Meken 57

Iesu a Utipine La Itre Ka Akötr

THUPENE la hna jele ngazone la itre faresaio pine la aqane pi hune fë angatre la itre hnei angatre hna majemin, Iesu a tro pi memine la itretre drei nyidrë. Mekune hi së e cili lo nyidrëti a thele memine la itretre drei nyidrë troa pane mano, ngo ngazo pe ke, hna traqa koi angatre la ka ala nyim. Ngo ame hë enehila, nyidrëti a thenge la itretre drei nyidrë me tro kowe la itre götrane e Turo, me Sidona, itre nöje gaa nany, ngöne la götrane ahuë. Ma celë hmekuje hi la sipu nyidrëti lai a ce tro memine la itretre drei nyidrë, e tröne la itre ifego ne Isaraela.

Ame la angatre a traqa kowe la ketre uma hnei angatre hna troa lapa ngön, haawe, Iesu a qaja ka hape, loi e thaa tro kö a atre hnene la itre atr la hmeku i angatr. Ngo ngacama thaa ketre götrane ne Isaraela kö la hnei angatre hna lapa ngön, ngo thaa sihngödre kö Iesu kowe la itre atrene la nöje celë. Kola traqa koi nyidrë hnene la ketre föe ne Heleni, hna hnahone e Fenisia ne Suria; nyidroti a sipo Iesu me hape: “Joxue, Hupuna i Davita fe, fetesi nie, ke ngazo hë la nekonge jajinyi hna ademonin.” Ngo thaa sa pi kö Iesu.

Nango qea ha e thupen, ame hnene la itretre drenge hna qaja koi Iesu ka hape: “Helë nyidoti jë pe; ke nyidoti a hë thenge shë.” Iesu a qaja la kepine matre nyidrëti a lapa thaup, öni nyidrëti ka hape: “Pëkö xa hna upi ni kow, ngo loi kowe la nöjei mamoe ka pate ngöne la lapa i angete Isaraela.”

Ngo catre catre kö föe. Nyidroti a easenyi Iesu me wakukupi qëmeke i nyidrë, me sipone iele nyidrë ka hape, “Joxue, xomexatua ni!”

Drei la utipine Iesu kowe la föe! Ngo nyidrëti hmaca kö a amamane hnyawa ka hape, ame la pane hnëqa hna upi nyidrëti troa kuca, ke, ene la troa nyihlue i Isaraela, nöje i Akötresie. Haawe, nyidrëti a pane tupathe ju la lapaune ne la föe, me qaja la mekune ka eje thene la itretre Iudra, laka, ka draië kö angatre hune la itre trehnyiwa; öni nyidrëti ka hape: “Tha loi kö troa xome la a i ite nekön, me kuiëne koi ite vailai.”

Kola amamane hnene la nine hne nyinawa me iqëmeke i nyidrë, laka, hetre ihnimi nyidrëti fe kowe la itre xaa atr, thaa angetre Iudra hmekuje kö. Nyidrëti fe a nango apujene la trenge ithahnata i nyidrë, ene la kola aceitunëne la itre wanaithihlë me itre kuli; öni nyidrëti göne la itre kuli, ka hape, kösë “itre neköi vailai,” maine neköi kuli. Thaa hmahma kö nyidro, ngo kolo pe a xome la mekune i Iesu ngöne lo lai edraiëne la itretre Iudra, me qaja cememine la ipië ka hape: “Gouëti, joxu; ngo ite vailai a pune xötönëti la ite wamine ka malamala qa hune la laulau ne la ite tixe i nyuden.”

Iesu a sa koi nyidroti ka hape: “We föe, atraqate la lapaune i nyipo; loi e troa eje koi nyipo tune la hnei nyipoti hna ajan.” Celë hi ewekë ka traqa! Ame la nyidroti a bëeke hmaca kowe la hnalapa, kola öhne hnei nyidroti la nekönatre e meköle hune la ibetr, a mele hë nyën.

Iesu a xötrëne memine la itretre drei nyidrë la itre qahlapa ne sidona me tro Ioridrano eë; angatre a manije ngöne la hnagejë ne Galilaia. Thupene lai, angatre a xepe e Dekapoli, ngöne la götrane ahië ne la hnagejë ne Galilaia. E cili angatre a elë hune la ketre wetr, ngo kola öhnyi angatre hnene la ka ala nyim, me traqa fë koi Iesu la itre peje ca, me itre ka geny, me itre timek, me itre trene mec. Kola ami angatre ngöne la lue fenie i Iesu, nge nyidrëti a aloine la itre meci cili. Kola hai la itre atr, pine laka, ewekë hë la itre hum, tro hnyawa ha la itre peje ca, nge goe hë la itre timek; nge angatre a atrune la Akötresi Isaraela.

Iesu a wangatrune la ketre atr ka simi hnangenyë nge ka tretr catre la aqane ithahnata. Ame la itre simi hnangenyë, ke, canga hetrenyi hi la hmahma thei angatr, maine angatre e nyipine la itre atr ka ala nyim. Ame la Iesu a öhne la jole ka eje thene la atr cili, haawe, nyidrëti a utipi angeic, me nango ee ananyi angeic. Ame hë la nyidrëti caasi pë hë me angeic, nyidrëti a amamane jë la nyine tro nyidrë a kuca koi angeic. Nyidrëti a amë la itre wanakoime i nyidrë hnine la lue hnangenyë i angeic, nge thupene la hnei nyidrë hna hnyiju, nyidrëti a ketre ju la sepeneqë i angeic. Thupene lai, nyidrëti a gala jë hnengödrai eë, me mano catr, me qaja ka hape: “Fepi.” Ame hna drenge hmaca kohilo hnene la atr, nge ngöne la ijine cili, atreine fe hë angeice ithahnata hnyawa.

Thupene la hna öhnyi Iesu hnene la ka ala nyimu e kuca la itre iamamanyikeu celë, angatre a amamane la ole i angatre me qaja ka hape: “Hnei nyidëti hna kuca aloine la nöjei ewekë asë; nyidëti a celohmëne la ite simihnangenyë troa deng, me ite humu troa ewekë.” Mataio 15:21-31; Mareko 7:24-37.

▪ Pine nemene matre thaa canga aloine kö hnei Iesu la meci ne la neköne la föe ne Heleni?

▪ Hnei Iesu hna tro ië thupen, memine la itretre drei nyidrë?

▪ Nemene la aqane amamane Iesu la utipine i nyidrë kowe la atr ka simi hnangenyë nge ka tretr catre la aqane ithahnata?