Tro Akötesieti “a Amekötine”
“Nge hape u, tha tro kö Akötesieti a amekötine kowe la ite iana i nyidë, lo hna hë e lai me jidi koi nyidrë?”—LUKA 18:7.
1. Drei la ketre qeqene ithuecatre koi nyipunie, nge pine nemen?
TRU la madrinen la itretre anyipici Iehova e cailo fen troa caas memine la itre trejine trahmanyi me föe ngöne la hnei angatr hna ce nyi hlue nyipici koi Iehova, a itre macatre hë enehila. Hapeu, hetre trejine kö ka tune lai hnei epuni hna atre hnyawa me fedre catre kow? Ma canga mama hi koi nyipunieti la pengöne la ketre qatre föe, ka hekö catre hë eahlo bapataiso, ngo xalaithe hi la itre icasikeu hna hnen ngöne la Uma Ne Baselaia, hnei eahlo hna trian? Maine pena, atre hi nyipunieti la ketre trejin ka qatre hë me cile huti nge nyimu macatre ne sajuëne nyidrë e nöjei wiik la itre huliwa ne cainöje trootro ne la ekalesia? Eje hi laka, ala nyimu e angatr itretre mele nyipici ka mekune ka hape, tro hë Amagedo ekö a traqa. Ngacama easë pala hi ngöne la fene ka ngazo, ngo ame pe, tre, thaa pujehnine pi kö la mejiune i angatr kowe la itre hna thingehnaeane hnei Iehova, nge ketre thaa hna ananazijëne pena kö la aqane catre i angatre troa “cile hut uti hë la pun.” (Mataio 24:13)Ketre nyipi qeqene ithuecatre kowe la ekalesia asë, la ejuine la lapaunene la itre hlue i Iehova ka mele nyipici koi Nyidrë.—Salamo 147:11.
2. Nemene la ewekë ka ahacen la hni së?
2 Ngo ame itre xaa ijin, ketre pengöne aqane ujë la hne së hna öhn. Hetre itretre anyipicin ka cainöje a itre macatre hë enehila, ngo kola tro la itre drai, nge kola pujehnine trootro la lapaune i angatre koi Iehova, uti hë la thaa hane angatr caasi memine la itre keresiano ne la ekalesia. Hace tro sa mekune laka kola nue triji Iehova hnene lo itre sine hmi së, nge atraqatre la aja së troa isa xatuane lai itre “mamoe ka pat”, matre tro angatr a bëeke hmaca kowe la hna axö mamoe. (Salamo 119:176; Roma 15:1) Ngo kola amejëne la itre hnyinge hnene la lue mekune celë ka ifeketh— ene laka itre xan a mele nyipici, nge itre xane pë hë a nanazij nge thaa caasi hë memine la ekalesia. Nemene la ka aijijëne la itretre anyipicin ka nyimutre troa catre lapaune kowe la itre hna thingehnaean hnei Iehova, nge kolo pe kö a paatre la lapaune i itre xan? Nemene la nyine tro sa kuca isa ala caas matre troa cile huti pala hi la mejiune së laka, “eashenyi hë la dai ka tru i Iehova”? (Zefania 1:14) Pane ce wange jë së la ceitune i Iesu ngöne la evangelia i Luka.
Ithuemacanyi Koi Itretre Mele “e traqa ha la Nekö i ate”
3. Drei la itre ka troa kepe thangan la ceitunene la sine föe memine la atre amekötin, nge pine nemen?
3 Ngöne Luka mekene 18, easa öhne la ceitune i Iesu göne la sine föe memine la ketre atre amekötin. Caa pengöne hi la ceitune celë memine lo trene sinee ka sipo iele, hne së hna ce wange ngöne lo ini hnapan. (Luka 11:5-13) Ngo kolo pe a mama xötreithe la itre xötre ne la ceitune ne la sine föe me atre amekötin laka, kola qaja la itre ka mel “e traqa ha la Nekö i ate” ngöne la musi ne la Baselaia, hna nyiqaane hë lo macatre 1914.—Luka 18:8.a
