Loi e Troa “Catr Ngöne La Nöjei Huliwa Ka Loi” e Treu Eiperem!

¹ Ame lo macatre hnapan, lo ijine kola cia dröne hmaca la itre sinöe, ke, hna hamëne la itre milio lao tarak, ene lo hna hape Itre Ithuemacanyi ne la Baselaia No. 34, tha hna hane kö cainöje tune lai ngöne la itre xaa macatre. Hna caasi me catre anyipicine hnene la itretre cainöje ne la ekalesia memine la itre pionie ngöne la huliwa ka ithuecatre cili. Hapeu, hnei epuni kö hna hane ce huliwa me angatr? Maine eje hi, ke, nyipici laka hna hetre madrine i epuni ngöne la ijine cili. Ame enehila, ma drei jë la epuni a isa hnyinge ka hape, Nemene jë la ‘huliwa ka loi’ hna hnëkëne koi së ngöne la macatre celë?​—Tito 2:14.

² Ngöne la treu eiperem, memine la qaane la treu mei, ke, tru la madrine së troa tro fë trongëne la zonale hna hnëkëne mekötine kowe la huliwa ne cainöje trootro thatraqane la lue treu cili, ene la Réveillez-vous! ne 22 eiperem, 1996, hna nyi taane ka hape “Eue la ijine troa paatre hnene la itre isi.” Ijije tro la taane mekune celë a ketr la itre atr ka nyimutre, haawe loi e tro së a catre me tru la zonale ka tune la hne së hna troa hamëne trongën. Ka nyipi ewekë catre la itre mekune e hnine la Réveillez-vous!, celë hi matre loi e troa tro fë ej ngöne la itre treu eipereme me mei, uti hë la troa pë lai zonale cili.

³ Ame La Aja Së​—Troa Huliwa Hnene La Ange Ka Cainöj Asë: Ketre ixatua ka tru e tro la nöjei ka cainöje ne la nöjei nöj a catre cainöje trootro ngöne la treu eiperem. Qa ngöne laka, thaa qea ju kö thupene la hne së hna atrune lo Drai ne Amekunëne matre eje pala kö ngöne la mekune së la aliene la mec i Keriso, eje hi laka troa tru la aja së troa amamane la madrine së kowe la thiina ka loi i Akötresie hnene la troa hamëne “la huje ne atrunyi Akötesie” ngöne la huliwa ne cainöje trootro..​—Heb. 13:15.

⁴ Loi e troa catre waipengöne la itre aja ne la nöjei atrene la ekalesia matre tro asë hi angatre a hane thele troa catre cainöje ngöne la treu eiperem. (Rom. 15:1) Loi e tro la itre ka cilëmekene la ini tusi ne la ekalesia a hmekëne hnyawa la itre ewekë ka troa ajolëne la itre atrene la hna ini tus i angatr, ene la troa wange ka hape, hapeu, hetrenyi kö la itre trejine ka pë loton? Haawe, drei la ka ijije troa iati? Nge hetrenyi kö la itre ka lapa thaupe me ka xoue atr? Tuneka matre ce cainöje me angatre hnene la itre trejine ka majemine hë nge ka hetre atreine ngöne la huliwa cili? Hapeue la itre ka umë maine itre ka wezipo pena? Ijije kö tro angatr a cainöje kowe la itre atr jëne telefon, maine troa cinyanyi pena, maine jëne la ketre aqane huliwa ka ijije troa hetre thangane ka loi qa ngön?

⁵ Nyimutre la itre trejine ka nanazije matre tha cainöje hë, eloi ne pe angatre a kapa pala hi la itre ixatua ngöne la ua, ene lo itre ithuecatre ka upi angatre troa xejë hmaca la huliwa ne cainöj. Tro la huliwa ka ketre pengön, ene la troa tro fë la Réveillez-vous! a hamëne la ketre ijine ka ijije koi angatre troa xejë hmaca la huliwa ne cainöj.

