Ini 10

Itre Thiina Ka Ngazo Hna Methinëne Hnei Akötresie

Nemene la aqane tro së a goeëne la itre ewekë hnei Akötresieti hna jele ngazon? (1)

Nemene lo itre xaa aqane kuci ngazo a ka sisi qëmeke i Iehova? (2)

Nemene la aqane tro la keresiano a wange la thoi? (3) me elo mani? (3) me ënö? (3) me iakötrë? (4) me kuci haze? (5) me hmo hnei ka haitr? (6)

Tro la ketre atr a nuetrije tuneka la itre hna majemine me itre aqane ujë cili? (7)

1. Itre hlue i Akötresie a ajane la loi. Ngo, loi e tro fe angatre a inine troa sisine la itre ewekë ka ngazo. (Salamo 97:10) Kolo lai a hape, troa triane la itre xaa ewekë hna kuca hna wathebone hnei Akötresie. Nemene la itre ewekë cili?

2. Kuci Ngazo: Ame la kuci ngazo qëmekene la faipoipo, me nyixetë, me ce meköle me öni, me angazone la kuku, me ce meköle hnei lue trahmany, ke, itre ngazo ka sisi xajawa i Akötresie. (Levitiko 18:6; Roma 1:26, 27; 1 Korinito 6:9, 10) Maine kola ce lapa hnene la trahmanyi me jajiny, ngo thaa ka faipoipo petre kö, ke, tro nyidroti a isa lapa, maine tro pena nyidroti a cile ngöne mus.​—Heberu 13:4.

3. Thoi, Me Elo Mani, Me Ënö: Thatreine kö tro Akötresieti a thoi. (Tito 1:2) Celë hi kepine matre, nyipi ewekë fe tro la atr ka ajane tro Akötresie a kepe angeic, a trije la thoi. (Ite Edomë 6:16-19; Kolose 3:9, 10) Hnene la aja mo hna ukune la atr, kowe la nöjei pengöne aqane elo mani. Haawe, thaa tro kö la itre keresiano a hane sine la nöjei pengöne aqane elo mani, tune la itre loteri, me troa mize maine kuci pari ngöne itre hna iwaja hoos, maine tereno lo hna qaja enehila ka hape, elo bigo. (Efeso 5:3-5) Nge, thaa tro kö la itre keresiano a ënö. Thaa tro kö angatre a itöne la ketre ewekë nge atre hnyawa hi angatre laka, hna atrekënö, maine troa xome pena la ketre ewekë, nge thaa hna sipone kö.​—Esodo 20:15; Efeso 4:28.

4. Itre Ijine Elëhni, Me Iakötrë: Troa traqa la itre aqane iakötrë ka tru, qa ngöne la hna lapa fë trenge hni. (Genese 4:5-8) Thatreine kö tro la ketre atr ka iakötrë, a enehmu i Akötresie. (Salamo 11:5; Ite Edomë 22:24, 25) Thaa loi kö e troa itëkeune la itre ngazo, maine tro pena a nyi thupene la itre ewekë ka ngazo hna kuca koi së hnene la itre xan.​—Ite Edomë 24:29; Roma 12:17-21.

5. Itre Trenge Ewekë Ka Hetre Menen, Me Kuci Haze: Alanyimu la itre atr ka thele mene thene la itre ua matre nyinyine la itre mec i angatr. Ame itre xan, ke, angatre a kuci iönine la itre atr ka ithupëjia me angatre matre, troa angazo angatre maine troa humuthi angatre pena. Satana hi la qaane la itre ewekë celë. Qa ngöne lai, thaa tro pi kö la itre keresiano a hane kuca itre ej. (Deuteronomi 18:9-13) Hunapo ka sisitria la troa lapa qale koi Iehova, matre thupë së qa ngöne la itre ka iangazo maine itre kuci iöni.​—Ite Edomë 18:10.

6. Hmo Hnei Ka Haitr: Thaa ngazo kö e troa nango iji waina, me bier, maine ketre pengöne ka haitre pena. (Salamo 104:15; 1 Timoteo 5:23) Ngo ngazo xajawa i Akötresie, la troa sasaithi tulu, ene la troa iji menu la gorok, me hmo hnei ka haitr. (1 Korinito 5:11-13; 1 Timoteo 3:8) Maine tro epuni a iji menu la ka haitr, ke, epuni a angazone la ngönetrei i epun, me thupe lapa, ene pe tro hë a lapa ngazo la fami i epun. Ketre, eje a canga thuejëne la itre xaa aja ne ngönetrei, troa tupathi epun.​—Ite Edomë 23:20, 21, 29-35.

7. Ame la atr ka kuca la itre ewekë hnei Akötresie hna methinën, ke, thaa tro kö angeice a “hetenyi la baselaia i Akötesie.” (Galatia 5:19-21) Maine nyipici la ihnimi epuni koi Akötresie, nge epuni a ajane troa amadrinë Nyidrë, ke, loi e tro epuni a nuetrije la itre ewekë cili. (1 Ioane 5:3) Inine jë troa sisine la hnei Akötresie hna methinën. (Roma 12:9) Thele jë troa caasi pala hi, memine la itre atr ka melëne la aja i Akötresie. (Ite Edomë 13:20) Atreine tro la itre keresiano ka nyipi atr hë, a hamëne la ixatua ka tru. (Iakobo 5:14) Ngo e hune la nöjei ewekë asë, hni ju koi Akötresie, me sipo Nyidrë la ixatua jëne la thith.​—Filipi 4:6, 7, 13.

[Iatr ne la götran 20, 21]

Akötresie a methinëne la troa iji menu la kahaitr, me ënö, me elo mani, memine la itre aqane ujë ka iakötrë