Ita Ne Thup Koi 28 Diseba Me Wiike Cili
Nemene La Hna Qajaqaja Göi Nyipunie Hnene La Itre Thithi Nyipunie?
“Ate shamatine la thithi fe, tro nöjei ate asëjëihë a traqa koi cilie.”—SAL. 65:2.
1, 2. Pine nemen matre itre hlue i Iehova a mejiune koi Nyidrë ngöne la angatr a thith?
IEHOVA pala hi a drenge la itre thithi ne la itre hlue i Nyidrë ka nyipici. Loi e tro sa mejiun, laka, Nyidrëti a drei së. Ngacama itre milio la Itretre Anyipicine i Iehova ka thithi koi Akötresie ngöne la ijine ka caas, ngo pëkö caa thithi hna thaa drenge hnei Nyidrë.
2 Hnene laka mejiune hi Davita laka, Akötresieti a shamatine la itre thithi angeic, ene pe öni angeic e nyima, ka hape: “Ate shamatine la thithi fe, tro nöjei ate asëjëihë a traqa koi cilie.” (Sal. 65:2) Hna sa pala hi la itre thithi Davita, ke, ketre hlue i Iehova angeic ka mele nyipici. Haawe, loi e tro sa isa hnying, ka hape: ‘Hapeu, kolo kö a mama ngöne la itre thithing, laka, eni a mejiune koi Iehova, nge ewekë ka sisitria catre koi ni la hmi ka wië? Nemene la hna qajaqaja thei eni hnene la itre thithing?’
Loi e Tro Sa Thithi Koi Iehova Cememine La Hni Ka Ipië
3, 4. (a) Nemene la aqane tro sa ujë ngöne la easa thithi koi Akötresie? (b) Nemene la nyine tro sa kuca, e kola gomegome la “mekune” së hnene la ketre ewekë ka ngazo hne së hna kuca?
3 Maine easa ajane troa kapa hnei Akötresieti la itre thithi së, haawe, nyipi ewekë tro sa thithi koi Nyidrë cememine la hni ka ipië. (Sal. 138:6) Loi e tro sa sipo Iehova troa waipengö së, tune la hna qaja hnei Davita, ka hape: “Akötesieti fe, thelethele ni jë, me atejë la ite mekuneng, nge xajawatineju, maine ej’ e kuhu hning la jëne aköt, nge e ni jë ngöne la gojenyi ka epine palua.” (Sal. 139:23, 24) Nyipici laka, nyipi ewekë tro sa thith, ngo loi e tro mina fe sa kapa la kola waipengö së hnei Akötresie, me drengethenge la itre eamo ka eje e hnine la Wesi Ula i Nyidrë. Iehova a eatrongë së ngöne la “gojenyi ka epine palua,” hnene la hna xatua së troa xome la ketre aqane mele ka troa ee së kowe la mele ka thaa ase palua kö.
4 Tune kaa la aqane tro sa ujë, e kola gomegome la itre “mekune” së hnene la ketre ewekë ka ngazo hne së hna kuca? (E jë la Salamo 32:1-5.) Maine easa thele troa thahe la mekuthethewe së ka ngazo, tro lai a ananazijëne la trenge catre së, tune la ketre sinöe a thaa sia ha ej hnene la ecatrehnine la itre drai hedredrei. Hnene laka hnei Davita hna kuca la ngazo, ene pe paatre hë la madrin thei angeic, nge kucakuca ha angeic. Ngo drei la kola ahmalohmaloeëne la hni angeic hnene la hnei angeic hna fe amamane la itre ewekë cili koi Akötresie! Mekune jë së la madrin ka eje thei Davita, ngöne la angeic a dreng, ka hape, ‘hna apaatrene la hna sasaith,’ nge Iehova a nue la ngazo i angeic. Maine tro së fe a amamane koi Akötresie la ngazo hne së hna kuca, tro hë lai a ahmalohmaloeëne la hni së, nge tro mina fe la itre qatre thup a xatuane la atre kucakuca ngöne la götrane la ua.—Ite edomë 28:13; Iako. 5:13-16.
Loi e Tro Sa Sipo Iele Akötresie me Ole Koi Nyidrë
5. Nemene la qaane la hnëewekë “sipo” ngöne la qene Heleni?
5 Maine easa hnehengazone la ketre ewekë, loi e tro sa trongëne la eamo hna hamëne hnei Paulo, kola hape: “The kuke hnine kö la kete ewekë; ngo loi e cengöne amamane koi Akötesie la ite aja i nyipunie hnene la thith, me sipo, me ole.” (Fil. 4:6) Ame la qaane la hnëewekë qene Heleni, hna hape, “sipo,” tre, kola qaja la troa catre sipo iele Iehova. Eje hi laka, easa sipo iele Iehova la ixatua qaathei Nyidrë, ngöne la easa cile kowe la ketre jol maine iaxösisi pena.
