Itre Ithuemacanyi Ne La Baselaia Na. 35

Hapeu Tro Kö a Ej La Ihnimikeu Thene La Nöjei Nöje Asë?

Kola Nanazije La Ihnimi Ne La Ka Alanyimu Kowe La Itre Ka Lapa Easenyi Angatr

NYIMUTRE catre la itre atr, itre milio, ka pë hmaca kö hna mejiune kow, nge atraqatre catre la akötre thei angatr, ngo thatre kö angatre la hna troa ujë kow göi troa hetre ixatua. Hna qaja hnene la ketre föe, maseta eahlo ekö ngo ka reterete hë, ka hape: ‘Eni pe hi a lapa ngöne la ketre jidr, nge fenafena jë hi la qëhnelö i eni hnene la ketre sine föe ka lapa ezi eni ngöne la batima, nge nyidroti a qaja koi ni ka hape, ka mele caasi nyidro. Matre eni a nango qaja acone ju ka hape, tru catre la joleng. Ene pe amamane ju nyidroti la ipië i nyidroti pine la hna iajolë, nge nyidroti a nue ni pi.’

Tru la akötre me hlehleu koi ni, la eni a atre e thupene ka hape, hna hnöjua hnene lo lai sine föe ngöne la jidri cili. Ame hë e thupene lai, hna qaja hnene lai qatre föe ka reterete, ka hape, hetre ini hnei eahlo hna xome qa ngöne lai, kola hape, “thaa tro kö a drei simine la kola sipo ixatua hnene la itre ka lapa easenyi së.”

Kola traqa ngöne la itre xaa ijine la itre hulö, pine laka, pëkö ihnimi së kowe la itretre lapa easenyi së. Kola mama hnyawa lai, ngöne lo isi i angetre Bosini me angetre Herezegovin, lue ejene enehila lo nöje hna hëne ekö ka hape, Yugoslavi; nyimutre la itre atr hna upe trije qa ngöne la itre hnalapa i angatr, itre milio la etrun, nge tren thauzane lao hna humuth. Hnei drei? Hna qaja treijëne hnene la ketre nekö jajinyi hna thapa qa ngöne la tribu i angeic, ka hape, “hnene hmaca kö lo itretre lapa easenyi hun. Atre angatre hi hun.”

Ame e Ruaneda, kola e la itre hadredre thauzane lao atr hna lepe humuth, a thaa hnei itre trehnyiwa kö ngo hnene hmaca kö lo itre atr ka lapa easenyi angatr. Hna qaja hnene la zonale The New York Times ka hape, “Ka ce mele la itre Tutsi me itre Hutu, kola itöixome la itre nekötrahmanyi memine la itre neköjajinyi ne la lue tribu cili, nge pëkö iwangatrehmekunyi atr thei angatr, kösë lo lue fini la lue tribu cili. Ngo thatre una ju hi, nge kaqa pi hi la caasi ne la lue tremesinelapan,” ame hna “nyiqaane jë la itre ihumuth.”

Ketre tune mina fe e Isaraela, laka, lue ka mele iasenyi hi la itretre Iudra memine la itre Arab, ngo alanyimu catre thei angatre la itre ka imethinë. Ceitune hi la aqane mele cili thene la itre katolik me itre porotesta ne Irelaad, nge kola mana trootro la itre atr ka ujë tune lai ngöne la itre xaa nöje ka tru. Paatre hë enehila la ihnimi thene la atr, thaa hna traqa tune kö kowe la fene ngöne la itre drai hnapan.

Pine Nemene Matre Kola Nanazije La Ihnimi Ne La Itretre Lapa Iasenyi?

Kola sa la hnyinge celë hnene la Atre xupi së. Kola ati ëjene la hnedrai së hnene la Wesiula i Nyidrë, ene la Tusi Hmitrötr, ka hape, “Ite drai hnapin.” Celë hi hneijine hna perofetane hë hnei Tusi Hmitrötr, kola hape, tro hë la itre atr a “tha hnimi sine.” Hna qaja fe hnei Tusi Hmitrötre göne la “nöjei ijine ka aköte” cili, laka, celë fe “puatine la fewatin,” nge ngöne la ijine cili, hnei Iesu hna thingehnaeane ka hape, “tro ha nanazije la ihnimi ne la ka ala nyimu ngöne laka, troa mana la ngazo.”​—2 Timoteo 3:1-5; Mataio 24:3, 12.

