Meken 133

Iesu a Umuthe La Huliwa Hnei Akotresieti Hna Upi Nyidrëti Troa Kuca

DREI la madrine ka tru koi së, ngöne laka, Iesu Keriso, Tane isi ka tru, a troa apaatrenyi Satana memine la fene ka ngazo i angeic! Ene pe nyiqaane pi la musi ka tingetinge i Iesu, a waane thauzane lao macatre.

Fene la musi Iesu me itre joxu ka ce me nyidrë, tro la itre thelene ka mele qa Amagedo, a nyihnyawane la ihnadro, pine laka dro catre ej, thupene la isi ka meköti Akötresie. Maine jë troa nue la ketre hnepe ijine tro la itre thelene a hnaho, nge tro la itre nekö i angatre a hane ce huliwa me angatr, me nyihnyawane la ihnadro matre tro eje a ketre hlapa ka mingöminge troa goeën.

Tro mina fe Iesu a thapa pi qa hnine la itre hua la itre ka meci ka nyimutre catr, matre tro fe angatre a hane mele ngöne la paradraiso ka lolo cili. Tro nyidrëti a aejëne lai, matre troa eatre la hnei nyidrëti hna thingehnaeane ka hape: “Calemi hë la ijine tro la nöjei ate ngöne la ite hua a denge la aqane ewekë i angeic, me tro pi.”

Thene la itre hna troa amelene hmaca cili, kola hane e fe lo atrekënö ka meci hune la sinöe ezi Iesu. Mekune hi së lo hna thingehnaeane hnei Iesu koi angeic, kola hape: “Nyipici ini a qaja koi ’ö ngöne la drai celë, Tro eö a ce me ini ngöne la paradaiso.” Thaa tro kö a tro hnengödrai eë hnene la atr celë troa hane ce musi me Iesu, ceitune me ketre joxu; ketre, thaa tro hmaca kö Iesu a nyi ngönetrei ne atr, matre troa ce mele me angeice e celë fene hna troa aparadraison. Eje hi laka, Iesu a troa ce me angeic, ngöne laka, tro nyidrëti a amele angeice hmaca matre troa hane mele ngöne la paradraiso, nge tro nyidrëti a thupëne matre tro pala hi a hetrenyi angeice la itre ewekë thatraqane la ngönetrei, me ngöne la götrane la ua, tune la aqane amamane hnene la iatr thupene la götrane celë.

Pane mekune ju së! Atraqatre la ihnimi Iesu kowe la itre atr asë ka drengethenge nyidrë, ene la itre thelene ka mele pe e Amagedo, me itre nekö i angatr, me itre atr ka mele hmaca qa hna mec, laka, itre miliar; nyipici, angatre asë lai a troa ce kökötre trootro uti hë la pexeje hnyawa angatr. Jëne la Hupuna i Nyidrë, Iesu Keriso joxu, Iehova a troa ce mele memine la itre atr, ngöne la götrane la ua. “Nge,” tune la hna qaja hnene la nine ula qaa hnengödrai hna denge hnei Ioane, kola hape: “Tro nyidëti a köletije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni, me teij, me aköt.” Pë hmaca kö atr ka troa akötr, maine hetre sine meci pena, e celë fen.

Ame ngöne la pune la Waane Thauzane Lao Macatre Ne Musi Iesu, tro ha ceitune la aqane mele ngöne la ijine cili, memine lo ijine Akötresieti a upe la pane trefën, ene Adamu me Eva, troa hnaho me nyialiene la ihnadro. Eje hi laka, troa tiqa la fene hnene la itre atr ka meköti me ka pexej, pine laka, troa kepe thangane hnei angatre asë la itre manathithi qa ngöne la mele hna hujëne hnei Iesu. Tro ha paatre la mec, lo pune la ngazo i Adamu.

Haawe, tro hë Iesu a eatrëne asë lo hnei Akötresie hna thele thei nyidrë. Qa ngöne lai, ame hë ngöne la pune la caa thauzane ne macatre ne musi Keriso, tro nyidrëti a nue hmaca pi la Baselaia kowe la Tretretro i nyidrë, me fetra fë koi Akötresie la itre atr ka pexej. Tro Akötresieti a nue Satana pi me itre dremoni angeic, qa hnine la hnaop, ene lo götrane hna aceitunëne me mec. Nemene kepine lai?

Ame ngöne la pune la musi Keriso, ala nyimu la itre atr ka mele ngöne lo lai paradraiso, itre atr hna amelene hmaca nge thaa hna hane tupathe fe kö lo lapaune i angatr. Qëmekene tro angatre a mec, thatre pengöne hnyawa kö angatre la itre hna thingehnaeane hnei Akötresie, matre thaa hane fe kö angatre amamane la lapaune i angatre kowe itre ej. Nge mele hmaca ha angatr, angatre a hane atre la nyipici qa hnine la Tusi Hmitrötr, troa hmaloi koi angatre troa nyihlue i Akötresie ngöne la paradraiso, ke pëkö icilekeu. Ngo maine troa nue Satana troa tupathi angatre me sewe angatre troa nyihlue i Akötresie, hapeu, atreine kö tro angatre a mele nyipici koi Akötresie ngöne la itupath? Celë hi kepine la, matre troa nue Satana hmaca.

