Meken 121
Qëmekene La Itretre Isenyin, Thupene Lai Thei Pilato
HMAHMAKANYI hë, nge ase hë Peteru akönia kelikelë Iesu; fenesi fe hë la kootr, nge kolo ha isa ije la itretre isenyin. Ngo ame la hmakanyi ne drai ka tru, angatre a icasikeu hmaca, ngöne pena ha lo hnë kootre i angatr, itretre isenyin. Maine jë kola thele hnei angatre troa kuca matre hetre emekötine lo ikootrë hna kuca jidrin. Ame la kola tro sai Iesu koi angatr, öni angatre e hnyinge koi nyidrë tune lo aqane ujë i angatre ngöne lo pane kootr; kola hape: “Maine eö la Keriso, qaja jë koi hun.”
Iesu a sa ka hape: “Maine tro ni a qaja koi nyipunie, tha tro kö nyipunieti a kapa; nge maine tro ni a hnyingë nyipunie, tha tro kö nyipunieti a sa.” Ngo hetre trenge catre i Iesu pala hi troa qaja amamane la pengöi nyidrë, öni nyidrë: “Epine tro ha la Nekö i ate a lapa ngöne la götrane maca ne la mene i Akötesie.”
Angatre asë hi a ajane troa atre, ene pe hnyinge hmaca ju koi nyidrë ka hape: “Huni kö, eö la Nekö i Akötesie?”
Iesu a sa ka hape: “Nyipunieti lai a qaja laka ini hi.”
Ame la aja ne la itre atr cili, ke ene la troa humuthi Iesu, matre kösë ame koi angatr, hna hmaca hi la ithahnata la. Ame koi angatr, ke, ka nyi tru Iesu. Angatre a hnyingëne ka hape: “Nyine ue hmaca koi shë la kete nyine anyipicin? ke ase hë shë drenge qa ngöne la ukeineqe i nyën.” Angatre a othi Iesu ju, me tro sai nyidrë koi Ponetio Pilato, ketre gavena ne Roma.
Hnei Iuda fe lo atre wanaxoeë Iesu, hna hane sine la kootr. Atrehmekune hë angeice laka, xecie hë göi Iesu, ame hnei angeice hna ietra. Angeice a tro pi troa wange la itre tane i angetre huje me itre qatr, me hamëne hmaca lo manie ka caate nge luepi; öni angeice ka hape: “Menu hë ni hna wanaxoeëne la madra ka pë ethan.”
Angatre a sa amenyine koi angeice ka hape: “Laka eëhuni pena ha? nga eö pe.” Iuda a trije pi la manie hnine la ēnē, nge angeice a tro pi me thele troa hnöjua. Ngo xecie pena pi hi la pici ne sinöe hnei angeice hna hnöthe la eno ngön, ene pe hna anyilanyilane ju hune la hnënge etë.
Thatre kö hnene la itre tane i angetre huj, la nyine troa kuca memine la manie. Öni angatre ka hape: “Tha ijije kö troa amë it’ eje ngöne la tenge ne ahnahna, ke thupene madra.” Celë hi matre, thupene la hna ce ithahnatan, angatre a itöne pi hnene la manie cili la hnepa dro ne la atre xupi ge, nyine hua ne la itre trehnyiwa. Celë hi matre ati ëjene jë la hnepa dro cili, ka hape, “Zi ne la madra.”
Thaa fetra petre kö la jö, nge kolo ha e Iesu kowe la hnalapa ne la gavena. Kola xele ma hane lö hnene la itretre Iudra, ke angatre a mekune ka hape, wanga ngazo pi angatre hna ce tro memine la angetre ethen. Haawe, Pilato a lö pi matre troa ithahnata me angatr. Nyidrëti a hnyinge koi angatre ka hape: “Nemene la ngazo ne la ate celë hnei nyipunie hna troa qaja?”
Kola sa hnei angetre Iudra, ka hape: “Maine pëkö ngazo i nyën, maine tha nue nyëne kö huni koi nyipë.”
Thaa aja i Pilato kö troa hane lö hnine la jole cili, matre öni nyidrëti ka hape: “Xomi angeice jë hnei nyipunie, me hnyingë angeice thenge la wathebo i nyipunie.”
Kola mama hnyawa la hni ne ajane ne la itretre Iudra troa ihumuth, matre angatre a sa ka hape: “Tha ijiji huni kö troa humu atr.” Eje hi laka, maine tro angatre a humuthi Iesu ngöne la ijine Paseka, tro ha tru la ka wesitr, pine laka, nyimutre la itre atr ka wangatrunyi Iesu. Ngo hnei angatre hna kuca matre troa humuthi Iesu hnei itretre Roma, pi politik; matre kösë ame kowe la nöje ke, thaa zö i angatre kö la meci Iesu.
Qa ngöne lai, thaa hna ithahnatane kö hnene la itre hene hmi lo kootre hna kuca jidrin, ene ngöne lo angatre a axeciëne la pune koi Iesu pine nyidrëti nyi tru; ngo enehila, angatre hmaca pena ha a thele la itre xaa kepine nyine nyi zö nyidrë. Angatre a ati ewekë Iesu, pine la köni ngazo ka tru: “Öhnë hë huni la celë kola [1] amenune la nöje shë, me [2] shawa troa hote koi Kaisara, me hape, [3] nyëne hi la Keriso Joxu.”
Ame la ngazo hna xome goeëne hnei Pilato, ke, ene laka, hnei Iesu hna qaja ka hape, joxu nyidrë. Nyidrëti a lö jë hnine la uma, me hë Iesu me hnyingë nyidrëti ka hape: “Hape u, eö la Joxu i angete Iuda?” Kösë lo Pilato a hape, hape u, hnei eö hna ena la wathebo, la öni eö ka hape, joxu eö, ene pe icilekeu ju me Kaisara?
Iesu a ajane troa atre la hnei Pilato hna drenge hë göi nyidrë, matre nyidrëti a hnyingë angeice ka hape: “Nyipëti hi a qaja xanëne lai, nge hape u, hnei kete hna qeje ni koi nyipë?”
Pilato a qaja ka hape, pëkö hnei angeice hna atre, nge thaa ajane kö angeice troa atrepengöne la jole cili. Pilato a sa ka hape: “Ate Iuda ni? Hnene la nöje i nyipë me ite tane i angete huje hna nue nyipëti koi ni; nemene la hnei nyipëti hna kuca?”
Thaa Iesu kö a thele troa neëne la pengöne la musi nyidrë. Nge kola troa sesëkötre hnei Pilato, pine la trenge ewekë hna troa qaja hnei Iesu enehila. Luka 22:66–23:3; Mataio 27:1-11; Mareko 15:1; Ioane 18:28-35; Ite Huliwa 1:16-20.
▪ Nemene kepine matre kola icasikeu hmaca hnene la itretre isenyine ngöne la hmakany?
▪ Tune kaa la aqane meci Iuda, nge hna itö nemenëne lo sileva?
▪ Pine nemene matre kola thele hnei angetre Iudra tro la itretre Roma a humuthi Iesu, ngo thaa sipu kuca kö angatr?
▪ Nemene la hnei angetre Iudra hna ati ewekë Iesu pin?