Mekene 9
Troa Atre Tune Kaa Laka Easë a Melëne La “Itre Drai Hnapin”
1, 2. Tro së a atre tune kaa laka, easë hë a melëne la itre drai hnapin?
TRO së a atre hnyawa tune kaa ka hape, easë enehila a melëne la ijine tro la Baselaia i Akötresie a mejë troa cile kowe la musi ne la atr? Tro fe së a atre tune kaa ka hape, easenyi catre hë lo ijine tro Akötresieti a apaatrene lo nöjei aqane iangazo me nöjei pengöne akötr?
2 Itre ewekë hi la hna ajane troa atre hnene lo itretre i drei Iesu. Hnei angatre hna hnyingë nyidrëti “la hatene” la hlepëti hmaca i nyidrë, ene lo ijine nyidrëti a troa joxu ne la Baselaia, nge tune mina fe la hatrene la “puatine la [“hneijine,” MN] celë.” (Mataio 24:3) Ame la Iesu a sa lai hnying, hnei nyidrëti hna e la itre ewekë ka troa traqa nge ka troa enijëne la fen, ketre tune mina fe la itre ejolene la mel laka, kola itraqaitrai; celë hi nöjei ewekë lai ka amamane laka, easë hë a nyiqaane melëne lo “ijine la pun,” nge “ite drai hnapine” a kolo hi a qaja la hneijine celë. (Daniela 11:40; 2 Timoteo 3:1) Hane kö së öhne ngöne la hneijine së, la hatrene cili ka nyimu alien? Atreine hi tro së a sa ka hape, nyipici, pine laka, ewekë hne së hna öhn, nge thaa ka sihngödre kö!
Itre Isi Ngöne La Fene Hnengödrai Asë
3, 4. Pine nemene matre easë a qaja ka hape ka ihmeku la itre isi ngöne la hneijine së, memine la hna perofetane hnei Iesu?
3 Hnei Iesu hna thingehnaeane ka hape, tro ha ‘cile la kete nöje kowe la kete nöj, me kete baselaia kowe la kete baselaia.’ (Mataio 24:7) Ame ngöne la macatre 1914, hna enijëne la fene hnene la ketre isi hna lö hnin hnene la itre nöje ka tru memine la itre baselaia; ka ketre pengöne kö la isi cili hune lo itre isi ekö hnapan. Kola jele nyipicine lai hnene la itre ka ini Histoire, matre angatre a hëne ju la ijine cili, ka hape, isi ka tru. Celë hi pane isi la ka ketre pengön, ka traqa ngöne la mele ne la atr, ene la pane isi ka tru ka jilapane la fene hnengödrai asë. Hna e la 20 milio lao sooc me itre xaa atr ju kö ka meci ngöne la ijine cili, thaa hna traqa tune kö ngöne la itre xaa isi ekö.
4 Mama hnyawa pi hi laka, kola nyiqaane la itre drai hnapin, hmekune lai Isi ka tru ka traqa kowe la fene hnengödrai asë. Hnei Iesu hna qaja, ka hape, tro la isi ka tru cili memine la itre xaa ewekë ju kö ka troa traqa, a “ite qane la aköt.” (Mataio 24:8) Nge nyipici hi lai, pine laka, tru catre pala kö la itre sooce me itre xaa atr ju kö ka meci ngöne lo hnaaluene isi ka tru ngöne la fen, 50 milio la etrun. Nyimutre catre pala kö la etrune la itre atr ka meci ngöne la itre isi ne la hneijine së, 100 milio nge hetre munëne la etrun, kösë troa afoa la etrune la itre ka meci ngöne lo 400 lao macatre ka ase hë! Nyine hmahma lai kowe la itre musi ne fen!
Itre Xaa Nyine Anyipicin
5-7. Nemene la itre xaa ka anyipicine ka hape, easë a melëne lo itre drai hnapin?
5 Hnei Iesu hna qaja mina fe la itre xaa ewekë ka troa nyi sine trongene la itre drai hnapin, hna hape: “Nge tro ha hete ite sha atraqate ngöne la ite hlapa, me jiin, me mec [itre meci ka ixötrekeu].” (Luka 21:11) Celë hi aqane qaja amamane la itre ewekë hna melëne qaane lo 1914, hnene laka, kola kökötre catre pala hi la itre akötre qa ngöne la itre hulö cili.