6, 7. Pine nemen matre loi e tro sa ole ngöne la itre thithi së?
6 Maine tro hi sa thithi ngöne la itre ijine easa aja ixatua, nemene la hna amamane hnene lai göne la itre aqane imelekeu së me Iehova? Hnei Paulo hna qaja, ka hape, loi e tro sa qaja amamane la itre aja së koi Akötresie “me ole” së. Nyipici, nyimutre la itre kepin ka uku së troa amamane la hni ne ole së, tune la aqane ujë i Davita ngöne la angeic a qaja, ka hape: “Iehova fe, enëtilai la ka sisitia, me ka men, me ka lolo, me cat, me nyine atrun; ke nöjei ewekë i cilieti la nöjei ewekë asë e koho hnengödrai, me e celë fen. Iehova fe, enëtilai la baselaia, nge ase hë atrunyi enëtilai ka hune la nöjei ewekë asëjëihë. . . . Akököje i anganyihunie, nyihunieti a oleti koi enëtilai, me ahmapanëti la atesiwa i enëtilai ka lolo.”—1 A. l. ite jo. 29:11-13.
7 Hnei Iesu pala hi hna olene koi Akötresie la göxen, memine la areto me waina hna xome ngöne lo ijine kola atrune la Jidri Ne Pui Ne Xeni Ne La Joxu. (Mat. 15:36; Luka 22:18, 19) Nyipici laka, easë mina fe a olene la itre ewekë cili, ngo loi e tro fe sa “ole koi Iehova” pine la ‘itre huliwa i Nyidrë kowe la itre neköi atr’, me pine la “ite hna hnyingëne amekötin” qaathei Nyidrë me pine la Wesi Ula i Nyidrë, maine pena lo maca ka eje enehila hnine la Tusi Hmitrötr.—Sal. 107:15; 119:62, 105.
Loi e Tro Sa Thithi Thatraqane La Itre Xan
8, 9. Pine nemen matre easa thithi thatraqane la itre Keresiano?
8 Eje hi laka, easë pala hi a thithi thatraqai së kö, ngo nyipi ewekë mina fe tro sa thithi thatraqane la itre xan, ene mina fe la itre Keresiano hne së hna thatre. Ngacama thatre asë kö Paulo aposetolo la itre trejine ne Kolose, ngo hnei nyidrëti hna cinyihan, ka hape: “Ini a olene koi Akötesingö ngöne la nöjei meku nyipunieti ni asë, kolo pala hi a sipo memine la madine ngöne la ite thithinge asë thatraqai nyipunie asë.” (Kol. 1:3, 4) Ketre, hnei Paulo fe hna thithi thatraqane la itre Keresiano ne Thesalonika. (2 Thes. 1:11, 12) Kola mama la pengö së memine la aqane goeëne së la itre trejine me easë ngöne la lapaun, jëne la itre thithi celë.
9 Maine tro pala hi sa thithi thatraqane la itre Keresiano hna iëne me thatraqane la “ite xa mamoe,” tre, easë hi lai a amamane hnyawa laka, easa wanga atrune la organizasio i Akötresie. (Ioane 10:16) Hnei Paulo hna sipone kowe la itre trejine me nyidrë troa thithi sai nyidrë matre ‘aijijë nyidrë troa ewekë me catre amamane la ewekë ka sihngödri ne la maca ka loi.’ (Efe. 6:17-20) Hapeu, easë kö a thithi tune lai thatraqane la itre xaa Keresiano?
10. Nemene la thangane the së, e tro pala hi sa thithi thatraqane la itre xan?
10 Maine tro sa thithi thatraqane la itre xan, tro ha saze la aqane ujë së koi angatr. Ketre, maine tro sa thithi thatraqane la ketre atr hne së hna methinën, tro hë lai a saze la aqane goeëne së la atr cili. (1 Ioane 4:20, 21) Ame la itre thithi celë, tre, itre ej a hamë ithuecatr, me sajuëne la caasi ka eje thene la itre trejine me easë. Ketre, kola mama jëne la itre thithi cili laka, eje the së la ihnimi Keriso. (Ioane 13:34, 35) Nge celë hi ketre götranene la wene ne la ua i Akötresie. Hapeu, easë kö a sipone la uati hmitrötr, me sipo Iehova troa xatua së troa eëne la wene ne ej, ene la ihnim me madrin, me tingeting me xomihni ahoeany, me metrötr me thiina ka loi, me nyipici, me thiina ka menyik me xomehnöth? (Luka 11:13; Gal. 5:22, 23) Maine easa ujë tune lai, tro ha mama ngöne la itre trenge ewekë së me itre huliwa së, laka, easa tro me mele ngöne la ua.—E jë la Galatia 5:16, 25.
