Iesu a Aloine La Nekö Jajiny Memine La Hum

Thupene la Iesu a ase qajaqaja la itre Faresaio ka wangatrune la qenenöj, nyidrë me itretre drei nyidrë a tro pi. Angatr a tro kowe la itre nöj ka nany ne Turo, me Sidona e Kanana, itre nöje lai e kolopi nge kuë.

E cili, hnei Iesu hna öhne la ketre uma troa lapan, ngo xele nyidrë tro la itre atr a atre. Ngazo pe, hna wangatrehmekunyi nyidrë. Hnene la ketre föe hna hnahon e cili nge ka qa Geres, hna öhnyi Iesu me hape: “Ekölö hi ni Joxu, Nekö i Dravita, epi utipi ni ju. Hna löthe la neköng hnei dremoni.”—Mataio 15:22; Mareko 7:26.

Ngo nango qea pi hë, öni itretre dreng ka hape: “Upi eahlo pi, ke eahlo pala hi la a hëne trongë së.” Iesu a qaja jë la kepin matre xele kö nyidrë ma xatua eahlo, öni nyidrë: “Tha hna upi ni kö kowe la nöjei atr asë, ngo hna upe meköti ni kowe la itre mamoe ka paatr ne Isaraela.” Ngo tha cile kö eahlo. Eahlo a easenyi Iesu me thil qëmeke i nyidrë me treij ka hape: “Joxu, xatua ni jë!”—Mataio 15:23-25.

Ma göi troa tupathe la lapaune i eahlo, hnei Iesu hna qaja la aqane waipengöi itre xa nöj hnei angetre Iudra, öni nyidrë: “Tha meköti kö troa xome la falawa ne la itre nekönatr, me kuiëne koi itre neköi kuli.” (Mataio 15:26) Ame la Iesu a qeje itre “neköi kuli,” nyidrëti lai a amamane la aqane hnime nyidrë la itre atren la itre xa nöj. Nge ma kolo fe a mama ngöne la iqëmeke i nyidrë, me aqane ithanata i nyidrë ka menyik.

Eloine hi, tha dreng akötrëne kö lai föe, ngo hnei eahlo pe hna sa jëne la mekuna i angetre Iudra, me amamane la ipië i eahlo. Öni eahlo: “Nyipici nyipëti hi Joxu, ngo ame pe, itre neköi kuli lo a xeni la ka malamala qa ngöne la laulau ne la itre maseta i nyudren.” Öhne ju hi Iesu la aqane lolo la thiina i eahlo, matre öni nyidrë: “Eje hi, atraqatre la lapaune i nyipo; tro ha eatr la aja i nyipo.” (Mataio 15:27, 28) Nge hna eatre la aja i eahlo ngacama patre kö la nekö jajiny! Ame la eahlo a bëek koi hnalapa, traqa ju hi eahlo a öhne la nekö jajiny a kola saaju hune ili, nge mele hë nyën—“patre hë lo dremoni”!—Mareko 7:30.

Iesu hë me itretre dreng a tro qa Kanana, me trongëne la nöj me thupa la Hneopegejë Ioridrano. Ma angatre jë a thupa la hneopegejë ngöne la ketre götrane e kolopi ne la Hnagejë Ne Galilaia, me lö kowe la itre nöje Dekapoli. Angatr a elë jë hune wetr, ngo öhnyi angatre ju hi hnene la ka ala nyim. Matre itre atr a traqa fë pi koi Iesu la itre ka peje ca, me ka genyi itrei, me itre timek, me itre hum, nge kola isa ami nyudren ngöne la lue ca i Iesu troa aloin. Ame hna hain hnei itre atr, nge angatr a atrune jë la Akötresi Isaraela.

Ngo hnime catre kö Iesu la ketre trahmanyi ka sim nge ka tretr. Nge eje hi laka, tha jole kö troa trotrohnine la aqane hmahma i angeic nyipine la ka ala nyim. Nge ma öhne hi Iesu la aqane xou i angeic, matre nyidrëti a xom ananyi angeice jë. Nge ame la nyidroti cas, Iesu a qaja jë la hnei nyidrëti hna troa kuca koi angeic. Nyidrëti a line ju la lue he ne wanakoim i nyidrë hnine la lue hnangenyë i angeic, me hnyiju, me ketr la thinem ne lai atr. Nyidrëti a gala jë draië, me hape: “Eph′pha·tha” kola hape, “Fe pi.” Qaane ju hi lai, fe pi hi la lue hnangenyë i angeic, nge tha tretre hë la që i angeic. Ngo ame pe, xele kö Iesu e troa iqajakeun, ke aja i nyidrë tro itre atr a mejiun hnene la hna sipu öhn me sipu dreng.—Mareko 7:32-36.

Tru catr la thangane la itre iamamanyikeu i Iesu kowe la ka ala nyim, ke “tha nyine qaja kö la aqane hai angatr.” Öni angatr: “Lolo catre la nöjei ewekë hnei nyidrëti hna kuca. Nge goi atreine fe nyidrëti aloine la itre ka simi hnangenyë, me itre ka hum.”—Mareko 7:37.