Troa Xome La Ita Ne Thup Celë e 08 Nofeba Me Wiike Cili
Kola Atrunyi Akötresie Hnene La Caasi Thene La Itre Keresiano
‘Catre jë nyipunie troa xölehuje la ce hni qa thene la Ua.’—EFE. 4:3.
1. Hna atrunyi Akötresie tune kaa hnene lo itre pane Keresiano ne Efeso?
KOLA atrunyi Iehova nyipi Akötresie, hnene la caasi ne lo itre Keresiano ne Efeso. Ame ngöne la traone cili ka xenyë, hetrenyi la itre xaa Keresiano ka trenamo nge ka trene hlu; ame itre xan, tre, itre hlue angatr, maine jë ka puafala. (Efe. 6:5, 9) Hetrenyi la itre xaa atr ne Iudra ka atre la nyipici ngöne lo köni treu ne cainöje Paulo hnine la sunago i angatr. Ame la itre xan, tre, ka thili angatr ekö koi Diana me ka kuci iöni. (Ite hu. 19:8, 19, 26) Kola mama hnyawa laka, hnene la nyipi hmi Keresiano hna acaasine la itre atr ka xulu qa ngöne la itre nöj ka nyimutre. Paulo a wanga atrehmekun, laka, kola atrunyi Iehova hnene la caasi ne la ekalesia. Hnene la aposetolo hna cinyihan, ka hape: “Loi e atrunyi nyidëti hnene la ekalesia.”—Efe. 3:21.
2. Nemene la ka thë la caasi ne la itre Keresiano ne Efeso?
2 Ngo hna thë la caasi ne la ekalesia ne Efeso. Hnei Paulo hna hmekëne la itre qatre thup e cili, ka hape: “Tro fe a xulu thei nyipunieti kö la nöjei ate ka troa qaja la ite ewekë ka qaliqali, troa hule koi angate la itete deng.” (Ite hu. 20:30) Ketre, hetrenyi pala kö la itre xaa trejin ka xome la aqane mekune ka gomegom, lo hnei Paulo hna hmekën, ka hape, ka “huliwa hnine la ite ka tha idei.”—Efe. 2:2; 4:22.
Ketre Tusi Ka Wanga Atrune La Caas
3, 4. Tune kaa la aqane wanga atrune la caas hnene la tusi Paulo koi angetre Efeso?
3 Hnei Paulo hna atrehmekune laka, maine kola ajane hnene la itre Keresiano troa catre ce huliwa, haawe, nyipi ewekë tro angatr isa ala caas, a catre sajuëne la caas. Hnei Akötresieti hna upi Paulo jëne la uati hmitrötr, troa cinyihane la ketre tusi thatraqane la angetre Efeso, ka amamane hnyawa la enyipiewekëne la troa caas. Drei la ketre ceitun, hnei Paulo hna cinyihane, ka hape, aja i Akötresie troa “casi la nöjei ewekë koi Keriso.” (Efe. 1:10) Ketre, hnei nyidrëti hna aceitunëne la itre Keresiano me itre sine etë ka isapengön, hna xome matre troa xupe la ketre uma. “Kola tratraune hnyawa la uma asë . . . , me kola draië nyine ēnēti hmitöte thei Iehova.” (Efe. 2:20, 21) Hnei Paulo mina fe hna wanga atrune la caasi ne la itre Keresiano ne Iudra me itre Ethen, me amekunëne kowe la itre trejin, laka, hna xupi angatr asë hi hnei Akötresie. Hnei nyidrëti hna qeje Iehova ceitu memine “la Tetetro, nge qa thei nyidë la hna cengöne ati ëjene la nöjei lapa e hnengödrai me celë fen.”—Efe. 3:5, 6, 14, 15.
4 Easa troa ce wange ngöne la mekene 4 ne la tusi Efeso, la kepin matre nyipi ewekë tro sa catr matre troa sajuëne la caas, memine la aqane xatua së hnei Iehova troa caas, memine fe la itre thiina ka troa xatua së troa caasi pala hi. Hapeu matre troa e asë la mekene tusi cili, matre tro nyipunieti a hane kepe thangane la kola inine la Ita Ne Thup (Tour de Garde) celë?
Kepin Matre Nyipi Ewekë Troa Catre Ce Hni
5. Pine nemene matre kola caasi hnene la itre angela troa nyihlue i Akötresie, ngo pine nemen matre jole koi së, easë itre atr, troa caas?
