Së Enehila
18, 19. (a) Tune kaa la aqane ithuecatre koi nyipunieti isa ala caas, hnene la hna wange hmaca la itre ceitune i Iesu? (b)Nemene pë hë la hne së hna troa ce wange ngöne la hna cinyihane ka troa xulu?
18 Nemene la hne së hna inine qa ngöne la hna ce wange la lue ceitune celë ngöne Mareko mekene 4? Hne së hna inine laka, ame la huliwa nyine tro sa kuca, tre, ene la troa tra feja. Thaa tro pi kö sa nue la itre jole maine itre xaa kepin pena, troa sewe së troa kuca la huliwa cili. (Ate cai. 11:4) Ngo nyipi ewekë fe troa atrehmekune hnyawa laka, ketre hnëqa ka tru koi së ene la troa e së thene la itre hlue ka ce huliwa trootro me Akötresie. Iehova caasi hi la ka aijijëne la itre atr troa hlue i Nyidrë, me amanathithine la trenge catre së, memine fe la itre atr ka kapa la maca. Easa atrehmekune hnyawa laka, thatreine kö së troa upe ielen la ketre atr troa nyihlue i Akötresie. Thaa tro pi kö sa nanazij, maine thaa kökötre nyimenyime kö maine thaa kökötre pena kö la ketre atr. Drei la kola akeukawane la itre hni së troa atre laka, kola nyithupene la huliwa së hnene la aqane mele nyipici së koi Iehova, me kowe mina fe la hnëqa hna hamë së hnei Nyidrë, ene la troa cainöjëne “la maca ka loi [ . . . ] ne la Baselaia . . . nyine anyipicine kowe la nöjei nöj.”—Mat. 24:14.
19 Nemene la itre xaa ini hna hamë së hnei Iesu göne la aqane kökötr la itre ka xötrei xötrethenge nyidrë me göne la huliwa ne la Baselaia? Troa sa la hnyinge cili ngöne la itre xaa ceitun hna hamëne ngöne la itre edromë ne la itre Evangelia. Tro pë hë sa ce wange la itre xaa ceitune cili ngöne la hna cinyihane ka troa xulu.
[Ithueamacany]
a Wange ju la ketre tulu ne huliwa ne cainöj ne la Trejine Georg Fjölnir Lindal e Islande hna qeje pengön ngöne la Annuaire des Témoins de Jéhovah 2005, götrane 210-211, memine la itre hna melëne hnene la itre hlue ka mele nyipici, ka cile huti e Irlande ngöne la nöjei macatre ngacama thaa hna canga öhne kö la itre thangan, nge hna qeje pengöne lai ngöne la Annuaire des Témoins de Jéhovah 1988, götrane 82-99.
b Hna qeje pengöne hë hnene la hna cinyihane celë laka, ame la itine feja, tre, eje a nyihatrene la itre thiina ka nyipi ewekë koi së nyine troa akökötren uti hë la troa macaj, nge, nyimutre la itre ewekë ka troa ajojezine itre ej. Ngo loi e troa trotrohnine laka, ame ngöne la ceitune i Iesu, ame la itine feja, tre, thaa tro kö eje a saze matre troa ketre itine feja ka ngazo maine ketre wene ka pi. Eje pe a troa cia uti hë la troa macaj.—Wange ju La Tour de Garde ne 15 Juun 1980, götrane 17-19.
c Hna xome mina fe la hnëewekë celë ngöne Ite Huliwa 12:10, ngöne laka hna thawa “xanëne” la ketre qëhnelö hna thingene fao.
The Thëthëhmine Kö Nyipunie?
• Nemene la itre xaa ewekë ka ceitu ngöne la kola traane la itine feja memine la kola cainöjëne la maca ne la Baselaia?
• Tune kaa la aqane kuca Iehova matre troa atrehmekune la aqane mele nyipici ne la ketre hlue i Nyidrë ka cainöjëne la maca ne Baselaia?
• Nemene la ewekë ka ceitu hnei Iesu hna qaja atrun, ngöne la aqane kökötre la itine feja memine la aqane kökötr ngöne la götrane la ua?
• Tune kaa la aqane troa “ce madine la ate trane memine la ate sin”?