Meken 131
Iesu a Amamanyi Tixenuë Nge Paseka Ne Macatre 33 M.K.
AME ngöne la ketre ijin, Iesu a ce ithahnatane jë memine lo levine lao aposetolo, matre tro angatre a itronyi hune la wetr e Galilaia. Ene pe drenge jë hnene la itre xaa ka xötrethenge Iesu, matre ala 500 angatre asë hune la wetr. Atraqatre la madrine i angatre ngöne la kola mama hnei Iesu, me nyiqaane troa ini angatr!
Ngöne la itre ewekë hnei Iesu hna qaja kowe la ka ala nyim, hnei nyidrëti fe hna qeje pengöne koi angatr, ka hape, hnei Akötresie hna hamëne la musi koi nyidrë e hnengödrai me e celë fen. Öni nyidrëti ka hape: “Qa ngöne lai, tro jë nyipunie, . . . ini angate jë troa trongëne la nöjei ewekë asëjëihë lo hnenge hna ahnithe koi nyipunie.”
Pane mekune hnyawa jë së! Kola ce kapa asë hnene la itre trahmany, itre föe me itre nekönatr, la huliwa ka caas: ene la troa inine la itre atr. Pine laka troa thele hnene la itre xaa atr troa sewe angatre troa cainöj, haawe, Iesu a ithuecatre koi angatr, me hape: “Hana wang, ini a ce me nyipunie ngöne la nöjei drai asëjëihë uti hë la pune la fene hnengödrai.” Iesu a troa ce memine la itretre drei nyidrë me xatua angatre jëne la uati hmitrötr, troa kuca la huliwa ne cainöje i angatr.
Thupene la hna mele hmaca hnei Iesu, 40 lao drai ne pane mama nyidrëti kowe la itretre drei nyidrë. Ngöne la itre ijine cili, nyidrëti a qaja koi angatre la pengöne la Baselaia i Akötresie, memine la itre hnëqa nyine troa kuca hnene la itre atr ka ajane troa xötrethenge nyidrë. Ame ngöne la ketre ijin, hnei nyidrëti fe hna hane mama koi Iakobo, ketre trejine me nyidrë ka thaa lapaune petre kö, me anyipicine koi angeice laka, Keriso nyidrë.
Itre aposetolo petre kö e Galilaia, nge Iesu a upi angatre troa bëeke a tro Ierusalema. E cili, angatre a icasikeu me Iesu, nge nyidrëti a qaja koi angatre ka hape: “Tha tro kö a ije qa Ierusalema, ngo troa teqene pe la hna thinge hnaeane hnei Tetetro, ene lo hnei nyipunie hna denge qa theng; ke hnei Ioane hna bapataisone hnei tim; ngo tro ha bapataiso nyipunie hnei Uati Hmitöte thupene la ite xa drai.”
Thupene lai, Iesu a iöhnyi hmaca memine la itre aposetolo, me thei angatre matre tro tröne la lapa, me tro Bethania eë, ketre traone ngöne la öline la wetr Elaio. Nyine haine laka, ngacama hnei nyidrëti hna amexeje pala hi ka hape, easenyi hë tro nyidrëti a tro hnengödrai eë, ngo angatre pala hi a mekune ka hape, troa acile la Baselaia i nyidrë e celë fen. Qa ngöne lai, angatre a hnyinge ka hape: “Joxu fe, hape u, ijinë hë la tro cilieti a ajoxunyi angete Isaraela hmaca?”
Thaa hnei Iesu kö hna thele troa amekötine hmaca la aqane mekune i angatr, ngo öni nyidrëti pe koi angatre ka hape: “Tha ijiji nyipunie troa ate la nöjei drai me nöjei macate, hnei Tetetro hna amë mate tro kö nyidëti a musinën.” Nge nyidrëti a qaja hnyawa hmaca la pengöne lo huliwa nyine troa kuca hnei angatr, öni nyidrë: “Tro nyipunie a hete mene e hlepëtipi la Uati Hmitöte koi nyipunie, nge tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.”
Angatre a goeëne la kola kepe Iesu hnengödrai eë, nge kola atuthi nyidrëti hnene la ketre iaw, matre thaa öhnyi nyidrëti hë hnei angatr. Thupene la hnei nyidrëti hna nyi ngönetrei ne atr, nyidrëti a elë hnengödrai eë ngöne la ngönetrei ne ua. Kola icilenyi la ala levine me goeëne la hnengödrai, ene pe mama pi hi ezi angatre la lue atr hna heetrë ka wië. Lue angela lai ka nyi ngönetrei ne atr, kola qaja koi angatre ka hape: “Angete Galilaia fe, hna uë nyipunieti laka goeë tiline la hnengödrai? ame Iesu lai hna xome qa thei nyipunie kowe la hnengödrai, tro nyidëti a traqa hmaca tune lo hnei nyipunie hna goeë nyidëti kola elë hnengödrai eë.”
Tune kaa la aqane tro trije Iesu la fene hnengödrai? Pëkö mejen, nge itretre drei nyidrëti hmekuje hi la ka öhnyi nyidrë. Tro hmaca nyidrëti a bëeke tune lai: pëkö mejen, nge itretre drei nyidrëti hmekuje hi la angetre troa wangatrehmekune laka, bëeke hmaca ha nyidrë, nge nyidrëti hë a cile ngöne la mene ne la Baselaia.
Kola uti pi la itre aposetolo qa hune la wetr Elaio, me Kederona thenge, me lö hmaca e Ierusalema; angatre a lapa e cili, ke kola drengethenge lo hnei Iesu hna qaja koi angatr. Treene hë lao drai ne angatre e cili, nge ijine pui ne xeni ne Paseka i angetre Iudra macatre 33 M.K., nge 120 la itretre drenge ka icasikeu e Ierusalema, hnine la ketre hnahage e koho. Ene pe kola atiqane la uma hnene la ketre ulili kösë enyi ka hnahna catr. Ame hna mama pi la itre thineme ka pici kösë eë, nge kola isa të hune la itretre dreng; ame hnei angatre hna qaane troa qaja la itre xaa qene hlapa kö. Tune lo hnei Iesu hna ahnithe laka, troa upe koi angatre la uati hmitrötr! Mataio 28:16-20; Luka 24:49-52; 1 Korinito 15:5-7; Ite Huliwa 1:3-15; 2:1-4.
▪ Hnei Iesu hna hamëne koi drei la itre ini tixenuë ngöne la wetr e Galilaia, nge nemene la itre ini cili?
▪ Tune kaa la aqane ithuecatre Iesu kowe la itretre drei nyidrë, nge nemene la aqane tro nyidrëti a ce me angatr?
▪ Ije drai hë thupene la hna mele hmaca hnei Iesu, nyidrëti a anyimua amamanyi kowe la itretre drei nyidrë, nge nemene la ini hnei nyidrëti hna hamëne koi angatr?
▪ Drei la atr hnei Iesu hna mama kow thupene la nyidrëti a mec, a ka thaa hane kö xötrethenge nyidrë ngöne lo ijine mele nyidrë?
▪ Nemene la lue icasikeu tixenuë Iesu me itre aposetolo i nyidrë, nge nemene la ewekë ka traqa ngöne la lue ijine cili?
▪ Nemene la aliene la hna qaja ka hape, tro Iesu a traqa hmaca tune lo nyidrëti a tro?
▪ Nemene la ewekë ka traqa ngöne lo Paseka macatre 33 M.K.?