“Tha Nyipici Kö La Ewekë Celë!”

HANAWANGE la ketre ewekë hna qejepengöne hnene la ketre trahmanyi ne Amerika ka lapa e Newe Iok (U.S.A.); öni nyidrë ka hape: “Hnene la neköngetrahmany, Ionathana la ejen, hna majemine troa tro lapa kowe la itre sine i angeic, kowe la hnalapa i angatr, tha nyipi nanyi catre kö. Ngo ame pe Valatina la ifëneköng, ke, tha madrine kö nyidro e tro lai nekö i nyiho a xomi loto kowe la hnalapa ne la itre sine i angeic. Ngazohnine palahi nyidro pine la ejolene la gojeny, ngo ame pe, ke, ame la itre sine ne la nekö i nyiho, ke, hetre uma i angatre nyine huliwaane la eleketoronik. Nge aja i angeice catre la metie cili, drei lai aliene la tro lapai angeice koi angatre troa amacaane la itre hnei angeice hna inin. Eni casi ju pe hi ngöne la hnalapa, ngöne la götrane ahuë, tha nanyi kö qa Manathan, ketre traone ne Newe Iok. Nge ame la ijine cili, ke, ifënekönge hë e Pueroto Riko troa iöhnyi memine la itre lapa i angeic. Ngo eni a lapa mekune ka hape: ‘Ma easenyi hë matre traqa pi Ionathana.’ Ene pe, keciqa jë hi la sine pate ne la qëhnelö. Öni hninge jë hi, ‘Hawe, canga traqa hi Ionathana.’ Ngo pëkö, tha angeice kö lai. Itre polisi pe, me itre atrei pital, kolo itre ka canga traqa hna upe troa atë la itre ka tru mecin, maine itre ka eatre pena ngöne la itre gojeny. ‘Atre hi nyipë la atrekë peremi ne la?’ kola hnyingëne koi ni hnene la polis. Öninge jë hi e sa koi nyidrë ‘ö, Ionathana hi nekönge la atrekë ewekën.’ ‘Hawe, hetre hace hne huni hna troa qaja koi nyipë. Ke hetre loto ka eatr, nge . . . ame nekö i nyipë . . . ame nekö i nyipë, ke, meci fe hë angeic.’ Canga öninge jë hi ‘Tha nyipici kö la ewekë celë!’ Qa ngöne laka hna thaasesëkötrë huni hnene la hace celë, hetrenyi la itre macatre laka thatreine kö huni troa thëthëhmin.”

Hanawange mina fe la hna cinyihane hnene la ketre kem, atre Baresolona (Sepania), öni nyidrë ka hape: “Ame e Sepania ngöne lo itre macatre 1960, mingöminge me lolo la mele ne la fami hun. Maria la ifëneköng, me köni nekö i nyiho, Davita, Pakito, me Izabela, 13 lao macatre ne la ka tru, nge 11 la hnaluen, nge 9 la ka co pe.

“Ame ngöne la ketre drai ne treu maac, macatre 1963, hna lö triji ini hnei Pakito, pine laka tru catre la hna akötre la he i nyën. Ngo, tha canga trotrohnine pe huni ka hape qa ngöne nemen. Ene pe tha qea ju kö thupen, nge kola ha mama koi hun, ngo ngazo pe, thupene köni hawa, meci pi hi nyën. Hna kaqa la none la he i nyën, ene pe neni pi la madra troa atuthe la atuat, hane hi lai kepine matre nyipune la mele i nyën.

“Thötre hë lao macatre thupene la meci Pakito. Ngo, eje palahi thei nyiho la akötre ka tru qa ngöne la paatre i nyën. Pëkö xaa ewekë troa nyihnane la kola paatre la ketre nekö së, ke, ceitu memine la kola thupatrije la ketre götrane ne la ngönetrei së. Nyipici, tha ijije kö tro la itre drai ka troa xulu, maine itre nekönatre hna troa hnahone hmaca, tro itr’ej’a köletrije la hace hne së hna lapafë.”

Kola amamane hnene la lue hace hna cinyihane ngöne la itusi celë, la ejuine la hace ka eje e kuhu hnine la itre keme me thine qa ngöne la meci ne la itre nekö i angatr. Nyipici la trenge ithahnata ne la ketre droketre, hnei nyidrëti hna cinyihane ka hape: “Nyipi hleuhleu, nge akötre catre koi së la mec, e troa traqa kowe la nekönatre hune la thupëtresij, pine laka ame la nekönatr, ka hnyipi traqa nyëne ngöne la fami, nge tha hne së kö hna mekune ka hape tro nyën’a meci pa. . . . Ame la kola meci hnene la itre nekönatr, ke, ceitune me kola paatre la itre hne së hna mekune thatraqane la itre drai hnapin, memine fe la troa paatre la imelekeune la itre tremesinen [maine nekön, maine tresihmunë, maine neköne haetra pena], nge itre . . . ka tha hane ju kö öhnyi loi ne la mel.” Hna drenge mina fe la hace ka tune la, hnene la itre föe lo kola uthithi la itre upune i angatr.

