Ijije Kö Troa Hane Sisitria Koi Së La Treu Eipereme 2000?
1 Troa sisitria la heji ne drai ka co 19 eiperem, ngöne la macatre ne huliwa së. Ame la kola troa lö la jö ngöne la ijine cili, tro la nöjei gurupe me nöjei ekalesia ne la Itretre Anyipici Iehova e cailo fene a atrune la Drai ne Amekunëne la meci Keriso. Ngacama isa götrane kö hne së hna mele ngön, ngo troa ketre ijine ka sisitria ngöne la macatre la easë a troa amekunëne la mele hna hujëne hnei Iesu. Hna cinyihane la ijine troa atrune la Drai ne Amekunën, hnine la Idrai së thatraqai eipereme 2000, lo hna hape “Calendrier des Témoins de Jéhovah 2000”, götrane 6.
2 Kola aijijë së ngöne la treu eipereme tro së a amamane hnene la hni së ka pexej, la ole së kowe la ihnimi gufa i Iehova, hna jëne la mele hna hujëne hnene la Hupuna i Nyidrë. Hna tune kaa? Hna cinyihane hnei Paulo ka hape: “Kola musinë huni hnene la ihnimi Keriso, nge dei lola mekune huni, laka, hna meci hnei kete thatraqanasë, ke meci asë; nge hnei nyidëti hna meci thatraqanasë, mate tha tro hmaca kö a mele koi angate kö ange ka mel, ngo loi pe koi nyidëti ate meci nge mele hmaca ha thatraqai angat.” (2 Kor. 5:14, 15) Eje hi laka, ame ngöne la treu eiperem, ijije hi tro së a amamane ka hape, thaa easë kö a meku së, ngo easë a mele koi nyidrë atre meci thatraqai së; qa ngöne lai, loi e troa nyipi ewekëne catrëne hne së itre hlue ne la Baselaia, la treu eiperem!
3 Saene Jë Troa Pionie Ka Ixatua e Treu Eiperem: Paulo aposetolo a hamëne la tulu koi së ngöne lo nyidrëti a qaja ka hape: “Ngo tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine la maca ka loi ne la ihnimi gufa i Akötesie.” (Ite hu. 20:24) Celë mina fe hnëqa lai hne së hna xom, ene la troa anyipici Iehova Akötresie. Haawe, catre pi së troa hane pionie ka ixatua ngöne la treu eiperem!
4 Troa lolo la treu eipereme 2000 troa pionie, pine laka, faifi lao mecixeni me sabath. Maine tro sa goeëne hmaca lo maac 1997, ngöne lo kola pane elë la etrune la itre pionie ka ixatua ngöne la köni nöje e Kaledonia, ene e Tas, me Walis, me Futuna; kola e la 310 lao ka pionie, matre kösë 17 koi 100 ngöne lo 1772 lao ka cainöj. Köni macatre thupen, hna elë la etrune la itretre cainöj. Kola amamane ka hape, atreine hi tro sa sasaithe lo lai 310 pionie ka ixatua. Ketre, hna acone hë lo etrune lo itre hawa, matre kösë atreine hi troa xome la huliwa cili hnene la itre trejine ka ala nyimu ngöne la ekalesia. Loi e tro la nöjei trejine a mekune hnyawa ngöne la thith, maine ijiji fe tro angatre a hane pionie ka ixatua e eiperem.
5 Ame ngöne la easë a xome la treu eiperem ngöne la Calendrier 2000, hnëkëne jë fe la porogarame së kowe la treu hnapin. Mekune jë la itre drai hnei epuni hna troa xome troa cainöj, nge amë ju fe la itre hawa hnei epuni hna atreine troa kuca ngöne la treu. Xome ju fe la traeme hnei epuni hna xome troa cainöje kowe la xaa atr, maine ngöne itre hnalapa trootro, maine ngöne la nöjei ijin. Hapeue la epuni a mekun, ijije hi troa eatrëne lai 50 lao hawa ne pionie ka ixatua? Maine thaa pexeje kö la itre hawa hna amekötin, tune kaa matre thaa thele jëne hnei epuni la aqane troa saze la porogarame i epun, matre troa hetre traeme ne troa pionie ka ixatua? Tro hi a kuca la caa hawa, nge 40 menetre ngöne la nöjei drai, matre traqa pi kowe la 50 lao hawa ngöne la treu.
