Mekene 16
Nemene La Aqane Tro Së a Easenyi Akötresie
1. Nemene la itre ewekë hna öhne ka ceitu ngöne la itre hmi?
HNA sesëkötre hnene la ketre atr ka ihamë ngöne la nöje e Asia, la angeice a lö hnine la ketre uma hmitrötre i itre budis, me öhne la itre aqane hmi ngöne la nöje cili. Ngacama thaa itre iatr kö ka amamai Maria maine Keriso, ngo nyimutre pi hë la itre aqane hmi i angatre ka ihmeku memine la aqane hmi koi Akötresie, hnene la itre atrene la nöje hnei epuni hna mele ngön. Hanawange la ketre ceitun, hnei angeice fe hna öhne la itre sapole me itre misel. Hnei itre xane fe hna öhne la itre ceitune celë, ngöne la itre nöje i angatr. Ngöne la götrane kohmiju maine götrane kohmijë ne la fen, ke, ceitune hi la itre aqane thele hnene la itre ka hmi troa easenyi Akötresie, ketre tune fe la itre hna sa atr nyine troa hmi kow.
2. Nemene la aqane qeje pengöne la thith, nge pine nemene matre kola thithi la itre atr?
2 Alanyimu la itre atr ka thele troa easenyi Akötresie, jëne la thith. Hna qejepengöne la thithi hnene la ketre itusi kola hape, “ketre aqane troa ithahnata hnene la atr, memine la Akötresie ka hmitrötr, maine pena memine la itre xaa haze, me itre atrene la nöje thaa hna öhne kö hnei atr, maine itre musi ka hetre menen, ngo thaa qathei atr pe.” (The New Encyclopædia Britannica) Alanyimu la itre atr ka easenyi Akötresie jëne la thith, me mekune hmekuje hi la itre manathithi hnei angatre hna troa kapa. Hanawange la ketre ceitun; hna hnyinge kowe la ketre Temoë i Iehova hnene la ketre trahmanyi ka hape: “Maine tro nyipëti a thithi thatraqai ni, ke, hapeu tro ha paatre la itre jole ka eje hnine la faming, maine ngöne la hna huliwang, maine ngöne pena la itre sine kucakuca ne la ngönetreing?” Hna mekune tune lai hnene la trahmany, ngo alanyimu la itre ka thithi nge ka öhne laka, thaa paatre kö la itre jole hnei angatre hna cile kow. Haawe, ma tro së a isa hnyinge ka hape, ‘Nemene la eloine la troa easenyi Akötresie?’
PINE NEMENE MATRE TROA EASENYI AKÖTRESIE
3. Drei la hne së hna troa thithi kow, nge pine nemen?
3 Nyipi ewekë troa wangatrune la thith, ngo thaa jëne tro kö a thele ewekë. Ame la sipu kepine la kola easenyi Akötresie, ke, kolo matre troa iloi hne së me Nyidrë. Celë hi matre, loi e tro së a thithi koi Iehova hmekuj. Hna qaja hnei Davita atre cinyihane la itre salamo ka hape: “Easenyi Iehova koi angat’asë angete hë nyidrë.” (Salamo 145:18) Iehova a hë së troa iloi me Nyidrë ngöne la tingeting. (Isaia 1:18) Ame la angetre kapa la ihë celë, ke, angatre a caasi memine la atre cinyihane la itre salamo, öni nyidrë ka hape: “Ngo ame ni, loi koi ni troa easenyi Akötresie.” Pine nemen? Pine laka, ame la itre atr ka easenyi Akötresie, tro angatre a kapa la nyipi manathith, nge tingetinge la mekune i angatr.—Salamo 73:28.
4, 5. (a) Pine nemene matre nyipi ewekë troa thithi koi Akötresie? (b) Nemene aqane imelekeu hne së hna troa eköthe me Akötresie jëne la thith?
