Mekene 6
Nemene La Kepine Matre Nue Pi Akötresie La Akötr
1, 2. Tune kaa la aqane aluuzine hnene la lue pane keme me thine së, lo mele ka loi hnei nyidroti hna kapa qaathei Akötresie ngöne la qaan?
PINE nemene matre, traqa pi la hnëjin? Nemene la ewekë ka angazone la mele ka sisitria hna hamëne hnei Akötresie, kowe la lue pane atr ngöne la paradraiso e Edena? Pine nemene matre paatre kö la tingetinge me meledrai, ngo joxu pena ha la iangazo me akötr, lue ewekë ka jilapane la fen, a itre thauzane hë lao macatre enehila?
2 Ame la kepine lai, ke, hnei Adamu me Eva hna huliwane angazone la musi ka eje thei nyidro. Thëthëhmine hë nyidroti lo hna hape, thatreine kö tro nyidroti a traqa kowe la mele ka loi, e hna nuetriji Akötresie me itre wathebo i Nyidrë. Hnei nyidroti hna thele troa sipu musinëne la mele i nyidro, kola mekune laka, tro kö a sisitria hune ekö. Celë hi matre sasaithe ju hi nyidro, la ifegone ene lo musi hna nue koi nyidro.—Genese, mekene 3.
Aqane Troa Wange La Musi Atraqatre i Akötresie
3-5. Pine nemene matre, thaa humuthi Adamu kö me Eva hnei Akötresie, me nyiqaane hmaca troa xupi hna i nyidro?
3 Pine nemene matre thaa humuthi Adamu kö ekö me Eva hnei Akötresie, me xupe hmaca la lue xaa trefëne nyine hna i nyidro? Pine laka, hna jele ngazone la Musi ka tru i Nyidrë, ene la tro nyidrëti a musinëne asë la nöjei hna xup.
4 Hanawange la ketre hnying, kola hape: Drei la ka ijije troa mus, nge eje thei drei la musi ka meköt? Meköti koi Akötresie troa mus, ke, ka pucatine asë Nyidrë nge nyidrëti la Atre xupe la nöjei hna xupe asë. Pine laka ka thatrehmekune la inamacane i Nyidrë, sisitria la aqane tro Nyidrëti a musi koi angatr. Ngo ame pe, hetre ka qeje engazone la musi Nyidrë. Maine jë hetre engazone lai atr hnei nyidrëti hna xup? Tro pë hë së a ce wange thupen, la aqane ketr la lapaune ne la atr hnene la ewekë cili.
5 Qa ngöne la hna trotriji Akötresie hnene la atr, ene pe fetra jë la hnyinge celë: hapeu, tro kö la atr a hetrenyi la mele ka loi, e tröne la musi Akötresie? Atre hnyawa la Atre Ixupe la aqane troa sa la hnyinge celë, ngo ame la jëne ka sisitria matre tro kö la itre atr a ketre sipu öhn, ke, ene la troa nue angatre troa kuca la hnei angatre hna mekun. Pine laka, hnei angatre hna sipu iëne la jë i angatr, thenge la musi hna isa hamëne koi angatre ekö, ene pe nue angatre pi hnei Akötresie.
6, 7. Pine nemene matre Akötresieti a nue aqeane pi la itre atr, matre tro angatre a ketre sipu mus?
6 Qa ngöne laka pexeje hë la ijine hna nue hnei Akötresie, tro la atr a mele thenge la aqane nue koi angeic troa ië ewekë thatraqane la mele i angeic, kösë, ijije hë enehila koi Nyidrëti troa axeciëne paluane kowe la atr, maine loi koi angeice la musi qaathei Nyidrë, maine ka loi pena la tro angeice a sipu mus. Loi pe, pexejë hë la ijine hna nue kowe la atr, troa traqa kowe la pune la itre mekune i angeic, ngöne la götrane la politik, me götrane hna kuca la nöjei pengöne mo ka tru ne la fen, me ngöne la götrane la sias, memine la götrane hna troa thele nyin la nöjei mec.
7 Celë hi matre hnei Akötresieti hna nue asë kowe la atr uti hë enehila, tro angeice a ketre musinëne la mele i angeic, matre mama jë la hatren, ka hape, ijije maine thaa ijije pena troa mele ka loi e tröne la musi Akötresie. Celë hi matre, ijije kowe la atr troa iën, loi koi angeice la thiina ka loi, maine iaxösisi, ihnimi maine imethinë, thiina ka meköti maine thiina ka qali. Ngo hnei angeice fe hë hna kepe thangane la itre thiina hnei angeice hna melën, ene la tingetinge ka xulu qa ngöne la atreine ce mel, maine akötre pena, thangane la hna mele hnine la ngazo.
Itre Ua Ka Pitru
8, 9. (a) Hna traqa tune kaa la icilekeu e koho hnengödrai? (b) Thupei Adamu me Eva, drei mina fe la hnei Satana hna hane ukune troa icilekeu?