4. Nemene la hnei Iesu hna ithanatan qëmekene troa qaja la ceitun hne së hna e ngöne Luka mekene 18?
4 Qëmekene troa amexeje lo ceitune ne la sine föe memine la atre amekötin, hnei Iesu hna qaja ka hape, ame la aqane mama ne la traqa i nyidrë hnine la musi ne la baselaia tre, troa öhn asë hi tune la “kola sameke qa ngöne la kete götrane la hnengödrai, me hudume kowe la kete götrane la hnengödrai.” (Luka 17:24; 21:10, 29-33) Ngazo pe, ala nyimu la itre atr ka mele ngöne la “ijine la pun,” ka thaa hane kö wanga atrune la itre hatrene ka anyipicine lai. (Daniela 12:4) Pine nemen? caasi hi la kepin memine lo ijine i Noa me Lota laka, hnei angatre hna drei simine la itre ithuemacanyi Iehova. Ame ngöne la itre ijine cili, ‘hnei angat hna xeni me ij, me itö, me eënyi me nyi uma, uti hë la traqa la drai ne apaatrenyi angatr asë.’ (Luka 17:26-29) Meci hë angatr pine laka hna thepe angatre pala ha hnene la itre huliwa hna majemin kuca o drai, ene pe thaa hmekënë hë angatr me jele nyipi ewekëne la aja i Akötresie. (Mataio 24:39) Ketre tune fe hi enehila, ala nyimu la itre atr hna xome melen hnene la itre huliwa o drai, matre thaa öhne kö angatre la hatrene laka, eashenyi trootro hë la pune la fene ka thatre Akötresieti kö.—Luka 17:30.
5. (a) Drei la hnei Iesu hna hmekën nge pine nemen? (b) Nemene la kepine matre paatre pi la lapaunene la itre xan?
5 Kola mama hnyawa laka, Iesu a hnehengazone la itretre drei nyidrë, ke nyidrëti a xouen e hane jë fe huli angatr hnene la fene i Satana, uti fe hë la tro angatr a bëeke “hmaca” kowe lo itre ewekë hna nuetrije hë ekö. (Luka 17:22, 31) Celë hi ewekë lai ka traqa kowe la itre xaa keresiano. Nyimutre la itre macatre ne treqen me ajane hnene la itre atr cili, la drai ne tro Iehova a apaatrene la fene ka ngazo celë. Ngazo pe, thaa traqa ju kö Amagedo ngöne lo ijine hnei angatr hna mekun, ene pe nanazije pi hi angatr. Kola tro la itre drai nge ketre kola paatre trootro fe lo mejiune i angatr, göne la drai Iehova laka calemi catre hë. Nango huli hmitre hë angatr ngöne la huliwa ne cainöj, nge kola xome trootro la traeme i angatr hnene la itre huliwa ne la mele i angatr, matre coco pe hi la ijine hna nue kowe la itre ewekë ne ua. (Luka 8:11, 13, 14) Celë hi aqane ‘bëeke [hmaca angatre lai] kowe la itre ewekë hna tro trije ekö’—drei la hleuhleu ka tru koi angatr!
Nyipi ewekë troa “lapa thith”
6-8. (a) Qeje pengöne jë la ceitune ne la atre amekötin memine la sine föe. (b) Nemene la ini hnei Iesu hna hamën jëne la ceitune celë?
6 Nemene la nyine tro sa kuca matre thaa tro kö a pujehnine la mejiune së kowe la itre hna thingehnaeane hnei Iehova? (Heberu 3:14) Celë hi hnyinge lai hnei Iesu hna amejëne thupene la hna hmekëne la itretre dreng, matre thaa tro kö angatr a bëeke hmaca kowe la fene ka ngazo i Satana.
