Meken 68

Iesu Pala Hi a Cainöje Ngöne La Hna Sevenene Drai

EASË pala hi ngöne la hna sevenene nge drai tixenuë ne la pui ne xeni ne hunuma. Iesu a cainöje ngöne la “Tenge mo,” ene la ketre götrane ne la ēnē, maine jë, ngöne la hnahage ne la itre föe. E cili hi lo hna amë la itre trengene mani, thatraqane la itre ahnahna hna hamëne hnene la nöjei atr.

Ame ngöne la nöjei jidri ne feet, ketre pengöne kö la aqane lai ngöne la hnahage cili. Hna amë la foa lao waca ne laame ka tru, nyine isa taane la foa lao diisi ka tru hna nyialiene hnei oel. Pine laka, kola mele lai oel hnine la 16 lao trengene oel, haawe, itre eje a hudrume lolo ngöne la jidr. Iesu a troa amekunëne enehila la itre atr ka drei nyidrë, la pengöne lo lai aqane hudrume ne la itre laame cili. Öni nyidrëti ka hape: “Ini la lai ne la fene hnengödrai; ame la ate xöte thenge ni tha tro kö angeic’ a tro ngöne la jidr, ngo tro angeic’ a hetenyi la lai ne la mel.”

Ame hna sa koi nyidrë hnene la itre Faresaio ka hape: “Eö lai a anyipici ’ö kö; tha nyipici kö la hnei ’ö hna anyipicin.”

Iesu a sa koi angatre ka hape: “Maine ini a anyipici ni kö, nyipici la hnenge hna anyipicin; ke ate hë ni la qange ngön, me hnenge hna troa tro kow; ngo tha ’te kö nyipunie la qange ngön, me hnenge hna troa tro kow.” Nyidrëti a qaja hmaca koi angatre ka hape: “Ini a anyipici ni kö, nge kete anyipici ni kö hnene la Tetetro ate upi ni.”

Kola hnyingë nyidrë hnene la itre Faresaio ka hape: “E ka la keme i ’ö?”

Öni Iesu e sa ka hape: “Tha ’te ni kö me Kakati hnei nyipunie; maine ate ni kö hnei nyipunie, maine kete ate Kakati fe hnei nyipunie.” Ngacama kolo pala hi a ajane hnene la itre Faresaio troa xölehuji Iesu, ngo pë pi kö ka li ime koi nyidrë.

Iesu a qaja fe ka hape: “Ini ha tro, nge ame la hnenge hna troa tro kow, tha ’teine kö nyipunie troa tro kow.”

Drenge hë hnei angetre Iudra lai, angatre a isa hnyinge ka hape: “Hape u, angeic’ a troa sipu humuthi angeice kö? Ke angeic’ a qaja ka hape. Ame la hnenge hna troa tro kow, tha ’treine kö nyipunie troa tro kow.”

Iesu a qaja ka hape: “Qa i nyipunieti la, ngo qange koho; itete fene nyipunie, ngo tha ate fene kö ni.” Öni nyidrëti hmaca ka hape: “Maine tha lapaune kö nyipunie ka hape, Ini hi, tro hë nyipunie a meci fë la ite ngazo i nyipunie.”

Eje hi laka, Iesu la a qaja lo mele i nyidrëti ekö, qëmekene tro nyidrëti a atr, nge ngöne fe laka, nyidrëti lo Mesia hna thingehnaean, ene lo Keriso. Ngo kolo kö a hnyingë nyidrë cememine la elëhni hnei angatr, ka hape: “Dei ’ö?”

Pine laka, angatre a thipetriji Iesu, haawe, nyidrëti a sa ka hape: “Eje hi lo hnenge hna qaja koi nyipunie ngöne lo qan?” Nge nyidrëti a qaja fe ka hape: “Nyipici nyidëti ate upi ni, nge ame la nöjei ewekë hnenge hna denge thei nyidë, ini a qaja lai kowe la fene hnengödrai.” Öni nyidrëti fe ka hape: “E ase hë nyipunie kapa draië la Nekö i ate, ame hna ate jë ka hape, ini hi, nge tha kuca xanëne kö ni la kete ewekë, ngo ame lo hnei Tetetroti hna ini ni, te, celë hi hnenge hna qaja. Nge ce ini me nyidëti ate upi ni; tha hna nue ni kö hnei nyidrë, ke, ini a kuca pala hi la nöjei ewekë nyine amadi nyidë.”

Nyimutre la itre atr ka drenge lai, matre angatre a lapaune ju koi nyidrë. Iesu a ujë koi angatre me qaja ka hape: “Maine tro nyipunie a xome hutine la tenge ewekënge, itete dei ni nyipunie ka nyipici, nge tro hë nyipunie a ate la nyipici, nge tro ha nue amacai nyipunie hnene la nyipici.”

Kola sa koi nyidrë hnene la itre ithupëjia, ka hape: “Ite matra i Aberahama hun, nge tha qa kö hna hujedö huni hnei kete ate; hna tune ka laka, öni nyipëti tro ha nue amacai hun?”

Ngacama angatre e itre xaa ijine fene la musi ne la itre trehnyiwa, ngo thaa ase kö angatre nue la ketre atre thepe nöje troa musinë angatr. Xelene kö angatre troa hë angatre ka hape, itre hlue. Ngo Iesu pe a amamane hnyawa koi angatre ka hape, itre hlue angatr. Ngöne nemene matre kola qaja tune lai? Iesu a qaja ka hape: “Nyipici, nyipici, ini a qaja koi nyipunie, ka hape, ame la ate kuca la ngazo, angeice hi la hlue ne la ngazo.”

Pine laka, xele kö angatre ma kapa, laka, itre hlue ne la ngazo angatr, haawe, angatre e qëmekene la ketre hulö. Iesu a qaja ka hape: “Ame la hlu, te, tha ka lapa huti kö ngöne la hnalapa, ngo loi pe la neköne ka lapa hut.” Eje hi laka, pë fe kö trenga mo ne la hlue, haawe, atreine hi troa helë angeic. Tro hmekuje hi lo neköne hna malane ngöne la hnalapa, maine hna hamëne pena, a lapa “hut,” kola hape, uti hë la tro angeice a mec.

Iesu a sisedrëne ka hape: “Nge maine tro la neköne a nue amacai nyipunie, nyipi nue amacai nyipunieti hë.” Qa ngöne lai, ame la nyipici ka nuegufane la itre atr, ke, celë hi lo nyipici göi Iesu Keriso lo hupuna. Atreine hi tro la mele i nyidrëti hmekuje ka meköt, hnei nyidrëti hna hujën, a thapa la nöjei atr qa ngöne la ngazo, laka, ame la pun ke, mec. Ioane 8:12-36.

▪ Ekaa la hnei Iesu hna cainöj, ngöne la hnaasevenene drai? Nemene la ewekë ka mama cile hnyawa e jidr, ngöne la götrane cili, nge nemene la pengöne lai, ngöne la ini hnei Iesu hna hamën?

▪ Nemene la hnei Iesu hna qaja ngöne qaane i nyidrë, nge nemene la ewekë ka mama jëne lai, göi pengö i nyidrë?

▪ Nemene la aliene la kola hape, itre hlue angetre Iudra, ngo nemene la nyipici ka troa nuegufa angatr?