Meken 94

Nyipi Ewekë Troa Thith Me Ipië

NGÖNE lo Iesu e Iudra, ke, hnei nyidrëti hna hamëne la ketre ceitune göne la enyipi ewekëne la troa catre thith. Enehila, nyidrëti hmaca e Ierusalema, nge kola amexeje hmaca la enyipi ewekëne la troa thithi pala hi. Maine jë nyidrëti pala kö e Samaria maine e Galilaia, ngöne la nyidrëti a hamëne la ketre ceitun:

“Dei la ate amekötine ngöne la kete lapa, laka tha qou kö e Akötesie, nge tha metötëne pena la ate; nge dei lai kete sine föe ngöne la lapa cili, nge nyidoti a tropi koi nyidë, me hape: Amekötine koi ni göi ithupëjiang. Nge pane xele kö nyidë, nge thupene lai nyidëti a qaja e kuhu hni nyidëti, ka hape: Ngacama tha qounge Akötesie, nge tha metötëne la ate; tro ni a amekötine kowe la sine föe celë, ke nyidoti a lapa huli ni, wanga hmanonopi ni hnei nyidoti hna pune tro e kolemi koi ni.”

Iesu a hamëne la ini qa ngöne la hnei nyidrë hna qaja, me hape: “Dengeju nyipunie la hna qaja hnene la ate amekötine ka qali thina. Nge hape u, tha tro kö Akötesieti a amekötine kowe la ite iana i nyidë, lo hna hë e lai me jidi koi nyidë, nge nyidëti a xomi hnin’ ahoeanyi angate ju?”

Thaa Iesu kö a amamane jëne la itre trenge ewekë celë laka, ceitui Iehova memine la ate amekötine ka pë metrötr. Nyidrëti pe a qaja ka hape, maine kola eatrëne la itre sipo lapaa hnene la ate amekötine ka pë metrötr, haawe, thaa luelue kö së laka tro Akötresie ka meköti me ka lolo a eatrëne la itre sipo lapaa ne la itre hlue i nyidrë maine angatre a thithi lapaa. Nyidrëti fe a sisedrëne ka hape: “Tro nyidëti a canga amekötine koi angat.”

Kola mama laka itre puafala me itre atr ju kö a elëhni pine la itre ate amekötine ka pë emekötin, nge kolo pala hi a hamë loi kowe la itre atr trena mo, me ka hetre hnëqa ka tru. Ngo, ame Akötresie, ke, tro Nyidrëti a nyi thupene koi itre atr ka kuca la ngazo, ngo tro nyidrëti fe a meköti kowe la itre hlue i Nyidrë, ene la troa hamëne la mele ka thaa ase palua kö. Ngo ala ije hi la itre atr ka xecie e kuhu hni angatre laka tro Akötresie a canga amekötine koi angatr?

Ngöne la Iesu a qeje pengöne la lapaune kowe la mene ne la thith, nyidrëti a amejëne la hnyinge celë, kola hape: “E traqa ha la Nekö i ate, hape u, tro angeic’ a öhne la lapaun’ e celë fen?” Pëkö mekune nyine sa la hnyinge celë matre kola amamane laka xalaithe hi la itre atr ka troa hetrenyi la lapaune cili ngöne la Iesu a musi ngöne la Baselaia.

Ame thene la itre ka drei Iesu, ke, hetrenyi la itre atr ka selëne la lapaune i angatr. Ka xecie koi angatre laka itre ka meköti angatr, nge angatre a methinëne la itre xan. Maine jë hetrenyi thei angatre la itre xaa ka drei Iesu. Haawe, Iesu a ithahnata koi angatre asë, me qaja la ketre ceitun:

“Ala lue la lue ate hna tro kowe la ēnē troa thith, faresaio la kete, nge telona kete. Nge faresaio a cile me thithi angeice kö tune la, ka hape, Akötesieti fe, ini a ole koi cilie qa ngöne laka tha ceitunge kö me ite xa ate, itete qene ënö, me ite ka qali thina, me itete kuci ngazo, nge kete tha cei tune memine la telona cili. Isa lu’ a tha xeni ni ngöne la ite drai ka luengemen, nge ini a hamëne la ite hnaaluepine la ite ewekëng’ asëjëihë.”

Hna majemine hnene la angetre faresaio troa amamane koi nöjei atr la emeköti angatr. Hna majemine hnei angatre troa thaa xeni e thupene hmi me drai ka co, itre ewekë hnei angatre hna sipu acile koi angatre kö. Ketre, angatre a nyi thupene hnyawa la nöjei haö ne la itre hlapa. Ngöne la itre treu ka ase hë, ngöne la ijine pui ne xeni ne uma ne hunuma, hnei angatre hna amamane hnyawa la imethinë i angatre kowe la itre atr ka thatre la Itre Hna Cinyihan, öni angatre ka hape: “Hnëjinë hë la nöje celë ka tha ’te kö la wathebo [ene la aqane qeje pengöne eje hnene la angetre faresaio].”

Nyidrëti a sisedrëne la ceitun, me qaja la ketre e angetre “hnëjin”: “Nge telona a cile ananyin, nge tha pi galajë kö hnengödrai ’ë, ngo angeic’ a xe la imano i angeic, kola hape, Akötesieti fe, fetesi nie la haetrati ka jifelö. Ini a qaja koi nyipunie, hna tropi la ate celë kowe la uma i angeice nge hna jele mekötine hune la kete; ke tro ha acone la at atrunyi angeice kö, nge tro ha atrune la ate aconyi angeice kö.”

Haawe, Iesu a qaja hmaca la enyipi ewekëne la troa ipië. Thaa sesëkötre kö së laka itre trenge ewekë la thatraqane la itretre dreng, pine laka aqane mekune ka eje ngöne la ijine cili: ka hlemu catre la itre faresaio, itre ka meköti xajawai angatre kö, nge ame la aqane mele ne la itre atr ngöne la hneijine cili, ke, hna amë panëne pala hi la göhmeku me götrane qa. Ngo drei la itre ini hna hamëne hnei Iesu göne la ipië! Luka 18:1-14; Ioane 7:49.

▪ Pine nemene matre kola eatrëne la sipo ne la sine fö hnene la ate amekötine ka pë metrötr, nge nemene la ini nyine xome ngöne la ceitune i Iesu?

▪ Ngöne la tro nyidrëti a traqa, nemene lapaune hnei Iesu hna troa thel?

▪ Drei la hnei Iesu hna ithahnata kow ngöne la nyidrëti a qaja la ceitune la faresaio me telona?

▪ Nemene la aqane mekune ka eje thene la itre faresaio nyine tro së a thipetrij?