Aqane Troa Huliwane Lo Boroshür Itre Maca Ka Lolo Qaathei Akötresie!
Boroshür Ka Hnyipixe Hna Kuca Nyine Xatua Së Troa Wange Hmaca La Itre Atr, Me Tupath Troa Nyiqaane Ini Tusi Hmitrötre Me Angatr
1. Nemene lo boroshüre hne së hna kapa ngöne lo ijine Asabele Ne Distrik, nge ka nyi jëne koi së troa wange hmaca la itre atr, me tupath troa nyiqaane ini Tusi Hmitrötre me angatr?
1 Ame ngöne lo ijine easa sine la Asabele Ne Distrik “Nyipi Thupëne Hnyawa Ju La Hni ’ö!,” madrine catre së troa kapa lo ketre boroshüre ka hnyipixe, ka troa nyi jëne koi së troa wange hmaca la itre atr, me tupath troa nyiqaane ini Tusi Hmitrötre me angatr. Ame la boroshüre Itre Maca Ka Lolo Qaathei Akötresie!, tre, ej a nyi hnane lo boroshüre Thele, ngo ceitune hi lue ej, hnene laka tha tru menu kö la itre ini e kuhu hnin. Celë hi matre, ijije hi troa huliwane lai boroshür celë, göi troa nyiqaane ini Tusi Hmitrötr memine lai atr e kuhu qene qëhnelö. Ame lo boroshüre Thele, tre ej a amamane kowe la ka xötrei ini Tus lo itre hna amekötine nyine troa trongëne hnene la Keresiano, nge ka jole kowe lai ka xötrei ini Tusi troa trongën. Ame pena la boroshüre celë ka hnyipixe, tre eje hi a amamane la itre maca ka lolo qa hnine la Tusi Hmitrötr.—Ite hu. 15:35.
2. Nemene kepine matre kola kuca la boroshür Maca Ka Lolo?
2 Pine nemene matre kola kuca la boroshür celë? Hnene la itre trejin e cailo fen hna sipone troa kuca la ketre sine itus ka hmaloi troa e, nge ka troa thue ajane kowe la itre atr troa atre la nyipici, me ini Tusi Hmitrötre fe e thupen, jëne lo itus Ini Tusi Hmitrötr. Ame la itre atr ka tha canga hmala kö troa ini Tusi Hmitrötr jëne itus, tre ma pi tro hë angatr a ini Tus, jëne boroshür. Ketre, ka hmaloi kö la troa ujëne la boroshür ngöne nyimu qene hlapa, hune la troa ujëne la itus ngöne nyimu qene hlapa.
3. Pine nemene matre isapengöne kö la boroshür celë memine la itre xa sine itus?
3 Pengöne La Boroshür Celë: Ame lo itre itus göi ini Tusi Hmitrötr, tre hna kuca matre hmaloi kowe la itre atr troa e, nge matre ijije troa trotrohnine la itre trenge nyipici, ngacama pëkö atre xatua angatr. Ngo ka ketre pengöne kö la boroshür celë. Hna kuca matre troa ini Tusi Hmitrötr memine la atre hamë ini. Celë hi matre, maine easa troa hamëne lai boroshür kowe la ketre atr, tre loi e troa pane ce ithanatane me angeice la casi maine lue paragaraf. Qa ngöne lai, ame la easa öhne la atr ngöne la hnalapa, maine ngöne la hna huliwa i angeice pena, tre ijije hi troa ce ithanatan, ke tha ka qea menu kö la itre paragaraf. Maine nyipici laka, loi e troa nyiqaane ini Tusi jëne la pane ini, ngo ijije fe hi troa hane nyiqaane hnei ketre ini.
4. Kola xatua së tune kaa hnene la boroshür celë, troa kapa la itre ini qa hnine la Tusi Hmitrötr?
4 Ame ngöne la itre xa sine itusi së, ijije hi troa öhne la itre mekune ka sa la hnying, ngöne la itre paragaraf. Ngo ame göne la boroshür celë, tre troa fe Tusi Hmitrötr matre atreine sa la itre hnying. Tha pi tro kö la itre atr a inine la itusi së, angatr a ajane troa ini Tusi Hmitrötr. Celë hi matre, hna e hi la itre mekene Tusi hna fejane ngöne la itre paragaraf. Qanyi së fe Tusi Hmitrötr, matre tro la ka ini Tus me easë a atre ka hape, ame la hnei angeice hna inin, tre itre ini qaathei Akötresie.—Is. 54:13.
