Loi e Troa Nyipi Ewekëne Hnyawa Lo Itre Atr Ka Kapa La Itre Ithuemacanyi Ne La Baselaia
1 Atraqatre la madrine së ngöne lo itre hnepe wiike ka ase hë, troa tro fë la Itre Ithuemacanyi Ne La Baselaia N. 35, hna nyitane ka hape, “Hapeu Tro Kö a Eje La Ihnimikeu Thene La Nöjei Nöje Asë?” Hnene la itretre cainöje ne la nöjei götrane ne la fene hna thele troa ketr asë la itre atr, me hane hamë angatre la Itre Ithuemacanyi Ne La Baselaia. (Mat. 10:11) Eje hi laka, hna amekötine troa nyipune la huliwa cili ngöne la sabathi 16 Nofeba, ngo maine hetre teritoare pala kö munën, haawe, loi e tro la itre qatre thupe a sipone matre troa sisedrëne la huliwa uti hë la pë hnyawa Ithuemacanyi Ne La Baselaia N. 35, ngöne la ekalesia.
2 Troa ahlëne la aja ne la itre atr ka ala nyimu, hnene la Itre Ithuemacanyi Ne La Baselaia. Angatre a öhne laka, paatre trootro la ihnimikeu thene la itre atr, qa ngöne lai, angatre a isa hnyingëne thele la pengöne la mele elany. (2 Tim. 3:3) Easë a ajane troa akökötrene pala hi la aja hne së hna amejëne thene la itre atr.
3 Hetre Thangane La Itre Ithuemacanyi Ne La Baselaia: Ame ngöne lo ijine tro fë ekö lo Itre Ithuemacanyi Ne La Baselaia, ene lo macatre 1995, hnene la ketre trejine föe, hna kapa ngöne poos, la ketre tarak, Itre Ithuemacanyi Ne La Baselaia. Hna kapa la caasi hnene la ketre föe, matre nyidroti a tro ju troa hane icasikeu hnine la Uma ne Baselaia, pine laka, kola ajane troa atrepengöne hnyawa la itre ini hna lapaune kow hnene la itre Temoë i Iehova. Thupene ju hi lai icasikeu cili, eahlo pë hë a mekune ju troa etid, nge pëkö icasikeu hnei eahlo hna trian. Thupene ju fe kö lai, eahlo a qeje fenesi pi fe qa ngöne lo hmi i eahlo hnapan!
4 Ala nyimu catre hë enehila la itre atr ngöne la teritoar, itre hadredre angatr, itre ka e la maca, e hnine la Itre Ithuemacanyi Ne La Baselaia N. 35. Ngo nemene la mekune i angatre ngöne la maca cili? Maine tro angatre a kapa madrine la ewekë hnei angatre hna e, ngo troa ala nyimu thei angatre la itre atr ka thaa xötrethenge kö la itre tulu ne ini, uti hë la traqa hmaca ketre Temoë i Iehova troa iwai. Hapeu, hane kö epuni hnëkë troa iwai hmaca? Tro la ihnimi së kowe la itre atr, a upi së troa hane iwai hmaca. Loi e troa wange asë hmaca la nöjei atr ka xome la Itre Ithuemacanyi Ne La Baselaia.
5 Nemene La Hna Troa Qaja Ngöne La Easë a Iwai Hmaca? Hamëne jë la itre hnepe mekune ngöne la enyipi ewekëne la maca ka eje hnine la Itre Ithuemacanyi Ne La Baselaia, nge thupene lai, qaja jë la ketre hnyinge ka ahlëne la aja i angeic. Drenge hnyawa ju la kola ithahnata hnene lai atr, matre troa atre la mekune ka eje thei angeic. Thupene lai, amamane ju la ketre mekune ka ijij, qa hnine la boroshüre Thele; ketre mekune ka eje e hnine la Itre Ithuemacanyi Ne La Baselaia. Maine kola kepe epuni hnyawa hnene lai atr, tupathe jë troa nyiqaane inine la Tusi Hmitrötre me angeic, nge the hmitre kö.
