Mekene 11
Kolo Ha Ami Trepene Enehila La Fene Ka Hnyipixe
1, 2. Nemene la hne së hna öhne enehila, ka ihmeku memine lo itre hna perofetan?
AME la ketre ewekë ka tru, ke, kolo ha nyiqaane nyi trepene enehila la fene ka hnyipixe i Akötresie, nge ketre kolo ha ethitre la fene i Satana. Easë a öhne hnyawa enehila laka, Akötresie a acasinekeune la itre atr qa ngöne la nöjei nöje asë me eköthe la ketre xötre atr ka hnyipixe ngöne la fen, matre troa nyihnane ngöne la itre drai ka calemi, la fene celë ka gomegom. Ngöne la 2 Peteru 3:13, hna hëne la xötre atr celë, ka hape, “fene hnengödrai ka hnyipixe.”
2 Tusi Hmitrötre fe a perofetane me hape: “Ngöne la ite dai hnapin [ene la hnedrai hne së hna melëne enehila] . . . , troa traqa la nöjei nöje ka ala nyimu, me hape: Trojë fe matre elëjë shë kowe la wete i Iehova [nyipi hmi i Nyidrë], . . . nge tro nyidëti a ini shë la ite jë i nyidë, nge tro sha trongëne la ite gojenyi qa thei nyidrë.”—Isaia 2:2-3.
3. (a) Kola eatre hui drei la hna perofetane hnei Isaia? (b) Nemene la hna qaja hnene la tusi ka nyipune la Tusi Hmitrötr?
3 Kola eatre enehila la hna perofetane celë thene la itre atr ka drenge thenge la ‘ite jë i Akötresie me trongëne la ite gojenyi qaathei nyidë.’ Kola qaja fe hnene la tusi ka nyipune la Tusi Hmitrötre la ketre nöje e celë fen, laka ame la itre atren, ke angatre a mele tingeting, nge hna hë angatre fe ka hape, “ka ala nyimu atraqat . . . qa ngöne la ite xöte nöj’asë, me ite tribu, me nöjei ate, me ite qene hlapa,” ketre itre fami ngöne la fene hnengödrai asë, ka caasi troa nyihlue i Akötresie. Kola qaja fe hnei Tusi Hmitrötre ka hape: “Angate hi la angete tropi qa ngöne la aköte atraqat.” Angatre hi la itre ka troa mele pe, ngöne la pune la fene celë hna musinëne hnei Satana.—Hna Amamane 7:9, 14; Mataio 24:3.
Nyipi Lapa Ka Caa Hae Ngöne La Fene Hnengödrai Asë
4, 5. Pine nemene matre kola atreine ce mele la itre Temoë i Iehova ngöne la fene hnengödrai?
4 Kola thele ngöne la hni ka menyik, hnene la itretre anyipici i Iehova, troa mele thenge la itre ini qaathei Akötresie me itre jë i Nyidrë. Angatre a mejiune kowe la ketre mele ka thaa ase palua kö ngöne la fene ka hnyipixe i Akötresie. Hnene la aqane drenge thenge angatre la itre wathebo i Akötresie ngöne la nöjei drai, angatre a amamane la ajane i angatre troa lapa fene la mus i Nyidrë, enehila nge ngöne fe la fene ka hnyipixe. Ngacama isa hnë mele kö, maine isa nöje pena, ngo angatre asë hi a drenge thenge la itre trepene meköti hna hamëne hnei Akötresie, jëne la Wesi Ula i Nyidrë. Celë hi kepine matre, angatre la ketre lapa ka caa hae ngöne la fene hnengödrai, ceitu me ketre xötre atr ka hnyipixe hna hnëkëne hnei Akötresie.—Isaia 54:13; Mataio 22:37, 38; Ioane 15:9, 14.
