Meken 52
Iesu a Ithuane La Itre Atr, Itre Thauzane La Etrun
ATRAQATRE la madrine la itre aposetolo, thupene la hnei angatre hna cainöje e Galilaia. Ame hë enehila, thupene lo hna humuthi Ioane, angatre a bëeke hmaca me tro koi Iesu me qaja koi nyidrë la itre ijine ka lolo hnei angatre hna melën. Ame la Iesu a öhne laka, kucakuca catre angatr, nge pëkö ijine tro angatre a hane xen, pine laka, kola traqa nge tro la itre atr, öni nyidrëti koi angatre ka hape: ‘Tro jë fe nyipunie kowe la ga pa ate troa pane mano.’
Ma angatre ezine e Kaperenauma, angatre a të jë hune la he, me ea eje kowe la ketre qahlapa gaa sihngödr, ananyine e Bethesaida; maine jë ngöne la götrane ahië ne la hneopegejë ne Ioridrano. Ngo nyimutre la itre atr ka öhne me drenge la angatre a qeje tro, matre angatre a nyenyape thenge la he, me xötrë ngönëtë trootro. Haawe, ame hë la kola qale la he, kola icilenyi la ka ala nyimu troa kepe Iesu me angetre drei nyidrë.
Ame la Iesu a uti qa hune la he, nyidrëti a öhne la itre atr, atraqatre la utipine i nyidrëti koi angatr, pine laka, kösë itre mamoe angatre ka pëkö itretre thupën. Haawe, nyidrëti a aloine pi la itre trene mec, me nyiqaane troa ini angatre la nöjei ewekë.
Pine laka, kolo ha easenyi troa lö la jö, kola tro koi Iesu hnene la itretre drei nyidrë me qaja ka hape: “Hnapapa lola, nge hejiheji hë. Upi angate jë troa tro kowe la ite lapa me ite hnalapa troa itö a i angate kö.”
Ngo Iesu a sa koi angatre ka hape: “Ithu a i angate ju nyipunie.” Atre hë nyidrëti la nyine troa kuca, ngo nyidrëti kö a pane tupathe la lapaune i Filipo, nyidrëti a hnyingë angeice jë ka hape: “Tro sha itö areto e ka mate tro angat’ a xen?”
Ame koi Filipo, ke, pëkö ewekë ka ijije troa kuca. Tru menu pala ha hnei atr, kola e la 5 000 lao trahmany, nge maine troa ce e angatre memine la itre föe me itre nekönatr, haawe, ma troa weje la 10 000 lao atr nyine troa ithuan! Celë hi kepine matre kola sa hnei Filipo koi Iesu ka hape: “Tha ijiji angate kö la ite denari [ame la caa denari, celë hi thupene la caa drai ne huliwa] ka lue haded, mate isa atrë angate la ite gö xeni ka co hi.”
Maine jë kola troa amamane hnei Anederea, laka, thatreine kö troa ithuane asë la itre atr, angeice a canga qaja ka hape: “Dei lai thöthi tene areto bali ka tripi me lue nene i, ngo troa tune ka kowe la ka ala nyimu?”
Kola hmeköni la ihaö, pine laka, angatre ngöne la hneijine qeu, qëmekene la paseka ne la macatre 32 M.K. Haawe, Iesu a upe la itretre drei nyidrë troa hëne la nöjei atr matre tro angatre a lapa xötrë isa 50 me 100 lao xötr. Thupene lai, Iesu a xome jë la faifi lao falawa memine la lue i, me gala jë draië, me olen; nyidrëti a thupathupa ju la itre falawa, me thawa la itre i. Nyidrëti a hamëne pi itre eje kowe la itretre drei nyidrë, matre tro angatre a thawa kowe la nöjei atr asë. Kola hai atraqatr, pine laka, hna ithuane asë hi la itre atr, pë pe kö ala caasi e angatr, a ka mecijin!
Thupene lai, Iesu a qaja kowe la itretre drei nyidrë ka hape: “Icasinekeune jë la ite sine munën, mate pëkö hna tij.” Munë ju kö, pine laka, hna nyialiene hmaca pe kö la 12 lao treng! Mataio 14:13-21; Mareko 6:30-44; Luka 9:10-17; Ioane 6:1-13.
▪ Pine nemene matre Iesu a thele la ketre götrane gaa pë atr, thatraqane la itre aposetolo i nyidrë?
▪ Hnei Iesu hna thenge a tro ië la itretre drei nyidrë, ngo pine nemene matre thatreine pala hi angatre troa mano?
▪ Pine laka hejiheji hë, nemene la hnene la itretre drenge hna sipone koi Iesu, ngo tune kaa la aqane hnime nyidrë la itre atr?