Ketre Tusi Qaathei Lapa Ne Xomi Meköt

Ange Trejine Fe,

Iehova Tretretroti hi la tulu ka sisitria ne ihnim. Celë hi matre, kola qaja hnene la Tusi Hmitrötr, ka hape: “Akötesieti la ihnim.” (1 Ioane 4:8) Ngacama Akötresieti Kapucatinasë Iehova, ngo tha hna hane kö qaja e hnine la Wesi Ula i Nyidrëti ka hape, “Akötresieti la men.” Ihnimi hi la trepene ka tru ne la mus i Nyidrë. Hapeu, tha pi Akötresieti së kö lai?

Ketre eloine fe laka, tha Iehova kö a upe iele së troa nyihlue i Nyidrë, thaa ka imusinë kö Nyidrë. Ame la aja i Nyidrë, ke, tro sa nyihlue i Nyidrë cememine la ihnim. Aqane tro hi së lai a amamane ka hape, ka xecie hnyawa koi së laka, ka meköti la aqane mus i Nyidrë, nge kola musi cememine la ihnim. Mama hnyawa ha ngöne la aqane trongene la mele ne la atr, laka, musi cile i Nyidrëti la hne së hna troa sajuën.

Pëkö sane la musi cile i Iehova. Ngo, hnei Satana hna qaja angazone la musi cile i Akötresie; qa ngöne lai, xulu hë kowe la nöjei atr asë la itre akötr. Eloine pe, Akötresieti ka inamacane Iehova, celë hi matre tha hnei Nyidrëti kö hna canga sa kowe la icilekeu i Satana. Ketre, ngacama atreine hi Akötresieti troa musinëne la itre atr troa kapa la mus i Nyidrë, ngo tha celë kö lai hnei Nyidrëti hna kuca. Pane mekune hmaca jë së lo Balaama a aköni a thele troa ëjine la nöje Isaraela. Tha ëji angatre ju kö hnei angeic, ngo hna amanathithi angatre pe. Ame e cili, tha hnei Iehova kö hna sewe Balaama troa icilekeu.—Num. 24:10-12.

Tha hnei Iehova kö hna upe iele angeice troa nyi hlue i Nyidrë. Tha ceitui Iehova kö memine lo itretre musi ka iaxösisi. Tha mene kö la ka upi Nyidrëti troa mus, ngo ihnimi pe. Nge nyiqaane mama ha la ewekë cili ekö, ngöne lo kola ase xupe lo lue pane atr. Tha hnei Iehova kö hna musinë Adamu me Eva troa drengethenge Nyidrë, ngo hnei Nyidrëti pe hna nue nyidroti troa iëne la hnei nyidroti hna ajan. Maine ka nyipi hnimi Iehova ju nyidro me nyipine la nöjei ewekë hnei Nyidrëti hna kuca thatraqai nyidro, atreine hi tro nyidroti ekö a cile catre koi Satana.

Ame ngöne lo hneijine i Mose, öni angeice ngöne la cainöje tixenuë i angeice kowe la nöje Isaraela, ka hape: “Hana wang, hnenge hna amë qëmeke i ’ö ngöne la drai celë la mele me loi, nge meci me ngazo.” (Deu. 30:15) Qanyine pë hë la nöje troa iëne maine angatr a ajane troa mel. Ketre ceitune hi memine la hna qaja hnei Iosua; öni angeice ka hape: “Maine ngazo koi nyipunie troa nyi hlue i Iehova, iënejë nyipunie ngöne la drai celë la tro nyipunie a nyi hlue kow.” Önine jë hi la nöj e sa koi Iosua ka hape: “Epi tha tro kö huni a thipe tiji Iehova.” (Ios. 24:15, 16) Pi tro fe hi së a hane sa tune lai enehila. Maine hnimi Iehova hi hne së, “epi tha tro kö” sa nuetriji Nyidrë.

Ame e hnine la ekalesia i Keresiano, trotrohnine hnyawa hi së ka hape, hna nue së troa isa ië ewekë. Nyipici laka, hna acile la itre qatre thup troa eamone me hajine e itre xa ijine la itre atr, ngo tha qa i angatre kö troa musinëne la lapaune me mele i angatr. Ase hë Paulo aposetolo qaja ngöne la tus i nyidrëti ekö: “Tha eëhuni kö a musinëne la lapaune i nyipunie, ngo eëhuni a xatuane la madine i nyipunie, ke cile huti hë nyipunie hnene la lapaun.”—2 Kor. 1:24.

Ame fe ngöne la ketre ijin, hnei Paulo hna qaja koi Filemona ka hape: “Tha pi kuca kö ni kete ewekë e tha ’te kö ni la hni’ö ; mate cia xane kö la loi ’ö, nge tha thenge kö la hna musinën.” Paulo a sipo “ngöne la ihnim.”— Filem. 9, 14.

Ka loi ju kö la troa kuca la ketre ewekë e hne së hna ajan, ke hetre madrine së, hune la troa kuca la ketre ewekë hna musinë së troa kuca! Iehova a upi së troa kuca la loi fë la hni ka ajan. Celë hi lai ka mama ngöne la trenge ewekë i Paulo; öni nyidrë: “Maine ini a thawa la ite ewekënge koi ange pë ewekë, nge maine ini a hamëne la ngönetei nge mate deuthe tij ; ngo pëkö ihniming, hawe, pëkö thangane koi ni.”—1 Kor. 13:3.

Hnei Satana hna qaja ka hape, itre atr a nyi hlue i Akötresie, ngo tha hnene kö la ihnim i angatre koi Nyidrë, ngo angatre pe a isine göi thupen. Celë hi matre thatreine kö tro sa qaja la madrine i Iehova, ngöne la kola nyi hlue i Nyidrëti hnene la itre trahmanyi me föe ka hnimi Nyidrëti hnene la hni angatre ka pexej!

Qa ngöne lai, Iehova a hnime la itre hlue i Nyidrëti asë, ene fe la itre nekönatr me itre thöthi ka thipetrije la fen memine la nöjei ewekë hnene eje hna hamën, qa ngöne laka angatr a hnimi Nyidrë. Loi e troa xecie hnyawa koi nyipunieti laka, atraqatre fe la ihnim i huni koi nyipunie.—Luka 12:42, 43.

Hnei nyipunie itre trejine trahmanyi me föe, me itre thöthi hna amamane la ihnim i nyipunieti koi Iehova lo macatre hnapan, ke 1 748 697 447 lao hawa ne cainöjëne nyipunieti la maca ka loi. Ala 7 782 346 nyipunieti itre ka xome la huliwa cili e cailo fen. Tru catre la madrine hun la eahuni a atre ka hape, 268 777 fe la itre hna hane bapataison, itre ka tru me itre thöthi ka amamane laka, hnei angatre hna sa xepu koi Iehova. Kösë lo ala 5 168 la hna bapataisone e nöjei wiik. Ketre ketri eahuni pi hë la eahuni a drenge la itre hna kuca!

Easë asë enehila a ixelë memine la nöjei pengöne jol, me itupath, me iaxösisi, nge kola tithi së hnei mec, maine easa uti ipië trootro. Ngo tha pi tro kö sa “hmacahmaca” me “kucakuca.” Epi cengöne kapa hnei nyipunieti la hatrene ihnimi huni celë.—Heb. 10:39; 2 Kor. 4:16.

Itre trejine me nyipunie,

Lapa Ne Xomi Meköti Ne La Itretre Anyipici Iehova