⁶ Inine Jë La Itre Thöthi Troa Hane Huliwa: Ngacama thaa itretre cainöje thaa hna bapataisone petre kö la itre neköne la itre Temoë i Iehova, ngo ame pe, ke, nyimu macatre hë ne cainöje angatre me itre keme me thine i angatre ngöne la huliwa ne cainöje trootro. Hapeue enehila, ijije kö tro angatre a hane itretre cainöje hna tha bapataisone petre kö? Tuneka, hna upi angatre kö hnene la hni i angatre troa hane cainöje trootro ngöne itre hnalapa? Troa eje lai e tro la itre hene fami a wai ijine pala hi ngöne la kola ini Tusi Hmitrötre memine la fami matre troa xatuane la itre nekö i angatre troa amacane la itre xaa aqane tro fë cainöje ka loi, ene la troa hnëkëne hnyawa la aqane nyiqaane ithahnata hna pi drenge me atreine trotrohnine hnene la itre atr, pine laka ka ihmeku memine la mele i angatr, me itre jole hnei angatre hna melën. Haawe, tro la itre nekönatre ka tru a hnëkëne la ketre hnyinge ka ijije troa amejëne la ketre mekune ka tru, ka troa thele la aja ne la atr, nge thupene lai tro angeice a qaja atrune la mekune qa hnine la zonal. Ame itre nekönatre ka co, ke ijije fe troa hetre thangane la hna cainöje trootro hnei angatr, ngacama tro hi a co la itre hnepe ithahnata hnei angatre hna troa hane qaja. Hanawange la ketre ceitun, ijije tro angatre a xatuane la ketre atr troa “e la ketre zonale ka ketre pengöne me hna troa tro fë ngöne la treu celë e cailo fene hnengödrai.” Ngöne la epuni ce hnëkë memine la fami i epun, ce wange ju fe la itre xaa mekune ka ijije matre hetre nyine tro epuni a sa kowe la itre atr ka thele troa isi memine la itre mekune i epun. Tro epuni a öhne la itre mekune ka nyimutre me ka loi ngöne la itus Comment raisonner. Ngöne la itre hawa ne xen, ke, xatuane jë la itre atrene la fami troa qaja la isa hnei angatre hna kuca ngöne la huliwa ne cainöj.

⁷ Tro La Itre Ka Ini Tusi Hmitrötre Ka Ijije Hë a Xomi Tulu Qa Ngöne La Huliwa Hnei Iesu Hna Amë Pe: Ame la troa inine la Tusi Hmitrötr, ke, thaa huliwa hmekuje kö lai hnei Iesu hna kuca kowe la itre atr. Hnei nyidrëti fe hna ce tro memine la itretre drei i nyidrë ngöne la huliwa ne cainöj, me ini angatre me amamane la aqane troa cainöj. (Luka 8:1; 10:1-11) Tuneka hë enehila ngöne la hnedrai së? 1 500 nge sin lao ka ini Tusi Hmitrötre e Kaledonia. Tha luele kö së laka jëne la itre ithuecatre ka ijij, troa nyimutre la itre ka ini Tusi Hmitrötr ka kökötre ngöne la ua nge atreine tro fe hë angatre a hane itretre cainöje hna tha bapataisone petre kö e treu eiperem.

⁸ Maine epuni a kuca la ketre etid, ke, pane mekune ju la itre hnyinge celë: Kolo kö a kökötre hnene la ka etid, nge ihmeku kö la trenge catre hnei angeice hna kuca memine la macatre i angeic, me atreine i angeic? Hnei angeice kö hna qaja amamane la lapaune i angeice kowe la itre xaa atr ngöne la nöjei ijine ka ijij? Angeice kö a xeetrëne la “ate ka hnyipixe”? (Kol. 3:10) Hapeu, angeice kö a trongëne la itre hna amekötine matre troa hane ketre atre cainöje tha hna bapataisone petre kö, tune la hna amamane ngöne la götrane 98 uti hë 100 hnine la itus Notre ministère? Maine epuni a mekune ka hape ijiji angeice hë troa hane cainöj, ke, hnauëne laka tha ce ithahnatane kö me angeic la götrane cili? Ame kowe la itre xaa ka etid, angatre pe hi a lapa treqene troa könë angatre kowe la huliwa ne cainöj. Eje hi laka, maine ajane hi la ka etid troa cainöj, ke, loi e tro la atre thupe perezida a pane ce wange me ce ithahnatane lai memine la lue qatre thup. Ngöne la ketre götran, ma troa hetre ewekë ka ajolëne la ka etid troa cainöj. Loi e tro la ketre qatre thup a ce sine me epuni la etid, me thele mekune thene la ka etid, matre tro angeice a fe amamane la aliene la hni i angeice kowe la nyipici. Thupene la hna drenge la hna qaja hnene la ka etid, atreine tro la qatre thup a hamëne la itre ixatua ka ijije qa hnine la Tusi Hmitrötr.