Kola amamane hnene la ewekë hna meköle goeëne hnei Ioane laka, thupene la itre macatre ka caa thauzane ne musi Iesu, tro Satana a thapa la itre atr ka ala nyimu catr, qa ngöne la hmi Akötresie. Ngo e fenesi hë la itupathi tixenuë cili, tro ha apaatrenyi Satana palua, me itre dremoni, memine fe lo itre atr asë hnei angeice hna atreine amenun. Nge ame pë hë itre ka cile catre qa ngöne la itupath, ene la itre thelene ka mele nyipici pe, tro angatre a kapa madrine epine palua la itre manathithi hna hamëne hnene la Tretretro e koho hnengödrai.

Eje hi laka, hnei Iesu hna kuca ha la aja i Akötresie, nge tro pala hi nyidrëti a eatrëne la mekuana i Akötresie ka sisitria. Drei la itre manathithi hne së hna troa kapa elany, qa ngöne la itre hnei nyidrëti hna kuca, ke ase hë acili nyidrë troa joxu e koho hnengödrai, hnei Akötresie! Ketre, thaa sihngödri kö lo itre hnei nyidrëti hna kuca, ngöne lo nyidrëti e celë fen.

Hna hmala la hni Iesu troa uti kowe la fen, nge jëne la ini hnei nyidrëti hna hamën, haawe, hnei nyidrëti hna thele matre tro së a hane atre hnyawa la Tretretro. Ketre, hnei nyidrëti hna melëne la itre thiina ka lolo i Akötresie. Kola ketr la itre hni së ngöne la easë a öhne la trenge catre ka tru, me aqane catr, nge ka hetrenyi nyidrë la inamacane ka pë san, nge ka maca nyidrë troa inin, me catre cainöj, nge ka tru la ihnimi nyidrë, me aliene la mekune i nyidrë. Eje hi laka, ame la easë a mekune hmaca la aqane akötre me meci nyidrë, matre tro la thupene mele qaathei nyidrë a hane aijijë së troa kapa hmaca la mele ka epine palua, ene pe hane ju fe ketr la itre hni së, me upi së troa olene koi nyidrë.

Nyipici, thaa ketre atr menu kö la hne së hna öhn, ngöne la easë a inine la mele i Iesu! Kola mama laka, ka sisitria catre nyidrë, nge thatreine kö ketre me ketre troa cile koi nyidrë. Hetre hni ne ajane së troa hane nyitipu Ponetio Pilato, gavena i angetre Roma, me qaja ka hape: “Hana wange la ate!” Kolo lai a qaja la “atr,” ene la atr ka tru ne la nöjei atr asë!

Maine tro së a kapa la thupene mele i Iesu ka thepe së qa ngöne la mec, haawe, atreine hi tro sa utretre qa ngöne la ehnefe ne la ngazo, memine la meci hne së hna kapa qaathei Adamu, nge tro pë hë së a itre nekö i Iesu, “Keme Ka Epine Palua.” Ame kowe la itre atr asë ka ajane troa hetrenyi la mele ka thaa ase palua kö, thaa tro kö angatre a atrepengöi Akötresie hmekuj, ngo Iesu Keriso fe lo Hupuna i Nyidrë. Epi tro asë hi së a e me inine la itusi celë, matre troa xatua së troa hetrenyi la atrehmekune ka sisitria catr, thatraqane la mele së! 1 Ioane 2:17; 1:7; Ioane 5:28, 29; 3:16; 17:3; 19:5; Luka 23:43; Genese 1:28; 1 Korinito 15:24-28; Hna Amamane 20:1-3, 6-10; 21:3, 4; Isaia 9:6.

▪ Nemene la hnëqa me madrine ka tru ka troa eje thene la itre thelene i Amagedo me itre nekö i angatr?

▪ Drei la itre xaa ka troa mele hnine la paradraiso, cememine lai itre thelene me itre nekö i angatr, nge troa trotrohnine tune kaa la hna hape, tro Iesu a ce me angatr?

▪ Nemene la pengöne la mele ngöne la pune la musi ka caa thauzane macatre, nge nemene la hna troa kuca hnei Iesu e thupene lai?

▪ Pine nemene matre troa nue Satana hmaca pi qa hnine la hnaop, nge nemene hë la pune koi angeice me itre ka xötrethenge angeic?

▪ Tune kaa la aqane tro Iesu a “Keme Ka Epine Palua”?