Tune Kaa La Aqane Caasi Ne La Itre Nyipi Keresiano?
1 Nemene la ka acaasin la itre atr ka ala sikisi milio nge sin la etrun ngöne la 234 lao nöj nge 380 lao qene hlapa hna ithanatan? Hmi i Iehova Akötresieti hmekuje hi la ka aijijëne lai. (Mika 2:12; 4:1-3) Kola atre hnyawa hnene la Itretre Anyipici Iehova jëne la itre ewekë hnei angatr hna melën, laka, ka caasi la itre nyipi Keresiano enehila. Tune la hna “axö mamoe” fene la “ate thupën,” easë a catre troa cile kowe la aqane mekune ne la fene celë ka gomegom.—Ioane 10:16; Efe. 2:2.
2 Ame la sipu aja i Akötresie tre tro la itre hnei Nyidrëti hna xup ka inamacan a caasi hnine la nyipi hmi. (Hna ama. 5:13) Atre hnyawa hi Iesu la enyipiewekëne lai, celë hi matre hnei nyidrë hna sipone jëne la thith matre troa caasi la itretre drei nyidrë. (Ioane 17:20, 21) Tune kaa la aqane tro së isa ala caas a thel, matre troa caas e hnine la ekalesia i Keresiano?
3 Aqane Troa Caas: Maine paatre hi la Wesi Ula i Akötresie memine la uati hmitrötre i Nyidrë, thatreine kö troa hetrenyi la caasi the së. Maine tro sa trongën la itre hne së hna e hnine la Tusi Hmitrötr, haawe, troa hetre thangan ka loi la uati hmitrötre i Akötresie ngöne la mele së. Kolo lai a aijijë së “troa xölehuje la ce hni qa thene la Ua ngöne la hna otene la iloi.” (Efe. 4:3) Ej a upi së troa ihnimikeu. (Kol. 3:13, 14; 1 Pet. 4:8) Hapeu, nyipunieti kö a hane thele troa caas hnene la hna sine thele pala hi la Wesi Ula i Akötresie ngöne la nöjei drai?
4 Easë mina fe a caas hnene la hne së hna catre xome la hnëqa së, ene la troa cainöje trootro memine la troa inin la itre atr. Ame ngöne la easë a ce huliwa memine la itre xan ngöne la hna cainöje trootro, ene la “ce cate kowe la lapaune ene la maca ka loi,” haawe, tro hë së a “ce huliwane la nyipici.” (Fil. 1:27; 3 Ioane 8) Maine tro sa huliwa tune lai, haawe, tro ha acatrene hnyawa la itre itre otrene ihnim e hnine la ekalesia. Haawe, tune kaa matre hëne hnei nyipunie ngöne la wiike celë la ketre trejin ka thaa hane petre kö ce cainöje trootro me epuni ngöne itre hnalapa trootro?
5 Drei la ketre manathithi ka tru e tro sa hane melëne enehila la ihnimikeu ne la itre trejin e cailo fene hnengödrai! (1 Pet. 5:9) Kola mama hnyawa me melën hnene la itre atr ka ala nyimu catr, ngöne lo itre ijine Kovasio hna hnëkën e Cailo Fen, hna hape “Atrunyi Akötresieti Jë.” Epi tro asë hi së a thele troa caas, hnene la hna e pala hi la Wesi Ula i Akötresie ngöne la nöjei drai, me catr ihnimikeu matre troa cile kowe la itre jol, me “ce” cainöjëne la maca ka loi.—Rom. 15:6.