4 Pine nemene kö la troa sipo ixatua thei Akötresie jëne la thith, nge ‘atrengëne hi nyidrë la ewekë hne së hna ajan, nge thaa ase petrekö së sipo nyidrë’? (Mataio 6:8, NW; Salamo 139:4) Jëne la thith, easë a amamane laka, easë a lapaune koi Akötresie me atrehmekunyi Nyidrë pine la “nöjei ahnahna ka loi asë, memine la itre hna hamëne ka loi asë.” (Iakobo 1:17; Heberu 11:6) Iehova a ajane me madrine la itre thithi së. (Ite Edomë 15:8) Atraqatre la madrine i Nyidrë ngöne la Nyidrëti a drenge la aqane amamane së la metrötre së, memine la aqane atrunyi Nyidrë hne së, tune la keme a madrine kowe la kuku hnene la aqane qaja me amamane nyëne la ole i nyën. (Salamo 119:108) Troa keukawa me itrotrohni la keme memine la nekön, e loi la aqane imelekeu i nyidro. Ame la nekönatre hna hnim, ke, angeice a ajane troa ithahnata kowe la keme i angeic. Ketre tune fe la aqane imelekeu së memine la Akötresi së. Eje hi laka, maine hne së hna kapa madrine hnyawa la hne së hna inine göi Iehova memine lo ihnimi Nyidrëti koi së, ke, ketre tro fe hë së a hetrenyi la aja ka tru troa hane amamane koi Nyidrë jëne la thith.—1 Ioane 4:16-18.
5 Ngöne la easë a thili kowe la Akötresie ka draië catr jëne la thith, ke, nyipi ewekë tro së a metrötr, ngo thaa tro pe a hnengazone menune pala ha me thele la itre hna ewekë hne së hna troa qaja. (Heberu 4:16) Pëkö ka thungijë së troa ithahnata me Iehova. Nge drei la ahnahna ka tru, ene laka, ijije tro së a ‘nenge la itre hni së’ xajawai Akötresie jëne la thith! (Salamo 62:8) Troa keukawa la aqane imelekeu së me Iehova, e hne së hna wangatrunyi Nyidrë, celë hi manathithi hna melëne lai hnei Aberahama, matre ati ëje i nyidrëti jë ka hape enehmu i Akötresie. (Iakobo 2:23) Ngo eje hi laka, ngöne la easë a thithi kowe la Joxu Akötresi ne hnengödrai memine la fene asë, ke, nyipi ewekë tro së a melëne la itre hnei Nyidrëti hna amekötine koi së, matre atreine tro së a easenyi Nyidrë.
ITRE EWEKË NYINE TROA KUCA MATRE ATREINE TROA EASENYI AKÖTRESIE
6, 7. Ngacama thaa Akötresieti kö a ajane tro së a hamë mani matre tro Nyidrëti a drei së, nemene la hnei Nyidrëti hna ajane tro së a qaja koi Nyidrë ngöne la easë a thith?
6 Hapeu, nyipici kö laka troa ithahnata koi Akötresie e hetre mani? Alanyimu la itre atr ka nyithupene la itre keme ne hmi, troa thithi thatraqai angatr. Ame itre xan, angatre a mekune ka hape troa kapa la itre thith i angatre thenge la etrune la itre ahnahna hnei angatre hna hamën. Ngo eje hi laka, thaa hane fe kö la Wesiula i Akötresie upi së troa hamë mani, e easë a ajane troa easenyi Iehova jëne la thith. Thaa hna nyithupene kö la itre ewekë ne la ua hnei Akötresieti hna hnëkëne thatraqai së, ketre tune mina fe thaa hna nyithupene kö hnei mani la itre manathithi hne së hna kapa, qa ngöne laka lolo la aqane imelekeu së me Nyidrë jëne la thith.—Isaia55:1, 2.
7 Haawe, nemene la nyine tro së a kuca? Nyipi ewekë troa hni ka loi. (2 Aqane lapa ite Joxu 6:29, 30; Ite Edomë 15:11) Nyipi ewekë tro së a lapaune koi Akötresie, nge loi e troa eje e kuhu itre hni së laka, Nyidrëti la “atre shamatine la thith” nge Nyidrëti la “ate nyi june koi angate thele catë Nyidrë.” (Salamo 65:2; Heberu 11:6) Nyipi ewekë tro së a hetrenyi la hni ka ipië. (2 Ite Joxu 22:19; Salamo 51:17) Ngöne la ketre ceitune hna hamëne hnei Iesu, ke, hnei nyidrë hna amamane laka, meköti kö la telona hnene laka, hnei angeice hna easenyi Akötresie cememine la hni ka ipië, hune la faresaio ngöne laka ka pi mama. (Luka 18:10-14) Ame ngöne la easë a troa easenyi Akötresie, ke, loi e tro pala hi së a mekune laka, “methi Iehova la angete hni tru asë.”—Ite Edomë 16:5.