5 Hnei Paulo hna ielene la itre trejine me nyidrë qa Efeso, troa ‘catre troa xölehuje la ce hni qa thene la Ua.’ (Efe. 4:3) Maine easa ajane troa trotrohnine la enyipiewekëne la troa catre ngöne la götrane cili, haawe, loi e tro sa ce wange la pengöne la itre angela i Akötresie. Pine laka thaa caa pengöne kö la itre atr e celë fen, haawe ijije hi tro sa qaja, ka hape, Iehova a amanathithine la itre angela ka nyimutre, angatr isa ala caas, thenge la isa pengö i angatr. (Dan. 7:10) Ngo ijije hi tro angatr a nyihlue i Iehova ngöne la caas, pine laka angatr asë hi a drengethenge Nyidrë me kuca la aja i Nyidrë. (E jë la Salamo 103:20, 21.) Maine nyipici laka ame la itre angela, tre, nyimu pengöne thiina ka lolo i angatr, ame pena ha la itre Keresiano, tre, nyimutre la itre etha i angatr. Celë hi ka ajolëne la caasi thei angatr.
6. Nemene la itre thiina ka troa xatua së troa ce madrin me ce huliwa, ngacama isapengöne kö la itre etha së?
6 Eje hi laka, ame la kola thele troa ce huliwa la itre atr ka thaa pexeje kö, tre, canga tro hi angatr a cile kowe la itre jol. Drei la ketre ceitun, hetrenyi e hnine la ekalesia la ketre trejine ka thiina ka menyik ngo ka majemine traqa hmitr; angeice a ce nyihlue i Iehova memine la ketre trejine ka traqa pala hi ngöne la hawa hna sa ngo ka canga elëhni pe; haawe, nemene la hnei nyidro hna isa mekun? Kola mekune hnene lo pane trejin, laka, ka ngazo la aqane ujë i ketre, ngo thëthëhmine hë angeice laka, tui angeice mina fe hi. Tune kaa la aqane tro la lue trejine cili a ce huliwa ngöne la caas? Hanawange la aqane troa xatua nyidro hnene la itre thiina ka lolo hnei Paulo hna qaja aloin nge ka mama ngöne la hnei nyidrëti hna qaja e thupen. Pane mekune jë së la aqane troa sajuëne la caas hnene la hna eëne la itre thiina cili. Kola cinyihane hnei Paulo, ka hape: “[Ini] a iele nyipunie troa tro . . . memine la hni ka ipië me menyik, memine la xomi hni ahoeany, kola isa xomi hni kö nyipunie ngöne la ihnim; kola catejë nyipunie troa xölehuje la ce hni qa thene la Ua ngöne la hna otene la iloi.”—Efe. 4:1-3.
7. Pine nemene matre nyipi ewekë tro sa caasi me ce huliwa memine la itre xaa Keresiano ka thaa pexeje kö?
7 Ka nyipi ewekë catre tro sa atreine troa caas me ce nyihlue i Akötresie memine la itre atr ka thaa pexeje kö, ke, kola aceitunëne la caasi ne la itre nyipi hlue i Akötresie memine la ngönetrei, tune la hna qaja hnei Tusi Hmitrötr, ka hape: “Casi la ngönetei, nge casi la Ua, tune la hna hë nyipunie ngöne la mejiune ka casi lo hna hë nyipunieti kow; casi la Joxu, nge casi la lapaun, nge casi la bapataiso, casi la Akötesie nge Tetetroti ne asë nyidë.” (Efe. 4:4-6) Pine laka kola huliwa i Iehova hnene la lapa ka caasi ne la itre trejin, ene pe eje thei angatr la uati hmitrötre me itre manathithi qaathei Iehova. Nge e akötrë së jë hnene la ketre atr e hnine la ekalesia, tro sa ië? Pëkö xaa hnë tro sa drenge la itre trenge ewekë ka epine palua.—Ioane 6:68.