6 Hane cahu itre ixatua ngöne la aqane troa nyiqaane ithahnata, nyine tro epuni a tupathe ngöne la kola wange hmaca la itre atr ka amamane la aja i angatre kowe la “Itre Ithuemacanyi Ne La Baselaia” N. 35:
◼ “Hapeu, mekune hi nyipëti lo tarak hnenge hna hamë nyipëti e cili lo. Hetrenyi e hnine eje la ketre maca nyine mele koi së, pine laka, eje a ketr la jole ka aisane enehila la fene hnengödrai asë—ene laka, pë hë ihnimikeu thene la itre atr.” Amamane ju la hatrene nyine anyipicine ngöne la Itre Ithuemacanyi Ne La Baselaia, götrane 2, fene la hna cinyihane hna hape, “Kola Nanazije La Ihnimi Ne La Ka Ala Nyimu Kowe La Itre Ka Lapa Easenyi Angatr.” Thupene lai, hnyingëne ju ka hape, “Hapeue la mekune i epun, aja i Akötresieti tro la itre atr a mele tune lai?” Nue pi troa sa. Fe jë la boroshüre Thele, ngöne la ini 5, nge tupathe jë troa nyiqaane inine la Tusi Hmitrötre memine lai atr.
◼ “Ame ngöne lo nyiso a xötrei iöhny, hnenge hna hamëne koi nyipëti la itre ithuemacanyi ngöne la topike hna hape, ‘Hapeu Tro Kö a Ej La Ihnimikeu Thene La Nöjei Nöje Asë?’ Tuneka la mekune i nyipë, ijije kö troa hetrenyi la ketre fene ka tune lai?” Nue pi troa sa. Fe jë la boroshüre Thele, ngöne la ini 6, nge e jë la paragarafe 6. Thupene lai, e jë la hna thingehnaeane hnei Akötresie ngöne Mika 4:3, 4. Maine kola mama ka hape, hetre hni ka ajane thene lai atr, haawe, hamëne ju lai boroshür, nge nyiqaane etidi jë me angeic.
◼ “Hnenge hna amë pe ngöne lo eni a wai epuni hmaca, la ketre tarake hna nyitane ka hape, ‘Hapeu Tro Kö a Ej La Ihnimikeu Thene La Nöjei Nöje Asë?’ Hetrenyi e hnine eje la ketre ixatua hna troa hamëne gufan, göi troa inine la Tusi Hmitrötre ngöne la itre hnalapa. Eni a bëeke matre troa amamane koi epuni la ixatua thatraqane la etid. [Amamane jë la itus Connaissance.] Kola qeje pengöne hnyawa hnene la itusi celë la ijine tro la nöjei atr asë a ihnimikeu, nge kola hamëne fe la itre xaa mekune ka sa la itre hnyinge hnei epuni hna lapa fë, maine jë, hna hape: Pine nemene matre easë a qatre trootro me mec? Pine nemene matre Akötresieti a nue la akötr? Nemene la ewekë ka traqa kowe la itre atr hne së hna hnime ka meci hë? Hapeu, ma epuni a ajane tro ni a amamane koi epuni la aqane troa etid?” Maine thaa hna kapa kö hnene la atr la mekune i epun, hnyingë angeice ju maine aja i angeice kö troa ketre e la itus; nge hamëne ju eje thenge lo hna amekötine göi thupen. Isa pui ju matre troa bëeke hmaca.
7 Ame hë la kola ase tro fë la Itre Ituemacanyi Ne La Baselaia N. 35, ngöne la itre teritoare asë, haawe, atreine hi tro së a hane tro fë pe la itus Connaissance, matre troa afenesine la treu. Hetrenyi la itre ixatua ngöne la aqane troa nyiqaane ithahnata, göi troa tro fë la itusi cili; itre eje ngöne la pune la Huliwa ne Baselaia ne diseba 1995; me maac, me juun, me nofeba 1996; me juun 1997.
8 Jëne la huliwa ne tro fë Itre Ithuemacanyi Ne La Baselaia, tro hë së asë a hetrenyi la ajane troa akökötrene la aqane xome la huliwa ne cainöje trootro. Jëne fe la ixatua i Iehova, atreine tro së a mejiune laka, troa hetre thangane catre la huliwa cili, e hne së hna xatuane fe la nöjei atr asë e cailo fen, matre tro fe angatre a hane öhne la mekuana i Iehova thatraqai angatr, ene laka, troa ihnimikeu. Epi tro Iehova a amanathithine pala hi la aqane catre së iwai hmaca, matre troa akökötrene la aja ne lo itre atr ka kapa la Itre Ithuemacanyi Ne La Baselaia.