Mekene 8

Kolo Hë a Troa Eatre La Itre Hna Thingehnaeane Hnei Akötresie

1, 2. Nemene la hnei Akötresieti hna hnëkëne matre troa apaatrene la akötr?

NYIMUTRE catre la itre macatre ne akötre la itre atr e celë fen, pine laka, kola musi hui angatre la itre xaa atr ka pitru, memine fe la itre dremoni. Ngo thaa hnei Akötresieti kö hna dreisimine la itre akötre së. Ngöne la nöjei hneijin, hetre ewekë pala hi hnei Nyidrëti hna amekötine nyine amelene la itre atr qa ngöne la iangazo memine la akötr.

² Ame ngöne lo ijine kola icilekeu e Edena, hnei Akötresieti hna qaja amamane la mekune i Nyidrë göi troa acile la ketre musi ka troa aparadraisone la fen, göhnë hna hnëkëne thatraqane la itre atr. (Genese 3:15) Thupene lai, hnei Iesu lo sipu qene qaja i Akötresie, hna xome la Baselaia cili, matre troa nyine taan la itre ini hnei nyidrëti hna troa hamëne kowe la itre atr. Nge nyidrëti a qaja jë ka hape, celë hmekuje hi sipu jëne iamele lai kowe la atr.​—Daniela 2:44; Mataio 6:9, 10; 12:21.

3. Nemene la aqane hëne Iesu la musi hna troa acile epin, thatraqane la fen, nge pine nemen?

³ Hnei Iesu hna hëne la mus i Akötresie ka troa traqa, ka hape “baselaia ne hnengödrai,” pine laka, kola troa musi qaa koho hnengödrai. (Mataio 4:17) Hnei nyidrëti mina fe hna hëne la musi cili ka hape, “baselaia i Akötesie,” pine laka, Akötresieti la ka troa acile ej. (Luka 17:20) Ngöne lo itre hadredre macatre ka paatre hë, hnei Akötresie hna nyi jëne la itre seketere i Nyidrë e celë fen, matre tro angatre a cinyihane la itre hnei Nyidrëti hna perofetan, göi itre ka troa cilëne la musi cili, me itre hna troa kuca hnene la Baselaia cili.

Joxu Ka Hnyipixe Ne La Fen

4, 5. Hna amamane tune kaa hnei Akötresie ka hape, Iesu hi la joxu hnei Nyidrëti hna kapa?

⁴ Iesu hi la ka eatrëne ekö lo itre hna perofetane a lue thauzane hë enehila lao macatre, göi troa joxu ne Baselaia i Akötresie. Hnei nyidrëti hna amamane laka, nyidrëti hi la hnei Akötresieti hna iën, troa tane la Baselaia ne hnengödrai ka troa musinëne la itre atr e celë fen. Nge thupene la hna meci hnei Iesu, Akötresieti a amele nyidrë hmaca jë matre elë hnengödrai eë, a ketre ua pena ha ka troa mus, nge ka thaa tro hmaca kö a mec. Nyimutre catre pi hë la angetre öhne la mele hmaca i nyidrë.​—Ite Huliwa 4:10; 9:1-9; Roma 1:1-4; 1 Korinito 15:3-8.

⁵ Thupene lai, hnei Iesu hna “munëti huti ju ngöne la götrane maca i Akötesie.” (Heberu 10:12) Hnei nyidrëti hna treqene e cili, la ijine tro Akötresieti a hamë nyidrëti la men, nyine thatraqane la hnëqa hnei nyidrë hna troa xom, ene la troa joxu ne la Baselaia i Akötresie e hnengödrai. Qa ngöne lai, kola eatrëne lo hna perofetane ngöne la Salamo 110:1, ngöne la Akötresieti a qaja ka hape: “Lapaju nyipë ngöne la götrane macang, uti hë la tro ni a amë la ite ithupëjia me nyipë nyine tane la lue ca i nyipë.”

