Meken 53

Angatre a Aja Joxu Ka Sisitria Hui Atr

KOLA hai hnene la itre atr, laka, itre thauzane la etrun, la hna ithuane hnei Iesu. Öni angatre ka hape: “Nyipici celë hi perofeta hna qaja tro ha uti kowe la fen.” Haawe, thaa angatre hmekuje kö a atrehmekunyi Iesu, ene lo perofeta ka tru kö hui Mose, ngo ngöne fe laka, tro nyidrëti a ketre atre musi ka sisitria. Celë hi matre, angatre a mekune ju troa xome ielene troa acili joxu nyidrë.

Ngo atrepengöne hnyawa hi Iesu la mekune la itre atr, ene pe patre ju hi nyidrë wanga hule iele nyidrëti jë hnei angatr. Nyidrëti a sipone jë kowe la itre atr troa isa bëeke kowe la itre hnalapa i angatr, me upe la itretre drei nyidrë troa elë hune la he i angatr, me tro Kaperenauma eë. Nge nyidrëti pë hë a tro pe troa thithi hune la wetr. Iesu hmekuje hi ngöne la jidri celë.

Qëmekene troa fetra la uke lai, Iesu a öhne me drenge qa hune la götrane gaa draië hnei nyidrëti hna cile ngön, la kola majapa la hnagejë hnene laka, catrehnine la eny. Easenyi trootro hë la paseka, nge kolo mina fe a troa dreuma treu; celë hi matre, Iesu a wangatrehmekune la he ne la itretre drei nyidrë, nge angatre a isine troa xomiujine hnyawa la he, ngo catrehnine catre la gejë. Angatre a isi me gejë troa galune la he.

Iesu a uti pi qa ngöne la wetr, me tro hune la itre itro gejë troa wai angatr. Traqa ha nyidrëti kowe la he, nge faifi hë lao kilomet hnene eje hna nyihnyapën. Ngo Iesu pala hi a tro, kösë nyidrëti kö a ketre trongëne la gojenyi nyidrë. Ame la kola öhnyi nyidrëti hnene la itretre drei nyidrë, haawe, angatre a sue, me hape: “[“Ua,” MN ] cahu!”

Iesu a ithuecatre koi angatre me sa ka hape: “Ini hi; the qou kö.”

Ngo Peteru a qaja koi nyidrëti ka hape: “Joxu, zimaine enëtilai, ula nieti jë ithuëtia jijipieti kowai enëtilai hune la hneopegejë.”

Öni Iesu e sa koi angeice ka hape: “Utipi!”

Ame hna utipi hnei Peteru qa hune la he, me tro hune la hnagejë troa itronyi me Iesu. Ngo ame la kola öhne hnei Peteru la ecatrene la eny, haawe, traqa ju hi la xou koi angeic, me qane troa lö; angeice a hokötre me hape: “Joxue, amele ni!”

Iesu a canga li ime pi, me xölehuji angeic, me qaja koi angeice ka hape: “Ate lapaune acone fe, ue la eö a luelu?”

Ame la kola elë hnei Peteru me Iesu hune la he, lapa kötre pi hi la eny, nge kola hai atraqatre la itretre dreng. Ngo hapeu, nyipici kö laka, tro angatre a sesëkötr? Maine hnei angatre ju hna trotrohnine lo “aliene la itre falawa,” me atrehmekune la iamamanyikeu hna kuca hnei Iesu ngöne lo itre hnepe hawa nyidrëti a pane ithuane lo itre atr, itre thauzane la etrun, hnene hi la faifi lao falawa, me lue ie, haawe, thatreine kö tro angatre a sesëkötre la kola öhnyi nyidrëti a tro hune la hnagejë, me aupune la eny. Enehila, kola atrunyi Iesu hnene la itretre dreng, me qaja ka hape: “Nyipici enëtilai la Hupuna i Akötesie.”

Ame ngöne la hnepe hawa thupen, angatre a xepe e Genezareta, ketre götrane gaa lolo troa eëny, ezine e Kaperenauma; angatre a kuiëne ju la iuhni ezine la traone cili. Ngo ame petre hi la angatre a uti qa hune la bootr, kola wangatrehmekunyi Iesu hnene la itre atr, nge angatre a nyiapëne xötreithe la nöje troa thele la itre trene sine mec. Ame la kola traqa hnene la itre trene meci hna xututhe hune la itre ibetre i angatr, me ketr la pune iheetre i Iesu, haawe, paatre pi hi la itre sine meci angatr, matre mele hë angatr.

Ame ngöne la ijine cili, kola öhne hnene lo itre atr hna ithuane hnei Iesu, itre thauzane la etrun, laka, paatre hë nyidrë. Celë hi matre, ame la kola traqa la itre bootre qaa Tiberia, angatre a sole hune itre ej, me tro Kaperenauma eë troa thele Iesu. Nge öhnyi nyidrëti hë hnei angatr, haawe, angatre a hnyingë nyidrëti ka hape: “Rabi, hlepëti hë cilieti e celë eu?” Tune la hne së hna troa wang, Iesu a troa haji angatr. Ioane 6:14-25; Mataio 14:22-36; Mareko 6:45-56.

▪ Thupene la hnei Iesu hna ithuane la itre atr, itre thauzane la etrun, nemene la hna ajane hnene la nöje tro nyidrëti a kuca?

▪ Nemene la hnei Iesu hna öhne qa hune la wetre hnei nyidrëti hna cile ngön, nge nemene la hnei nyidrëti hna kuca?

▪ Pine nemene matre, thaa ewekë ka singödri kö kowe la itretre dreng, la iamamanyikeu hna kuca hnei Iesu?

▪ Nemene la ewekë ka traqa ngöne la nyidrëti a troa easenyine la he?