8. Maine easë a ajane tro Akötresie a kapa la itre thithi së, ke, nemene la nyine tro së a pane apuiloine the së?
8 Maine easë a ajane tro Akötresieti a sa la itre thithi së, ke, nyipi ewekë tro së a apuiloinyi së, ene la troa nue trije la itre aqane ujë së ka ngazo. Ame ngöne la kola xatuane la itre xane hnei Iakobo troa easenyi Akötresie, ke, hnei nyidrë hna hane qaja fe ka hape: “Köla ime pi nyipunie itre ka ngazo; nge apui loine pi la itre hni nyipunie itre luelue hni.” (Iakobo 4:8) Ijije fe tro la itre atr ka kuca la ngazo a hane iloi me Iehova, e hnei angatre hna pane ietra me tro trije la itre aqane mele i angatre ka ngazo hnapan. (Ite Edomë 28:13) Thaa tro jë kö a drei së hnei Iehova, e hne së hna huliwa hnihni Nyidrë, ngöne laka, thaa hne së kö hna apui loinyi së ngöne la ua. Tusi Hmitrötre a qaja ka hape: “Ke eje hune la itre ka meköti la lue xajawa i joxu, nge ame la lue hnashama i nyidrë, te, kola shamatine la ite thithi angatr; ngo eje hune la angete kuca la ngazo la xajawai joxu”.—1 Peteru 3:12.
9. Tro sa jëne drei e easë a ajane troa ithahnata me Akötresie, nge pine nemen?
9 Tusi Hmitrötre fe a qaja ka hape: “Ke pëkö ate ka meköti e celë fen, ate kuca la loi nge pë fe kö ngazo.” (Ate Cainöj 7:20) Qa ngöne lai, ma drei la tro epuni a isa thele ka hape: ‘Tuneka la aqane tro ni a easenyi Akötresie?’ Tusi Hmitrötre a sa ka hape: “Nge maine kuca la ngazo hnei kete ate, hetenyi hë la ate xëwe fë koi Tretretro, ene Iesu Keriso ka meköt.” (1 Ioane 2:1) Eje hi laka itre ka ngazo së, ngo atreine tro së a easenyi Akötresie me nyipici koi Nyidrë jëne Iesu Keriso, ene lo ka meci matre thupene mele së. (Mataio 20:28) Thatreine kö tro së a easenyi Iehova Akötresie, e thaa hna jëne Iesu kö. (Ioane 14:6) Ketre, thaa tro kö së a mekune ka hape, kola troa sengetrije asë la itre ngazo së jëne la thupene mele hna hujëne hnei Iesu, nge easë pala hi a kuca catrëne la ngazo. (Heberu 10:26) Ngo maine hne së hna catre kuca la hne së hna atreine troa thipetrije la ngazo, ngo traqa hmaca pi hi la ketre ijine easë a tria, ijije tro së a ietra koi Akötresie me sipo Nyidrë troa senge trije la itre ngazo së. Maine tro së a easenyi Nyidrë ngöne la hni ka ipië, ke, tro hë Nyidrëti a drei së.—Luka 11:4.
ITRE IJINE KA IJIJE TROA ITHAHNATA ME AKÖTRESIE
10. Nemene la aqane tro së nyitipu Iesu ngöne la easë a troa thith, nge nemene la itre ijine ka ijije koi së, maine easë a ajane troa lapa caasi matre troa thithi koi Nyidrë?
10 Hnei Iesu pala hi hna wangatrune la aqane imelekeu i nyidrë me Iehova. Celë hi matre, hnei nyidrëti hna hnëkëne pala hi la itre ijin, matre ijije tro caasi hi Nyidreti a ithahnata me Akötresie jëne la thith. (Mareko 1:35; Luka 22:40-46) Loi e tro fe së a hane xötrethenge la tulu i Iesu me thithi pala hi koi Nyidrë. (Roma 12:12) Qa ngöne lai, nyipi ewekë troa nyiqaane la drai hnene la thith, nge qëmekene troa meköl, tro së a olene la hnei Nyidrëti hna xatua së. Ketre, ngöne la drai ka pexej, thele jë troa easenyi Akötresie “ngöne la nöjei ijin.” (Efeso 6:18) Atreine tro fe së a thithi thaupe e kuhu itre hni së, ngöne laka atre hi së ka hape ijije tro Iehova a drei së. Kola acatrene la aqane mele së koi Iehova hnene laka, easë hmekuje hi me Nyidrë, nge maine hne së hna thithi koi Nyidrë ngöne la nöjei drai, ke, tro hë së a easenyi catre pala hi koi Nyidrë.
11. (a) Pine nemene matre loi e troa ce thithi cememine la fami? (b) Kola hapeu la epuni a qaja ka hape “Amen” ngöne la pune la thith?