6 Kolo pala hi a tru hnei atr ka meci ngöne la itre sha atraqatr. Ketre, thupene lo pane isi ka tru ngöne la fen, 20 milio la atr ka meci hna tithe hnene hmekuje hi lo giripi ne Sepania—itre xane a qaja ka hape, 30 milio nge hetre munëne la etrune la itre ka mec. Hna thapa fe la mele ne la itre xane hnene la SIDA, itre hadredre thauzane la etrun, nge kola troa kei fe la itre milio ngöne la itre drai ka troa xulu. Ame ngöne la nöjei macatre, itre milio la etrune la itre atr ka meci hnene la itre meci fë wenethëhmi, me kaaser, me itre xaa meci ju kö. Itre xane a meci trootro hnei jinë xen, itre milio fe la etrun. Thaa nyine ikelikelëne kö, kola mama hnyawa laka, qaane lo macatre 1914 kola thapa hnene la itre ‘ka ti hose ne la tusi Hna Amamane’ jëne la itre isi angatr, itre jiine me itre meci ka ixötrekeu, lo mele ne la itre atr ka nyimutre ngöne la fene hnengödrai asë.—Hna Amamane 6:3-8.
7 Hnei Iesu mina fe hna thingehnaeane ka hape, troa elë la ihumuth, nge celë hi ewekë la hne së hna öhne hnyawa enehila ngöne la nöjei nöje asë. Öni nyidrëti ka hape: “Nge tro ha nanazije la ihnimi ne la ka ala nyimu ngöne laka troa mana la ngazo.”—Mataio 24:12.
8. Nemene la ka amamane ka hape, ka ihmeku la hneijine së memine lo hna perofetane ngöne 2 Timoteo mekene 3?
8 Ketre, hna perofetane fe hnei Tusi Hmitrötre laka, tro ha paatre trootro la itre thiina ka loi, ewekë ka mama hnyawa enehila ngöne la fene asë, hna hape: “Tro ha traqa la nöjei ijine ka aköte ngöne la ite drai hnapine. Ke tro nöjei ate a hnimi angate kö, me meciu mani, me selën, me nyi tru, me pi tru, me tha dei keme me thin, me tha ole kö, me tha metöte kö, angete tha hnimi sinen, me tha ihnimi kö, me itete ixöjetij, me ka tha’teine xomi hnöth, me ka cate mek, me itete tha ajane kö la loi, itete wanaxoe, me huliwa wathöthöl, me ka kekë, me itete ajane la nyine amadrine ngo tha ajane kö koi Akötesie; angetre kösë thina ka ijiji Akötesie, ngo xelene pe la menen’ej . . . Ate thina ka ngazo me itete iaö, tro pala kö angat’ a ngazo.” (2 Timoteo 3:1-13) Itre ewekë asë hi la, hna öhne hnene la lue meke së.
Ketre Nyine Anyipicin
9. Nemene la ewekë ka traqa e koho hnengödrai, ngöne lo ijine kola xejë la itre drai hnapin e celë fen?
9 Hetrenyi la ketre kepine matre kola atraqatre catre la akötre ngöne la hneijine së enehila. Ame ngöne lo macatre 1914, ijine kola nyiqaane la itre drai hnapin, hna traqa hmekune la macatre cili la ketre ewekë ka troa athixötrëne la mele ne la itre atr. Ame ngöne la ijine cili, tune lo hna perofetane hë ngöne la Tusi Hmitrötre ka hape: “Nge kola ishi e hnengödrai; Mikaela [Keriso ngöne la mene i nyidrë e koho hnengödrai] me ite angela i nyidë a ishi memine la drakona [Satana] me ite angela i nyën [itre dremoni] a itö ishi me angat, nge tha cate kö nyuden; kete pa hmaca kö hne i nyudeni e hnengödrai. Ame hna helënepi la drakona atraqat, celë hi une ekö, ëjene Diabolo nge Satana, ate amenune la fene hnengödrai asëjëihë; hna helë nyëne pi kowe la fene hnengödrai, nge hna ce helë nyëne me ite angela i nyën.”—Hna Amamane 12:7-9.