Enehila kola paatre la ihnimi ne la itre atr, kolo lai a anyipicine ka hape, easë hë la a melëne la itre drai hnapine ne la fene celë. Ewekë lai ka lolo, pine laka, easenyi hë matre nyihnane pi la fene celë me itre atrene ka thipetriji Akötresie, hnene la fene ka hnyipixe nge ka meköt, hna troa jilapane hnene la ihnim.​—Mataio 24:3-14; 2 Peteru 2:5; 3:7, 13.

Ngo hapeu, hetrenyi kö la ketre nyipi kepine ka aijijë së troa mejiune ka hape, atreine hi troa saze la aqane ujë ne la itre atr​—laka, atreine hi tro angatre a ihnimikeu, me ce mele ngöne la tingeting?

Ihnimekeu i Angetre Lapa Iasenyi​—Ka Troa Ej

Hna hnyingë Iesu hnene la ketre atre inine la wathebo ka hape: “Drei la ate easenyi ni?” Maine jë angeice a ajane tro Iesu a sa koi angeice ka hape, ‘Angetre Iudra.’ Ngo ngöne la ceitune hnei Iesu hna hamëne ene la pengöne lo atre samaria ka lolo thiina, nyidrëti a amamane laka, itretre lapa easenyi së fe la itre atr ne la itre xaa nöj.​—Luka 10:29-37; Ioane 4:7-9.

Hnei Iesu fe hna amamane hnyawa laka, ame la ihnimi ka sisitria catre thupene la ihnimi së koi Akötresie, ke, ene la troa hnime la itre ka lapa easenyi së; celë hi ihnimi lai ka troa eatrongëne la mele së. (Mataio 22:34-40) Ngo hapeu, hetre itre atr fe hë ka amamane hnyawa laka, angatre a hnime la itretre lapa easenyi angatr? Eje hi laka, ewekë ka mama lai thene lo itre pane keresiano! Angatre a hlemu loi, hnene la aqane hnime angatre la itre xaa atr.​—Ioane 13:34, 35.

Tuneka fe enehila? Hetre atr fe kö ka hane eënyine la ihnimi hna melëne hnei Keriso? Kola qaja hnene la Encyclopedia Canadiana ka hape: “Ame la huliwa ne la itre Temoë i Iehova, ke, eje a amexeje me acilëne hmaca lo aqane melene la itre keresiano ekö, ene lo mele ka eje thei Iesu me itretre drei nyidrë . . . Itre trejine asë hi angatr.”

Nemene la aliene la mekune cili? Kolo lai a hape, thaa hnene kö la itre Temoë i Iehova hna nue la​—isa pengönene la atr, ene la isa hane ikupein, maine isa nöj, maine isa tribu pena​—troa nyijëne imethinë memine la itretre lapa easenyi angatr. Thaa hane hmaca fe kö angatre ihumuth, pine laka, kösë lo hnei angatre hë hna lepelepe la itre taua i angate mate nyine uja dro pena, me ite jo i angate nyine hele ne xötre vin. (Isaia 2:4) Hlemu loi la itre Temoë i Iehova, pine laka, hetre hni ne ajane i angatre pala hi troa xatuane la itretre lapa easenyi angatr.​—Galatia 6:10.

Thaa sesëkötre kö së la kola jele loine la itre Temoë i Iehova hnene la ketre zonal, Sacramento Union, kola hape: “Atreine hi troa qaja ka hape, maine troa xötrethenge hnene la nöjei atr la itre trepene meköti hna inine hnene la itre Temoë i Iehova, haawe, tro ha paatre la itre ihumuthi ka tru, me imethinë e celë fen, pine laka, musi hë la ihnim.” Hna wangatrehmekune hnene la ketre trahmanyi ka hane cinyanyi hnine la ketre zonale ne Hongrie, hna hëne ka hape, Ring, öni nyidrë ka hape: “Eni ha trotrohnine hnyawa la mekune ka tru, kola hape, maine hna jilapane hmekuje ju la fene hnene la itre Temoë i Iehova, haawe, pë hmaca kö troa hetrenyi la itre isi, nge ame hmekuje hi la huliwa ne la itre polis, ke, ene la troa thupe ngöne la itre gojeny, me waipengöne la itre paspor.”

Eje hi laka, nyimutre catre kö la itre atr ka mekune ka hape, troa saze la fene hnengödrai, e hna ihnimikeu la nöjei atr asë. Tro ha eatre tuneka la ewekë cili? (Pane wange ju ngöne la ketre götrane la pepa.)