11 Iehova fe a hane drenge la kola thithi fë la ka alanyim. (1 Ite Joxu 8:22-53) Ijije fe tro së a easenyi Akötresie hnine la fami, tro la hene la lapa a thithi sai angatr. Celë hi ka troa acatrene la aqane imelekeu ne la itre atrene la fami, ketre, troa mama kowe la itre thöthi laka hetre Iehova pine laka, angatre a drenge la itre keme me thine i angatre a thithi koi Akötresie ngöne la hni ka ipië. Nemene la nyine troa kuca maine ketre atr a thithi fë la itre atrene la ekalesia, ngöne la ketre ijine icasikeu ne la itre Temoë i Iehova? Maine easë a hane sine la icasikeu, ke, loi e tro së a drenge hnyawa, matre ngöne la kola nyipune la thith, ijije tro së a hane qaja hnene la hni ka pexeje ka hape, “Amen,” kola hape lai, “Loi e troa ej.”—1 Korinito 14:16.
ITRE THITHI HNEI IEHOVA HNA DRENG
12. (a) Hnauëne laka thaa sa kö Akötresieti la itre xaa thith? (b) Pine nemene matre thaa tro hmekuje kö së a mekune la itre hne së hna ajane ngöne la easë a thith?
12 Kola mekune hnene la itre xane me thele ka hape, ngacama angatre hi a thithi jëne Iesu, ngo thaa hna sa kö me kapa hnei Akötresie la itre sipo i angatr. Ngo hnei Ioane aposetolo hna qaja ka hape: “E tro sha sipone kete ewekë thenge la aja i nyidrë, nyidrëti a drei shë.” (1 Ioane 5:14) Haawe, nyipi ewekë tro së a sipo thenge la aja i Akötresie. Pine laka Nyidrëti a ajane tro së a egöcatre ngöne la ua, loi e tro së a hane qaja hnine la thithi së, la itre ewekë ka angazone la mele së ngöne la ua. Nyipi ewekë tro së a hmaca, qa ngöne la ajane troa thele la itre ewekë ne ngönetrei. Hanawange la ketre ceitun, maine nyipici laka, easë a sipone jëne la thithi matre tro së a hetrenyi la wangatrehmekune ka jui, maine trenge catre ka aijijë së troa cile kowe la itre mec memine la itre hnepe kucakuca, thaa tro kö la itre ewekë celë a hetrëne la itre aja së ngöne la ua. (Salamo 41:1-3) Pine laka, tru pala ha la hnei eahlo hna wangatrune la meci ka eje thei eahlo, hnene la ketre keresiano föe hna sipo Iehova troa xatua eahlo troa atreine waipengöne la meci eahlo. Qa ngöne lai, hmaca ju hi eahlo, hna hnehengazone menune pala ha la itre meci ka traqa koi eahlo, nge trotrohnine ju hi eahlo ka hape, ijije tro eahlo a hetrenyi la “men, ngo tha qa the huni kö.” (2 Korinito 4:7) Qaane ju hi lai, kola kökötre la aja i eahlo troa xatuane la itre xan, ene pe hnei eahlo hna xome ju fe la huliwa ne pionie lapa.
13. Tune la hna amamane ngöne Mataio 6:9-13, nemene la itre ewekë nyine troa qaja hnine la itre thithi së?
13 Nemene la nyine tro së a qaja ngöne la itre thithi së, matre tro Iehova a kapa madrine itre ej? Hnei Iesu hna amamane kowe la itretre drei i nyidrë la aqane troa thith. Ngöne la tulu ne thithi hnei nyidrë hna qaja ngöne Mataio 6:9-13, nyidrë a amamane la itre ewekë nyine troa thithi thatraqan. Nemene itre ewekë ka sisitria, nyine tro së a thithi thatraqan? Nyipi ewekë troa qaja panëne la ëje i Akötresie memine la Baselaia i Nyidrë. Loi e tro fe a thithi thatraqane la itre xaa ewekë ka nyipi ewekë kowe la ngönetrei. Ketre, loi e tro fe së a sipo Nyidrë troa senge la itre ngazo së, me thepe së qa ngöne la itre itupathi ne la atre ka ngazo, ene Satana Diabolo. Tha hnei Iesu kö hna ajane tro së a nyimane la thithi celë, maine e gufane hmaca la thith i nyidrë, ngo loi e troa trotrohnine hnyawa pe la itre aliene ej. (Mataio 6:7) Troa ce mele hnyawa tune ka hnene la keme memine la nekön, e caasi pala hi la itre hna ewekë hna qaja hnene la nekönatr, ngöne la angeice a ithahnata kowe la keme i angeic?