7 Luka a cinyihane laka hnei Iesu hna “ulatine la cei tune koi angat, ka hape, qai angate troa lapa thith, nge tha tro kö a kucakuca.” Öni Iesu: “Dei la kete amekötin ngöne la kete lapa, laka tha xou kö e Akötesie, nge tha metötëne pena la ate ; nge dei la kete sine föe ngöne la lapa cili, nge nyidoti a tro pi koi nyidë, me hape, Amekötine koi ni göi ithupëjiang. Nge pane xele kö nyidë, nge thupene lai, nyidëti a qaja e kuhu hni nyidrëti ka hape, Ngacama tha qounge Akötesie, nge tha metötëne la ate ; tro ni a amekötine kowe la sine föe celë, ke, nyidoti a lapa huli ni, wanga hmanono pi ni hnei nyidoti hna pune tro e kolemi koi ni.”
8 Thupene la hna qaja la ceitune cili, hnei Iesu hna amamane la aqane troa xötrethenge; öni nyidrë: “Denge ju nyipunie la hna qaja hnene la ate amekötine ka qali thina. Nge hape u, tha tro kö Akötesieti a amekötine kowe la ite iana i nyidë, lo hna hë e lai me jidi koi nyidë, nge nyidëti a xomihnin’ ahoeanyi angate ju? Ini a qaja koi nyipunie, tro nyidëti a canga amekötin koi angat. Ngo e traqa ha la Neköi ate, hape u, tro angeic a öhne la lapaun’ e celë fen?”—Luka 18:1-8.
“Amekötine jë koi ni”
9. Nemene la sipu taan ka mama ngöne la ceitune i Iesu göne lo sine föe me atre amekötin?
9 Canga mama hi koi së la sipu taan la ceitune celë. Thaa hna amamane hmekuje kö hnene lo lai atre amekötin memine lo lai sine föe, ngo hna jëne Iesu mina fe. Kola xëwe hnene la sine föe: “Amekötine koi ni göi ithupëjiang.” Ketre, önine la atre amekötin: “Tro ni a amekötine kowe la sine föe celë.” Matre Iesu a hnyingëne ka hape: “Nge hape u, tha tro kö Akötesieti a amekötin?” Nge öni Iesu mina fe e qeje Iehova, ka hape: “Tro nyidëti a canga amekötine koi angate.” (Luka 18:3, 5, 7, 8) Haawe, eue la ijine tro Akötresieti “a amekötin”?
10. (a) Hna pane traqa eue la drai ne iameköti ngöne lo hneijine i Iesu? (b) Eu nge troa amekötine tune kaa kowe la itre hlue i Akötresieti enehila?
10 Ame ngöne lo hneijine i Iesu, tre, hna traqa la “ijine nyi thupen” (maine, “itre drai ne elëhni,” Kingdom Interlinear) ngöne lo macatre 70 M.K. lo kola ce apaatren e Ierusalema memine la eneti hmitrötr. (Luka 21:22) Ame kowe la nöje i Akötresieti enehila, tre, tro ha amekötin ngöne la “drai ka tru i Iehova.” (Zefania 1:14; Mataio 24:21) Ame ngöne la ijine cili, tro Iehova a “nyi thupene ka aköte koi angete akötë” angetre nyihluei Nyidrë, ene la tro Iesu Keriso a “troa nyi thupene koi angete tha ’te Akötresie, me koi angete tha denge thenge la maca ka loi ne la joxu së Iesu.”—2 Thesalonika 1:6-8; Roma 12:19.