Hnene la ketre föe ka latresi hna qaja ka hape: “Ame la föeng, ene Rusel, ke, ka ce huliwa nyidrë me itre droketre, ka inyiëëne angatre lo itre atr ka eatre qa hna isi ngöne la götrane Pasifik, lo ijine hnaluene isi ne la fene hnengödrai asë. Tha hnei nyidrëti kö hna meci ngöne la hna isi, matre hnei nyidrëti hna bëeke hmaca a tro Amerika, nge e cili la hnei nyidrëti hna öhne la mele ka tingeting. Nge, hnei nyidrëti e cili fe hna nyihluene la wesiula i Akötresie, ame pe, ngöne la itre macatre 60-65, ke, nyidrëti a nyiqaane meci fë wenethëhmi. Ngo nyidrëti palahi a tupathe troa huliwa catre fë. Ame la ketre drai ne julai, macatre 1988, ke, hna traqa catre koi nyidrë la meci nyidrë, ene pe, tria pi nyidrë. Hace me hleuhleu koi ni la kola traqa la ewekë celë, ketre meci tha iahni. Ame nyidrë koi ni, tha hnenge kö hna mekune hmekuje ka hape föeng, ngo hnenge fe hna xomi nyidrë ceitu memine la sinenge hnenge hna hni catre kow. Hetre 40 lao macatre ne ce mele nyiho, nge eni a öhne enehila la ejolene la troa mele hmekuje pe.”

Itre hnepe hne së la hna atre qa ngöne la itre thauzane lao akötre ka lepe palahi o’drai la itre fami ngöne la fene hnengödrai asë. Tune la hna qejepengöne hnene la itre ka lapa fë hace ka hape, ngöne la kola meci hnene la ketre nekö i epun, maine fö i epun, maine ifënekö i epun, maine keme me thine i epun, maine ketre sine i epuni pena, ke, tro hë epuni a hane öhne la enyipicine la hna cinyihane hnei Paulo, ketre keresiano, kola qaja la meci ka hape: “ithupëjia hnapin.” Ame la hna majemine hne së e kola drenge la mejene hace, ke, hna lapa qaja ka hape “tha nyipici kö la ewekë celë! Thatreine kö ni troa jelenyipicin.” Hanawange fe la itre xaa hna majemine hne së hna troa ce wang.​—1 Korinito 15:25, 26.

Ejehi laka, qëmekene troa ce wange la isa aqane drenge së la hace, ke, loi e troa pane mekune kowe la itre hnyinge ka sisitria celë. Hapeu, hna nyipune hë la mel, la kola meci la atr? Ijiji së kö troa iöhnyi hmaca memine lo itre hne së hna hnim?

Hetre Mejiun

Hna hamëne koi së hnei Paulo, ketre atr cinyihane la Tusi Hmitrötre la mejiune ka troa thepe së hmaca qa ngöne la “ithupëjia hnapin,” ene la mec. Hna cinyihane ka hape: “Meci la ithupëjia hnapin hna troa apaten.” (1 Korinito 15:26) Pine nemene matre xeci e kuhu hni nyidrë la hna ithahnata celë? Qa ngöne la ini hnei nyidrë hna kapa qa thene la atr mele hmaca qa hna mec, ene Iesu Keriso. (Ite Huliwa 9:3-19) Celëhi matre Paulo a cinyihane ka hape: “Ngöne laka traqa ha la meci hnei atr, kete traqa ha la troa mele hmaca qa hna meci hnei ate. Ke meci asë göi Adamu, tune lai troa amelen’asë hmaca göi Keriso.”​—1 Korinito 15:21, 22.

Hace koi Iesu la nyidrëti a wange la ketre sine fö, eahlo a treije latresi, me goeëne la nekö i eahlo trahmanyi a meci hë. Hanawange la hna qejepengöne koi së hnene la Tusi Hmitrötr, kola hape: “Nge nyidëti a eashenyine la qanahage ne la lapa, hana wang, kola xututhe la ate ka mec, neköne ka casi ne la thine i angeic, nge nyidoti la sine fö; nge ce me nyidoti la ka ala nyimu qa ngöne la lapa. Nge öhnyi nyidoti hë hnei Joxu, nyidëti a hnimi nyido, me ulatine koi nyido, ka hape, ‘The teije kö.’ Nge nyidëti a jötëti, me kete la ok, ame hna cileju la angete xututh. Nge nyidëti a ulatin, ka hape, ‘Thupëtesiji fe, ini a qaja koi ’ö, Cilejë.’ Ame hna lapajë lo ka meci me qane troa ewekë. Ame hnei nyidëti hna hamë angeice kowe la thine i angeic. Ame hna qou atraqat angat’asë; ame hnei angate hna atrunyi Akötesie, kola hape, ‘Xulu hë e celë the shë la perofeta atraqat;’ nge, ‘Akötesieti a xöje la nöjei ate i nyidë.’ ” Wange ju la aqane amamane i Iesu la ihnimi nyidrë, ngöne la nyidrëti a amelene hmaca la neköne la sine fö! Celëhi matre, loi e troa lapa mekune kowe la etrune la itre ewekë hnei nyidrë hna troa kuca ngöne la itre drai ka calemi!​—Luka 7:12-16.

