Ini 13
Tro Epuni a Öhne Tune Ka La Nyipi Hmi?
Ka loi asë kö koi Akötresie la nöjei hmi asë, maine caasi la hmi hnei Nyidrëti hna kapa? (1)
Pine nemene matre nyimutre catre la itre hmi ka mekune ka hape itre keresiano itre ej? (2)
Tro epuni a wangatrehmekune tune ka la itre nyipi keresiano? (3-7)
1. Caasi hi la nyipi hmi thatraqane la itre Keresiano, nge ame hi la trepene ej, ke, Iesu. Ketre tune fe enehila, tro fe a caa organizasio, maine caa lapa ne lo itre nyipi hlue i Iehova Akötresie. (Ioane 4:23, 24; Efeso 4:4, 5) Tusi Hmitrötre a qaja ka hape, xalaithe hi la itre atr ka xötrëne la gojenyi gaa ilitre ne tro kowe la mel.—Mataio 7:13, 14.
2. Hnene la Tusi Hmitrötre hna qaja hë ekö ka hape, thupene la hna meci hnene la itre aposetolo, ke, tro la itre ini ka thoi memine la itre aqane ujë ka thaa eje kö thene la itre keresiano, a mama trootro hnine la ekalesia i keresiano. Tro la itre atr a amenune la itre ka lapaun, matre troa nyi sinetronge i angatr, hune la troa xötrethenge Keriso. (Mataio 7:15, 21-23; Ite Huliwa 20:29, 30) Celë hi la kepine matre nyimutre catre la nöjei atr ka sipu selëne ka hape, itre keresiano fe angatr. Tro së a wangatrehmekune tune ka, la itre nyipi keresiano?
3. Ame la hatrene ka amamane hnyawa la itre nyipi keresiano, ke, ene laka hetrenyi thei angatre la nyipi ihnimikeu. (Ioane 13:34, 35) Thaa hna ini angatre kö ka hape, itre ka draië kö angatre hune la itre xaa pengöne atr maine hune la itre xaa raas. Ketre mina fe, thaa hna ini angatre kö troa methinëne la itre atr ne la itre xaa nöj. (Ite Huliwa 10:34, 35) Celë hi matre, thaa angatre fe kö a hane sine la itre isi. Ame la aqane imelekeu ne la itre nyipi keresiano, ke, kösë itre trejine trahmanyi me trejine föe.—1 Ioane 4:20, 21.
4. Ame la ketre ka nyi hatrene la nyipi hmi, ke, itre atrene eje a metrötrëne la Tusi Hmitrötr. Angatre a kapa hnyawa ej, tune la Wesiula i Akötresie, me jele nyipicine la hnene eje hna qaja. (Ioane 17:17; 2 Timoteo 3:16, 17) Angatre a wangatrune la Wesiula i Akötresie, ame koi angatr, ke, ka sisitria kö eje hune la itre mekune la itre atr maine itre kutim, ene la qene nöje i angatre pena. (Mataio 15:1-3, 7-9) Angatre a catre troa xötrethenge la Tusi Hmitrötr, ngöne la nöjei drai ne mele angatr. Haawe, thaa isazikeu kö la hnei angatre hna cainöjëne memine la aqane mele i angatr, ohe, angatre a mele thenge la hnei angatre hna qaja.—Tito 1:15, 16.
5. Nyipi ewekë fe tro la nyipi hmi a atrune la atresiwa i Akötresie. (Mataio 6:9) Hnei Iesu hna qaja amamane pala hi kowe la itre xaa atr la atresiwa i Akötresie, ene Iehova. Tro la itre nyipi keresiano a xome la tulu cili. (Ioane 17:6, 26; Roma 10:13, 14) Drei la itre atr ngöne la götrane i epuni ka qaja la atresiwa i Akötresie?
6. Nyipi ewekë tro la itre nyipi keresiano a cainöjëne la Baselaia i Akötresie. Celë hi huliwa lai, hna kuca hnei Iesu. Hnei nyidrëti hna qaja lapane la Baselaia. (Luka 8:1) Hnei nyidrëti fe hna amekötine kowe la itretre drei i nyidrë, tro angatre a cainöjëne lai maca ka loi cili ngöne la fene hnengödrai asë. (Mataio 24:14; 28:19, 20) Itre nyipi keresiano a lapaune hmekuje hi kowe la Baselaia i Akötresie, atre troa axulune kowe la fene asë, la tingetinge me lapa loinöj.—Salamo 146:3-5.
7. Tha tro kö la itretre drei i Iesu, a hane sine la fene ka ngazo. (Ioane 17:16) Thaa tro kö angatre a hane lö hnine la politik, me itre ewekë ka azikozikone la aqane mele ne la itre atrene la nöj. Angatre a neëne la itre ewekë ka eje ngöne la fen, ene la aqane ujë, me itre hna majemine kuca, me itre aqane mekune ka ngazo. (Iakobo 1:27; 4:4) Hapeu, atreine kö epuni troa wangatrehmekune ngöne la götrane i epun, la hmi ka hetrenyi la itre hatrene celë, ka jele nyipicine la nyipi hmi ne la keresiano?
[Iatr ne la götran 26, 27]
Kola ihnimikeu hnene la itre nyipi keresiano, me metrötrëne la Tusi Hmitrötr, me cainöjëne la Baselaia i Akötresie