Ihnim Ka Eje Thene La Itre Trejin

TRAQA koi 1 500 lao macatre ne xome la nöje i Isaraela la ëje i Iehova Akötresie. Ame hë e thupen, hnei Nyidrëti pena ha hna iëne qaathene la angetre ethen “la nöje thatraqane la [ëje] i nyidë.” (Ite hu. 15:14) Tro hë la itre ka xome la ëje i Nyidrë a anyipici Nyidrë ngöne la nöjei götrane hnei angatre hna mele ngön, me cas ngöne la mekun, me aqane huliwa. Tro ha acasi angatr hnene la huliwa hnei Iesu hna ahnith kowe la itretre drei nyidrë. Öni nyidrë koi angatr: “Trojë nyipunie a inine la nöjei nöj’ asëjëihë, me bapataiso angate kowe la [ëje] i Tetetro, me Hupuna, me [u]ati [h]mitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie.”—Mat. 28:19, 20.

² Ame la epuni a nue la mele i epuni koi Iehova me xomi bapataiso, tre, atre drei Iesu hë epun, me ketre atrene la lapa ne la itre keresiano e cailo fen. Angatr a isine matre tha tro kö angatr a imethinë pi nöj, maine pi tribu, maine pine laka hetre itre ka trenamo nge hetre itre ka pë mo. (Sal. 133:1) Matre, epuni a hnime me metrötrëne la itre trejine e hnine la ekalesia, ngacama isa hane ngönetrei epuni kö, maine isa nöje i epuni kö, maine isa ini kö hna kapa qaathei mus. Eje hi laka, maine tha nyihlue i Iehova ju epun, tha tro jë kö epuni lai a ce huliwa me angatr. Kola mama laka, ka catrecatre kö la otretre ne ihnim ka iothekeu epuni hune la aqane imelekeu ne la itre atr ka ce hmi, maine ce sinee, maine itre atrene la hnepe lapa.—Mar. 10:29, 30; Kol. 3:14; 1 Pet. 1:22.

TROA AMEKÖTINE LA AQANE WAIEWEKË

³ Hetre itre xan ka elë hune la pi draië pine laka isa hane ngönetrei angatre kö me itre xan, maine isa parti politik kö, maine isa aqane mele kö, maine hnei ketre ewekë pena. Loi e tro angatr a mekun la itre pane keresiano ekö ka qene Heberu; hnei angatre hna xometrij qaathei angatr la imethinë ke, hna xele ma wang ekö la itre atrene la itre xa nöj. Ame la Iehova a upi Peteru troa tro kowe la hnalapa i Konelio, ketre Keneturio ne Roma, hnei Nyidrëti hna hnëkë angeice hnyawa.—Ite Huliwa mek. 10.

⁴ Ame ngöne la kola iamamanyi koi Peteru, hna upi angeic troa humuthe me öni la itre xa öni ka sisi kowe la angetre Iudra. Ame la Peteru a qeje jol, ithanata jë hi qa hnengödrai, kola hape: “Ame la hnei Akötesieti hna nyihnyawan, te, the tro kö eö a hape, hmitöt.” (Ite hu. 10:15) Hnei Iehova hna wenë amekötine la mekuna i Peteru matre troa hnëkë angeic, ene la troa tro kowe la ketre trahmanyi ne ethen. Ame hë la angeic a trongëne la hna ahnith koi angeic, öni angeic e qaja kowe la itre ka traqa itronyi ngöne la ijine cili ka hape: “Ate hë nyipunie laka hmitöte kowe la ate Iuda troa icasikeu me iashenyi memine la ate ne la kete nöj; ngo hnei Akötesie hna amamane koi ni, ka hape, tha tro kö ni a qaja, ka hape, hmitöte me sisi la kete ate. Celë hi mate traqa ha ni, nge [tha cile kö ni] ngöne lo ijine thei [e]ni.” (Ite hu. 10:28, 29) Thupene lai, kola mama hnyawa koi Peteru la hatrene laka, Iehova a kepe Konelio me hnepe lapa i angeic.

⁵ Ame Saulo atre Taraso, tre, ketre atr ka kapa la ini ka tru thene la itretre Faresaio. Ngo hnei angeic hna ipië, me sine la lapa hnei angeic ekö hna xele ma wang. Ketre, hetre itre hna amekötin hnei angeice hna kapa qaathei angatr. (Ite hu. 4:13; Gal. 1:13-20; Fil. 3:4-11) Hetre itre xa atr ekö ka hane kapa la maca ka loi me nyihlue i Iehova. Matre hnei angatr hna wenë amekötine la mekuna i angatr, tui Segio Paulo, me Dionusio, me Damari, Filemona, me Onesimo, me itre xane ju kö.—Ite hu. 13:6-12; 17:22, 33, 34; Filem. 8-20.