11. Pine nemen matre ijije tro sa sipone kowe la itre xan troa thithi thatraqai së?
11 Maine easa atre, ka hape, hna thele troa thoi hnene la itre nekö së ngöne la itre itupathi angatr ngöne la hna ini, loi e tro sa thithi sai angatr me hamë angatr la ixatua qa hnine la itre Hna Cinyihan matre tro pala hi angatr a huliwa nyipici, nge troa sewe angatre troa kuca la ngazo. Hnei Paulo hna qaja kowe la itre Keresiano ne Korinito, ka hape: “Eëhuni a thithi koi Akötesie mate tha tro kö nyipunie a kuca la ngazo.” (2 Kor. 13:7) Kola amadrinë Iehova hnene la itre thithi cili hna qaja cememine la hni ka ipië, nge itre eje mina fe a qaja aloinyi së. (E jë la Ite Edomë 15:8.) Tui Paulo, loi e tro fe sa sipone kowe la itre xan troa thithi thatraqai së. Hnei nyidrëti hna cinyihan, ka hape: “Thithijë nyipunie thatraqai hun; ke eëhuni a mekune laka hetenyi hë huni la mekuthethewe ka loi, eëhuni a ajane troa loi thina ngöne la nöjei ewekë asëjëihë.”—Heb. 13:18.
Kola Mama La Pengö Së Ngöne Mina Fe La Itre Xaa Ewekë Hne Së Hna Thithi Fë
12. Nemene la itre ewekë ka sisitria nyine tro sa thithi fë?
12 Hapeu kolo kö a mama ngöne la itre thithi së, laka, Itretre Anyipicine i Iehova së ka madrin me ka catre huliwa? Hapeu, easë kö a thithi iele matre tro pala hi sa eatrëne la aja i Akötresie, me cainöjëne la maca ne la Baselaia, me anyipicine la musi cile i Iehova, me ahmitrötrëne la atresiwa i Nyidrë? Loi e tro sa pane thithi fë la itre ewekë cili, tune la hna amamane hnei Iesu ngöne la nyidrëti a qaja, ka hape: “Tetetro i anganyihunieti e kohoti hnengödrai, jiniati e hmitöte la atesiwa i enëtilai. Jianiati e hlepëtipi la baselaia i enëtilai. Longëtinejë la hanengë i enëtilai e celë fewatine axajanëti e koho hnengödrai.”—Mat. 6:9, 10.
13, 14. Kola mama tune kaa la pengö së jëne la itre thithi së?
13 Ame la itre thithi së koi Akötresie, tre, itre ej a amamane la pengöne la itre hni së, me itre ewekë hne së hna hnehengazon, me itre aja ka eje the së. Atre hnyawa hi Iehova la sipu pengö së. Kola qaja ngöne Ite Edomë 17:3, ka hape: “Nyine deu sileva la öl, nge nyine deu gole la hnaeë; ngo Iehova la ate thupathe la ite hni.” Öhne asë hi Akötresieti la itre ewekë ka eje e kuhu hni së. (1 Sam. 16:7) Atre hnyawa hi Nyidrë la aqane goeëne së la itre icasikeu, memine la huliwa ne cainöj, memine fe la itre trejine me easë ngöne la götrane la ua. Nyipici, atre hi Iehova la aqane wange së la itre “tejine” me Keriso. (Mat. 25:40) Atre hi Nyidrë, ka hape, maine ka tru koi së la hne së hna thithi kow, maine pena easë hi a e gufane la itre hnaewekë. Öni Iesu lo, ka hape: “E tro nyipunie a thith, the xötraeë kö, tune la nöjei ethen; ke angat’ a mekune [menune] laka tro ha dei angate qa ngöne la nöjei tenge ewekë ka nyimute.”—Mat. 6:7.