Tro Hë La Nöjei Atr Asë a Ihnimikeu

Kola amamane hnene la thithi hna hamëne hnei Iesu Keriso, laka, easenyi catre hë matre traqa pi la ketre ewekë ka sisitria ka troa saze la fen. Hnei Iesu hna ini së troa thith, jëne la cainöje hnei nyidrëti hna hamëne hune la wetr, öni nyidrëti ka hape: “Jiniati e hlepëti pi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai.”​—Mataio 6:10, King James Version.

Nemene la Baselaia i Akötresie? Celë hi ketre musi hna acile e koho hnengödrai, eje a troa musinëne la fen. Hane hi lai kepine matre kola hëne eje ka hape, “Baselaia ne hnengödrai.” Hna ië Iesu, “Joxu ne tingeting” hnei Iehova Tretretro i nyidrë, troa cilëmekene la Baselaia cili.​—Mataio 10:7; Isaia 9:6, 7; Salamo 72:1-8.

Nemene hë la ewekë ka troa traqa kowe la fene celë ka tiqa hnei imethinë, ngöne la troa hlepëti la Baselaia? Tro la “Baselaia,” a “lep’anyilanyilane me apatene” la nöjei baselaia asë ka ngazo ne la fene celë. (Daniela 2:44) Kola qeje pengöne hnei Tusi Hmitrötre ka hape: “Nge kola pate la fene hnengödrai . . . , ngo troa cile huti epine palua la ate kuca la aja i Akötesie.”​—1 Ioane 2:17.

Tusi Hmitrötre fe a hane qaja la pengöne la fene ka hnyipixe, kola hape: “Ke tro la ite ka meköti a lapane la nöj, nge tro la ite ka pë ethan’a hne ngön’ej.” (Salamo 37:9-11, 29; Ite Edomë 2:21, 22) Drei la ketre ijine ka troa sisitria catre koi së! “Pa hmaca kö mec, me hace hni, me teij, me aköt.” (Hna Amaman 21:4) Tro fe ha hane mele hmaca lo itre atr ka meci hë, nge tro hë la ihnadro asë a paradraiso.​—Isaia 11:6-9; 35:1, 2; Luka 23:43; Ite Huliwa 24:15.

Maine easë a hane ajane troa mele ngöne la fene ka hnyipixe, haawe, loi e tro së a ihnimikeu, tune lo aqane ini së hnei Akötresie. (1 Thesalonika 4:9) Hna qaja hnene la ketre trahmanyi ka inine la Tusi Hmitrötr, qa ngöne la itre nöje e cahië, ka hape: “Eni a lapa treqene lo ijine hna thingehnaeane hnei Tusi Hmitrötr, lo hna hape, tro la itre atr asë a ihnimikeu.” Ka xecie hnyawa lai ngöne la hni së, laka, tro Akötresieti a aeatrëne la itre ewekë hnei Nyidrëti hna thingehnaean! Öni Nyidrëti ka hape: “Ase hë ni qaja, nge tro ni a aeatën’ej.”​—Isaia 46:11.

Ngo maine epuni a ajane troa hane kapa la itre manathithi fene la Baselaia i Akötresie, haawe, loi e tro fe nyipunieti a kapa la atrehmekune qa hnine la Tusi Hmitrötr, celë hi ewekë lai hna kuca hnene la itre atr ka menyik, itre milio la etrune ngöne la fene hnengödrai asë. (Ioane 17:3) Hetre ixatua fe hnei epuni hna troa kapa qa ngöne lo boroshüre ka 32 lao götran, Nemene La Hnei Akötresieti Hna Thele The Së? Maine epuni a ajane troa hane kapa la caa boroshüre ka tune lai, nyialiene ju la pepa hna nyihatrene troa thupa sinën, ngöne lo pane götrane ne la tarake hna hnëkëne thatraqane lai, nge iupi fë pi kowe la aderesi ka easenyi kowe la hnei epuni hna lapa.

□ Eni a ajane troa hane kapa la boroshüre Nemene La Hnei Akötresieti Hna Thele The Së?

□ Maine epuni a ajane troa inine la Tusi Hmitrötr, ke hë ni jë.

[Hna xome ngön la foto götran 2]

Sniper and funeral in Bosnia: Reuters/Corbis-Bettmann