5 Maine nyipici laka, caas la itretre anyipici Iehova ngöne la fene hnengödrai asë, ngo thaa hnei angatre kö hna thele troa pi mama. Atre hi angatre laka, thangane la mene ne la uati hmitrötre i Akötresieti lai, ngöne la itre atr ka drenge thenge la itre trenge wathebo i Nyidrë. (Ite Huliwa 5:29, 32; Galatia 5:22, 23) Huliwa i Akötresieti lai. Tune la hna qaja hnei Iesu, “Ame la nöjei ewekë hnei ate hna tha’tein, te, ateine Akötesie.” (Luka 18:27) Haawe, maine hnei Akötresieti hna kuca thenge matre cile huti la hnengödrai me fen, tro fe Nyidrëti a aijijëne troa hane cile huti la nöje ne la fene ka hnyipixe.
6. Pine nemene matre, ijije troa qaja la ewekë ka traqa kowe la itretre anyipici i Iehova, laka, ketre iamamanyikeu ne la hneijine së?
6 Qa ngöne lai, atreine hi tro së a nyiqaane mekune la aqane tro Iehova elanyi a musi hune la fene ka hnyipixe, e hne së hna pane goeëne la aqane nyi trepene Iehova enehila la fene cili. Nge ame la hnei Nyidrë hna kuca memine la itretre anyipici i Nyidrë, ke, kola aceitunëne me ketre iamamanyikeu ne la itre hnedrai enehila. Pine nemen? Pine laka, hna eköthe la itre Temoë i Iehova, kösë ketre lapa ka caa hae ngöne la fene hnengödrai asë, ketre fami hna thaa tro kö a hane aisalapane hnene la itre gomegome qa ngöne la pi mama fë nöj, me xele ma wai ketre raas, maine isalapa ngöne la hmi pena. Ngacama itre milio la etrune la itre Temoë i Iehova ka mele ngöne la 200 lao nöj enehila, ngo thaa isazikeu kö angatr, hna acaasi angatre hnene la ketre otrene ka catr. Thaa hna hane kö öhne ekö ngöne la mele ne la atr, la ketre fami ka caasi tune lai, nyipici laka, ketre iamamanyikeu ne la itre hneijine së—hna kuca hnei Akötresie.—Isaia 43:10, 11, 21; Ite Huliwa 10:34, 35; Galatia 3:28.
Troa Atrehmekune Tune Kaa La Itre Atrene La Nöje i Akötresie
7. Ame koi Iesu, nemene la aqane tro së a atrehmekune la itretre nyipi drei i nyidrë?
7 Nemene la ketre aqane tro së a atrehmekune la nöje hnei Akötresieti hna iën, nyine trepene la fene ka hnyipixe i Nyidrë? Haawe, drei la ka aeatrëne la itre trenge ewekë i Iesu ngöne Ioane 13:34, 35? Öni nyidrë: “Ini a hamë nyipunie la wathebo ka hnyipixe, laka, tro nyipunieti a ihnimikeun; tro nyipunie a ihnimikeune tune la hnenge hna hnimi nyipunie. Celë hi mate, tro nöjei ate asëjëihë a wangatre hmekune laka, itete dei ni nyipunie, e tro nyipunie a ihnimikeu.” Itre Temoë i Iehova a mejiune kowe la trenge ewekë i Iesu, me xötrethenge itre ej. Tune la aqane ini angatre hnene la Wesi Ula i Akötresie, “ihnimikeu cat” angatr. (1 Peteru 4:8) Ketre, angatre a “[“xetrë angatre kö,” MN] hnei ihnim, celë hi otene ka nyipi loi.” (Kolose 3:14) Qa ngöne lai, ame la ihnimi itre trejine ke, celë hi “saetë, maine sima” ka isilekeune matre caasi angatre ngöne la fene hnengödrai asë.
