“Hapeu Tro Kö a Eje La Ihnimikeu Thene La Nöjei Nöje Asë?”
1 Hetrenyi la ketre maca ka lolo, hna hamëne hnei Akötresie, nyine akeukawane la nöjei atr asë; tro ha cainöjëne eje e cailo fen, ngöne la 169 lao qene hlapa. Nemene la maca cili? Nge troa tro fë eje tuneka?
2 Ame la aliene la maca cili, ke, kola qaja la ihnimi ka eje thene la itre treme sine lapan. Eje e hnine lo Itre Ithuemacanyi Ne La Baselaia Na. 35; ame la taan, ke, hna hape, “Hapeu Tro Kö a Eje La Ihnimikeu Thene La Nöjei Nöje Asë?” Kola xödrane hnene la Itre Ithuemacanyi Ne La Baselaia celë, la itre hnepe aqane ujë ne la fen, me amamane laka, ame la kola hleuhleu la itre atr, me akötre la mele i angatr, ke, hnene laka, pëkö ihnimi thei angatr. Eje a qeje pengöne hnyawa la kepine matre ngöne la hnedrai së enehila, kola nanazije catre la ihnimi ne la itre ka lapa iasenyi, nge troa hetre ethane lai ngöne la itre drai ka calemi.
3 Ngo kola amamane fe hnene la Itre Ithuemacanyi Ne La Baselaia Na. 35, la itre treme sine lapan, itre milio la etrune ngöne la fene enehila, angatre a mele inyipicikeu, hetrenyi thei angatre la ihnimikeu. Kola qaja fe hnene la ithuemacanyi cili la aqane melëne la mele ne keresiano, hnene la itre atr ekö ngöne la hneijine i Iesu—nge hetrenyi la ihnimikeu i ange treme sine lapan, hnine la hmi hnei angatre hna xom; celë fe ketre ini ka tru lai hna hamëne koi angatr, hnei Iesu Keriso.—Luka 10:25-37.
4 Kola nyipune me qeje pengöne hnene la Itre Ithuemacanyi Ne La Baselaia Na. 35, ka hape, calemi catre hë la ijine troa cilëmekene hnei Keriso la Baselaia i Akötresie, nge tro ha ihnimikeu asë la nöjei atr ka lapa iasenyi ngöne la fene hnengödrai asë. Kola upe la itre atr ka e la ithuemacanyi celë, troa hane kapa fe la boroshüre, Nemene La Hnei Akötresieti Hna Thele The Së? ketre, loi e tro fe angatre a atre la nyine troa kuca matre troa hane kepe thangane lai ewekë hna hnëkëne cememine la ihnim, thatraqane la fene hnengödrai asë; ketre hna amekötine lai hna qeje pengöne hnyawa e hnine la Wesi Ula i Akötresie.
5 Drei La Ka Troa Tro Fë Lai Ithuemacany? Ngöne la itre treu okotropa me nofeba, tro la itre Temoë i Iehova ne la fene hnengödrai asë a tro fë la ithuemacanyi celë kowe la itre atr hnei angatre hna atre, me itretre lapa easenyi angatr, me itre sinee i angatr; ithuemacanyi la ka troa amamane hnyawa la aqane troa ihnimikeu hnene la itretre lapa iasenyi. Loi e tro asë hi la itre atrene la ekalesia ka ijije troa tro fë la Itre Ithuemacanyi Ne La Baselaia Na. 35, a hane ce thawa la ithuemacanyi cili kowe la nöjei atr ka ala nyim.
6 Ame la sipu aliene la huliwa cili, ke, ene la troa amejëne la ajane la itre atr, matre tro angatre a hane inine la Tusi Hmitrötre ngöne la boroshüre Thele, maine ngöne pena la itus Connaissance. Ketre, maine tro asë hi la nöjei ka nyihlue i Iehova a hetrenyi la hni ka ajane troa catre tro fë la ithuemacanyi cili, haawe, tro ha hlemu loi e cailo fene la ihnimi Iehova Akötresie, me Iesu Keriso Hupuna i Nyidrë.