11. Tune kaa la aqane troa “canga” traqa la hna amekötin?
11 Ngo tune kaa la aqane tro sa trotrohnine la hna thingehnaeane hnei Iesu laka tro Iehova a “canga” amekötin? Kola amamane hnei Tusi Hmitrötr, laka, ngacama “ [Iehova] a xomi hnine ahoeanyi,” ngo tro Nyidrëti a canga amekötin ngöne la drai hna sa hnei Nyidrë. (Luka 18:7, 8; 2 Peteru 3:9, 10) Ngöne lo ijine i Noa, ame la kola traqa la iwë, meci tretre ju fe kö e cili lo itre atr ka ngazo. Ketre, tune lo itre drai i Lota, hnene la eë hna hlupi qaa hnengödrai me humuth asë la nöjei atr ka ngazo. Öni Iesu: “Nge tro ha kete tune fe ngöne la drai ne tro ha mama la Neköi ate.” (Luka 17:27-30) Tro hmaca fe a “canga traqa pi koi angate la hnëjin,” ene kowe lo itre atr ka ngazo. (1 Thesalonika 5:2, 3) Eje hi, ijije tro sa mejiune hnyawa laka, thaa tro jë kö Iehova a nue la caa drai kowe la fen, nge ijine tro ha amekötine ej.
“Tro Nyidrëti a amekötin”
12, 13. (a) Nemene la ini hne së hna kapa qa ngöne la ceitun ne la sine föe memine la atre amekötin? (b) Pine nemen matre xecie koi së, laka, tro Iehova a drenge la itre thithi së nge tro Nyidrëti a kuca matre troa axulune la meköt?
12 Kola amamane la itre xaa nyipici ka sisitria hnene la ceitune ne la sine föe memine la atre amekötin. Ame ngöne la kola hamë ini hnei Iesu qa ngöne lai ceitun, öni nyidrëti ka hape: “Denge ju nyipunie la hna qaja hnene la ate amekötine ka qali thina! Nyipici, hapeu, ketre tha tro jë kö Akötresieti a amekötine thatraqane la itre iana i Nyidrë?” Eje hi lai laka, thaa Iesu kö a qaja ka hape tro Iehova a tune la ketre atre amekötin, ngöne la aqane ujë i Nyidrëti kowe la itre hlue i Nyidrë. Iesu pe a amamane la isapengöi Akötresie memine la atre amekötin, matre troa hamëne kowe la itretre drei nyidrëti la ketre ini ka nyipi ewekë catr göi Iehova. Nemene la itre götrane ka aisapengönë Akötresieti memine la atre amekötin?
13 Ame la hnapan, tre, ka “qali thina “ la atre amekötin ngöne la ceitune i Iesu; ngo “Akötesieti a amekötine koi ange ka meköt.” (Salamo 7:11; 33:5) Thaa hnehengazone fe kö la atre amekötine la aja ka eje thene la sine föe, ngo ame Iehova, tre, Nyidrëti a wanga atrunyi së isa ala caas. (2 Aqane lapa ite Joxu 6:29, 30) Tha hmalahnine kö la atre amekötin troa xatuane la sine föe, ngo ame Iehova, ka hetre hni ne ajane i Nyidrë—nyipici, ka nyipi atraqatre la aja i Nyidrëti troa xatuane la itre hlue i Nyidrë. (Isaia 30:18, 19) Nemene la ini hne së hna troa xome qa ngöne lai? Maine hna drenge hnene la atre amekötine ka qali thina la xëwe ne la sine föe me kapa la sipo meköti nyiidro, haawe, ketre sisitria catre pala kö Iehova. Tro Nyidrëti a drenge la itre thithi ne la itre hlue i Nyidrë, nge tro pala kö Nyidrëti a amekötine thatraqai angatr.—Ite Edomë 15:29.
14. Pine nemen matre loi e tro sa mejiune laka troa traqa la drai ne iameköti Akötresie?
14 Qa ngöne lai, ame angetre thaa lapaune hmaca kö ka hape, calemi hë la ijine iameköti i Iehova, tre, mekune ka ngazo lai thei angatr. Pine nemen? Pine laka, e nuetrije hë lo lapaune kowe la “drai ka tru i Iehova,” nge eje a easenyi catre pe, tre, angatre hi lai a icilekeu memine lo hna qaja ka hape, atreine Akötresieti troa eatrëne la itre hnei Nyidrëti hna thingehnaean. Nge, pëkö atr ka ijije troa isenyine me qeje ejolen la hnei Nyidrëti hna mekune troa kuca. (Iobu 9:12) Matre ame la nyipi hnying, tre, hapeu, tro kö ni a cile huti ngöne la lapaun? Nge celë hnyawa hi la mekune hnei Iesu hna amejën, ngöne la pune la ceitune ne la sine föe memine la atre amekötin.