10, 11. Nemene la thangane kowe la itre atr, thupene lo kola upe triji Satana me itre demoni i angeice qaa koho hnengödrai?
10 Nemene hë la thangane lai kowe la itre atr asë e celë fen? Önine lo hna perofetane ka hape: “Ekölö hi ni la hnadro me hnagejë qa ngöne la hna utipi koi nyipunie la Diabolo ka tru tenge elëhni, ke trotrohnine hë nyëne laka xoxopate pe hi la ijine i nyën.” Nyipici, atre hnyawa hi Satana laka, easenyi hë troa apaatrene la fene i angeic, celë hi matre, angeice a canga kuca asë la hnei angeice hna atreine matre troa upe la itre atr troa icilekeu me Akötresie, qëmekene la troa apaatrenyi angeice memine la fene hnei angeice hna musinën. (Hna Amamane 12:12; 20:1-3) Hleuhleu nge ngazo la pune kowe la itre ua, pine laka, hnei angatre hna huliwane menune la atreine hna hamëne koi angatre troa ië ewekë! Nge drei mina fe la engazone la aqane mele ngöne la ihnadro, hmekune lo macatre 1914, ene lo kola nyiqaane ajojezine la fene hnei angeic!
11 Celë hi matre, thaa sesëkötre kö së la hnei Iesu hna perofetane thatraqane la hneijine së, ka hape: “Nge tro ha mama qa hnengödrai la ite ewekë nyine aqoun, me ite haten’atraqat.”—Luka 21:11.
Easenyi Hë La Pune Kowe La Musi Atr Me Itre Dremoni
12. Nemene pala kö la ketre e itre hna perofetane tixenuë, ka troa eatre qëmekene la troa nyipune la fene celë?
12 Ijetre pala kö la itre hna perofetane hnei Tusi Hmitrötr ka troa eatr, qëmekene la tro Akötresieti a apaatrene la fene celë? Thaa tru pe kö! Eje ngöne 1 Thesalonika 5:3 la ketre hna perofetane tixenuë, hne së hna e ka hape: “Ame ngöne la angatre a ce ithahnatane la tingetinge me mele xetietë, ame hna canga traqapi fe koi angatre la hulö.” (The New English Bible) Kola amamane hnyawa laka, troa nyiqaane la pune la fene celë, “ngöne la angatre a ce ithahnata.” Ewekë lai ka troa asesëkötrëne la fen, troa traqa la isi ka tru ngöne la ketre ijine thaa hmeke kö la itre atr, ene laka, angatre pe kö a sikusikune me thele tingetinge me mele xetietë, ngo thaa iene pi kö la nyine mejiune kow.
13, 14. Nemene lo itre ijine gomegome hna thingehnaeane hë hnei Iesu, nge troa nyipune tune kaa?
13 Xoxopatre pe hi la itre ijine kowe la fen, hna musinëne hnei Satana. Easenyi hë matre paatre pi hë ej, nge ngöne la ijine cili troa gomegom; celë hi hna thingehnaeane lai hnei Iesu, öni nyidrë: “Qa ngöne laka tro ha aköte atraqate, pëkö hna tune kö qa ngöne la qane la fene hnengödrai uti hë enehila, nge kete pëkö troa tun.”—Mataio 24:21.
14 Troa nyipune la “aköte atraqate,” hnene la isi i Akötresie e Amagedo. Celë hi lo ijine lai hna qaja hnei Daniela perofeta, ngöne laka, ijine tro hi Akötresieti lai a “lep’anyilanyilane me apatene la nöjei baselaia asëjëihë cili.” Haawe, hna nyipune hi lai la itre musi ne fen, musi ne la itre atr ka triji Akötresie. Tro la Baselaia i Nyidrë hna acile e koho hnengödrai, a musinëne la mele ne la nöjei atr asë. Tune la hna thingehnaeane hë hnei Daniela, thaa tro hmaca kö a nue la musi “kowe la ite xa nöj.”—Daniela 2:44; Hna Amamane 16:14-16.
