“Catre Jë Troa Huliwa i Joxu Palahi”

¹ Ejehi laka, hetre porogarame së ka tru huliwane hne së hna troa aeatrëne ngöne la itre huliwa i Akötresie e treu Eiperem, me Mei! Ame e 14 Eiperem, ke, easë a troa atrune la Drai ne Amekunëne la ijine meci Keriso. Tro së a xatuane la nöjei atr ka kösau troa hane traqa matre nyipiewekëne la ijine cili: itre sine ce huliwa së, itre sinee së ka tha hmi kö, itre sine ce ini së, itre ka xötrei öhne la nyipici, itre ka ini Tusi Hmitrötr. Kuca ju la ca ipepa nyine fejane la itre hnei epuni hna mekune troa hane könën, matre pëkö hna troa thëthëhmin.

² Nge, ngöne la wiike thupen, ke, tro së a xatuane la itre ka sine la Drai ne Amekunën, troa hane drenge la cainöje ka ketre pengone kö hna kuca koi nöjei atr, e 23 Eiperem, ame la taan, ke, “Easenyi hë la pune kowe la hmi ka thoi.” Easë a mejiune laka nyimu atr ka ajan, me ka drenge la ithuemacanyi celë ka nyipici, nge easë fe a mejiune laka tro fe angatr’a öhne la enyipiewekëne la troa icasikeu lapa memine la ekalesia, ngo tha ene kö la tro hi a traqa e itre xaa ijin.

³ Troa trofë trongëne la Itre Ithuemacanyi ne la Baselaia ka ketre pengön: Ame la mekune ka sisitria ne la icasikeu e drai 23 Eiperem, ke, ene la troa hamëne ngöne la ijine ka ijije la Itre Ithuemcanyi ne la Base­laia No. 34 ka foa lao götran, nge hna troa trofë trongëne utihë drai 14 Mei. Hapeu, tha caasi kö la mekune i epuni laka troa “cate huliwa i Joxu pala hi” ngöne la ijine Amekunën?​—⁠1 Kor. 15:⁠58.

⁴ Troa hamën’atrune la Itre Ithuemacanyi ne la Baselaia ngöne la nöjei ekalesia. Troa amë acone la itre kareto hna nyialiene hnene la Itre Ithuemacanyi ne la Baselaia ngöne la ketre götrane ka sihngödr, tro hi a fe itr’ej ngöne la kola nyipune la icasikeu e drai 23 Eiperem. Ngöne la ijine cili, ke, ijije hë troa hamëne kowe la itre trejine me kowe la nöjei atr. Ngöne la kola nyipune la icasikeu ne la ekalesia e drai 23 Eiperem, ke, troa kapa hnene la isa alacasi la ca tarake matre ijije troa atrepengöne hnyawaane la alien, me hnëkë göi troa hamëne trongën’ej.

⁵ Tro La Itre Qatr’a Catre Huliwa i Joxu: Tro la itre qatre thup’a itronyi ngöne la mekene treu troa ithahnataane la itre xaa mekune göne lai huliwa cili ka ketre pengöne kö. Tro la itre ekalesia a catre troa huliwaane hnyawaan’asë la götrane i angatr. Qëmekene la kola troa nyipune la huliwa celë, ke, catre jë së troa ketr la nöjei atr ngöne la itre teritoare lo laka qea ha la hna tha cainöjën. Ame la easë a goeëne la enyipiewekëne la huliwa, ke, kola amejëne la aja së troa ami ijine troa cainöje trootro. Eje hi laka alanyimu catre kö la itre ka cainöje trootro ka troa pionie ka ixatua la treu celë hune lo itre xaa ijin. Eje mina fe laka, ma tro la itre ka ini Tusi Hmitrötre ka kösau a hane nyixanyi së, troa itretre cainöje ka tha bapataiso petrekö. Drei la ketre ijine madrine tro së a kapa qa ngöne la hne së hna catre ce huliwa i Joxu!

⁶ Tro la itre ka elemekene ne la ini tusi ne la ekalesia a hnëkëne la ketre gurupe thatraqane la huliwa ne cainöje e mecixeni me sabath. Troa xatuane la nöjei atre cainöje troa hane isa catre kuca la huliwa celë. Ketre, ngöne la ijine huliwa cili, troa hnëkëne fe la ketre porogarame ne huliwa ne cainöje trootro göi hej; maine tro hi a caasi ngöne la wiik. Itre xan’a mekune troa cainöje e thupene la hna ini, matre hane cetro me xatuane la itre thöth, ka ajane troa hane cainöj.