6 Pine laka, ase hë nango autine la hawa thatraqane la itre pionie lapa, haawe, tune kaa matre hane jë fe epuni xome la huliwa cili? Pine nemene matre troa treqene la drai hedredrei? Pine laka, kolo ha troa fenesi la itre drai hnötr, haawe, lolo troa nyiqaane lai ngöne la treu eiperem! Maine epuni a luelue, pine laka, maine jë thaa ijiji epuni kö troa eatrëne la 70 lao hawa hna amekötine kowe la itre pionie lapa, hnauëne laka, thaa pane pionie ka ixatua kö nyipunie ngöne la treu eiperem, me thele troa eatrëne thupene la 70 lao hawa? E öhne nyipunie laka, atreine hi nyipunie kuca lai, the hmitre kö troa canga hane xome la huliwa ne pionie lapa—Wange ju la itus, Notre ministère, götrane 113-14.
7 Loi e Tro Së a Itretre Catre Tro fë La Maca Ka Loi: Ame koi së asë itretre cainöj, tui itre pionie mina fe, tro la ihnimi së koi Akötresie, me kowe la itre atr ka lapa easenyi së, a upi së troa pexeje la hne së hna atreine kuca kowe la huliwa i Iehova, thenge la ka ijije koi së isa ala caas. (Luka 10:27) Easë mina fe hane amamane laka, “eësha huliwa, me cat, ke hne shë hna mejiune koi Akötesie ka shewengönie, lo Ate amelene la nöjei ate asëjëihë, nge sisitia kö angete lapaun. (1 Tim. 4:10) Celë hi kepine matre kola ithuecatre koi së isa ala caas, troa hane xome la huliwa ne la Baselaia, matre ame ngöne la treu eiperem, troa weje la 100 koi 100 la ka pionie.
8 Thaa tro pi kö së a thëthëhmine la ithuecatre i Iesu, hna hape: “Atraqate la meledrai, nge xalaithe hi la angete troa menue. Celë hi mate xëwejë nyipunie kowe la Joxu ne la meledrai, mate upepi la angete troa menue kowe la meledrai i anganyidë. Ame ju fe kö la thupene Iesu a qaja lai, hnei nyidrëti hna icasikeune la 12 lao aposetolo i nyidrë me upi angatre troa cainöj. (Mat. 9:37, 38; 10:1, 5, 7) Thupene hë la caa macatre, hna inine hnyawa ha la ala 12 troa cainöj, haawe hnei Iesu fe hna “iëne la ite xa ate ala köniate nge luepi, me upi angat, me hamë angatre mina fe lo itre ini ka caas, kola hape: “Atraqate la meledrai . . . qa ngöne lai thithijë nyipunie kowe la Joxu ne la meledrai, mate tro nyidëti a upe la angete troa huliwane la meledrai i nyidë.” (Luka 10:1, 2) Kola qaja amamane hnene la tusi Ite Huliwa, la aqane kapa Iehova la itre thithi cili. Ame hë ngöne la Penetekos 33 M.K., hna elë la etrune la itretre dreng, matre 120 hë angatr. Haawe, elë trootro ju pë hë, uti hë la traqa koi 3000, me 5000 la etrun. (Ite Huliwa 1:15; 2:41; 4:4) Thupene lai, “alanyimu hë la angete deng. (Ite Huliwa 6:7) Ketre tune mina fe ngöne la hneijine së, easë a sipone kowe la maseta, matre troa tru catre pala hi hnei ka troa cainöjëne la Baselaia! Thenge la itre thithi së, loi e troa amekötine hnyawa hnene la nöjei ka cainöje asë e hnine la itre ekalesia, la itre ijine troa cainöj, ngöne la nöjei treu.
9 Pane goeëne ju lo lai treu eiperem ngöne la Calendrier 2000 Pine laka, ame lue pane drai ne la treu, ke mecixeni me sabath, hapeu, ijije kö tro epuni a hane hnëkë troa hane cainöje ngöne la lue drai cili, me canga nyiqaane xejë la huliwa ngöne la treu? Ijije kö tro së a hane sine la nöjei “Drai Ne Tro Fë Zonal ngöne la treu, memine la itre atrene la Ini Tusi së? Nge tune kaa matre kuca pala hi hne së e nöjei sabath, la caasi maine nyimu hawa ne cainöj? Ijije kö tro së a hane cainöje ngöne la itre xaa hej? Nge thaa tro pi kö së a nue la itre ijine troa cainöje ngöne la hna huliwa së, me hna ini, maine ngöne la easë a kuca la ketre huliwa pena ngöne la drai. Nyihatrene jë la itre drai hne së hna mekune troa xome troa cainöj, nge wange ju la aqane troa eköthe itre eje hnine la calendrier së.