14 Kola mama mina fe ngöne la aqane ithanata së ngöne la easa thith, laka, easa mejiune koi Akötresie. Hnei Davita hna qaja, ka hape: “Cilieti [Iehova] lo hnenge hna za ngön, me hnapo ka cate qëmeke ne la ithupëjia. Tro ni a munëti ngöne la uma ne heta i cilie epine palua; tro ni a za ngöne la ahnuene la lue iape i cilie.” (Sal. 61:3, 4) Ame la Akötresieti a ‘ce munëti me easë’ ngöne la götrane la ua, tre, easa mele xetietë, ke, Nyidrëti a thupë së hnyawa. (Hna ama. 7:15) Drei la kola akeukawane la hni së troa easenyi koi Iehova jëne la thith, me mejiune hnyawa laka Nyidrëti la ‘xöle’ së ngöne la itre ijine kola tupathe la lapaune së!—E jë la Salamo 118:5-9.
15, 16. Troa xatua së tune kaa hnene la thithi troa atrehmekune la sipu ewekë ka upi së troa xome la itre hnëqa hnine la ekalesia?
15 Maine ka nyipici së ngöne la easa thithi fë la aja së koi Iehova, tre, tro hë lai a xatua së troa atrehmekune hnyawa la nyipici göne la itre aja cili. Drei la ketre ceitun, ame la aja së troa xome la hnëqa ne qatre thup hnine la ekalesia i Akötresie, tre, hna nyitrepene kö lai hnene la thiina ka ipië göi troa ixatua, me kuca la hne së hna atrein matre troa akökötrene la itre aja ne la Baselaia? Maine pena easa thele troa “pi sisitia” maine “qene joxu” kowe la itre xan? Thaa tro pi kö a öhne la itre ewekë cili thene la itre hlue i Iehova. (E jë la 3 Ioane 9, 10; Luka 22:24-27.) Maine eje the së la itre aja ka ngazo, loi e tro sa thithi koi Iehova Akötresie cememine la nyipici, tro lai a xatua së troa atrehmekune itre ej, me canga thipetrij qëmekene tro itre ej a cia e kuhu hni së.
16 Maine jë eje thene la itre Keresiano föe la aja tro la itre föi angatr a xome la hnëqa ne drikona, maine qatre thupe pena. Loi e tro la itre trejine föe cili a ujë thenge la itre aja hnei angatr hna thithi fë ngöne la gaa sihngödr, hnene la hna catre troa amamai tulu ka lolo. Ka nyipi ewekë catre lai, ke, troa hetre thangane la aqane ithanata me aqane ujë ne la hene ne la fami kowe la ekalesia.
Ngöne La Kola Nyi Trenge Ewekëne La Itre Xan Ngöne La Thith
17. Pine nemen matre loi e tro sa lapa ngöne la gaa sihngödr ngöne la easa thithi casi koi Iehova?
17 Ame itre xaa ijin, hnei Iesu hna kötrene la ka ala nyim, matre troa thithi cas kowe la Tretretro i nyidrë. (Mat. 14:13; Luka 5:16; 6:12) Eje mina fe the së lai aja cili troa lapa cas. Maine tro sa thithi cememine la hni ka menyik ngöne la ketre götran gaa sihngödr, tro hë sa axecië mekun me amadrinë Iehova, nge ka troa hetre thangane ka loi koi së ngöne la götrane la ua. Ngo hnei Iesu mina fe hna thithi qëmekene la nöjei atr; celë hi matre loi e troa wange hnyawa la aqane troa thith ngöne la götrane cili.
18. Nemene la itre xaa mekun nyine tro la itre trejine trahmany a hnehen ngöne la angatr a nyi trenge ewekëne la ekalesia ngöne la thith?
18 Ame ngöne la itre icasikeu, kola nyi trenge ewekëne la ekalesia ngöne la thith hnene la itre trahmanyi ka nyipici. (1 Tim. 2:8) Loi e tro la itre trejine a qaja ngöne la pune la thith, ka hape, “amen,” kola hape, “eje hi lai.” Ngo nyipi ewekë tro angatr a kapa la itre hna qaja hnene la trejin, matre troa qaja la hnëewekë cili. Pëkö ketre ewekë ka athixötrë së hna qaja hnei Iesu ngöne lo tulu ne thith hnei nyidrëti hna hamën. (Luka 11:2-4) Ketre, thaa hnei nyidrëti kö hna qaja asë la itre aja maine itre jole pena ka eje thene la itre atr, angatr isa ala caasi ka drei nyidrë. Loi e troa thithi fë la itre ewekë cili ngöne la easë cas, ngo thaa qëmekene kö la ka ala nyim. Nge maine easa nyi trenge ewekëne la ketre gurup ngöne la thith, loi e tro sa neëne la itre ithuemacany, laka, thaa nyine tro kö a iqajakeun.