⁷ Troa hnëkëne la itre icasikeu ne la huliwa ne cainöje matre aijijëne la itretre cainöje me itre pionie troa canga nyiqaane la huliwa ne cainöje e nöjei drai. Tha tro kö a aqeane la itre icasikeu cili. Loi e tro së isa alacasi a hnëkëne la ketre aqane troa trofë la Itre Ithuemacanyi ne la Baselaia, ka tha jole kö. Ame ngöne la itre icasikeu ne huliwa ne cainöj, e hnaipajö, ke, tro fe a qaja la ca mekune maine luetre göi troa wange hmaca lo itre ka kapa la Itre Ithuemacanyi ne la Baselaia. Ngo, hnei itre xaa ka cainöje hna mekune troa hamëne trongën’itr’eje e hmakanyi, me e hnaipajö. Hawe, tro la atre thupëne la huliwa ne cainöj’a mekune hnyawaane laka tro palahi a hetre teritoar. Troa cinyihane la ëjen, me aderesi ne la atr ka amamai aja ngöne la pepa ne xomi not trootro. Tro fe a cinyihane la itre mekune ka nyipiewekë hna ithahnataane ngöne la götrane lo hna hape, itre hna öhn. Tro la aqane kuca celë a hnëkë së kowe la iwaihmaca ngöne la wiik, maine ngöne la treu.

⁸ Ame itre xaa ka cainöj, ke, angatr’a ajane troa hamë ixatua kowe la ketre ekalesia e mëëk, maine ngöne la itre hnapeti pena, matre troa huliwaane hnyawaane la itre götrane cili, nge ka nyipiewekë catre e maine atreine angatre qaja la qene hlapa ne la nöj, nge kola kepe angatre ngöne la itre götrane hna wathebone la huliwa ne cainöje trootro ngöne la itre hnalapa. Maine jë, tro la itre xaa ka cainöj’a xomi vakasi matre troa hane sine la huliwa celë e Vanuatu, maine e Walis, me Futuna. Tro angatr’a iöhnyine memine la kolezi ne itre qatre thupe ne la ekalesia i angatr, nge tro pë hë angatr’a thuemacanyi filial. E maine hne së hna öhne la ketre atr ka tha lapa kö ngöne la teritoare së, ke, loi e troa hamëne la ëje i angeice me aderesi angeice kowe la ekalesia ka huliwaane lai teritoar.

⁹ Itre keme me thin, hapeu, itre nekö i epuni kö a hane isiine troa kökötre ngöne la götrane ne la ua matre itretre cainöje hna tha bapataisone angatr? Hna öhne laka ame ngöne la itre xaa ekalesia, ke, hnene la itre nekönatre ka loi thiina hna ce tro memine la itre keme me thine i angatre ka hni koi Iehova ngöne la huliwa ne cainöje a nyimutre hë la itre macatre enehila, nge itre nekönatre ka maca hë enehila, ngo tha itretre cainöje ne la maca ka loi pala kö angatr. Tro la itre keme me thin’a mekune hnyawaane ka hape nyipi ijije kö la itre nekö i angatre kowe la hnëqa celë. Tro la luetre e itre qatre thup’a ce ithahnataane la itre pengöne memine la hene ne fami, me wange ka hape ijije kö tro lai nekönatre a hane ketre atre cainöje hna tha bapataison.​—⁠om pp. 99-100.

¹⁰ Hapeu, hetre itretre cainöje kö ngöne la ekalesia i epuni ka nango pujehnine e troa hamë huje ne atrunyi Iehova? (Heb. 13:15) Ngacama itre xane palahi a xötrethengene la itre tulu ka meköti ne la Tusi Hmitrötr, ame pe, ke, nanazijë hë angatr, pine laka, hna akötrëne jë la hni angatr, maine hna ajolëne pena la mele i angatre hnene la itre ehacene la fen. Tro la iwai hnene la ketre qatre thup’a ithuecatre hmaca koi angatre matre tro hmaca angatr’a hane sine la nöjei icasiekeu ne la ekalesia, nge ngöne la ketre ijine ka ijij, tro hmaca angatr’a hane nyiqaane ne cainöje trootro.