“Hape u, tro angeic’a öhne la lapaun’e celë fen?”
15. (a) Nemene la hnyinge i Iesu, nge pine nemen? (b) Nge nemene la nyine tro së isa ala caasi a isa hnyingëne thel?
15 Hnei Iesu hna amejëne la ketre hnyinge ka ahlëne la itre mekun, kola hape: “Ngo e traqa ha la Nekö i ate, hape u, tro angeic’ a öhne la lapaun’ e celë fen?” (Luka 18:8, Ithuemacanyi e cahu fen, MN) Thaa Iesu kö a qaja la lapaune tune la hne së hna majemine trotrohnin hnene la hnepe hnëewekë hna hape “lapaun,” ngo ketre pengöne lapaune kö, ene la lapaun ka eje thene la sine föe. Thaa hnei Iesu kö hna sipu sa la hnyinge i nyidrë. Nyidrëti pe amejëne ej matre upe la itretre deng troa isa mekune la pengöne la sipu lapaune i angatr. Eje kö a pujehnine trootro matre ajojezi angatre me ahmacanyi angatr kowe la itre hna hutrö hë kow? Maine hetrenyi jë pena angatre la lapaune ka eje thene la sine föe? Ketre tu së fe enehila, loi e tro sa isa hnyinge ka hape, ‘Nemene pengöne lapaun tro “la Nekö i ate” a öhne e kuhu hning?’
16. Nemene pengöne lapaun ka eje thene la sine föe?
16 E maine easa ajane tro sa hane kapa elanyi la meköti Iehova, nyipi ewekë tro sa xötrethenge la lapaune ne la sine föe. Nemene la pengöne lapaune ka eje thei eahlo? Kola mama la lapaune i eahlo hnene laka, hnei eahlo hna ielen, me catre ‘tro koi [atre amekötin] me hape, Amekötine koi ni.’ Maine hnene la sine föe cili hna sipo iele matre troa kapa la ewekë ka meköt qaathene la atre ka tha meköti kö, haawe, ijije hi troa mejiune hnene la itre hlue i Iehova enehila laka, tro angatr a kapa la ewekë ka meköti qaathei Iehova—ngacama nango qea la ijine tro angatr a pane itreqe. Ketre, angatr a amamane la mejiune i angatr kowe la itre hna thingehnaean hnei Akötresie; celë hi matre angatr a thithi iele, me ‘hë e lai me jidri koi nyidë.’ (Luka 18:7) Eje hi laka, maine thaa thithi hë hnene la ketre keresiano matre troa amekötin hnei Akötresie, tro ha mama e cili laka, thaa mejiune hë angeice kowe la hnei Iehova hna troa kuca thatraqane la itre hlue i Nyidrë.
17. Nemene la itre kepine matre tro sa thithi iele me catre lapaun, laka, troa traqa la drai ne iameköti Akötresie?
17 Ame ngöne la easa mekune hnyawa la pengöne la sine föe, tre, kolo hi lai a hamë së la itre xaa kepine matre tro sa thithi iele. Tro sa pane ce wange la eisapengönene la mele i eahlo me easë. Hna hatrengëne lapaane la atre amekötin hnene la sine föe ngacama pëkö atr ka upi eahlo troa sipone ielen; ngo ame së, Wesi Ula i Akötresie a xatua së troa “thithi iele.” (Roma 12:12) Thaa mama kö kowe la sine föe laka troa kapa la sipo i eahlo, ngo Iehova a axeciëne koi së laka, tro Nyidrëti a amekötin thatraqai së. Iehova a ulatine jëne la perofeta i Nyidrë, ka hape: “Ngacama hmit’ ej, teqene kö ej ; ke tro kö ej’ a traqa, nge tha tro kö a hmit.” (Habakuka 2:3; Salamo 97:10) Pëkö sine xölene la sine föe matre ce xëwe me acatrene pena la sipo i eahlo, ngo hetrenyi së la sine xöle ka catr, Iesu, “nyidëti hë ngöne la götrane maca i Akötesie kola xëwe sai së.” (Roma 8:34; Heberu 7:25) Qa ngöne lai, maine hace kowe la sine föe troa sipo ielene la atre amekötin matre troa kapa la ewekë ka meköti qaathei nyidrë, haawe, drei lai ewekë ka sisitria kö koi së troa catre fë la lapaune së kowe la drai ne iameköti i Iehova!