6. Nemene la aqane amamane i Iesu ka hape, ijiji nyidrëti hi troa Joxu ne la Baselaia i Akötresie?

⁶ Hna amamane hnei Iesu ngöne lo nyidrëti a mele e celë fene ka hape, ijiji nyidrëti hi troa xome la hnëqa cili. Ngacama tru la itre iakötrë hna kuca koi nyidrë, ngo hnei nyidrëti pala hi hna iëne troa mele nyipici koi Akötresie. Kola mama hnyawa jëne lai laka, trenga thoi hna sile hnei Satana lo angeice a qaja ka hape, pë pi kö caa atr ka troa atreine cile catre me mele nyipici koi Akötresie ngöne la itupath. Hnei Iesu, atr ka pexej, nge ‘Adamu hnapine,’ hna amamane ka hape, thaa tria kö la aqane xupe Akötresie la atr, ngo ka pexej.​—1 Korinito 15:22, 45; Mataio 4:1-11.

7, 8. Nemene la loi hnei Iesu hna kuca e celë fen, nge nemene la hnei nyidrëti hna amamane jëne lai?

⁷ Drei la atre mus ka atreine troa kuca la loi ngöne la ketre hnepe ijin, tune lo aqane kuca Iesu ngöne la itre hnepe macatre ne la huliwa ne cainöje i nyidrë? Hnei nyidrëti hna kapa jëne la uati hmitrötre i Akötresie, la mene ka aijijë nyidrë troa aloine la itre ka wezipo, me itre ka genyi ca, me itre timek, me itre ka simi hnyangenyë, memine fe la itre hum. Hnei nyidrëti mina fe hna amelene hmaca la itre ka mec! Hnei nyidrëti hna amamane ngöne hi la ketre hnepe götrane la ihnadro, lo ewekë hnei nyidrëti hna troa kuca elanyi kowe la itre atr ne la fene hnengödrai asë, ngöne lo ijine nyidrëti a troa kapa la mene ka catre ngöne la Baselaia.​—Mataio 15:30, 31; Luka 7:11-16.

⁸ Pine laka, nyimutre catre pi hë la itre ewekë ka loi hnei Iesu hna kuca ngöne lo ijine nyidrëti e celë fen, haawe, kola qaja jë hnei Ioane lo ketre atr drei i nyidrëti ka hape: “Nge kösaue pe kö la nöjei ewekë hnei Iesu hna longëtin, nge maine cengöne cinyihan’asë jë, te, ini a mekun, tha ijije kö e celë fene la nöjei tusi hna cinyihan.”​—Ioane 21:25.a

9. Pine nemene matre, kola easenyi Iesu hnene la itre atr ka hni ka ajan?

⁹ Atre ka menyike nge ka ihnimi ipitö Iesu, atraqatre catre la ihnimi nyidrë kowe la itre atr. Nge maine nyipici laka, hnei nyidrëti hna xatuane la itre atr ka puafala memine la itre hna waja huj, ngo hnei nyidrëti fe hna hane wangatrune fe la itre atr ka trene mo maine itre tane la nöj. Hnene la itre ka hni ka ajane hna drenge thenge la aqane ula i Iesu, kola hape: “Trohemi koi ni, nyipunie asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng; ke menyike ni, nge ipië la hning; nge tro nyipunieti a öhne la hna mano thatraqane la ite u i nyipunie. Ke uqa la nyine isilekeung, nge hmaloe la ehnefeng.” (Mataio 11:28-30) Hnene la itre atr ka xoue Akötresie hna tro koi Iesu, me treqene hnyawa la musi hnei nyidrëti hna troa cilën.​—Ioane 12:19.

Angetre Troa Hane Ce Musi Me Nyidrë

10, 11. Drei la ka troa ce musi me Iesu, hune la fen?

