Mekene Waan
Kola Caas Ngöne La Hmi Enehila—Nemen La Aliene La Hna Ithanata Celë?
1, 2. (a) Hetre ketre hmi kö hne së hna öhne enehila ka iacaasinekeun la itre atr? (b) Nemen la mejiun ka ej thene la itre atr ka thiina ka meköt?
MAMA ha e cailo fen la aja ka eje thene la itre atr, ene la troa caas ngöne la hmi. Itre milio la etrun la itre atr hna acaasin, qa ngöne la itre nöje ka tru, me itre tribu, me itre qene hlapa. Nge kolo pala hi a traqatretr la itre atr e nöjei macatre. Hna qeje ëje i angatr e hnine la Tusi Hmitrötr ka hape, “itete anyipici” Iehova nge hna hë angatre fe ka hape, “ka ala nyimu atraqat.” Itre atr lai ka “nyi hlue i [Akötresie] e lai me jid.” (Isaia 43:10-12; Hna Amamane 7:9-15) Pine nemen matre angatr a nyihlue i Akötresie? Pine laka, atre hë angatr ka hape, Iehova hmekuje hi la nyipi Akötresie. Celë hi ewekë lai ka upi angatr troa mele thenge la itre trepene meköt i Nyidrë. Qa ngöne la hnei angatre hna inin, atre hë angatr ka hape, angatre hë a melën la “ite drai hnapin” ne la fene celë zine la ngazo, nge calemi hë la ijine tro Akötresie a apaatrene ej, matre nyihnane pe hnene la paradraiso ngöne la fene ka hnyipixe.—2 Timoteo 3:1-5, 13; 2 Peteru 3:10-13.
2 Wesi Ula i Akötresie a thingehnaean ka hape: “Panacas, ame hna patepi la ate ka ngazo . . . Nge tro la ange ka menyike a hetenyi la nöj, nge tro angat’ a madine la tingetinge atraqat.” (Salamo 37:10, 11) “Tro ha la ange ka meköti a hetenyi la nöj, me lapa palua kö ngön’ ej.” (Salamo 37:29) “Tro [Akötresie] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec, me hace hni, me teij, me aköt ; ke patë hë la ite ewekë hnapan.”—Hna Amamane 21:4.
3. Hna acaasine tune kaa enehila la itre atr hnine la nyipi hmi?
3 Ame la itre atr enehila hna acaasine hnine la nyipi hmi, tre, angatre hi lai itre pane atren elanyi la fen ka hnyipixe lo hna thingehnaean. Hnei angatr hna inin la aja i Akötresie, me thele jën troa eatrëne ej. Hnei Iesu lo hna amaman la enyipiewekëne lai, ene lo nyidrëti a qaja ka hape: “Nge dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” (Ioane 17:3) Hna cinyihane fe hnei Ioane aposetolo ka hape: “Kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.”—1 Ioane 2:17.
Sipu Alien La Caas Ngöne La Hmi
4. (a) Nemen la nyipi alien la hna hape kola iacaasinekeune la itre atr ka nyimutre ngöne la nyipi hmi? (b) Nemen la aqane qejepengöne hnene la Tusi Hmitrötr la iacaasinekeun?
4 Nemen la aliene la kola qaja enehila ka hape, kola iacaasinekeune la itre atr ka nyimutre ngöne la nyipi hmi? Nyine amamane hnyawa laka, calemi catre hë la ijine troa nyipun la fene celë ka ngazo, nge troa nyihnane ej hnene la fen ka hnyipixe lo hna thingehnaean hnei Akötresie. Mama hnyawa pi hi koi së la kola eatr la itre hna perofetan hnei Tusi Hmitrötr, jëne la etrun lai itre hna iacaasinekeun. Kola qaja hnene la ketre hna perofetan ka hape: “Ngöne la ite drai hnapine troa acili hutine la wete ne la ēnē i Iehova [nyipi hmi i Nyidrë hna adraiën] hune la hene la ite wet [e hune la nöjei pengöne hmi], . . . nge tro la nöjei nöj’ asë a xöte kow’ ej. Nge troa traqa la nöjei nöje ka ala nyimu, me hape, Trojë fe, mate elëjë shë kowe la wete i Iehova memine la ēnē i Akötesi Iakobo ; nge tro nyidëti a ini shë la ite jë i nyidë nge tro sha trongëne la ite gojenyi qa thei nyidë.”—Mika 4:1, 2; Salamo 37:34.