Kola Sajuëne La Caasi Hnene La “Ite Atr Nyine Ahnahna MN”
8. Nemene la hnei Keriso hna xom matre troa xatua së troa cile catr kowe la itre iajojezi ka thi lapa?
8 Hnei Paulo hna xome la ketre aqane ujë ka eje ekö thene lo itre sooc, matre troa qaja la aqane hamëne Iesu la “ite atr nyine ahnahna MN” matre xatuane la ekalesia troa caas. Ame la sooc ka hun ngöne la ketre isi, tre, ijije hi tro angeic a traqa fë la ketre atr hna thapa e cili, matre troa nyihluene la föi angeic. (Sal. 68:1, 12, 18) Ketre tune mina fe, pine laka hnei Iesu hna apone la fene celë, ene pe ewekë i nyidrëti hë la itre hlue ka hni ka ajan. (E jë la Efeso 4:7, 8.) Hnei nyidrëti hna xome tune kaa lai itre hna thapa? “Nyidëti a ujën’ ite xane nyine aposetolo; nge ite xane nyine perofeta; nge ite xane nyine amamane la maca ka loi; nge ite xane nyine thupe me ini; nyine kuca amekötine la nöjei ate hmitöt, nge nyine xome xatuane la huliwa, nge nyine adraiëne la ngönalë i Keriso; uti hë la traqa asë hë shë kowe la ce hni ngöne la lapaun.”—Efe. 4:11-13.
9. (a) Kola xatua së tune kaa hnene la “ite atr nyine ahnahna MN” matre troa eje pala hi the së la caas? (b) Pine nemene matre loi e troa thele hnene la nöjei atrene la ekalesia troa sajuëne la caas?
9 Kola aceitunëne la “ite atr nyine ahnahna MN” memine la itretre thupë mamoe ka ihnim, laka, angatr a xatua së matre troa eje pala hi the së la caas. Drei la ketre ceitun, maine kola öhne hnene la ketre qatre thup ne la ekalesia, la lue trejine e “ielëhnikeu,” tre, tro hë angeice a sajuëne la caasi ne la ekalesia hnene la hna hamë eamo koi nyidro ngöne la gaa co, me thele troa ‘haji nyidro cememine la hni ka menyik.’ (Gal. 5:26–6:1) Tune la itretre hamë ini, kola xatua së hnene la “ite atr nyine ahnahna MN” troa eköthe hnyawa la lapaune së hune la itre ini qa hnine la Tusi Hmitrötr. Qa ngöne lai, angatr a sajuëne la caas, me xatua së troa itre Keresiano ka macaj. Ewekë lai hnei Paulo hna wanga atrun, ene pe nyidrëti a cinyihane jë, ka hape, “mate tha ite medenge hmaca kö shë hna iufekeune me xom’ agöne hnene la enyin’ asë ne la ihaji, nge hnene la nyinyithina ne la nöjei ate, me iaö, lo nyine ithue hnine troa amenun.” (Efe. 4:13, 14) Loi e tro la nöjei Keresiano asë a thele troa sajuëne la caasi ne la lapa ne la itre trejin; ceitune hi lai memine la aqane itö ixatua hnene la itre götrane ne la ngönetrei së.—E jë la Efeso 4:15, 16.
Loi e Tro Sa Eëne La Itre Thiina Ka Hnyipixe
10. Nemene la aqane ujë ka ngazo ka ijije troa angazone la caasi së?
10 Hapeu, hnei nyipunieti kö hna atrehmekun ngöne la mekene foa ne la tusi Paulo koi angetre Efeso, laka, ihnimi la thiina ka sisitria ka troa aijijë së troa itre Keresiano ka macaj nge ka caas? Ketre, eje mina fe a amamane la aliene la ihnim. Drei la ketre ceitun, maine tro sa xötrëne la jëne ihnim, tre, tro hë sa iananyi memine la kuci ngazo me qene tratraij. Hnei Paulo hna hmekëne la itre trejine me nyidrë, matre thaa tro hmaca kö angatr a “tro tune la ite ethen.” Eje hi, itre ka “thaa hmahma hmaca kö” angatr, nge thaa “hna nue angate kö kowe la qene tratraij.” (Efe. 4:17-19) Kola angazone la caasi së hnene la fene ka ngazo celë. Kola qene hnyiman la kuci ngazo hnene la itre atr, me sili nyiman, me goeëne lai ngöne la itre nyine iamadrinë, me hane kuca fe lai ngöne la itre götrane gaa co me gaa tru atr. Ketre, tune la atr ka thele hany, ijije tro la aqane ujë cili a ananyi angeic qaathei Iehova memine la ekalesia. Pine nemen? Pine laka canga tro hi lai a upi angeic troa kuca la ngazo. Ketre, ame la atr ka faipoipo hë nge ka thele hany, tre, canga tro hi a uku angeic troa nyi xetë; ene pe, kola thapa la itre nekönatr qaathene la itre keme me thine i angatr, nge kolo fe a thë la imelekeu ne la lue trefën. Drei la ketre ewekë ka thi lapa! Celë hi kepin ka tru ka upi Paulo troa cinyihan, ka hape: “Tha hnei nyipunie hna ini thei Keriso troa tune lai”!—Efe. 4:20, 21.