¹⁰ Ngöne la itre musi ne fen, hetrenyi e hnin la itre nekö joxu, haawe, ceitune fe lai memine la Baselaia ne hnengödrai i Akötresie. Tro Iesu a ce thawa memine la itre xaa atr la musi nyidrë hune la ihnadro, ke, asë nyidrëti lo isisinyikeu me angatre troa ce thawa me nyidrë la musi kowe la fene hnengödrai, itre joxu fe hë angatr.​—Ioane 14:2, 3; Hna Amamane 5:10; 20:6.

¹¹ Celë hi matre, troa nyixanyi Iesu hnene la itre atr ka thaa ala nyimu kö, angatre a troa mele hmaca me elë hnengödrai eë. Angatre hi la itre atrene la Baselaia i Akötresie, musi ka troa hamë manathithi kowe la nöjei atr. (2 Korinito 4:14; Hna Amamane 14:1-3) Haawe, ngöne la itre macatre, hnei Iehova hna nyi trepene hnyawa lo musi ka troa hamëne la manathithi ka epine palua kowe la nöjei atr asë.

Traqa Ha La Pune Kowe La Ka Musi Caas

12, 13. Nemene pe hi la hna treqene troa kuca hnene la Baselaia i Akötresie?

¹² Ame ngöne la hneijine së, hnei Akötresieti hna nyiqaane amekötine la itre huliwa ne la atr. Tune la aqane troa qeje pengöne hnyawa hnene la mekene 9 ne la boroshüre celë, kola amamane hnene la itre ewekë hna perofetane hnei Tusi Hmitrötre laka, cilë hë la Baselaia i Akötresie me Keriso qaane lo macatre 1914, nge easenyi hë matre lepe trije pi hnene eje la fene hnengödrai hna musinëne hnei Satana. Traqa ha la ijine tro la Baselaia cili a “[“musi e nyipine,” MN] la itre ithupëjia me [Keriso].”​—Salamo 110:2.

¹³ Kola qaja hnene la hna perofetane ngöne Daniela 2:44 ka hape: “Nge ngöne la ite drai ne la ite joxu cili [ka musi enehila] tro la Akötesieti ne hnengödrai a axulune la kete baselaia [e koho hnengödrai] ka tha tro kö a apaten’epine palua, nge tha tro kö a nue la baselaia cili kowe la ite xa nöj [tha tro hmaca kö a nue tune lo la musine la atr]. Tro ej’a [Baselaia i Akötresie] lep’anyilanyilane me apatene la nöjei baselaia asëjëihë cili, nge tro ej’a cile hut’epine palua.”

14. Qaja jë la itre xaa manathithi hna troa kapa, qa ngöne laka, troa paatre la musi ne la atr?

¹⁴ E ase hë apaatrene la itre musi ka xele ma drei Akötresie, tro caasi pë hë la Baselaia i Nyidrë a musi hune la fene hnengödrai asëjëihë. Thatreine kö troa angazone eje hnene la atr, pine laka, hna acile eje e koho hnengödrai. Tro hmaca ha a hnen la musi ngöne lo göhnë ne eje ekö ngöne la xötrei, ene e hnengödrai thei Akötresie. Nge hnene laka kola troa musi hnei Akötresieti hune la fen, haawe, thaa tro hmaca kö a amenu së hnene la hmi ka thoi, memine lo itre mekune ka gufa ne la filozofi, me itre iaö ne la kuci politik. Thaa tro hmaca kö a nue troa cia la itre ewekë cili e celë fen, tro hë itre eje a paatre palua.​—Mataio 7:15-23; Hna Amamane, mekene 17 koi 19.

[Ithueamacany]

[Iatr ne la götran 18]

Ame ngöne lo ijine Iesu ekö e celë fen, hnei nyidrëti hna aloine la itre ka wezipo me amelene hmaca la itre ka meci hë, matre troa amamane la hnei nyidrë hna troa kuca ngöne la fene ka hnyipixe

[Iatr ne la götran 19]

Tro la Baselaia i Akötresieti e koho hnengödrai a lepe anyilanyilane la nöjei pengöne musi ka xele ma drei Nyidrë