5, 6. (a) Nemene la alien la hna qaja ka hape, kola traqa la itre nöje koi Iehova? (b) Nemen la itre hnying nyine tro sa isa thel troa sa?
5 Thaa itre nöje asë kö la ka sipu traqa troa caas, ngo itre atrene pe a lö pi qa ngöne la nöjei nöje ka tru asëjëihë, itre milio hë la etrui angatr kola traqa troa thili koi Iehova hnine la uma i Nyidrë, uma ngöne götran ua. Atre hë angatr la mekuana me ihnimi Iehova Akötresie memine la itre xaa thiina ka lolo i Nyidrë, ene pe ketre ju la itre hni angatr. Celë hi matre angatr a ipië me thel troa kuca la aja i Akötresie. Ceitune hnyawa la aqane thithi angatr memine la atre cinyihan la tusi Salamo, kola hape: “Ini ni jë troa kuca la hanengë i cilie, ke cilieti la Akötesingö.”—Salamo 143:10.
6 Hapeu, kolo fe kö a hane öhnyi epuni e hnine lo lai itre atr ka ala nyimu hnei Iehova hna iacaasinekeun hnine la hmi ka caas? Nemene fe la pengöne koi nyipunie lo ini hna kapa qa hnine la Tusi Hmitrötr, mekuthetheu i nyipunieti kö a amaman ka hape, Iehova la qeqene la ini cili? Nemene fe la aqane tro nyipunie a hane “trongëne la ite gojenyi qa thei nyidrë”?
Aqane Eatr La Caasi Cili
7. (a) Nemene hë la aqane troa eatrën elanyi la caas hnine la hmi? (b) Pine nemen matre nyipi ewekë troa canga hane thili koi Iehova enehila, nge nemene la nyine kuca matre tro fe la itre xan a hane a ixötrethenge?
7 Ame la aja i Iehova, tre, ene la troa acaasin asë la itre hnei Nyidrëti hna xup ka inamacan hnine la nyipi hmi. Eje hi laka tru la madrine së troa lapa treqen elanyi la drai ne tro la nöjei ka mele asë a thili kowe la Akötresie ka caas! (Salamo 103:19-22) Ngo qëmekene lai, tro Iehova a pane apaatren la nöjei atr ka xele ma kuca la hnei Nyidrëti hna amekötin. Hetrenyi thei Nyidrë la ajan troa seng la ngazo ne la itre atr, matre Nyidrëti a canga ithuemacanyine ju la ewekë hnei Nyidrëti hna troa kuca, kolo matre hetre ijin kowe la nöjei atr e cailo fen troa ujë me trij la itre thiina ka ngazo i angatr. (Isaia 55:6, 7) Qa ngöne lai, kola canga hë enehila kowe la “nöjei nöj’ asëjëihë, me nöjei tribu, me ite qene hlapa, me nöjei ate” ka hape: “Qouju e Akötesie, me hamë nyidëti la atrun, ke traqa ha la ijine hnyingëne hnei nyidë ; nge thiliju koi nyidë ate xupe la hnengödrai, me fen, me hnagejë, me ite timi ka qeqe.” (Hna Amamane 14:6, 7) Hane fe kö nyipunie nyipi ewekën la hna ihë celë? Maine eje hi, haawe, qa i nyipunieti pena troa hane hën la itre xaa atr troa atre la nyipi Akötresie me troa thili koi Nyidrë.
8. Thupene la hna inin la itre trepene ini qa hnine la Tusi Hmitrötr, nemen la itre nyine tro sa catre kuca matre troa kökötre ngöne la ua?
8 Thaa ajane kö Iehova troa thili koi Nyidrë hnene la itre atr ka lapaune koi Nyidrë göi qaja hi ngo isa kuci mekune pe. Aja i Akötresieti pe la troa hetrenyi thene la itre atr la “trotrohnine la aja i nyidë” nge troa amamane lai hnene la itre aqane mele i angatr. (Kolose 1:9, 10) Celë hi matre ame la itre atr ka kapa madrin la itre trepene ini qa hnine la Tusi Hmitrötr, tre, angatr a thel troa itre keresiano ka macaj. Hetre hni ne ajane i angatr troa atrepengöi Iehova hnyawa, me troa akökötren me ajuin la aqane trotrohnin angatr la Wesi Ula i Nyidrë me trongëne hnyawa ej ngöne la mele i angatr. Angatr a thel troa hane eën la itre thiina ne la Tretretro i angatr e koho hnengödrai, me xome la itre mekun thenge la itre aqane wai ewekë i Nyidrë. Ewekë lai ka upi angatre fe troa thel la itre aqane troa hane xome la huliwa ne iamele hnei Iehova hna hnëkën thatraqa së enehila ngöne la fen. Hapeu, eje fe thei nyipunie la aja cili?—Mareko 13:10; Heberu 5:12–6:3.