11. Thenge la ithuecatre hna hamëne hnene la Tusi Hmitrötr, nemene la itre ewekë nyine tro la itre Keresiano a saze?
11 Hnei Paulo hna wanga atrune la enyipiewekëne tro sa thipetrije la itre aqane mekune ka thi lapa, me eëne la itre thiina ka xatua së troa ce mele memine la itre xan. Öni nyidrë, ka hape: “Tro nyipunie a tijepi la ate ka hekö ka ngazo, thenge la thina hnapan, nge thenge la nöjei aja ka iaö; me ahmadradrane hmaca ngöne la mekune ne la ite hni nyipunie; me xetëne hnei nyipunie la ate ka hnyipixe, lo hna xupe tui Akötesie ngöne la thina ka meköt, me thina ka hmitöte me nyipici.” (Efe. 4:22-24) Tro sa ahnyipixene tune kaa ‘la mekune ne la itre hni së’? Maine tro sa sine thele cememine la hni ne ole, la itre ewekë hne së hna inine qa hnine la Wesi Ula i Akötresie me qaathene la tulu ka lolo hna amë hnene la itre Keresiano ka macaj, haawe, tro hë sa xetrëne la atr ka hnyipixe, “lo hna xupe tui Akötesie.”
Loi e Tro Sa Xome La Itre Aqane Ithanata Ka Hnyipixe
12. Kola sajuëne tune kaa la caas hnene la hna qaja la nyipici, nge pine nemene matre jole kowe la itre xan troa qaja la nyipici?
12 Ka nyipi ewekë catre troa iqajakeune la nyipici e hnine la ketre hnepe lapa, maine hnine la ekalesia pena. Troa ieakeune la itre atr hnene la trenge ithanata ka lolo, me hna qaja mekötin, me hna ifekeune hnyawa. (Ioane 15:15) Ngo nemene la ewekë ka traqa ngöne la kola thoi la ketre atr kowe la trejine me angeic? Ame la kola atre la ewekë cili hnene la trejine me angeic, eje hi laka, tro ha nunue lo otrene nyipici ka iothekeu nyidro. Haawe, trotrohnine hi nyipunie la kepine matre Paulo a cinyihan, ka hape: “Isa qeje nyipici kowe la ate eashenyi nyipunie; ke eëshë la ite hnepe ngönetei ne la kete ate me kete ate.” (Efe. 4:25) Maine jë troa jole kowe la ketre atr troa nyiqaane qaja la nyipici, qa ngöne laka ka majemine angeice thoi ngöne lo angeic a nekönatr. Ngo tro Iehova a amanathithine la trenge catre hnei angeice hna kuca matre troa saze, me hane xatua angeice mina fe.
13. Kola hapeue la troa thipetrije la trenge ewekë ka iakötrë?
13 Kola ini së hnei Iehova troa sajuëne la metrötr me caas e hnine la ekalesia me hnine la hnepe lapa së, hnene la hna xomehnöthe la aqane ithanata së. “The xulu kö qa ngöne la ite ukeineqë i nyipunie la tenge ka sis . . . Iananyipi nyipunie memine la tenge ka haite asë, me iwesitë, me elëhni, me kakaeo, me nyi tru, me nöjei ngazo asëjëihë.” (Efe. 4:29, 31) Ame la ketre aqane tro sa neëne troa qaja la trenge ewekë ka iakötrë, tre, ene la troa eëne la hni ne metrötr kowe la itre xan. Drei la ketre ceitun, ame la trahmanyi ka ithanata akökötreny kowe la föe i angeic, tre, tro ha saze la aqane ujë i angeic, e hnei angeice hna inine la aqane wanga atrune Iehova la itre föe. Akötresie mina fe a iëne la itre föe hnene la uati hmitrötr, me hamë angatr la manathithi ka tru troa ce musi me Keriso. (Gal. 3:28; 1 Pet. 3:7) Ketre tune mina fe, ame la föe ka majemine catrëne la trahmany, tre, tro ha saze la aqane ujë i eahlo, e hnei eahlo hna inine la aqane xomihnine Iesu la iakötrë.—1 Pet. 2:21-23.
