Ini 5
Nemene La Aja i Akötresie Kowe La Fen?
Nemene la kepine matre xupe jë Iehova la ihnadro? (1, 2)
Pine nemene matre thaa paradraiso kö la fene enehila? (3)
Nemene la pune kowe la itre atr ka ngazo? (4)
Ngöne la itre drai ka troa xulu, nemene la hnei Iesu hna troa kuca kowe la itre ka wezipo? kowe la itre qatr? kowe la itre ka mec? (5, 6)
Maine ajane së troa hane kepe thangane la itre manathithi ka troa xulu, ke, nemene la nyine tro së a kuca? (7)
1. Hnei Iehova hna xupe la fene celë, matre tro la itre atr a mele manathithi hune eje epine palua. Aja i Nyidrëti pala hi troa jilapaane la fen, hnene la itre atr ka meköt, me ka madrin. (Salamo 115:16; Isaia 45:18) Tha tro jë kö a apatrene la ihnadro; tro eje a cile huti epine palua.—Salamo 104:5; Ate Cainöj 1:4.
2. Qëmekene tro Akötresie a xupe la atr, ke, hnei Nyidrëti hna iëne la ketre hnepe götrane la ihnadro, me nyihnyawane eje matre ketre paradraiso ka mingöming. Hnei Nyidrëti hna hëne la hlapa cili ka hape, gaatrane Edena. E cili hi la hna amë lo pane trahmanyi me föe, ene Adamu me Eva. Ame la aja i Akötresie, ke, tro nyidroti a hnaho me nyialiene la fene asë. Nge tro fe hë a aparadraisone trongëne la fene asë.—Genese 1:28; 2:8, 15.
3. Hnei Adamu me Eva hna tria ngöne laka, hnei nyidroti hna thë troa ena la wathebo i Akötresie. Celë hi matre, Iehova pë hë a upe triji nyidroti pi qa ngöne la gaatrane Edena. Luzi hë la paradraiso. (Genese 3:1-6, 23) Ngo, thaa hnei Iehova kö hna thëthëhmine la trepene mekune i Nyidrë kowe la fen. Nyidrëti pe a thingehnaeane ka hape, tro la fene a paradraiso, nge tro la itre atr a mele hune eje epine palua. Nemene la aqane tro Nyidrëti a aejëne la mekuana i Nyidrë?—Salamo 37:29.
4. Qëmekene troa paradraiso la fen, ke, troa pane apaatrene la itre atr ka ngazo. (Salamo 37:38) Ewekë lai ka troa traqa e Amagedon, ene laka tro la isi i Akötresie a apaatrene trije la iangazo. Easenyi hë troa akalabusi Satana koi 1 000 lao macatre. Kola hape, pë hmaca kö atr ka ngazo ka troa adrone la fen. Tro hmekuje hi la nöje i Akötresie, a mele ngöne la Paradraiso cili.—Hna Amamane 16:14, 16; 20:1-3.
5. Thupene lai, tro Keriso Iesu a Joxu, me musi hune la fene hnengödrai asë ngöne lai 1 000 lao macatre cili. (Hna Amamane 20:6) Tro nyidrë a xome trije trootro la ngazo, ka eje ngöne la mekune memine la ngönetrei së. Tro hmaca së a itre atr ka pexeje tui Adamu me Eva ekö, lo qëmekene tro nyidroti a thaa idrei. Thupene lai, pë hmaca kö wezipo, me qatr, me mec. Tro ha loi hnene lo itre ka wezipo, nge tro fe hë a ngönetrei ne thöthi hmaca lo itre qatr.—Iobu 33:25; Isaia 33:24; Hna Amamane 21:3, 4.
6. Ngöne la itre macatre ka ca thauzane musi Iesu, ke, tro la itre atr ka lapaune a huliwa matre paradraiso hmaca jë la fene asë. (Luka 23:43) Haawe, tro hë a amelene hmaca la itre milio lao ka meci e celë fen. (Ite Huliwa 24:15) Maine tro angatre a kuca la hna amekötine koi angatre hnei Akötresie, ke, tro pala hi angatre a mele e celë fene epine palua. Ngo maine tro angatre a thaa idrei, ke, tro hë a apaatrenyi angatre uti hë epine palua.—Ioane 5:28, 29; Hna Amamane 20:11-15.
7. Qa ngöne lai, troa hune la aja i Akötresie thatraqane la fen, ene lo mekune i Nyidrëti ekö ngöne la qaan. Hapeu, aja i epuni kö troa hane melëne la itre manathithi cili ka troa xulu? Maine eje hi, ke, nyipi ewekë troa atre Iehova, me drenge thenge la itre hnei Nyidrëti hna amekötin. Troa xatua epuni troa trongëne lai, e hnei epuni fe hna hane sine la itre icasikeu ngöne la uma ne Baselaia ne la itre Temoë i Iehova.—Isaia 11:9; Heberu 10:24, 25.
[Iatr ne la götran 10]
Paradraiso hna aluzin
[Iatr ne la götran 11]
Thupei Amagedon, paradraiso hmaca ha la fen