15. Nemene ju hë la pune kowe la iamenu i Satana me itre demoni i angeic?
15 Ketre, ngöne la ijine cili, tro ha paatre lo itre iamenu ka xulu qaathei Satana me itre dremoni. Nge tro ha xome la trenge catre qathene la itre ua cili ka icilekeu, matre thatreine hë angatre troa “amenune la nöjei nöj.” (Hna Amamane 12:9; 20:1-3) Ase hë a amekötine laka, tro angatre a meci nge angatre pë hë a treqene troa apaatrenyi angatr. Drei la madrine laka, tro ha hmaloi kowe la nöjei atr asë, troa thepe angatre qa ngöne la itre iamenu i Satana me itre dremoni!
Drei La Ka Troa Mele Pe? Nge Drei La Ka Troa Mec?
16-18. Drei la ka troa mele pe ngöne la kola nyipune la fene celë, nge drei la itre ka troa paatr?
16 Drei la ka troa mele pe, ngöne lo Akötresieti a troa amekötine la fen? Nge drei la ka troa mec? Hnei Tusi Hmitrötre hna amamane ka hape, tro Akötresieti a thupëne me amelene lo itre atr ka kapa la mus i Nyidrë. Ame koi itre ka xelene la mus i Nyidrë, haawe thaa tro kö a hane thupë angatr, nge troa ce apaatrenyi angatre memine la fene i Satana.
17 Önine la tusi Ite Edomë 2:21, 22 ka hape: “Tro la ite ka meköt [ene lo itre ka drenge thenge lo musi Akötresie] a lapane la [“ihnadro,” MN], nge tro la ite ka pë ethan’a hne ngön’ej. Ngo troa thupa tije la ite ka ngazo [ene lo itre ka tha drenge thenge lo mus i Akötresie] qa ngöne la [“ihnadro,” MN], nge troa feje tije la itete iaö qa ngön’ej.”
18 Ketre kola qaja mina fe hnene la tusi Salamo 37:10, 11 ka hape: “Ke panacas ame hna patepi la ate ka ngazo . . . Nge tro la ange ka menyike a hetenyi la [“ihnadro,” MN], nge tro angat’a madine la tingetinge atraqat.” Ngöne la xötre 29 hna qaja mina fe ka hape: “Tro ha la ange ka meköti a hetenyi la [“ihnadro,” MN], me lapa palua kö ngön’ej.”
19. Nemene la eamo nyine tro së a wangatrune hnyawa?
19 Loi e tro së a amë e kuhu hni së la eamo hna hamëne ngöne salamo 37:34, kola hape: “Teqe Iehova ju nge trongënejë la jë i nyidrë, nge tro nyidrëti a adraië eö mate hetenyi eö la [“ihnadro,” MN]; tro eö a goëne la kola thupa tije la ite ka ngazo.” Önine mina fe la xötre 37 me 38 ka hape: “Ati hatene ju la ate ka uthautha, nge hana wange la ate ka meköt; ke hete pune ka loi kowe la ate ka tingeting. Ngo tro ha cengöne apatene la angete shashaith; ame la pune la ite ka ngazo, te, troa thupa tij.”
20. Pine nemene matre, ijije tro së a qaja ka hape, easë a mele ngöne la ketre hneijine ka sisitria catr?
20 Nyine ixatua nge nyine madrine koi së la troa atre laka, Akötresieti a kukehni së, nge calemi hë la ijine tro Nyidrëti a apaatrene la ngazo memine la akötr! Drei fe la madrine ka tru the së troa trotrohnine laka, easenyi catre hë troa eatre la itre hna perofetane ka sisitria cili!
[Iatr ne la götran 20]
Hnei Tusi Hmitrötre hna ahnithe ekö la itre ewekë ka troa traqa, nyine nyi “hatene” la itre drai hnapin
[Iatr ne la götran 22]
Easenyi pala ha, matre apaatrene trije pi hë e Amagedo, lo itre atr ka xele ma drenge thenge la musi Akötresie. Nge tro pë hë a mele la itre ka kapa la musi cili, angatre a troa tro me lö ngöne la ketre fene ka hnyipixe nge ka meköt