14. Pine nemene matre ka hetre ethan la troa elëhni?
14 Maine tro pala hi sa drenge la trenge ithanata ka iakötrë, tro hë sa thatreine xomehnöthe la elëhni së. Ketre, ijije hi tro ej a thë la aqane imelekeu ne lue atr ka iatre hnyawa. Ceitune hi la elëhni memine la eë. Canga tro hi ej a kökötr me hetre ethan. (Ite edomë 29:22) Maine hetre nyipi kepine ju hë la elëhni së, ngo loi e tro sa xomihnine ej wanga troa hetre ethane kowe la aqane imelekeu së memine la itre xan. Loi e tro la itre Keresiano a catre troa nue la ngazo ne la itre xan, nge thaa tro kö angatr a lapa fë elëhni, me amexeje hmaca la jole cili. (Sal. 37:8; 103:8, 9; Ite edomë 17:9) Hnei Paulo hna hamë eamo kowe la angetre Efeso, ka hape: “Elëhnijë, ngo the ngazo kö; nge the lö kö la jö hune la iwesitë i nyipunie; kete the nue hne i diabolo kö.” (Efe. 4:26, 27) Maine tro sa elëhni, tro hë së lai a nue jë i Diabolo troa aciane la gomegom, me thë la caasi së e hnine la ekalesia.
15. Nemene la ethan la troa xome la ifekë ewekën?
15 Ame la troa metrötrëne la itre ewekë ne la itre xan, ene la thaa tro kö a atrekënö itre ej, tre, celë hi aqane ujë ka troa sajuëne la caasi hnine la ekalesia. Easa e, ka hape: “Ame la ate kë’ nö, the ënö hmaca kö.” (Efe. 4:28) Kola kökötre thene la nöje i Iehova la inyipicikeu. Maine tro la ketre Keresiano a angazone la inyipicikeu cili hnene la hna xome la ifekë ewekën, tro hë angeice a thë la elolone la caasi cili.
Kola Acaasi Së Hnene La Ihnimi Së Koi Akötresie
16. Tune kaa la aqane tro sa acatrene la caasi së hnene la hna qaja la trenge ewekë ka iakeukawany?
16 Ame la kola caasi hnene la itre atrene la ekalesia i Keresiano, tre, thangane hi la ihnimi angatr koi Akötresie; celë hi ka upi angatre lai troa hnime la itre xan. Kola upi së hnene la hni ne ole së kowe la thiina ka menyike i Iehova, troa catre trongëne la eamo celë, ka hape: “[Qaja jë] la tenge ka loi, la nyine troa eamon, mate aciane la loi koi angete deng. . . . Ihnimi ipitö ju nyipunie, nge iutipinekeuneju, kola inu’ aloinekeun, tune la hnei Akötesie hna nu’ aloinyi nyipunie göi Keriso.” (Efe. 4:29, 32) Iehova a nue cememine la thiina ka menyik, la itre ngazo ne la itre atr ka thaa pexeje kö, tu së hi. Hapeu, thaa tro fe kö sa hane nue la ngazo i itre xan?
17. Pine nemene matre loi e tro pala hi sa catre troa sajuëne la caas?
17 Kola atrunyi Iehova hnene la caasi ne la nöje i Nyidrë. Kola upi së hnene la ua i Nyidrë troa sajuëne la caasi cili ngöne la nöjei götrane la mele së. Eje hi laka, loi e tro pala hi sa nue troa eatrongë së hnene la ua cili, ke hnei Paulo hna cinyihan, ka hape: “The akötëne kö hnei nyipunie la Uati hmitöte i Akötesie.” (Efe. 4:30) Ame la caas, tre, celë hi ketre trengamo ka tru alamekene nyine tro sa thupëne hnyawa. Ej a thue madrine kowe la nöjei atr asë ka thele troa sajuëne ej, nge kolo mina fe a atrunyi Iehova. “Qa ngöne lai nyi tupu Akötesieti jë nyipunie, tune la ite nekö hnimina; me tro pala hi ngöne la ihnim.”—Efe. 5:1, 2.
Tro Nyipunieti a Sa Tune Kaa?
• Nemene la itre thiina ka sajuëne la caasi ne la itre Keresiano?
• Tune kaa la aqane troa sajuëne la caasi hnine la ekalesia hnene la aqane ujë së?
• Kola xatua së tune kaa hnene la aqane ithanata së troa atreine ce huliwa memine la itre xan?