10 Ame la treu eiperem, celë hi ketre ijine ka ijije kowe la nöjei atrene la ekalesia ka ijije troa cainöj, troa kepe angatre hnene la itre qatre thup, matre tro fe angatre hane nyiqaane troa xome la huliwa cili, ngacama thaa itre hna bapataisone petre kö. Maine easë a ini tusi kowe la ketre atr, hapeu, ka kökötre hnyawa kö angeice ngöne la atrehmekun, ene pe ijiji angeice fe hë troa hane sipone la qatre thup perezida, matre troa hane cainöjëne la maca ka loi? Maine hetre nekö së hna thaa bapataisone petre kö, hapeu, hne së kö hna hane ce ithahnatane memine la itre qatre thup, la aqane kökötre i angatre ngöne la götrane la ua? Hapeu, thaa celë kö la ijine ka ijije la, tro angatre a hane nyiqaane cainöj?—Wange ju la itus, Notre ministère, götrane 97-100.
11 Ame ngöne la aja së troa catre huliwa ngöne la treu eiperem 2000, nyipi ewekë tro asë hi së a cainöje trootro, me hamëne la rapore së ngöne la pune treu. (Wange ju la Mareko 6:30.) Loi e troa hamë ixatua kowe la itre ka xötrei cainöj, ngöne la aqane troa cinyihane trongëne ngöne lo porogarame la itre hawa hnei angatre hna kuca ngöne la hna cainöje trootro. Maine tro së a hane catre cainöj, haawe, tro fe hë së a hane hamëne la hne së hna atreine kowe la rapore ne treu eiperem, nge kolo mina fe a atrunyi Iehova jëne la trenge catre hne së hna kuca ngöne la huliwa i Nyidrë.
12 Ihë Jë Troa Hane Sine La Drai Ne Amekunën: Hapeu, tro kö a sisitria la madrine ngöne la easë a öhne la aqane elëne la etrune la itre atr ka sine la Drai ne Amekunëne la meci Keriso, macatre 2000? Eje hi! kolo lai a hape, ala nyimu la itre atr ka troa traqa troa hane amamane la ihnimi angatre koi Iehova Akötresie me Keriso, qa ngöne la ewekë hnei nyidroti hna kuca thatraqai angatr! (Ioane 3:16; 15:13) Loi e troa canga hnëkë hnyawa, matre thaa tro kö a thungi jë së me hnepe lapa së, troa hane sine la Drai ne Amekunën.
13 Ijine hi la troa nyiqaane hëne la itre xaa atr troa hane sine la Drai ne Amekunën. E wengëne jë me cinyihane la ëjene la itre atr hne së hna mekune troa hën. Maine troa könëne lo itre ka ini tusi hë ekö, memine lo itre ka etid enehila, me itre hne së hna wange pala hi. Hane ju fe e la itre hne së hna atre ngöne la hna huliwa, me hna ini, me itre ka lapa easenyi së, me itre ka ce huliwa me easë. The thëthëhmine kö troa hane amë fe la ëje ne la itre hne së hna atre, me itre sinee së. Thupene la hna kuca la liste cili, haawe, nyiqane hë angatre jë hë isa ala caas. Loi e thaa tro kö a jole e troa ahnithe la hmekune la hna atrune la Drai ne Amekunën memine la drai me hawa. Pine laka, easenyi hë la 19 eiprem, loi e troa amekunëne hmaca la itre atr, maine jëne telefone maine isa wai angatre isa ala caasi pena koi angatr. Sipone jë troa ce tro me angatre ngöne la heji cili.
14 tune la hna amekötine hnei sasaiatri kowe lo iwahutine la itre qatre thup, haawe, loi e troa pane catre thuecatre fe hnei angatre kowe lo itre trejine asë ka nanazije ngöne la teritoare së, matre troa hane sine la Drai ne Amekunën. (Mat. 18:12-14) Tro hmaca la itre qatre thupe a goeëne lo tusi Sasaiatri, hna kapa lo 2 febuare 1999. Tro la seketere a kuca la ketre liste ne la itre trejine asë ka nanazij, me thupene lai, tro la qatre thupe ka thupëne la huliwa ne cainöj, a isa ahnithi angatre kowe la itre qatre thupe ka troa wai angatr, me hë angatre troa hane sine la Drai ne amekunën. Maine jë ame ngöne la kola kapa hnene la itre trejine cili la itre thuecatre qaathene la itre qatre thup, haawe, tro hmaca jë fe hë angatre a hane nyiqane xome la huliwa ne cainöj, a ngöne mina fe la treu eiperem. Ka loi fe koi angatr, e tro la ketre trejine ka macaje a ce cainöje trootro me angatr.