¹¹ Tro La Nöjei Ka Ijij’a Hane Sine La Huliwa Ne Madrine Celë: Hapeu, hna öhnyi jole kö hnene la itre nekö i epuni, maine itre thöth, troa hane cainöje ngöne itre hnalapa trootro? Nge, nemene fe la pengöi epuni itre ka xötrei cainöj, itre ka tha maca hnyawa palakö ngöne la huliwa ne cainöj? Tro kö epuni a öhne la madrine hnei epuni hna troa kapa qa ngöne la hna huliwaane la Itre Ithuemacanyi ne la Baselaia! Ame la ka nyipiewekë, ke, troa hnëkëne la ketre aqane trofë ka tha jole kö.

Ijije tro epuni a qaja tune la:

◼ “Ame la treu celë, ke, eahuni a hamëne trongëne la ketre ithuemacanyi ka nyipiewekë ngöne la 232 lao nöje e celë fene hnengödrai. Ka nyipiewekë catre la ithuemacanyi celë pine laka ej’a hamë së la itre aliene ka catre matre hetre mejiune së kowe la nyin la itre jole hne së hna cile kow enehila. Madrine fe huni e tro epuni a hane hetrenyi la pepa celë.”

Maine pena tro epuni a tupathe la aqane trofë celë:

◼ “Ame la treu celë, ke, faifi milio lao ka saene troa trofë trongëne la ithuemacanyi ka nyipiewekë ngöne la itre qene hlapa ka isapengön. Hna hnëkën’eje kowe la itre atr ka ajane troa apatrene la itre akötre hne së asë hna cile kow enehila. Hanawange la ca pepa koi epun.”

Maine jë epuni a ajane troa qaja la aqane trofë celë ka tha jole kö:

◼ “Eahuni a xatuane la nöjei atr troa e la ithuemacanyi ka nyipiewekë hna nyitaane ka hape [e jë la taane ne la Itre Ithuemacanyi ne la Baselaia]. Pane goeëne ju la hna qaja ngöne la götrane 2 göne la etrune la itre jole ne . . . [e jë la xötre hna iëne qa hnine la Itre Ithuemacanyi ne la Baselaia]. Ejehi, ame koi hun, ke, troa hetre madrine i epuni e tro epuni a e la ithuemacanyi ka ijije celë. Hane fe la pepa i epuni.”

¹² Nyipiewekëne ju la aja hna öhne thene la nöjei ka kapa la Itre Ithuemacanyi ne la Baselaia. The ithahnata nyimenyime kö; ketre, troa saathe hnyawa la ithahnata nyine qaja; the ithahnata kö ceitu me kola iwaja matre canga traqa kowe la pun. Easë a ajane troa huliwaane hnyawaane la itre götrane së, me hamëne kowe la nöjei atr ka ajane troa e lai Itre Ithuemacanyi ne la Baselaia, memine fe la itre atren’asë ngöne la caa fami. E pëkö atrene lai hnalapa, ke, sijihatrene hnyawa ju ngöne la not ne la itre hnalapa trootro, matre ijije tro epuni a bëeke ngöne la ijine ka ijije troa hamëne la Itre Ithuemacanyi ne la Baselaia kowe lai atr. Tro fe a trofë trongëne la Itre Ithuemacanyi ne la Baselaia ngöne la kola cainöje e cahu gojeny, me hane hamëne kowe la itre atr ka ajane troa e itr’ej. Ngo tha tro kö së a hamëne itr’ej ceitune me itre pepa ne ihule koi itre setroa. Loi pe, tro së a easenyine la itre ka tro, me qejepengöne la enyipiewekëne la ithuemacanyi hna trofë. Ngöne la epuni a cainöje e nöjei ijin, ke, hane ju hamëne la Itre Ithuemacanyi ne la Baselaia, maine ngöne pena la epuni a tro kowe la ketre nöj me ketre nöj, maine ngöne la epuni a cainöje kowe la itre sine ce huliwa i epuni e kola mano treqene troa xejë hmaca la huliwa. Ame koi itre ka thatreine kö troa tro qa ngöne la hnalapa i angatr, pine la itre xaa kepine ka nyimutre, ke, ijije tro angatr’a hamën’itr’eje kowe la itre ka traqa troa wai angatr, me itre droketre, me itre ëfirmie, me itre ka salem, me itre xane ka traqa kowe la hnalapa i angatr.

