Nyitipu Iehova Jë Troa Hetrenyi La Nyipi Ihnimi Koi Itre Xan

¹ Iehova la tulu ka sisitria ngöne la troa hnime la itre xan. Pine laka, Nyidrë la Joxu ne hnengödrai, me fene hnengödrai, ka tru la aja i Nyidrë troa hamëne la ka jijije kowe la itre hnei Nyidrëti hna xup, ene la itre atr. (1 Pet. 5:7) Hnei Iesu hna xatuane la itretre drei i nyidrë troa melëne la itre thiina ne la Tretretro i nyidrë, ka afetrane la jö me axulune la manie kowe la nöjei ka meköti me kowe fe la itre ka thaa meköti kö. (Mata. 5:45) Atreine tro fe epuni a nyitipu Iehova e tro epuni a troa hane amamane la ihnimi epuni kowe la itre xan​—ene la troa hnëkë troa cainöjëne la maca ka loi ne la Baselaia kowe la nöjei atr hnei epuni hna ixelë memin. Maine tro së a atrepengöne hnyawa la itre boroshüre hne së hna troa trofë e treu julai, ke, thaa tro kö a jole koi së troa hamëne la ixatua ka ijije ngöne la ua kowe la itre xan. Tro la itre aqane trofë celë a hamëne la itre xaa mekune göne la aqane tro epuni a hnëkë kowe la aqane nyiqaane ithahnata, me sisedrëne la aja jëne la itre iwaihmaca.

² Maine epuni a hamëne la boroshüre hna hape “Dieu se soucie-t-il vraiment de nous?” ke, qaja ju ka hape:

◼ “Hapeu, hane fe kö epuni isa thele la kepine matre tro la Akötresie a nue la itre atr hnei Nyidrëti hna hnime troa akötr? [Nue pi troa sa.] Thaa tro kö la boroshüre a sa hmekuje la hnyinge celë, ngo eje fe a amamane la hnei Akötresieti hna thingehnaean, ene la tro Nyidrëti a apaatrene la nöjei ngazo hna hna ikucakeune hnene la itre atr memine la hnei angeice hna kuca kowe la ihnadro.” E jë la paragarafe 23 ngöne la götrane 27. Amamane jë la iatr e cahu fen, nge e jë la Salamo 145:16 qa hnine la paragarafe 22. Hamëne ju la boroshür. Maine thaa ajane kö lai atr troa xome ej, ke, qaja ju la ketre hnyinge nyine troa sa ngöne la kola troa bëeke hmaca, hna hape, “Ajane kö epuni troa atre la aqane tro Akötresie a aeatrëne la aja i Nyidrë, ene la troa axulune la itre manathithi kowe la nöjei atr, me aparadraisone la fen?”

³ Ngöne la epuni a bëeke hmaca troa wange lo itre atr ka kapa la boroshür “Dieu se soucie-t-il vraiment de nous?” ke, nyiqaane ju la porotrike tune la:

◼ “Ame lo pane traqa ni, ke, hne so hna ce wange laka Akötresie a kukehnine la mele ka loi së, nge aja i Nyidrë troa apaatrene la nöjei ngazo hna ikucakeune hnene la itre atr, nge hna kuca fe kowe la ihnadro.” Fe jë la boroshüre kowe la iatr ngöne la götrane 2-3 nge qaja ju ka hape: “Hne so hna nyipune lo porotrike so hnene la hnyinge celë, hna hape, Tro Akötresie a aeatrëne tune ka la aja i Nyidrë, ene la troa axulune la itre manathithi kowe la nöjei atr me aparadraisone la fen? Hapeue la mekune i epun?” Nue pi troa sa. Fe jë kowe la götrane 17, nge e jë la paragarafe 2 memine la Daniela 2:44. Thupene lai, e jë la paragarafe 12 ngöne la götrane 18. Hnyingëne ju lai atr ka hape, maine aja i angeice jë fe troa hane ce wange me epuni la mekene 9 ne lai boroshür. Maine ajane hi angeic, ke, nyiqaane jë hë la etidi angeice jëne lai boroshür.

⁴ Hanawange la ketre aqane tro fë ka ijije göi troa hamëne la boroshüre hna hape “E Meci Hë La Atr Hne Së Hna Hnim.” Amamane jë la icetröne nge qaja ju ka hape:

◼ “Ame enehila eahuni a tro fë la boroshüre celë ka troa akeukawane me hamë mejiune kowe la itre milio lao atr trene sinee hna hnim, a ka meci hë. Hapeu, hnei epuni kö hna isa hane thele maine hetre mejiune jë fe kö thatraqane la itre ka meci hë? [Nue pi troa sa.] Tusi Hmitrötre a qaja amamane la hna thingehnaeane hnei Akötresie göne la melehmaca.” E jë la Ioane 5:28, 29. Fe jë la boroshüre, nge qejepengöne jë la itre mekune qa hnine la paragarafe ka nyipune la götrane 28 memine la pane paragarafe ne la götrane 31. Amamane jë la itre iatr sine trongen. Hamëne ju lai boroshür. Atreine hi tro epuni a hnëkëne la aqane troa iwaihmaca hnene la troa hnyinge ka hape, “Pine nemene matre ka xecie koi së laka, ka troa patre palua la mec?”