8. Nemene la ketre hatrene hna hamëne hnei 1 Ioane 3:10-12, matre troa atrehmekune la itretre nyihlue i Akötresie?
8 Ketre hna qaja ngöne 1 Ioane 3:10-12 ka hape: “Mamapi la ite nekö i Akötesie, me ite nekö i diabolo ngöne laka, thaa qa thei Akötesieti kö la ate tha kuca kö la thina ka meköt, memine la ate tha hnime kö la tejine me angeic. Ke dei lola Wesi Ula hnei nyipunie hna denge qa ngöne la qane laka, qâ shë troa ihnimikeu; tha tro kö a tui Kaina lo qa ngöne la ka ngazo, ate humuthe la jini angeic.” Qa ngöne lai, ame la itretre nyihlue i Iehova ke, angatre la itre atrene la ketre fami ka thaa hane kö isi nge hna wangatrehmekune ngöne la nöjei nöje asë.
Ketre Hatren Nyine Troa Wangatrehmekun
9, 10. (a) Nemene la huliwa ka aijijë së troa wangatrehmekune la itretre nyihlue i Akötresie ngöne la itre drai hnapin? (b) Nemene la aqane aeatrëne hnene la itre Temoë i Iehova la Mataio 24:14?
9 Hetrenyi la ketre aqane troa atrehmekune la itretre nyihlue i Akötresie. Ngöne la ewekë hnei nyidrë hna perofetane göi pune la fen, hnei Iesu hna qaja la itre ewekë ka nyimutre ka troa qajaqaja la itre drai hnapin. (Wange ju la Mekene 9.) Ame la ketre götrane ka sisitria ne la hna perofetane cili, ke, ene la hna qaja ngöne Mataio 24:14: “Nge tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj; ame hna traqa pi la pun.”
10 Hapeu, öhne kö së la kola eatre la hna perofetane cili? Eje hi. Pine laka, qaane lo kola nyiqaane la itre drai hnapine ngöne lo macatre 1914, hnene la itre Temoë i Iehova hna cainöjëne la maca ka loi ne la Baselaia ngöne la fene hnengödrai, tune lo aqane upi angatre hnei Iesu, laka, troa tro kowe la itre hnalapa trootro. (Mataio 10:7, 12; Ite Huliwa 20:20) Itre milio la etrune la itre Temoë i Iehova ka wange trongëne la itre atr ngöne la nöjei nöj, matre troa hane ithahnatane me angatre la pengöne la fene ka hnyipixe. Celë hi matre, epuni la a hane kapa la boroshüre celë, ngöne laka, ame la huliwa ne la itretre anyipici i Iehova, ke, ene la troa kuca me hamëne la itre itusi ka qeje pengöne la Baselaia i Akötresie. Hapeu, atre fe kö epuni la itre atr ne ketre nöje ka cainöjëne la Baselaia i Akötresie ngöne itre hnalapa trootro, ngöne la fene hnengödrai asë? Kola amamane hnei Mareko 13:10 laka, troa “pane” kuca la huliwa ne cainöje trootro me huliwa ne ini, qëmekene troa traqa la pune la fen.
Nyine Sa Lo Hnaaluene Hnyinge Ka Tru
11. Nemene fe la hna kuca hnene la itre Temoë i Iehova, qa ngöne laka, angatre a kapa la mus i Akötresie?
11 Pine laka, kola drenge thenge hnene la itre Temoë i Iehova la itre trenge wathebo i Akötresie, angatre fe a hane kuca la ketre ewekë. Angatre a amamane laka, Satana a thoi ngöne la angeice a qaja ka hape, thatreine kö tro la itre atr a cile catr, e traqa ju tupathe la aqane mele nyipici i angatre koi Akötresie; haawe, kolo hi lai a sa la hnaaluene hnyinge ka tru, ka ketr la mele nyipici ne la atr. (Iobu 2:1-5) Itre milio la etrune la itre Temoë celë, angatre a mele ngöne la nöjei nöj, nge angatre a amamane la caasi angatre me aqane mele nyipici angatre kowe la mus i Akötresie. Ngacama itre atr ka ngazo angatr, ngo angatre a nyixöle i Akötresie me cilëgöline la musi cile i Nyidrë, nge kola catrehnine catre pala hi la itre itupathi Satana.