5. Pine nemene matre nyipi ewekë tro la ka hamë ini a hnëkë hnyawa qëmekene troa hamëne la ini?
5 Tha hna qeje pengöne asë kö la itre mekene Tus. Nemene la kepin? Hna kuca la boroshür celë matre tro la ka ini Tus a hnying, nge matre tro fe la ka hamë ini a hamëne hnyawa la ini. Celë hi matre, nyipi ewekë troa hnëkë hnyawa qëmekene troa hamëne la ini. Ngo, tha tro pe a tru la hna ithanata. Nyipici laka, pi tro catre së lai a qeje pengöne la Tusi Hmitrötr. Ngo ka loi ju kö tro sa sipone kowe lai hnainine troa qaja la aqane trotrohnine angeice la mekene Tusi hna e. Maine tro sa hnyinge hnyawa, atreine hi tro sa xatua angeice troa trotrohnine la aliene la itre xötr hne sa hna ce e.—Ite hu. 17:2.
6. Tro sa huliwane tune kaa la boroshür ngöne la easa (a) cainöje kowe la itre atr ka luelu göi Akötresie me Tusi Hmitrötr? (b) cainöje ngöne itre hnalapa trootro? (c) sipone kowe la ketre atr troa ini Tusi Hmitrötr me easë? (d) bëeke troa wange hmaca la itre atr?
6 Ceitune la boroshür celë memine la itre xa itus göi ini Tusi Hmitrötr, ijije hi troa tro fë ngöne la nöjei ijin, ngacama hetre sine itusi kö hna amekötine troa tro fë ngöne la treu. Ketre jia ne huliwa ka lolo nyine tro sa huliwane matre troa tupath troa nyiqaane ini Tusi memine la itre atr hne së hna iöhnyi memin. Maine tro sa huliwane la boroshür celë thenge lo aqane upi së ngöne lo ijine asabele ne distrik, “tro hë sa madrine troa wange hmaca la itre atr matre ce ithanata Tusi Hmitrötr me angatr jëne lai boroshür celë!”—Wange ju la itre mekune hna eköhagene ngöne götrane 7-9.
7. Tro sa huliwane tune kaa la boroshür celë ngöne la easa xomiujine la ini Tusi ne la ketre atr?
7 Aqane Troa Xomiujine La Ini Tus: Maine jë, troa pane e la itre hnyinge ka nyi tane ka co ne la ini. Thupene jë hi lai, troa e la paragarafe memine la itre xötr hna cinyanyine amekölen. Ase jë hi lai, troa hnyinge hnyawa kowe lai atr, matre xatua angeice troa trotrohnine la aliene la itre xötr. Qëmekene troa tro kowe la ketre tane ka co, sipone jë kowe lai atrene la hnalapa troa sa la pane hnying, matre mama jë ka hape, trotrohnine hnyawa ha angeic la mekun? Ame la easa xötrei bëeke troa wange hmaca la atr, ma loi e troa ce ithanatane la ca hnyinge hi, ka nyi tane ka co ne la ini. Thupene hë la easa anyimu a bëeke troa wange lai atr, ijije troa nango aqean, uti hë la easa ce ithanatane me angeice la ca ini ka pexej.
8. Nemene la nyine tro sa qaja e tro sa fe Tusi Hmitrötr kowe la itre atr, nge pine nemen?
8 Ame lo itre xötr ka mama ezine la hnaithanata “E jë,” tre itre eje hi lai ka sa mekötine lo hnyinge ka nyi tane ka co ne la ini. Ame la easa troa fe kowe la ketre atr la ketre mekene Tus, epi the tro kö sa qaja la ka hape, “Hnei Paulo aposetolo hna cinyihane ka hape,” maine “Hanawange la hna perofetane hnei Ieremia,” wanga mekune jë angeice ka hape, easë hi a qeje ketre atre hi. Ma ka loi hi e tro sa qaja ka hape, “Kola qaja hnene la Wesi Ula i Akötresie,” maine “Hanawange la hna perofetane hnene la Tusi Hmitrötr.”
9. Hapeu, tro kö a xom asë la itre xötr ne la itre paragarafe hne së hna ce ithanatane memine la ka ini Tus?
9 Hapeu, tro kö sa e asë la itre xötr ka mama ngöne la itre paragaraf, maine tro hi a e lo itre hna upi së ka hape, “E jë”? Qanyi së hi lai troa wang. Isa hetre enyipiewekëne hi la itre mekene Tusi cili. Ame la itre mekune hna qatrenge hnene itre ej, tre itre ithuemacanyi lai ka lolo. Ngo ame pe, maine tha ijije kö la traeme ne la ka ini Tus, maine tha nyipi ajane kö, maine pena, thatreine kö e, tre ma loi e tro hi a ce wange la itre xötr hna upi së ka hape, “E jë.”