9. Nemen la nyine troa kuca matre troa hetrenyi la nyipi caas enehila?
9 Tusi Hmitrötr a amamane ka hape, nyipi ewekë troa caas hnene la itretre nyihlue i Iehova. (Efeso 4:1-3) Eje hi hetrenyi enehila la caas ngacama easë pala kö a mele ngöne la fene ka gomegom, nge easë pala kö a icilekeu memine la itre aja së ka ngazo. Hnei Iesu hna catre thithi sai angetre drei nyidrë asë, matre tro angatr a ce hni me nyipi caas. Nemen la alien la itre trenge ewekë cili? Ame la hnapan, tre, troa lolo la itre aqane imelekeu i angatr me Iehova me Hupuna i Nyidrë. Ame la hnaaluen, tre, tro angatr a ketre caas, angatr itretre dreng. (Ioane 17:20, 21) Celë hi kepin matre Iehova a jën la ekalesia i Keresiano, orgasizasio hnei Nyidrë hna hnëkën matre troa inin la nöje i Nyidrë.
Itre Jëne Troa Caas?
10. (a) Nemen la hne së hna akökötren ngöne la mele së, qa ngöne la hne së hna isa thel hnine la Tusi Hmitrötr la itre mekun ka sa la ite hnying ka ketr la itre hni së? (b) Wange ju cahu itre jëne ka sajuëne la caas thene la keresiano me sa la itre hnyinge hna amë wengën hnine la paragarafe celë.
10 Hanawang, sevene cahu sipu jëne matre troa caas hnine la hmi. Ame ngöne la nyipunie a sa cahu itre hnying, nyipi ewekë troa isa thele la thangane la itre ini qa ngöne la isa aqane imelekeu i nyipunie me Iehova nge memine mina fe la itre trejin me nyipunie itre keresiano. Eje hi laka maine tro nyipunie a thele mekun qa ngöne la itre ini celë, me e ngöne la tusi hmitrötr la itre mekene tus me xötr thaa hna fejane kö, eje hi lai laka, tro hë nyipunie a hetrenyi la inamacan qaathei Akötresie, memine la atrein thele ewekë me wai ewekë—celë hi itre thiina lai ka nyipi ewekë catre koi së. (Ite Edomë 5:1, 2; Filipi 1:9-11) Waipengöne asë ju cahu itre jëne troa caas, ase jë ketre, matre ketre pena.
(1) Easë a atrehmekun laka, Iehova la ka ijij troa acil la itre wathebo göi loi me ngazo. “Lapauneju koi Iehova hnene la hni’ ö ka pexej, ngo the lapa qale kowe la hnei’ ö hna trotrohnin. Mekuneju koi nyidë ngöne la nöjei goje i’ ö asë, nge tro pena nyidëti a amekötine la ite jë i ö.”—Ite Edomë 3:5, 6.
Nemen la kepin matre nyipi ewekë tro sa thele ihaji me eamo thei Iehova ngöne la easë a xomi meköt matre troa axeciën la ketre mekun? (Salamo 146:3-5; Isaia 48:17)
(2) Eje the së la Wesi Ula i Akötresie ka troa eatrongë së. “Hnei nyipunie hna kapa la wesi ula i Akötesie lo hnei nyipunie hna denge qa thei hun, tha hnei nyipunie hna kapa kösë tenge ewekë i ate, ngo wesi ula i Akötesie, (nyipici lai,) celë hi kola huliwane la ite hni nyipunie angete lapaun.”—1 Thesalonika 2:13.
Pine nemen matre thaa ka loi kö la tro së a kuca la ketre ewekë thenge la sipu “mekune” së hmekuj? (Ite Edomë 14:12; Ieremia 10:23, 24; 17:9)
Ame ngöne la itre xaa hnepe götranen la mele së, maine thatre kö së la hna qaja hnei Tusi Hmitrötr ngöne la ketre götran, nemen la nyine tro sa kuca? (Ite Edomë 2:3-5; 2 Timoteo 3:16, 17)
(3) Easë asë hi a kapa la xeni ka caas ngöne la götrane la ua. “Tro ha inine la ite nekö i nyipo asë hnei Iehova.” (Isaia 54:13) “Tro sha imekunekeune mate troa aciane la ihnimi me ite huliwa ka loi ; tha tro kö a tije la icasikeu shë tune la thina i ite xan ; ngo loi pe troa [“ithuecatrekeu,” Les Saintes Écritures — Traduction du monde nouveau (MN ) ], nge nue catëne jë e tro nyipunie a goeëne la drai [ne lep apaatren] a eashenyi hë.”—Heberu 10:24, 25.