Thatreine kö troa thëthëhmine la aqane amelene hmaca Iesu, la ketre ka mec, qëmekene la nöjei angetre anyipicin. Drei la enyipicine la mele hmaca, lo hnei nyidrëti hna perofetaan, laka troa hetre iamele hmaca ngöne la fene hnengödrai memine la “hnengödrai ka hnyipixe.” Ngöne la ijine cili, hnei Iesu hna qaja ka hape: “The sheshëköte kö ene lai, ke calemi hë la ijine tro la nöjei ate ngöne la ite hua a denge la aqane ewekë i angeic, me tropi.”​—Hna Amaman 21:1, 3, 4; Ioane 5:28, 29; 2 Peteru 3:13.

Peteru la ketre, e angetre anyipicine la mele hmaca, ce nyidrë me itre xane qa ngöne lo ala luako, lo itre sine tronge i Iesu. Ngöne la ngöne-gejë ne Galilaia, angatr’a drenge la kola ewekë hnei Iesu a mele hmaca ha. Önine la hna cinyihane ka hape: “Iesu a ulatine koi angat ka hape, ‘Ange trohemi ma xen.’ Nge pëkö kete e angete denge cate hni troa hnyingë nyidëti, ka hape, Dei nyipë? Ke ate hë angate laka celë hi Joxu. Ame hna jötëtipi Iesu, me xome la areto me ite i, me hamë angat. Celë hi hnaakönine hnei Iesu hna amamai nyidëti kö koi angete deng, thupene la hnei nyidëti hna mele hmaca qa hna mec.”​—Ioane 21:12-14.

Celëhi matre, ka xeci hnyawa e kuhu hni Peteru, la kola cinyihane ka hape: “Qaja aloinyi Akötesie me Tetetroti ne la Joxu shë Iesu Keriso, lo ate hnaho shë hmaca pi, thenge la ihnimi atraqate i nyidë, kowe la mejiune ka mel, hnene la mele hmaca jë Iesu Keriso qa hna mec.”​—1 Peteru 1:3.

Celëhi matre, itre milio lao atr ka hetrenyi la mejiune ka tru celë, ene la troa iöhnyi hmaca memine lo itre atr hne së hna hnime e celë fen, ngo tha tune hmaca kö la aqane mele enehila. Nemene la pengöne la mele cili? Hetre itre xaa mekune qa hnine la Tusi Hmitrötre ka amamane la mejiune kowe lo itre sine së ka paatre hë. Troa qejepengöne ngöne la pune la boroshüre celë, hnine lo hnahage hna nyitaane ka hape “Ketre Mejiune Ka Catre Kowe La Itre Ka Mec.”

Ngo pane wange jë pe së, la itre mekune ka troa mama ngöne la ijine kola paatre qa the së la atr hne së hna hnim, hanawange la itre mekune cili: Ka loi kö la troa latresi pin? Nemene la aqane tro ni a mele memine la haceng? Nemene la aqane tro la itre xan’a hamë ixatua? Nemene la ixatua tro ni a hamëne kowe la itre ka lapa fë hace? Hune la nöjei ewekë asë, nemene la mejiune hna qaja hnene la Tusi Hmitrötre kowe la itre ka mec? Ijije kö tro ni a iöhnyi hmaca memine la itre hnenge hna hnim? Nge eka?

Itre Hnyinge Nyine Troa Mekun

Nemene la thina ka ijije kowe la atr ngöne la kola meci la ketre atr hnei angeice hna hnim?

Nemene la hnei Iesu hna kuca kowe la sine föe ne Naina?

Nemene la hnei Iesu hna thinge hnaeane thatraqane la mec?

Pine nemene laka xeci hë e kuhu hni Peteru me Paulo, la mele hmaca?

Nemene lo itre mekune ka ijije troa sa?

[Hna cinyhan ne la götran 4]

‘Hetre hace hne huni hna troa qaja koi nyipë. Ke hetre loto ka eatr, nge . . . ame nekö i nyipë . . . ame nekö i nyipë, ke, meci fe hë angeic.’