10. Eue la tro sa saze, matre tro pena ha ini Tus jëne la itus Ini Tusi Hmitrötr?
10 Tro Ha Ini Tus jëne lo itus Ini Tusi Hmitrötr: Maine anyimu a ithanatane hë së memine la ketre atr la boroshür Maca Ka Lolo, nge majemi hë angeice kowe la ini Tus, qanyi së wange maine tro ha sisedrëne la ini Tusi jëne la itus Ini Tusi Hmitrötr, maine tro kö a ini Tus jëne lai boroshür. Isa qanyine pë hë la itre ka cainöje wange ka hape, eue la troa saze itus. Maine easë hë a mekune troa ini Tus jëne lo itus Ini Tusi Hmitrötr, tro kö sa nyiqaane qa ngöne la qaan? Pëkö hna amekötine göne lai. Isapengöne kö la itre atr. Ngo ame pe, tha ngazo kö troa ce wange hmaca jëne la itus Ini Tusi Hmitrötr, la itre mekune hne së hna ce wange hë me angeic ngöne lo boroshür.
11. Pine nemene matre loi e tro sa huliwane hnyawane la boroshüre së ka hnyipixe?
11 Easa mele ngöne la fene ka tha wange atrune kö la maca ka loi, ngo ame pe, hna nue koi së troa cainöjëne la maca ka lolo catr: kola musi la Baselaia i Akötresie, nge easenyi hë tro ej a xomi së kowe la fene hna jilapane hnene la thiina ka meköt! (Mat. 24:14; 2 Pet. 3:13) Ka xeci hnyawa e kuhu hni së ka hape, tro ha ihmeku la trenge ewekë ne la itre ka drenge la maca celë memine la ketre hna perofetane ka hape: “Lolopi hë hune la ite wete la lue ca i angeic’ ate tro fë la maca ka loi, ate amamane la tingeting, ate tro fë la loi, ate amamane la iamele, ate qaja koi Ziona, ka hape, Kola musi la Akötesi nyipo.” (Is. 52:7) Epi tro sa huliwane hnyawane la boroshür celë, matre tro fë la maca ka loi koi itre ka ajan, ngöne la itre götrane hne së hna cainöje ngön!
[Hna ëkohagen götran 7]
Koi Itre Ka Luelu Göi Akötresie Me Tusi Hmitrötr:
● Hnene la itre ka cainöj hna öhne laka, ame ngöne la itre xa götran, maine kola drenge hnei itre atr la easa qeje “Akötresie” maine “Tusi Hmitrötr,” tre tha pi ithanata ju hi angatr me easë. Haawe, maine easa xötrei iöhnyi memine la ketre atr, ma loi e troa ce porotrikëne me angeice la itre mekune hnei angeice hna ajane troa ithanatan, ka tune la enyipiewekëne la troa hetre musi ka loi, memine la itre ixatua ka lolo thatraqane la itre hnepe lapa, memine la aqane trongene la itre drai elany. Maine jë, ka loi troa ce wange memine lai atr la boroshür Maca Ka Lolo, thupene la hne së hna anyimu a wai angeice hmaca, me amamane la kepine matre ijije troa qaja ka hape, hetre Akötresie, nge ijije troa mejiune kowe la hnei Tusi Hmitrötre hna qaja.
[Hna ëkohagen götran 8]
Cainöje Ngöne Itre Hnalapa Trootro:
● “Eni a traqa troa wai epun, ke eni a ajane troa amamane koi epun ka hape, tha jole kö tro sa atre la hnei Akötresieti hna troa kuca elany thatraqane la itre atr. Tro jë kö Akötresieti a thepe së qa ngöne la nöjei akötr, nemene fe la mekuna i epun? [Nue pi troa sa.] Kola amamane hnene la boroshür celë la xötr e hnine la Tusi Hmitrötr ka sa lai hnying. [Line pi koi angeic lai boroshür, nge e jë lai pane paragaraf ne la ini 1, memine la Ieremia 29:11.] Haawe, nemene fe la mekuna i epun, aja i Akötresieti kö tro sa hetre mele ka loi elany? [Nue pi troa sa.] Maine ajane epun, xome jë pë hë koi epuni lai boroshür celë. Nge qanyinge hmaca pë hë, matre tro nyiso a ce wange la hnaaluene paragaraf, me wange jëne la ketre mekene la Tusi Hmitrötr ka hape, ‘Tro Akötresieti a apatrene tune kaa la itre akötr?” Maine nyipunieti a öhne laka, ijije troa nango aqeane ngöne la nyipunieti a xötrei iöhnyi memine lai atr, ce e jë me angeice la hnaaluene paragaraf, memine la köni mekene Tus. Sipone jë troa bëeke hmaca, matre troa sa la hnaaluene hnying.