Nemen la itre manathith hna troa kapa hnene la itre atr ka xome hnyawa la itre ewekë hna hnëkën hnei Iehova matre troa xen ngöne la götrane la ua? (Isaia 65:13, 14)
(4) Iesu la tane së, ngo thaa ketre atr kö. “The tro kö a hë nyipunie, Rabi, ke, casi hi la ate ini nyipunie, ene Keriso ; nge ite tejine asë nyipunie. Nge the tro kö a hëne la kete ate e celë fen, kaka ; ke casi hi la Tetetro i nyipunie e hnengödrai. Nge kete the tro kö a hë nyipunie, ite meken ; ke casi hi la mekene i nyipunie, ene Keriso.”—Mataio 23:8-10.
Hapeu, ijije kö troa mekun hnene la ketre e easë ka hape, ka sisitria kö së hune la itre xan? (Roma 3:23, 24; 12:3)
(5) Easë a mejiune laka Baselaia i Akötresieti hmekuje hi la nyin la itre ejolen la fen. “Celë hi mate thithiju nyipunieti tune la, ka hape, Tetetro i anganyihunieti e kohoti hnengödrai, jiniati e hmitöte la atesiwa i enëtilai. Jiniati e hlepëtipi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai. Ngo pane thelejë nyipunie la baselaia i Akötesie, me thina ka meköti anganyidë.”—Mataio 6:9, 10, 33.
Qa ngöne nemene jë matre ame la easë a “pane thele la baselaia” kolo hi lai a xatua së troa thupën la caasi së? (Mika 4:3; 1 Ioane 3:10-12)
(6) Hetre thangan ka loi kowe la itre hlue i Iehova qaathene la uati hmitröt, jëne ej angatr a eën la itre thiina ka sisitria matre troa caas hnene la itre keresiano. “Ame la ite wene la Ua, te, ihnim, me madin, me tingeting, me xomi hni ahoeany, me metöt, me thina ka loi, me [“lapaun,” MN ], me thina ka menyik, me xome hnöth.”—Galatia 5:22, 23.
Nemen la nyine tro sa kuca matre troa hetre thangan la uati hmitrötre i Akötresie ngöne la mele së? (Ite Huliwa 5:32)
Nemene la emenene la ua i Akötresie, ngöne la aqane imelekeu së memine la ite sine huliwa së Keresiano? (Ioane 13:35; 1 Ioane 4:8, 20, 21)
(7) Ame asë hi la itre nyipi hlue i Akötresie, tre, angatr asë hi a cainöjën la maca ka loi ne la Baselaia. “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”—Mataio 24:14.
Nemen la ka nyi göhnene e kuhu hni së la ajan troa catre xom lai huliwa ne cainöj? (Mataio 22:37-39; Roma 10:10)
11. Maine tro së a xötrethenge la nyipici qa hnine la Tusi Hmitrötr, nemen la thangane itre ej kowe la mele së?
11 Ame la easë a hmi koi Iehova hnene la hni ka caas, ene pe easë a easenyi catr koi Nyidrë, nge kola aijijë së troa kapa madrin la elolon la aqane imelekeu së memine la itre trejin me easë ngöne la ua. Kola qaja ngöne Salamo 133:1 ka hape: “Hana wang, lolopi hë me sheminge pi hë la kola ce lapa la ange tejin!” Drei la eloin la troa kötren la fen memine la nöjei ewekë ka ngazo ka ej e hnine ej, ene la mele caas, memine la kuci ngazo, me iakötrë, nge tro pe a ce mel me caas memine la itre atr ka hni koi Iehova hnyawa me drengethenge la itre wathebo i Nyidrë!