12. Tulu i drei la hna xötrethenge hnene la itretre anyipici Iehova?
12 Enehila kola hane nyixane hnene la itre milio lao Temoë i Iehova, lo itre xaa Temoë ekö ka amamane la aqane mele nyipici angatre koi Akötresie. Maine tro hi a e la itre xan, ene Abela, Noa, Iobu, Aberahama, Sara, Isaka, Iakobo, Debora, Rutha, Davita, me Daniela. (Heberu mekene 11) Kola qeje angatre hnei Tusi Hmitrötre ka hape, ‘itete anyipicine ka ala nyimu.’ (Heberu 12:1) Angatre hi lai, me itre xane ju kö, tune mina fe la itretre drei i Iesu, angetre mele nyipici koi Akötresie. Ketre, hnei Iesu hna sipu hamëne la ketre tulu ka sisitria, ene laka, pexeje la aqane mele nyipici nyidrë.
13. Nemene la aqane qeje pengöi Satana hnei Iesu, a thaa nyine tro kö a isenyin?
13 Nyine amamane hi la laka, nyipici Iesu, ngöne laka, ame la nyidrë a ithahnata kowe la itre faresaio, öni nyidrë jë hi a qeje Satana ka hape: “Ngo enehila nyipunie a thele troa humuthi ni, ene la ate qaja koi nyipunie la nyipici hnenge hna denge qa thei Akötesie. . . . Keme i nyipunie la diabolo, nge pi tro nyipunie a kuca la ite aja i keme i nyipunie. Ate ihumuthi nyëne qa ngöne la qān, nge tha cile huti kö ngöne la nyipici, ke, pëkö nyipici thei nyën. E tro nyën’a qaja la thoi, te, qa thei nyëne hi, ke ate thoi nyën, nge keme ne ej.”—Ioane 8:40, 44.
Nemene Hë La Hnei Epuni Hna Troa Iën?
14. Nemene la ewekë ka traqa enehila kowe la trepene la fene ka hnyipixe?
14 Kolo pala hi a catre catre trootro la trepene la fene ka hnyipixe hnei Akötresieti hna amë hune la ketre lapa ka caa hae, ene lo itre Temoë i Iehova ngöne la fene hnengödrai. Ngöne la nöjei macatre hna e la itre hadredre thauzane lao atr ka kapa la mus i Akötresie hnene laka hnei angatre hna huliwane la atreine ië ewekë, ka eje thei angatre me nyi trepene la mele i angatre hune la nyipi atrehmekun. Angatre a hane ce tro memine la itre atrene la fene ka hnyipixe, me cilëgöline la musi cile i Akötresie, me amamane laka, ka sili trenga thoi lae Satana.
15. Nemene la huliwa ne ithew hna troa kuca ngöne la hnedrai së?
15 Pine laka, Keriso la ka thawa luëne la nöjei “mamoe” me nöjei “got,” haawe, tro hë nyidrëti a amekötine la pune kowe la itre atr ka iëne la mus i Akötresie, ene laka, tro ha ami angatre ngöne la “götrane maca” i nyidrë. Ngöne la hnei Iesu hna perofetane thatraqane la itre drai hnapin, hna thingehnaeane hnei nyidrë ka hape: “Nge troa icasikeune jë la nöjei nöj’asëjëihë ngöne la qëmeke i angeic; nge tro angeic’a thawa luë angate pi, tune la ate thupë mamoe a thawa luëne la nöjei mamoe me nöjei got; nge tro angeic’a’ amë la nöjei mamoe ngöne la götrane maca i angeic, ngo nöjei got ngöne la götrane mi.” Ka hni ka ipië la itre mamoe, hnei angatre hna ce tro me xatuane la itre trejine me Keriso, me drenge thenge la mus i Akötresie. Ame pena ha la itre gotr, ke, angatre hi lo itre ka pi hun, nge hnei angatre hna xele ma hane wange lo itre trejine me Keriso, nge pëkö hna kuca troa hane cilëgöline la mus i Akötresie. Nemene hë la pune la iameköti? öni Iesu ka hape: “Tro angate lai [itre got] kowe la hna troa nyithupene ka tha ase palua kö; ngo angete thina ka meköti [itre mamoe] kowe la mele ka tha ase palua kö.”—Mataio 25:31-46.