⁹ ‘Anyipiewekëne Jë La Nöjei Ijin’ Jëne La Huliwa Ne Pionie Ka Ixatua: Ngöne la nöjei macatre, ngöne lo ijine Amekunëne la mec i Keriso, ke, atraqatre la ole ne la itre thauzane lao trejine kowe la thupene mele i Iesu, matre angatre a ‘anyipi ewekëne la nöjei ijin’ ngöne la angatre a xome la huliwa ne pionie ka ixatua. (Efe. 5:15-17) Ngacama tru la itre trenge catre hne së hna troa hamën, ngo ame pe, ke, tru catre la loi hne së hna troa kapa qa ngön. Alanyimu catre la itre thöth ka thiina ka loi, angatre a xome la huliwa ne pionie ka ixatua ngöne la angatre a vakaas. Ame koi itre xaa trejine ka huliwa ngöne la drai ka pexej, ke, angatre a catre cainöje e hej, me mecixeni me sabath. Qa ngöne lai, hnene la itre atrene la itre fami asë hna ce xome la huliwa ne pionie ka ixatua! Ngöne la itre xaa ekalesia, nyimutre catre la itre qatre thup me itre drikona cememine la itre ifënekö i angatre ka ce xome la huliwa cili. Jëne la tulu ka loi hna hamëne hnei angatr, kola upe la itre xane troa nyitipu angatr, celë hi kepine matre alanyimu catre la itre trejine ka xome la huliwa ne pionie ka ixatua ngöne la treu eiperem.

¹⁰ Maine ijiji maine tha ijije pena tro epuni a pionie ka ixatua, ngo loi e troa thele jëne troa aelëne la etrune la hna cainöje hnei epuni e treu eiperem. Amë ju la ketre mekune hnei epuni hna ajane troa traqa kow, ngacama ketre aja ka tru ejolene catr, ngo atreine hi troa eatrën. Tro epuni a öhnyi manathithi qa thei Nyidrë qa ngöne laka hetre aja i epuni troa “huliwane asë la nöjei ewekë i epun, me ketre nue apexejenyi epun” ngöne la huliwa i Nyidrë, ngacama ketre hetrenyi la itre jole thei epun.​—2 Kor. 12:15 (NW).

¹¹ Itre Icasikeu Thatraqane La Huliwa Ne Cainöj: Loi e troa hnëkëne ngöne la nöjei drai la itre icasikeu thatraqane la huliwa ne cainöje göne lo tro fë la zonal Réveillez-vous!, troa iëne la ketre traeme ka ijije matre troa canga nyiqaane cainöj. Loi e tro fe a hnëkëne la itre icasikeu kowe la huliwa ne cainöje e hej. Troa alanyimu la itre ka cainöje e nöjei mecixeni me sabath, haawe celë hi matre, loi e tro la itre ekalesia a hnëkëne amë ngöne la porogarame la itre icasikeu thatraqane la huliwa ne cainöj e mecixeni hmakanyi me hnaipajö ngöne la ijine kola tro fë lai zonal Réveillez-vous!

¹² Loi e tro la itre ka troa elemekene la itre icasikeu göi cainöje trootro a hetrenyi la nyimu teritoare thei angatr. Troa kuca panëne la itre teritoare tha hna huliwane pala kö.