TROA CAS MEMINE LA ITRE TREJIN E CAILO FEN

⁶ Eje hi laka, hna e së koi Iehova me kowe la organizasio i Nyidrë hnene la ihnim ne la itre trejin e hnine la ekalesia. Mama cile hnyawa hi koi epun la hatrene ihnim ka ej thene la itretre drei Iesu Keriso, tune lo hnei nyidrëti hna qaja ka hape: “Ini a hamë nyipunie la wathebo ka hnyipixe, laka tro nyipunieti a ihnimikeun; tro nyipunie a ihnimikeune tune la hnenge hna hnimi nyipunie. Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:34, 35) Hnei epuni hna ketre sipu öhne la ihnim ka eje e hnine la ekalesia, me trotrohnine laka, hatrene hi la ihnim ka eje thene la itre hlue i Iehova e cailo fen. Celë hi ka akökötrene la ihnimi epun koi Nyidrë, me kowe la organizasio i Nyidrë. Epuni fe a hane eatrëne la hna perofetane hnei Tusi Hmitrötr, ene la troa icasinekeune la itre atr ngöne la itre drai tixenuë celë, matre troa atrunyi Iehova ngöne la tingeting me cas.—Mika 4:1-5.

⁷ E tro sa goeëne la aqane gomegome la fene enehila, pëkö atr ka mekune laka, ijije troa acasine la itre atr “qa ngöne la ite xöte nöj’ asë, me ite tribu, me nöjei ate, me ite qene lapa.” (Hna ama. 7:9) Pane mekune jë la eisapengönene la itre atr ka mele ngöne la itre nöje hna jilapane hnei masin, memine la itre atr ka fedre kowe la melene tribu. Nge mekune jë së la icilekeu thene la itre atr ka ca hane ngönetrei, nge ka ce nöje hi, ngo isa hmi angatre pe. Nge the qaja kö la isi pi nöj, laka kola aisane la itre atr hnene la kuci politik. Ketre, hetre ka trenamo, maine ka pë mo, nge hetre itre xa jëne gomegome kö ka aisane la itre atr enehila. Ngo, hnene la ihnim me tingeting hna acasine la itre atr ne la nöjei nöj asë, me itre atr ne la itre lapa asë, me itre atr ka isa hetre aqane mel. Matre ketre iamamanyikeu lai hna aijijëne hmekuje hi hnene la Akötresie Ka Pucatin Asë.—Zaka. 4:6.

⁸ Ame hë la epuni a nue la mele i epun, me xomi bapataiso, ketre Atre Anyipici Iehova ha epun, nge epuni fe la ketre atrene la lapa ne la itre trejin. Hnene laka, hetre eloin hnei epun hna kapa qa ngön, haawe, qa i epun troa thele matre tro palahi a hetrenyi la cas hnine la lapa cili. Celë hi matre, tro sa wangatrune la hna qaja hnei Paulo ngöne Galatia 6:10: “Tro sha kuca la loi kowe la nöjei ate asëjëihë e hete ijine shë, ngo sisitia kowe la nöjei ate ne la lapa i angete lapaun.” Tro fe sa xötrethenge la eamo celë, kola hape, “The kuca kö kete ewekë thenge la ikucanyi me pi tru; ngo loi e isa mekune memine la hni ka ipië, laka sisitria angate hui angeic; the isa wai ewekëne kö, ngo loi e isa wange la ite ewekë i ite xan.” (Fil. 2:3, 4) Loi e tro palahi sa thele troa goeëne la itre trejine tune la aqane goeë angatre hnei Iehova, ngo tha tro kö a goeëne la ka mama koi lue mek. Tro hë lai a tingetinge me madrine la aqane imelekeu së me angatr.—Efe. 4:23, 24.

TRO SA IMEKU

⁹ Tune la aqane amamane hnei Paulo, ka cas la itre atrene la ekalesia ke, angatr a imekunekeun. (1 Kor. 12:14-26) E hetre akötr ne la itre xa trejin e cailo fen, ce akötre asë la itre hlue i Akötresie. Ngacama iananyi së memine la itre xa trejin e cailo fen, ngo ame pe, easë palahi a meku angatr. E hna axösisin la itre xa trejin, akötr asë hi së. E hetrenyi la itre trejin ka aja ixatua, maine hna lep hnei hulö, maine kola isi maine ihumuth ngöne la nöje i angatr, kola thele jëne hnene la itre trejine e cailo fen troa iupi fë la ka nyipiewekë kowe la mele i angatr, me acatrene la lapaune i angatr koi Iehova.—2 Kor. 1:8-11.