14. E tröne la itre sipo, nemene la itre xaa nyine tro së a thithi kow?
14 Eje hi laka, thaa tro hmekuje kö a sipo me xëwe ngöne la easë a thith, loi e tro fe së a atrunyi Akötresie me ole koi Nyidrë. (Salamo 34:1; 92:1; 1 Thesalonika 5:18) Ijije tro fe së a hane thithi thatraqane la itre xan. Madrine catre Iehova ngöne la Nyidrëti a drenge la easë a amamane la ihnimi së, me thithi sane la itre trejine me easë ngöne la ua, trahmanyi me föe ka kucakuca me hna akötrën. (Luka 22:32; Ioane 17:20; 1 Thesalonika 5:25) Eje hi laka, hna cinyihane hnei Paulo aposetolo ka hape: “The kuke hnine kö la kete ewekë; ngo loi e cengöne amamane koi Akötresie la ite aja i nyipunie hnene la thith, me sipo, me ole. Nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitria qa thei Akötesie hune la nöje i mekun’asë.”—Filipo 4:6, 7.
CATRE JË TROA THITH
15. Nemene la nyine tro së a mekune hnyawa, maine kola mama koi së laka thaa hna sa kö la itre sipo së?
15 Ngacama kola kökötre trootro la atrehmekune i Akötresie thei epun, ma ame pe hna traqa la itre xaa ijine epuni a mekune laka, thaa hna sa kö la itre sipo i nyipunie. Troa eje lai, pine laka ma thaa celë pala kö la ijine ka ijij, hna mekune hnei Akötresie troa sa me kapa la aja i epun. (Ate Cainöj 3:1-9) Ketre, ma tro sa mekune ka hape thaa nyipi ewekëne kö Iehova la hace ka eje the së, ngöne laka thaa canga sa kö Nyidrëti la hnyinge së; ngo tro kö Nyidrëti lai a sa la itre thithi së, ke, atre kö Nyidrëti la ijine troa aeatrëne lai.—2 Korinito 12:7-9.
16. Pine nemene matre nyipi ewekë troa catre thith, nge nemene la thangane lai kowe la aqane imelekeu së me Akötresie?
16 Tro la aqane catre thithi së a amamane laka, qa kuhu hni së la itre ewekë ka tru hne së hna qaja koi Akötresie. (Luka 18:1-8) Maine ngöne la kucakuca ka eje ngöne la ketre götrane la mele së, atreine tro së a sipo Iehova troa xatua së, matre tro së a hune ngöne la hace cili. Ketre, maine tro pena a catre thithi me huliwa thenge la itre hne së hna sipon, easë hi lai a amamane laka, qa kuhu hni së la itre hne së hna qaja. Loi e tro së a nyipici, me qaja mekötine la itre hne së hna sipon. Nyipi ewekë fe tro së a catre thith, ngöne la kola traqa koi së la itupath. (Mataio 6:13) Maine hne së pala hi hna thithi nge hne së fe hna catre xomihnine la itre aja së ka ngazo, eje hi laka tro kö së a öhne la aqane tro Iehova a xatua së. Ketre, kola acatrene catrëne la lapaune së, memine la aqane imelekeu së me Nyidrë.—1 Korinito 10:13; Filipi 4:13.
17. Nemene la manathithi hne së hna troa kapa e hne së pala hi hna thith, nge thaa mano kö së troa nyi hlue i Akötresie?
17 Maine hne së pala hi hna thithi ngöne la easë a huliwa i Iehova Akötresie, ke, tro hë së a öhne laka, thaa qa ngöne kö la sipu trengecatre së la easë a atreine nyihlue i Nyidrë. Qa thei Iehova la trenge catre ka aijijë së troa huliwa i Nyidrë. (1 Korinito 4:7) E tro së a wangatrune la mekune celë, haawe, tro ha xatua së troa hetre ipië nge lolo la aqane imelekeu së me Nyidrë. (1 Peteru 5:5, 6) Nyipici laka, nyimu kepine ka tru matre easë a catre thith. Tro la itre thithi hne së hna qaja qa kuhu hni së, memine la atrehmekune ka sisitria hne së hna kapa ngöne la aqane troa easenyine la Tretretro së e hnengödrai, a hamëne la nyipi manathithi ngöne la mele së.