8 Hana wange la ketre nyine troa wangatrun. Thaa nyidroti hmekuje kö, lue pane keme me thine së, lo ka pi tru koi Akötresie. Ngo drei mina fe la itre xaa ka icilekeu ngöne la hneijine cili? Kolo itre xaa xupuana i Akötresie, ene la itre ua. Qëmekene tro Akötresieti a xupe la atr, hetrenyi kö la itre xaa xupuana i Nyidrë ka draië: ene la itre angela ka nyimutre, itre ka troa mele e koho hnengödrai. Hnei Nyidrëti mina fe hna xupi angatre me hamëne koi angatre la mus, ngo thaa tro pe a sasaithe la Musi Akötresie.—Iobu 38:7; Salamo 104:4; Hna Amamane 5:11.
9 Kola amamane hnei Tusi Hmitrötre laka, hna pane nyiqaane icilekeu e koho hnengödrai. Hna traqa la ajane kowe la ketre ua, troa ketre sipu mus. Hnei angeice mina fe hna ajane tro la itre atr a thili koi angeic. (Mataio 4:8, 9) Hnene la ua ka icilekeu hna nyi ewekë Akötresie, me qaja ka hape, Nyidrë a cipa Adamu me Eva la ketre ewekë ka lolo, ene pe iaö nyidroti ju hi troa hane icilekeu. (Genese 3:1-5) Celë hi matre, kola hë angeice ju ka hape, Diabolo (Atre sili trenga thoi) nge Satana (Atre icilekeu). Thupene lai, hnei angeice hna ukune fe la itre xaa ua, troa hane icilekeu. Kola hëne itre ej, ka hape, itre dremoni.—Deuteronomi 32:17; Hna Amamane 12:9; 16:14.
10. Nemene hë la pune la icilekeu ne la itre atr me itre ua?
10 Qa ngöne la hnene la itre atr hna hane icilekeu me Akötresie, haawe, hna huli angatre fe hnei Satana me itre demoni i angeic. Celë hi kepine matre Tusi Hmitrötre a hë Satana ka hape, “haze ne la fen,” atre “atimekëne la itre hni angete tha lapaune kö.” Ketre, Wesi Ula i Akötresieti fe a qaja ka hape, “fene hnengödrai asëjëihë a meköle thene la ate ka ngazo.” Hnei Iesu mina fe hna hë Satana “tane celë fen.”—2 Korinito 4:4; 1 Ioane 5:19; Ioane 12:31.
Lue Hnying
11. Nemene fe la ketre hnyinge hnei Satana hna cile fë, matre troa upe zö Akötresie?
11 Hna amejëne hnei Satana la ketre hnyinge ka nyi zö Akötresie. Ene la kola upe ka hape ka hetre ethane la aqane xupe Akötresie la atr, nge maine hetre itre trenge wathebo hna amekötine koi angeic, thatreine jë kö tro angeice a kuca la loi. Haawe, Satana a mekune ka hape, tro la itre atr a ëji Akötresie, ngöne la kola traqa koi angatre la itre itupath. (Iobu 2:1-5) Celë hi mekune i Satana lai, ngöne la aqane tëëtëne la mele nyipici ne la atr.
12-14. Nemene la aqane amamane hnene la mele ne la atr, la nyipici göne lo lue hnyinge hna catre cile fë hnei Satana?
12 Drei la kepine matre nue pi Akötresie la itre macatre ka nyimutre, matre pane melëne jë hnene la itre hna xupe ka inamacan. Qa ngöne lai, atreine hë Nyidrë troa sa la hnyinge celë memine mina fe lo hnyinge ka tru, ene lo pengöne lo Musi atraqatre i Akötresie. (Wange ju la Esodo 9:16.) Qanyine la nöjei pengöne aqane mele ne la atr, troa amamane la trenge nyipici ngöne la lue hnyinge cili.
13 Haawe, thupene hë la itre macatre hna melëne hnene la atr, hapeu, thaa musi Akötresieti kö la atrekë nyipi göhnene la musi Atraqatr? Atreine kö la itre atr sipu cilëne la mus, matre sisitria hune la itre hna amekötine hnei Akötresie? Hetre ketre musi kö hna acile hnei atr ka isa pengöne memine la musi Akötresie, nge ka atreine troa fetra sai së kowe la fene ka tiqa hnene la manathith, ene laka, pë hmaca fe kö isi, me ihumuth, me mele thoi? Atreine kö ngaane la pë mo me hamëne kowe la nöjei atr la meledrai? Atreine kö apaatrene la kucakuca me qatr, memine la mec? Drei la nöjei ewekë hna troa aeatrëne hnene la musi Akötresie.—Genese 1:26-31.
14 Ame ngöne la hnyinge hnaaluen, nemene hë la ewekë ka amamane hnyawa ngöne la itre macatre, göi hna atreine troa kuca hnene la atr? Hapeu, ngazo la hnei Akötresieti hna kuca, ene la aqane xupe i Nyidrë la itre atr? Ketre, tro kö a hetrenyi la itre atr ka kuca la loi, ngacama kola waziluthi angatre hnene la itre itupath? Tro kö la itre atr a amamane la aja i angatre troa lapa fene la musi Akötresie, hune la musi ne la atr ka tro triji Nyidrë?
[Iatr ne la götran 13]
Hnei Akötresie hna nue ijine kowe la atr, troa amamane la edraiëne la inamacane i angeic