● “Ala nyimu la itre atr ka thithi ngöne la angatr a ixelë memine la itre jol. Ka hane fe kö epuni thith? [Nue pi troa sa.] Hapeu, Akötresieti kö a dreng la itre thithi asë, maine hetre itre thithi hnei Nyidrëti kö hna xele ma dreng? [Nue pi troa sa.] Hetrenyi ni la ketre boroshür ka amamane la aqane sa hnei Tusi Hmitrötr la hnyinge celë. [Line pi lai boroshür, nge ce wange ju la pane paragarafe ne la ini 12, nge e jë la itre xötr e cili lo hna hape, “e jë.”] Madrine kö epuni la kola qaja ka hape, pi tro Akötresieti a drenge la itre thithi së? Ngo maine easa ajane tro Nyidrëti a sa la itre thithi së, nyipi ewekë troa pane atre Akötresieti hnyawa. [Bëeke jë kowe la ini 2, nge amamane jë la itre tane ka co.] Maine ajane epun, hane pë hë la boroshür celë, nge tro pë hë ni a bëeke e ketre drai, matre tro sa ce wange la aqane sa hnei Tusi Hmitrötr la itre hnyinge celë.”
● “Eni a traqa koi epun, ke ala nyimu hë la itre atr ka hnehengazone göne la drai elany. Nemene fe la mekuna i epun, tro kö a tro loi la mele së? [Nue pi troa sa.] Ala nyimu la itre atr ka thatre kö ka hape, hetrenyi e hnine la Tusi Hmitrötr la ketre maca ka lolo nge ka thue mejiune së. Hane hi la itre xa hnying hna sa hnene la Tusi Hmitrötr.” Line pi koi angeice lai boroshür, nge upi angeice jë troa iëne la hnyinge hnei angeice hna ajane troa sa. Tro jë kowe lai ini hna köjan, nge amamane jë la aqane trongene la ini Tus. Sipone jë troa bëeke hmaca e ketre drai, matre troa ce ithanatane pena la ketre hnying.
[Hna ëkohagen götran 9]
Sipone Jë Troa Ini Tusi Memin:
● “Eni ekula a troa wai epun, ke eni a ajane troa amamane la ketre aqane ini Tusi Hmitrötr ka hnyipixe jëne la boroshür celë. Kola e la 15 lao ini e celë hnin, nge hetrenyi la itre xötre ne la Tusi Hmitrötr ka sa la itre nyipi hnying. [Amamane jë koi angeice la icetrön.] Ase hë epuni thele jëne troa trotrohnine la hna qaja e hnine la Tusi Hmitrötr? [Nue pi troa sa.] Eni a ajane troa pane amamane koi epun la itre ini, ke hmaloi hi troa trotrohnin. [Ce wange ju me angeice la pane paragarafe ne la hnyinge 3 ne la ini 3, nge e jë la Hna Amamane 21:4, 5. Maine ijij, ce wange ju fe me angeice la hnaaluene paragaraf, nge e ju fe la itre xötr hna upi së ka hape “e jë la.”] Maine ajane epun, tro pë hë ni a nue koi epuni la boroshür celë. Eahuni a ithuecatre koi epuni troa aca tupath la aqane ini Tusi Hmitrötr celë. Nge maine ajane epuni troa ini Tusi tune la, tre qanyi epuni kö. Eni a sipone matre, ame hë e ketre drai, tro sa ce wange la pane ini. Tha ka tru kö la nyine troa ce ithanatan, casi la götrane lai boroshür.”
[Hna ëkohagen götran 9]
Iwai Hmaca:
● Ame la easa bëeke troa wange hmaca la itre ka ajane troa porotrikë Tusi Hmitrötr, maine jë troa qaja ka hape: “Eni a madrine troa iöhnyi hmaca me epun. Hnenge hna xome la boroshür celë ka amamane la aqane sa hnei Tusi Hmitrötr la itre nyipi hnying. [Line pi koi angeice lai boroshür, nge sipo angeice jë troa goeëne la tröne lai boroshür.] Nemene la mekune hnei epuni hna ajane troa ithanatan? [Nue pi troa sa. Tro jë kowe la ini hnei angeice hna iën.] Eni a sipon, tro ni a amamane koi epuni la aqane xatua së hnene la boroshür celë troa atre la aqane sa hnei Tusi Hmitrötr la itre hnyinge së.” Ithanatane jë me angeice la casi maine lue paragaraf, nge xome jë fe la itre xötr hna hape “e jë,” matre tro angeic a goeëne la aqane ini Tus. Nyipunieti hë lai a ini Tusi Hmitrötr memine lai atr! Hamëne jë lai boroshür kowe la atrene lai hnalapa, nge sipone jë troa bëeke hmaca. Maine traqa ha nyipunie kowe la pune la ketre ini, ijije tro nyipunieti a ce ithanatane la pane ini ne la boroshür, maine ketre ini pena hna iëne hnene la atrene la hnalapa.