¹³ Ije Zonale Hnei Epuni Hna Mekune Troa Hamën? Isa qanyi së kö isa alacasi troa sa la hnyinge celë. Ngöne la epuni a troa mekune la etrune la itre zonale nyine tro epuni a tro fë ngöne la huliwa cili ka ketre pengön, ke, pane wange ju la pengöne la teritoare hnei epuni hna troa huliwan, memine la macatre i epun, me trenge catre i epun, memine la traeme hnei epuni hna troa xome thatraqane la huliwa, me itre xaa götrane ju kö. Pane mekune ju pe, lo nyine amekunëne hna hamëne ngöne lo La Tour de Garde ne 1 januare, 1994, kola hape: “Loi e tro la itretre cainöj a isa catre troa amë la 10 lao zonale ngöne la treu, ngo qanyine kö la hna atreine hne së isa alacaas; ma tro la itre pionie a mekune troa amë la 90.” Hapeue la mekune celë, atreine fe hi epuni troa aeatrëne lai?

¹⁴ Qatre Thup​—Nyipi Ewekë Catre Troa Metrötrëne La Porogaram: Loi e troa xeci koi angatre ka hape, hna huliwan asë la itre teritoare hnene la ekalesia ngöne la kola tro fë trongëne la zonal Réveillez-vous! Loi e tro fe angatre a wange hnyawa la itre teritoare hnë thele mani, hna athipe kowe la ekalesia. Ame koi itre ka troa cainöje ngöne la itre götrane cili, ke, loi e troa hnëkë hnyawa, nge loi e troa lolo fe la aqane hetr. Tha loi kö troa thele la ketre aqane nyiqaane ithahnata ka jole pala ha troa trotrohnin. Ngöne la epuni a easenyine la ketre atr ka thele mani, ke, epuni pë hë a qaja jë ka hape tha hnei epuni kö hna majemine öhne la itre atr thele mani ngöne la hnalapa i angatr, haawe, epuni a traqa ngöne la hnë huilwa i angatre matre troa tro fë la ketre hna cinyihane ka nyipi ewekë thatraqai angeic. Thupene lai, epuni pë hë a amamane ju la ketre mekune ka tru hnine la zonal. Loi e tro fe a hnëkëne la itre ijine troa tro fë la itre zonale ngöne la kola cainöje e nöjei ijine ka ijij ngöne la itre teritoare ne la ekalesia. Pine laka troa goeëtili epuni hnene la itre atr, loi e troa thupëne hnyawa la pengö së, ene la aqane heetre së me aqane ele ihe pena. Hetrenyi fe la itre xaa götrane hnë tro epuni a cainöje ngön, tune la itre hnë kei hnei avio, maine ngöne la pital, maine ngöne itre hnë ami loto, maine pena ngöne la itre uma thatraqane la itre sine qatr. Loi e tro la koleji ne la itre qatre thup a wange hnyawa la itre nyine troa hnëkëne thatraqane la huliwa cili, ngöne la teritoare ne la ekalesia i epun.

¹⁵ Iehova la ketre Atre ka catre huliwa pala hi. (Ioane 5:17) Hnei Nyidrëti hna xupe la hnengödrai me ihnadro, memine fe la itre sinöe me itre öni, nge tha hnei Nyidrëti kö hna hmaca e cili, pine laka hnei Nyidrëti hna nyipune ngöne la kola xupe la atr. Ame laka easë pi hi la, ke, thangane hi la hna catre huliwa hnei Akötresie. Maine easë la itretre “nyitupu Akötesie,” jëne la ihnimi së koi Nyidrë, tro lai a upi së troa “catre kowe la nöjei huliwa ka loi.” (Efe. 5:1; Tito 2:14) Pine laka atraqatre koi Iehova la trenge catre hne së hna kuca kowe la huliwa i Nyidrë, nge tune fe la ajane troa kepe manathithi pine la hna catre cainöj, eje hi laka tro hë së a aloine la aqane cainöje së. Eje hi laka, Iehova a kapa madrine la aqane catre së troa kuca la huliwa i Nyidrë, nge tha ka gufa kö la huliwa së. (1 Kor. 15:58) Haawe, maine ka mele e kuhu hni së la ole koi Iehova, loi e tro së a isa catre cainöje e treu eiperem, nge ka xeci koi së laka Iehova a kapa la itre huliwa së, ngo tro Nyidrë a amanathithi së, qa ngöne lai tro fe së a öhnyi thangane la hne së hna catr nyi hlue i Nyidrë!