15 Ithuecatre Jë Troa Cainöje e Eiperem! Loi e troa ce huliwa hnene la itre qatre thupe asë, me itre drikona, me itre hene hnepe lapa, matre troa sisitria la hna cainöje e eiperem 2000. Tro hë la itre qatre thupe a elemekene hnyawa la huliwa ne cainöj. (Heb. 13:7) Nyipi ewekë troa hnëkëne hnyawa la itre nyine troa kuca, göne la itre icasikeu thatraqane la huliwa ne cainöj, ngöne la wiik, me göi itre mecixeni me sabath. Tro mina fe a hane wange matre troa icasikeu göi cainöj, maine e hnaipajöhej, me e hejihej. Loi e troa afedrene ngöne la uma ne Baselaia la porogarame ka qatrenge la nöjei ewekë hna hnëkëne göi eiperem. Nyipi ewekë fe troa canga iëne la itre ka troa xomiujine la itre icasikeu göi cainöj. Loi e tro mina fe a hnëkëne ijije la teritoar, matre troa munë kowe la itre ka troa cainöj.
16 Ame ngöne la treu eiperem, troa tro fë la itre zonal, La Tour de Garde me Réveillez-vous! Troa thele troa inine la Tusi Hmitrötre memine la itre atr asë ka kepe së, jëne lo boroshüre, Thele. Qa ngöne lai, nyipi ewekë troa hetrenyi the së la nyimu zonal, me boroshür.
17 Ame hë ngöne la pune la treu, tro la itretre xomiujine fe la itre Ini Tus, me itre drikona a thele troa xatuane la itre atrene la gurupe i angatr, troa canga hamëne la rapore ne hna cainöje e pune treu. Maine jë troa nyiqane hleme ngöne la sabath 30 eiperem. Thupene lai, maine ngöne la kola e hnene la seketere la etrune la itre rapor, nge angeice a öhne laka, hetre ka thaa hamëne pala kö, haawe, tro angeice a amekunë angatre troa canga nyialiene itre eje qëmekene e 6 mei, ke angeice a troa iupi fë la itre rapore ngöne la drai cili koi sasaiatri. Atreine hi tro fe angeice a wange la itre ka xomiujine la itre Ini Tus, matre troa ixatua me thuemacane la itre trejin.
18 Ketre hnepe ijine ka nyipi ewekë catre ngöne la macatre, la treu hmekune la Drai ne Amekunën, kowe la itretre nyihlue i Akötresie. Loi e troa ketre ijine easë asë a troa catre kuca la huliwa i Akötresie. Troa traqa kowe lai, e hne së isa ala caasi hna isa thele la aqane tro sa hane cainöjëne la maca ka loi, nge itre ka saene troa pionie ka ixatua a thele troa eatrëne la mekune i angatr, nge hne së mina fe hna thele troa trothenge la itre xaa atr, me ce tro me easë troa atrune la Drai ne Amekunëne la meci Keriso. Catre pi së troa sipone koi Iehova troa amanathithine la huliwa së, nge easë fe a thele troa sisitria la hne së hna kuca ngöne la treu eiperem 2000, matre nyine atrune me amadrinë Akötresie!—Heb. 13:15.
[Hna eköhagen götran 3]
Pionie Ka Ixatua
Hna Elë La Etrune La Itre Pionie:
Kaledonia: 259
(Maac 1997)
Tas: 59
(Maac 1997)
Walis & Futuna: 10
(Maac 1997)
[Hna eköhagen götran 4]
Etrune La Itretre Cainöj
Hna Elë La Etrune La Itretre Cainöj:
Kaledonia: 1688
(Ogas 1998)
Tas: 280
(Ogas 1997)
Walis & Futuna: 46
(Eiperem 1999)
[Hna eköhagen götran 5]
Itre Ka Sine La Drai Ne Amekunën
Hna Elë La Etrun:
Kaledonia: 4398 (1997)
Tas: 1583 (1997)
Wallis & Futuna: 197 (1999)