18. Tune kaa la aqane acatrene la lapaune së hnene la itre thithi së nge ijije kö tro itre ej a xatua së troa kapa la meköt?
18 Kola ini së ngöne la ceitune ne la sine föe la aqane ce tro ne la thith memine la lapaun, nge ijije tro la aqane catre thithi iele së a lepetrije la itre iajojezi ka troa apujene la lapaune së. Nyipici laka, thaa kolo kö lai a qaja ka hape ame la troa nyimutre la itre thith, tre, celë hi nyine nyi nyin la pë lapaun. Ohea! (Mataio 6:7, 8) Kola aeasenyi së kowe la Atre xupi së hnene la itre thithi së me acatrene la lapaune së, pine laka, atre hnyawa hi së ka hape thatreine kö së troa mele e tröne la Akötresi së. Nge pine laka nyipi ewekë la lapaun, tre, ijije tro ej a hamëne la mel, haawe, thaa sesëkötre kö së lo Iesu a upe la ithuecatre kowe la itretre drei nyidrë “troa lapa thith nge tha tro kö a kucakuca.” (Luka 18:1; 2 Thesalonika 3:13) Eje hi lai laka, ame la “drai ka tru i Iehova” tre, thaa eje kö a troa xulu qa ngöne laka hne së hna thith. Tro kö ej a traqa, ngacama thithi ju hë maine thaa thithi pena. Ngo tro së isa alacaas a kapa la meköt me mele pe ngöne la ijine isi Akötresie, e hne së hna akökötrene hnyawa la lapaune së me catre thithi lapa.
19. Tro sa amamane tune kaa ka hape thaa luelue kö së nge catre la lapaune së laka tro Akötresieti “a amekötin”?
19 Pane mekune hmaca jë së lo hnyinge i Iesu: “Ngo e traqa ha la Nekö i ate, hape u, tro angeic a öhne la lapaun’ e celë fen?” Nemene la mekune ka sa la hnyinge celë? Drei la madrine së laka, itre milio la itre hlue ka mele nyipici koi Iehova e cailo fen, angatr a amamane enehila jëne la itre thithi angatr, memine la aqane xomi hni ahoeany, me cile hut, laka hetrenyi angatr la lapaune cili! Qa ngöne lai, ame la mekune ka sa la hnyinge i Iesu, tre, Eje hi! Haawe, ngacama fene i Satana a akötrë së enehila hnene la itre ewekë ka thaa meköti kö, ngo easa lapaune catrëne laka tro Akötresieti “a amekötine kowe la ite iana i Nyidë”.
[Ithueamacany]
a Pane ce e jë së la tusi Luka 17:22-33 matre troa trotrohnine hnyawa la ceitun. Atrehmekune ju la itre ithuemacanyi hna hamëne göne “la Nekö i ate” ngöne Luka 17:22, 24, 30 matre troa sa la hnyinge hna amejën ngöne Luka 18:8.
Mekune pala kö nyipunie?
• Nemene la ka traqa kowe la itre keresiano matre paatre pi la lapaune i angatr?
• Pine nemen matre easë a catre lapaune kowe la drai ne iameköti Akötresie ka troa xulu?
• Nemene la itre kepine ka upi së troa cile huti pala hi ngöne la thith?
• Nemene la aqane tro la thithi iele a xatua së matre thaa tro kö a paatre la lapaune së?