⁵ Maine hnei epuni hna hamëne la boroshüre hna hape “E Meci Hë La Atr Hne Së Hna Hnim,” ke, ngöne la epuni a bëeke hmaca, tupathe ju la aqane tro fë celë:

◼ “Ame lo ketre porotrike so, ke, hne so hna ithahnatane la mejiune ka sheming, ene la melehmaca. Kola qejepengöne hnene lo boroshüre hnenge hna amë pe, la kepine matre xecie koi së laka, troa apaatrene trije la mec. Hapeu hane fe kö epuni öhne laka, nyine iakeukawany, nge ka hamë mejiune la itre hnei Akötresieti hna thingehnaean?” Nue pi troa sa. Thupene lai, fe jë kowe la götrane  31 ne la boroshür, nge e jë la hnaaluene la paragaraf, memine la hnaakönin, nge e jë fe la Hna Amamane 21:1-4. Qaja atrune jë la mejiune ka eje the së, ene la troa mele epine palua. Qanyine kö la aja thene la atr, memine la aqane mele i angeic, ngo loi e troa hnyingë angeice ka hape, ajane kö angeice troa hane inine la Tusi Hmitrötre jëne la itus Connaissance, maine pena, qaja ju la ketre hnyinge matre troa nyijëi epuni troa iwaihmaca.

⁶ Ma tro epuni jë a tupathe la aqane tro fë celë la kola hamëne la boroshüre hna hape “Epi thatraqai nyipunie la mel ka tha ase palua kö e celë fene hnengödrai!”:

◼ “Alanyimu la itre atr ka isa thele la aliene la mel. Angatre a isa hnyinge ka hape: ‘Pine nemene matre eni a mel? Tune ka la melenge elany? Nemene la itre ewekë ka troa traqa elany koi ni?’ Hapeue la mekune i epun, eka la hnë tro së a öhne la itre mekune celë? [Nue pi troa sa.] Pane mekune ju la hna qaja hnene la Tusi Hmitrötr. [E jë la Salamo 36:9.] Hapeu, thaa ka meköti kö e troa qaja ka hape, atreine tro la Atre xupi së a qejepengöne la kepine matre easë a mel? [Nue pi troa sa.] Tro la boroshüre celë a amamane la aja i Akötresie ka tru, hnei Nyidrëti hna lapa mekune me hnëkëne koi së.” Amamane jë la itre iatr 47-49, e jë la itre hna cinyihane ngöne la iatr, nge qejepengöne itre ej; thupene lai, hamëne jë lai boroshür. Maine hna kapa hnene lai atr, ke, hnyinge ju ka hape: “Pine nemene matre xecie koi së laka, aja i Akötresie pala hi tro la itre atr a mele ka thaa ase palua kö ngöne la paradraiso e celë fen?” Ce wange ju la hawa ne iwaihmaca.

⁷ Maine hnei epuni hna amë lo boroshüre hna hape “Epi thatraqai nyipunie la mel ka tha ase palua kö e celë fene hnengödrai!” ke, ngöne la iwaihmaca, qaja ju ka hape:

◼ “Ame lo ketre traqa ni, ke, hnenge hna madrine lo porotrike so, laka Tusi Hmitrötre a qaja ka hape hetre aliene la mele ne la atr.” Amamane jë la iatr ngöne la icetrön, nge hnyinge ju ka hape, “Pine nemene matre xecie koi së laka, aja i Akötresie pala hi tro la itre atr a mele ka thaa ase palua kö ngöne la paradraiso e celë fen?” Hnyingë angeice ju ka hape, ajane kö angeice troa inine la Tusi Hmitrötre ngöne la hnalapa i angeic, nge thaa tro kö a hetre thupene la ini cili. Amamane jë la itus Connaissance, nge e hetre aja i angeic, haawe, canga amamane ju la aqane troa inine la Tusi Hmitrötre jëne lai sine tus.

⁸ Tro la aqane cainöje së a amamane la aja ka eje the së troa xatuane la itre atr, ka hni ka meköti troa “wangate hmekune la nyipici.” (1 Tim. 2:4) Celë hi matre amë ju la itre ijine ngöne la porogarame i epun, troa wange hmaca la nöjei atr hnei epuni hna amë pe la ketre boroshüre kow. Maine hetrenyi thei epuni la ihnimi kowe la itre atr, troa mama hnyawa lai ngöne la aqane xatuane epuni la itre ka akötre me treije pine la itre ewekë ka sisi hna kuca hnine la hmi ka thoi, matre tro fe angatre a hane hetrenyi la hatrene, jëne iamele koi angatr. (Ezek. 9:4, 6) Tro hë epuni a hane kapa la madrine ka xulu qa ngöne laka, epuni fe a hane nyitipu Iehova, ngöne la troa xatuane la itre xane hnene la hni ka ajan.​—Wange ju la Filipi 2:20.