¹³ Ije iwaihmaca tro epuni a kuca ngöne la ijine huliwa celë? Ejehi laka troa nyimutre catr, pine laka troa wange hmaca la nöjei ka amamai aja kowe la Itre Ithuemacanyi ne la Baselaia. Ngöne la xötrei iöhny, ke, loi e troa amamane hmekuje la Itre Ithuemacanyi ne la Baselaia. Thupene lai, ngöne la epuni a bëeke hmaca, ke, qaja ju la itre xaa mekune ka ijije qa hnine la Itre Ithuemacanyi ne la Baselaia. Drenge hnyawaane ju la kola fe amamane hnene la atr, la itre mekune i angeice ngöne la hnei angeice hna e. Tro lai a xatua epuni troa atrehmekune la zonale hna hnyipi kapa nyine troa hamën, memine fe la taane ne mekune nyine troa ithanataan. E maine ajane hi la atr troa wai angeice hmaca, ke, thelejëne jë troa nyiqaane inine la Tusi Hmitrötre me angeic.​—⁠1 Kor. 3:​6, 7.

¹⁴ “Tha Gufa Kö La Huliwa i Nyipunie”: Hapeu, nyipiewekë kö la nöjei hna kuca thatraqane la huliwa celë? Hnei Paulo hna anyipicine koi angetre Korinito ka hape: “Tha gufa kö la huliwa i nyipunie kowe la Joxu.” (1 Kor. 15:58) Hna amanathithine palahi ngöne la itre macatre la huliwa celë, ene la troa hamëne trongëne la Itre Ithuemacanyi ne la Baselaia. Hnene la lue trefëne hna nyidrawane la ketre hnalapa hnei nyidroti hna troa xötrei lapaan, öhne ju pe hi nyidro la ketre pepa hnapane hnine la hnë ami heetr, ene lo Itre Ithuemacanyi ne la Baselaia. Celë pehi la ewekë hna amë pe hnene lo itre ka trotrije la uma. Thupene la hnei nyidroti hna e, ke, nyidroti a iöhnyine ju memine la ekalesia easenyine lai hnei nyidro hna lapa, ame hnei nyidroti hna sipone troa ini Tusi Hmitrötr. Hnei nyidroti hna nyiqaane sine la nöjei icasikeu, nge thupene lai hnei nyidroti hna fe amamane la aja i nyidro troa hane bapataiso. Maine jë, troa ceitune lai memine la itre pepa hnei epuni hna amë pe!​—⁠km 2/75 p. 1; goeëne ju fe Réveillez-vous!, 22 Febuare 1977, götrane 15.

¹⁵ Tru catre la huliwa nyine troa kuca. Ame la aja së, ke, loi e tro la nöjei ekalesia a isa fenesi troa huliwaane hnyawaane la itre teritoare hna athipe koi angatr e 14 Mei, maine ngöne la pune ne la treu pena göi itre götrane hna ajane palakö troa hamëne lai Itre Ithuemacanyi ne la Baselaia. Loi e troa nyimutre la Itre Ithuemacanyi ne la Baselaia hna troa iupifë matre ijije tro la nöjei pionie lapa, me pionie ka ixatua a kapa la 250 lao pepa, nge ame koi itretre cainöj, ke, 50 lao pepa. Tro la itretre cainöje me itre pionie a kapa hmekuje la etrune la itre pepa hna mekune troa trofë trongën. Nge e nango tru pala ha koi angatr, ke, troa hamëne matre tro itre xane a huliwaan. E tro së a ce huliwa hnyawa, ke, tro la ithuemacanyi ka nyipewekë a haöthe la itre götran’asë.

¹⁶ Loie tro së a lapa qale catre koi Iehova matre atreine së troa aeatrëne hnyawa la huliwa hna upi së troa kuca. (Kol. 3:23) Kola të drea la mele ne la nöjei atr. Pëkö nyipi kepine tro angatr’a lapa thatre la aliene la nöjei ewekë ka traqa kowe la fene hnengödrai enehila. Calemi hë la pun. Loi e tro angatr’a atrehmekune hnyawa laka tha thei atr kö la nyin la nöjei jole ka traqa kowe la fene hnengödrai. Akötresieti hmekuje hi la ka atrein. Ame la itre ka ajane troa hetrenyi la itre manathithi qa thei Akötresie, ke, tro angatr’a canga mekune me axeciëne e kuhu itre hni angatr, tha tro kö a hmiitre troa melëne thenge la itre hnei Nyidrëti hna amekötiin.

¹⁷ Ngöne la kola nyipune la huliwa ka ketre pengöne e 14 Mei, ke, hapeu, tro hë së a mano? Ohea! Tro së a sisedrëne troa catre huliwa thenge la hna eamo së hnei Paulo, eamo qa thene la uati hmitrötr.