¹⁰ Loi e tro asë hi së a thithi sane la itre trejin e nöjei drai. Hetrenyi la itre trejine hna tupath hnei ngazo. Itre xan a hace fë la ngazo hna kuca koi angatr, nge atre hë hnei itre atr. Nge itre xan pena a qëmeke kowe la icilekeu ne la itre sine huliwa me itre atrene la hnepe lapa, nge tha ka mama kö. (Mat. 10:35, 36; 1 Thes. 2:14) Tro lai a ketri së asë ke, itre atrene së la lapa ka cas ne la itre trejine e cailo fen. (1 Pet. 5:9) Hetrenyi mina fe la itre ka catre huliwa i Iehova, me amamai tulu ngöne la huliwa ne cainöj me ngöne la ekalesia. Nge the qaja kö lo itre trejine atrekë hnëqane troa thupëne la huliwa ne cainöj e cailo fen. Ngacama pëkö ketre ewekë hne së hna atreine troa kuca thatraqai angatr, ngo ijij tro la itre thithi së a xatua angatr. Celë hi aqane tro së lai a amamane la ihnimi së koi angatr.—Efe. 1:16; 1 Thes. 1:2, 3; 5:25.

¹¹ Hnene laka kola gomegome la fene ngöne itre drai tixenuë celë, loi e troa hnëkë la nöje i Iehova troa itö ixatua. Ame la kola traqa la itre hulö, tune la sa, me di, hetre porogaram ne ixatua hna hnëkëne thatraqane la itre hna lepe hnei hulö. Ketre, kola hnëkëne la itre xen, me mani, me jia ne huliwa göi xupi uma. Hetre tulu ka lolo hna amë pe hnene la itre keresiano ekö. Ame la kola jiinë xeni e Iuda, hnene la itre trejin ne la itre xa götrane nöj hna mekune hmaca lo eamo hnei Iesu hna hamën. Hnei angatre hna iupi fë ahnahna kowe la itre trejin e Iudra. (Ite hu. 11:27-30; 20:35) Hnei Paulo aposetolo hna hnëkëne la itre ixatua matre troa tro loi la huliwa. (2 Kor. 9:1-15) Ame enehila, e hna lepe la itre trejin hnene la ketre hulö, nge angatr a aja ixatua, canga saqe hi organizasio me itre trejin hnëkëne me iupi fë la ka nyipiewekë koi angatr.

HNA KETRE AISA ANGATRE KÖ TROA KUCA LA AJA I IEHOVA

¹² Hna hnëkëne la lapa ka cas ne la itre trejin e cailo fen matre troa kuca la aja i Iehova. Ame la aja i Iehova enehila tre, ene la troa cainöjëne la maca ka loi ne la Baselaia ngöne la fene asë nyine anyipicine kowe la nöjei nöje asë. (Mat. 24:14) Pine laka easa kuca la huliwa celë, aja i Iehova fe tro palahi sa ujë thenge la itre trepene meköt i Nyidrë. (1 Pet. 1:14-16) Loi e tro sa ce huliwa thatraqane la maca ka loi. (Efe. 5:21) Tha ijine tro kö së a nyinyape thele la itre sipu aja së, ngo ijine tro pe së enehila a amë panëne la Baselaia i Akötresie ngöne la mele së. (Mat. 6:33) Maine tro sa catre lapa mekune lai, me ce huliwa memine la itre trejin thatraqane la maca ka loi, tro hë sa hetrenyi la madrin enehila me hane kapa elanyi la itre manathithi ka epine palua.

¹³ Ame së Itretre Anyipici Iehova, itre atrene së la nöje ka pë ethan, nge ka catre huliwa i Akötresie. Hna ketre aisa së kö qaathene la itre atr matre troa kuca la aja i Nyidrë. (Tito 2:14) Hnene la aqane nyihlue i Iehova së matre tha ceitu së kö me itre xan. Easa ce huliwa memine la itre trejin e cailo fen, nge casi hi la qene hlapa hne së hna ce ithanatan, ene la nyipici. Ketre, easa melëne la nyipici hne së hna ithanatan. Hnei Iehova ha ekö hna qaja amë lai jëne Zefania perofeta, kola hape: “Ame hnenge pena hna troa ujëne kowe la nöje la aqane ewekë [maine, qene hlapa] ka wië, mate tro angat’ asë a hëne la [ëje] i Iehova, me nyi hlue i nyidë hnene la hni ka cas.”—Zef. 3:9.

¹⁴ Thupene lai, hnei Iehova hna upi Zefania troa qejepengöne la lapa ne la itre trejin e cailo fen, nge ka eatre hnyawa enehila, kola hape: “Tha tro kö la ite thelene i Isaraela a kuca la ngazo, me qaja la thoi, nge tha tro kö a öhne ngöne la qe i angate la sesepeneqë ka iaö; ke tro angat’ a xeni me meköl, nge pëkö ate troa aqounyi angat.” (Zef. 3:13) Trotrohnine hë së la nyipici, ene la Wesi Ula i Akötresie, nge hne së hna amekötine la itre mekuna së, me mel thenge la itre trepene meköt i Iehova. Celë hi ka aijiji së troa ce huliwa. Matre hetrenyi la itre ewekë hne së hna kuca, kösë thatreine kö troa kuca hnei atr. Pëkö nöj ka ceitu memine la nöje i Akötresie, nge ka atrunyi Nyidrë ngöne la fen asë.—Mika 2:12.