LOI E TROA ITHAHNATA KOI IEHOVA NGO TRO FE A DREI NYIDRË
18. Nemene la aqane tro së a drei Akötresie?
18 Maine easë a ajane tro Akötresieti a kapa la itre thithi së, ke, loi e tro së a drenge la hnei Nyidrëti hna amekötine koi së. (Zakaria 7:13) Thaa hnei Nyidrëti hmaca kö hna ithuemacanyi jëne la itre perofeta, nge ketre thaa jëne pena kö la ketre aqane kuci haze. (Deuteronomi 18:10-12) Ngo ijije tro së a drei Akötresie ngöne la easë a inine la Wesiula i Nyidrë, ene la Tusi Hmitrötr. (Roma 15:4; 2 Timoteo 3:16, 17) Tune la easë a thele troa majemine xeni la ketre xeni ka loi thatraqane la ngönetrei së, nyipi ewekë fe tro së a “ajane la zane thi ka xenyë ene la wesi ula.” Inine jë troa majemine xome la xeni ne ua, ene la troa e ngöne la nöjei drai la Wesiula i Akötresie.—1 Peteru 2:2, 3; Ite Huliwa 17:11.
19. Nemene la thangane ka loi hna troa kapa, e hne së hna thele mekune ngöne la hne së hna e hnine la Tusi Hmitrötr?
19 Mekune hnyawa ju la aliene la itre hna cinyihane hnei epuni hna e hnine la Tusi Hmitrötr. (Salamo 1:1-3; 77:11, 12) Kola hape troa atreine wai mekune me thele troa trotrohnine la hnei epuni hna e. Hna aceitunëne lai, memine la kola mano thupene la hna xen. Atreine tro epuni a lapa fë la xeni ne ua hnei epuni hna xome hë, me nyi xane hmaca hnene la itre hnei epuni hna e, matre isilekeune memine la itre hnei epuni hna atre hë. Wange ju la thangane la ithuemacanyi kowe la mele i epun, memine la aqane amamane eje la thiina i Akötresie cememine la itre aqane ujë i Nyidrë. Jëne la hna isa inine la Tusi Hmitrötr, atreine troa kapa la xeni ne ua hna hamëne hnei Akötresie. Qa ngöne lai, tro hë epuni a easenyi catre koi Akötresie, nge tro fe ha xatua epuni troa cile kowe la itre jole ka xulu koi epuni ngöne la nöjei drai.
20. Maine hne së hna sine la itre icasikeu i keresiano, nemene la aqane tro itre eje a xatua së troa easenyi Akötresie?
20 Tune lo angetre Isaraela ngöne la angatre a drenge hnyawa la kola e qëmekene la icasikeu la Trenge Wathebo i Akötresie, loi e tro fe epuni a hane hnangenyë ka loi ngöne la kola ithahnatane la Wesiula i Nyidrë, ngöne la itre hna icasikeu ne la keresiano; celë hi ketre aqane tro epuni a easenyi koi Akötresie. Ngöne la ijine i angetre Isaraela, hnene la itre ka inine la wathebo hna qeje pengöne la aliene la hnei angatre hna e hnine la Trenge Wathebo, matre xatuane ju la itre atr ka drei angatre troa trotrohnine me trongëne la ini hna hamën. Drei la qaane la madrine atraqatre ka eje thei angatr. (Nehemia 8:8, 12) Drei la kepine matre, loi e tro fe epuni a hane sine la itre icasikeu ne la itre Temoë i Iehova. (Heberu 10:24, 25) Celë hi ka troa xatua epuni lai, troa trotrohnine la atrehmekune qa thei Akötresie me trongëne eje ngöne la mele i epun, nge jëne tro epuni lai a hane kapa la manathith. Maine tro epuni a hane nyi atrene la fami ka iacasinekeune la itre trejine ngöne la fene hnengödrai asë, ke, tro lai a thuejë i epuni troa hane lapa easenyi Iehova. Nge tune la hne së hna troa wang, atreine hi tro epuni a öhne la nyipi hunapo ka caas, ene la nöje i Akötresie.
HAPEUE LA HNEI EPUNI HNA ININ
Pine nemene matre loi e tro epuni a easenyi koi Iehova?
Nemene la nyine tro epuni a kuca matre ijiji epuni fe troa easenyi koi Akötresie?
Nemene la itre mekune nyine qaja ngöne la epuni a thith?
Pine nemene matre loi e tro epuni a catre thith?
Tro epuni a drei Iehova tune ka enehila?