19. Tune kaa la aqane tro sa ujë ngöne la kola thithi qëmekene la ka ala nyim?
19 Ame ngöne la kola nyi trenge ewekë së ngöne la thithi, tre, nyipi ewekë tro sa “qou e Akötesie.” (1 Pet. 2:17) Maine jë hetre itre xaa ijine ka loi me götran nyine troa kuca la itre xaa ewekë, laka, thaa ijije kö troa kuca ngöne la itre icasikeu ne Keresiano. (Ate cai. 3:1) Drei la ketre ceitun, maine jë tro la ketre atr a ajane tro la itre atrene asë la gurup a ie wanakoime ngöne la kola thith. Maine jë tro la aqane ujë cili a athixötrëne maine ajeane pena la itre xan qa ngöne la hnei angatre hna dreng, tune la itre atr ka xötrei traqa troa sine la itre icasikeu. Ketre, ijije tro la itre trefën a ie acony, ngo maine tro pala hi angatr a ihaluth ngöne la kola thith, tre, ijije tro la aqane ujë cili a athixötrëne la itre ka goeë angatr. Maine jë tro angatr a mekune, ka hape, ka sisitria catre kö la aqane ihnimi nyidro hune la troa atrunyi Iehova me metrötrë Nyidrë. Qa ngöne lai, maine easa ajane troa metrötrë Nyidrë, loi e tro sa “kuca asë nyine atrunyi Akötesie,” nge thaa tro kö sa xome la ketre aqane ujë ka troa ajeane maine athixötrëne pena la ketre atr.—1 Kor. 10:31, 32; 2 Kor. 6:3.
Nemene La Itre Ewekë Nyine Thithi Fë?
20. Tro nyipunieti a qeje pengöne tune kaa la tusi Roma 8:26, 27?
20 Ame itre xaa ijin, maine jë thatre kö së la nyine troa qaja ngöne la easa thithi cas. Hnei Paulo hna cinyihan, ka hape: “Tha’ te hnyawa kö shë la qâ shë troa sipon; ngo hnene la Uati [Hmitrötr] hna sipo thatraqai shë ngöne la awe hna tha’ teine qaja. Nge nyidëti [Akötresie] la ate thele la ite hni, a öhne la mekune ne la Ua.” (Rom. 8:26, 27) Nyimutre la itre thithi hnei Iehova hna aijijëne troa cinyihane e hnine la Tusi Hmitrötr. Nyidrëti a kapa la itre thithi cili kösë lo itre sipo hne së hna ajane troa qaja, qa ngöne lai Nyidrëti a aejën. Atre pengö së hnyawa hi hnei Akötresie, memine la mekune ne la ua, ke, qaathei Nyidrë matre jëne la itre atr, hna cinyihane eje hnine la Tusi Hmitrötr. Iehova a sa la itre thithi së ngöne la kola “sipo” thatraqai së hnene la ua. Ngo maine hne së hna inine hnyawa la Wesi Ula i Akötresie, tro ha canga mama koi së la itre ewekë nyine troa thithi fë.
21. Nemene la hne së hna troa ce wange ngöne la hna cinyihan ka troa xulu?
21 Tune la hne së hna ce wange hë, kola mama hnyawa la pengö së jëne la itre thithi së. Drei la ketre ceitun, maine jë itre ej a amamane la pengöne la aqane imelekeu së me Iehova, memine la aqane majemi së memine la Wesi Ula i Nyidrë. (Iako. 4:8) Tro pë hë sa ce wange ngöne la hna cinyihan ka troa xulu, la itre xaa thithi me itre xaa hnëewekë hna xome ngöne la itre thith ka eje e hnine la Tusi Hmitrötr. Ame la easa wange trongëne la götrane cili hnine la itre Hna Cinyihan, nemene hë la thangane lai kowe la aqane thithi së koi Akötresie?
Tro Nyipunieti a Sa Tune Kaa?
• Tune kaa la aqane tro sa ujë ngöne la easa thithi koi Iehova?
• Pine nemene matre loi e tro sa thithi thatraqane la itre trejine me easë?
• Troa mama tune kaa la pengö së me itre aja së, jëne la itre thithi së?
• Nemene la aqane tro sa ujë ngöne la kola thithi qëmekene la nöjei atr?