Meken 61

Melë Hë La Thöthi Hna Löthe Hnei Dremoni

IESU hë e hune la wetr heremona ce me Peteru, Iakobo, me Ioane, nge kola traqa pe la ketre jole kowe la itretre drei nyidrë ka lapa pe. Ame ngöne la Iesu a bëek, nyidrëti a canga wangatrehmekune laka, hetre hnepe jol. Kola cile xötreithe la itretre drenge hnene la ka ala nyim, nge kola isi ithahnata me angatre hnene la itretre cinyihan. Ame la kola öhnyi Iesu hnene la itre atr, angatre a sesëkötre me nyenyape troa itronyi me nyidrë. Iesu a hnyinge ka hape: “Nemene la ithahnata i nyipunie me angatr?”

Kola tro pi la ketre atr qa hnine la ka ala nyim, me sa iwatingöneca qëmeke i Iesu, me qaja koi nyidrëti ka hape: “Ate ini fe, ini a tro fë koi cilie la nekönge hna löthe hnei [“ua,” MN ] ka hum; nge ej’ a pune xölehuji nyën, me tha nyën; ame hna trapahaewepi nyën, me gete umënyö, me wegeju; qangë hë hna ulatine koi angete dei cilie mate troa helën’ ej, ngo tha ’teine kö angat.”

Eje hi laka, kola thele hnene la itretre cinyihane troa sili trenge ewekë pine la thatreine angatre troa aloine la nekö trahmany; maine jë kola hnyimasai angatr. Ngo ngöne la ijine ka ngazo cili, kola fetra hnei Iesu. Öni nyidrë: “We xöte ka tha lapaune kö; tro ni a ce me nyipunie uti hë eu? Tro ni a xomi hni nyipunie uti hë eu?”

Eje hi laka, Iesu a qaja la itre trenge ewekë celë kowe la itre atr asë ka drei nyidrë, ngo maine jë hnei nyidrëti hna thë troa qaja lai kowe la itretre cinyihan, pine la hnei angatre hna thele iwesitrë memine la itretre dreng. Thupene lai, Iesu a goeëne la nekönatre trahmanyi me qaja ka hape: “Awi nyëne pi koi ni.” Ngo ame ju hi la kola tro koi Iesu hnene la nekönatr, ame hna canga tha nyëne pi hnene la [“ua,” MN ], nge nyëne a kei hune la hnadro, me jipajipa me trapahaewe.

Iesu a qaja ka hape: “Traqa eue la ewekë celë koi nyën?”

Öni keme ka hape: “Qan’ e nekönat. Nge a nyimu hnen’ eje hna kuië nyëne kowe la eë me kowe la ite tim, troa humuthi nyën.” Ketre, kola sipone hnei keme me hape: “Maine pucatine cilie, te, ma xatua huni me hnimi hun.”

Maine jë nyimu macatre ne thele ixatua ha la keme celë. Enehila, pë jë hë mejiune i nyidrë, ngöne la kola öhne laka, thatreine kö itretre drenge troa aloine la nekönatr. Ame hnei Iesu hna drenge la hë ne la trahmanyi me ithuecatre jëne la “[“trenge ithahnata celë,” MN ], ‘Maine ateine pe!’ Atein’ asë hë la nöjei ewekë hnene la ate lapaun.”

Ame hna canga sa hnene la kem, me sipo Iesu ka hape: “Ini a lapaun, xatua ni ka tha nyipi lapaun!”

Iesu a öhne la kola inyiapenyi la ka ala nyimu koi nyidro; ame hnei nyidrë hna shawa la demoni, me hape: “Hmunë la [“ua,” MN] ka hum, me ka sim, ini a qaja koi hmunë, löpi qa hni nyën, nge the löthi nyëne hmaca kö.” Ame la kola lö pi la dremoni qa hnine la nekönatr, eje a ahokötrenyi nyën, me anyimua ajipajipanyi nyën. Ame hna tui nyëne lo ka mec, kola meköle hune la dro, thaa enije hë, matre ala nyimu la ka qaja ka hape: “Meci hë nyën!” Ngo Iesu a ea la ime i nyën, nge nyëne a cil.

Qëmekene troa traqa la ewekë cili, hnei itretre drenge fe hna hane helëne la itre dremoni, ngöne la kola upi angatre troa cainöje trootro. Haawe, ame hë la angatre e hnine la ketre uma, angatre a hnyingë Iesu ju ka hape: “Hna uëne laka tha pucatine kö nyihunie jötëtia helën’ ej?”

Ngöne la nyidrëti a sa la hnying, Iesu a amamane koi angatre ka hape, hnene laka thaa hna lapaune kö hnei angatr; öni nyidrë: “Tha lö xane pi kö la ka tune lai, ngo loi pe hnei thith.” Eje hi laka, nyipi ewekë troa hnëkë hnyawa matre troa helëne la dremoni cili ka ketre pengöne kö nge ka catr. Ketre, nyipi ewekë fe troa catre la lapaun, nge troa catre sipo Akötresie matre tro nyidrëti a hamëne la mene ka ijij.

Nge Iesu a qaja hmaca ka hape: “Nyipici, ini a qaja koi nyipunie, maine hetenyi nyipunie la lapaune tune la wene sinapi, tro nyipunie a qaja kowe la wete celë, ka hape, Kötejë qa la kowe lai; ame hna kötepi ej; nge pëkö ewekë hna troa tha ’teine hnei nyipunie.” Drei la etrune la mene ne la lapaun!

Maine jë kola mama ngöne la itre xaa ijine laka, tune la ketre wetr ka tru, itre jole a ananazijë së troa kökötre ngöne la huliwa i Iehova. Ngo Iesu a amamane ka hape, maine tro së a aciane la lapaune ngöne la itre hni së, nge maine tro së a thupëne me akökötrene ej, haawe, tro hë eje a kökötre trootro uti hë la macaje së troa cile kowe la itre ewekë ka thungijë së, me itre jole ka ceitune memine la itre wetr. Mareko 9:14-29; Mataio 17:19, 20; Luka 9:37-43.

▪ Ngöne la nyidrëti a bëeke hmaca qa hune la wetr Heremona, nemene la ewekë hnei Iesu hna öhne ngöne la nyidrëti a traqa?

▪ Nemene la ixatua hnei Iesu hna hamëne kowe la keme ne la nekönatre hna löthe hnei dremoni?

▪ Pine nemene matre thatreine ju kö la itretre drenge helëne la dremoni?

▪ Tune la aqane amamane Iesu, nemene la hna atreine hnene la mene ne la lapaun?