16. Nemene la nyine tro epuni a kuca, maine epuni a ajane troa mele elanyi ngöne la paradraiso?
16 Nyipici, tru la hnei Akötresieti hna hnimi së! Easenyi hë matre axulune pi Nyidrë la ketre paradraiso ka mingöminge e celë fen. Hapeu, aja i epuni kö troa hane mele ngöne la paradraiso cili? Maine eje hi, ke, amamane jë la ole i epuni kowe la itre hnei Iehova hna hnëkën, ene la troa atrepengöi Nyidrë, nge troa tro thenge la itre hnei epuni hna inin. “Thele Iehova jë nyipunie e ijine öhnyi nyidë; hë nyidëti e easenyi pete kö nyidë. Qâne la ate ka ngazo troa tije la thina i angeic, nge kete qâne la ate ka menu troa tije la ite mekune i angeic, nge hmaca ju angeice koi Iehova, mate tro nyidëti a hnimi angeic.”—Isaia 55:6, 7.
17. Pine nemene matre, loi e troa saqe troa iëne la hne së hna troa nyihluen?
17 Pë hmaca kö traeme hna troa aluuzine enehila. Easenyi pala ha la pune la fene celë. Kola ixatua hnene la Wesi Ula i Akötresie me hape: “The ajane kö nyipunie kowe la fen, memine fe la itre ewekë e celë fen. Maine kete ate a ajane la fen, pëkö aja koi Tetetro e kuhu hni angeic . . . Nge kola pate la fene hnengödrai, memine la hna aja kow; ngo troa cile epine palua la ate kuca la aja i Akötesie.”—1 Ioane 2:15-17.
18. Nemene la itre nyine troa kuca matre hetrenyi thei epuni la mejiun, troa hane mele ngöne la paradraiso i Akötresie ka hnyipixe nge ka mingöming?
18 Kola hnëkëne enehila la itre hlue i Iehova, matre troa mele epine palua ngöne la fene ka hnyipixe. Angatre a inine la itre nyine troa kuca, ngöne la götrane la ua me itre xane ju kö, ka nyipi ewekë matre troa akökötrene la paradraiso. Eahuni a hane xatua epuni fe troa ië Akötresie, ene la Atre musi cil, me troa sajuëne la huliwa ne iamele hnei Nyidrëti hna iupi troa kuca enehila e celë fene hnengödrai asë. Inine jë la Tusi Hmitrötre memine la itre Temoë i Iehova, nge thele jë troa atrepengöne la Akötresie ka hnimi epun, nge ka troa apaatrene la akötr. Maine tro epuni a kuca tune lai, haawe, tro fe hë epuni a hane ketre atrene la fene ka hnyipixe. Qa ngöne lai, tro hë epuni a hetrenyi la mejiune laka, tro fe Akötresieti a hane kepe epun, nge tro fe hë epuni a hane mele epine palua ngöne la fene ka hnyipixe nge ka mingöminge hnei Nyidrëti hna troa acil.
[Iatr ne la götran 30]
Lapa ka caasi la itre Temoë i Iehova ngöne la nöjei götrane la fen
[Iatr ne la götran 32]
Kolo ha nyiqaane eköthe la trepene la fene ka hnyipixe i Akötresie