Thipetrije Pi La Itre Qaan La Gomegom
12. Pine nemen matre nyipi ewekë tro sa thipetrije la aja troa mele caas?
12 Nyipi ewekë tro sa thipetrij la itre qaan la gomegom, matre tro pala hi a sisitria la caasi the së. Ame la ketre kepin matre kola gomegom la fen, tre, hnene laka, kola icilekeu me Akötresie me itre trenge wathebo i Nyidrë hnene la itre atr. Iehova a xatua së troa thipetrije la aqane ujë cili, ngöne laka Nyidrëti a amamane hnyawa koi së lo atrekë huliwane lai, ene Satana Diabolo. (2 Korinito 4:4; Hna Amamane 12:9) Satana hi lo ka iaö Adamu me Eva matre tro nyidroti a thipetrij la hna qaja hnei Akötresie me sipu kuca la itre mekun ka thaa ihmeku hmaca kö memine la aja i Akötresie. Hleuhleu la pune koi nyidro me koi së mina fe itre matra i nyidro. (Genese 3:1-6, 17-19) Hna löthe hnyawa la fene enehila hnene la aqane mele caasi ne la itre atr, me aqane icilekeu i angatr me Akötresie me itre trenge wathebo i Nyidrë. Qa ngöne lai, nyipi ewekë tro sa hmekën wanga löthi së jë fe hnene la aqane ujë cili.
13. Nemene la ka troa amaman ka hape, easë a hnëkë hnyawa troa mel ngöne la fen ka hnyipixe me ka meköti Akötresie?
13 Hanawang la ketre ceitun, lolo catr la hna thingehnaean hnei Iehova, ene laka, troa nyihnan la fene ka ngazo celë hnene la hnengödrai ka hnyipixe me ihnadro ka hnyipixe nge “eje la thina ka meköti e cili.” (2 Peteru 3:13) Hapeu, thaa kolo kö lai a hane upi së hnene la mekune celë troa nyiqaan hnëkë, matre tro së a hane mele elanyi ngöne la fen hna troa haöth hnene la meköt? Kolo lai a hape, troa wangatrune hnyawa la eamo qa hnine la Tusi Hmitrötr, kola hape: “The ajane kö nyipunie kowe la fen, memine fe la ite ewekë e celë fen. Maine kete ate a ajane la fen, pëkö aja koi T etetro e kuhu hni angeic.” (1 Ioane 2:15) Qa ngöne lai easë a kötren la aqane ujë ne la fene celë—ene la aqane mele caasi ne la itre atren, me sasaithi tulu la aqane isa wai angatre kö, me kuci ngazo me iakötrë. Loi e tro sa majemine troa drengethenge Iehova hnene la hni ka pexej, ngacama kola huli së hnene la ngazo ka eje the së. Kola amamane hnyawa pe ngöne la nöjei götran ne la mele së ka hape, hna eatrongëne la itre mekune së me itre aliene hni së matre troa kuca la aja i Akötresie.—Salamo 40:8.
14. (a) Pine nemen matre nyipi ewekë troa canga thele enehila troa inin la itre jë i Iehova me troa xötrethenge itre ej ngöne la mele së? (b) Nemene la alien koi së la itre xötr hna hamën hnine la paragaraf?
14 Ame la kola traqa elanyi la ijine tro Iehova a apaatren la fen ka ngazo celë memine la itre atr asë ka ajan la itre aqane mele ne ej, haawe, thaa tro jë kö Iehova a kötrën ananyin la drai cili. Thaa tro jë kö Nyidrë a uthe la drai ne iameköti, nge ketre thaa tro jë kö Nyidrë a triane la itre hnei Nyidrë hna amekötine hë, matre troa treqen la itre xaa atr ka inin me kuca la aja i Nyidrë, ngo itre ka luelue pala kö, nge thatreine pala kö angatr troa nuetrij la mele ne la fen. Enehila hi la ijine troa qale koi Iehova! (Luka 13:23, 24; 17:32; 21:34-36) Drei la madrine ka tru e troa goeën la kola canga xome hnene la ka ala nyimu atraqatr la itre ijine ka lolo celë, matre troa sine thele la ini qaathei Iehova, hna hamën jëne la Wesi Ula memine la organizasio i Nyidrë; nge troa caas me ce trongën la itre jë i Nyidrë ka eatrongë së kowe la fene ka hnyipixe! Troa tru catre la ihnimi së koi Iehova me ajan troa nyihlue i Nyidrë, e hne së hna catre thele troa atre Nyidrëti hnyawa pala hi.
Revizio
• Nemene la mekuana i Iehova göi hmi?
• Thupene la hna inin la itre trepene ini qa hnine la Tusi Hmitrötr, nemene la itre nyine tro sa kuca hnene la hni ka menyik matre tro sa kökötr ngöne götrane la ua?
• Nemene la nyine tro së a isa kuca matre tro sa caas memine la itre xaa ka nyihlue i Iehova?
[Iatr ne la götran 4]
‘Tro ange ka menyik a hetrenyi la ihnadro, nge tro angatr a madrine la tingeting atraqatr’